CHIIYO 35

Mbutukonzya Kusala Kabotu

LIZYA

Toonse kuli zintu nzitusala. Zintu zyiingi nzitusala zilakonzya kutujatikizya swebo abweenzuma mbutulaabo aJehova. Muchikozyano, tulakonzya kulisalila kwakukkala, mbutunoojana mali yakusanina mpuli naakuti kusala kukwata naakuti kukwatwa. Kuti twasala kabotu, tulabotelwa mubuumi alubo tulabotezya Jehova.

1. Kujana Bbayibbele lyakugwasya biyeni kuti usale kabotu?

Kutanasala zyakuchita, komba kuli Jehova kuti akugwasye alubo bala Bbayibbele kuti ubone kuti Jehova uzibona biyeni nzuyanda kusala. (Bala Tusimpi 2:3-6.) Chimwi chiindi, Jehova utupa milawu ilaantanganana. Muchiimo chili boobo, tweelede kuswiilila milawu yaJehova.

Weelede kuchitaanzi kuti muBbayibbele kakutakwe milawu ilaantanganana? Jehova uuyookuzulwida “munzila moyelede kweendela.” (Isaya 48:17) Kujana wakuzulwida biyeni? Ulakonzya kujana malayilile aakonzya kukugwasya. Malayilile aamuBbayibbele nkasimpe katondeezya Leza mbayeeya ambalimvwa. Tulakonzya kubona Jehova mbayibona imwi nkani kuti twabala Bbayibbele. Kuti twaziba kuti Jehova uyibona biyeni imwi nkani tulasala munzila iimubotezya.

2. Niinzi nzitweelede kuyeeya katutanasala?

Bbayibbele lyaamba kuti, muntu “uucenjede ulakkala ansi kuyeeya ntaamu zyakwe.” (Tusimpi 14:15) Eezi zyaamba kuti katutanasala, tweelede kulipa chiindi chakuyeeyesesya atala anzituyanda kusala. Chiindi nuyanda kusala chimwi chintu, weelede kulibuzya kuti: ‘Ngaali malayilile aamuBbayibbele ngindeelede kubelesya? Nzindiyanda kusala zilapa kuti ndibe aaluumuno lwamumizeezo na? Nzindiyanda kusala zilapa kuti bamwi bamvwe biyeni? Kwiinda zyoonse, zilapa kuti Jehova abotelwe na?’—Deuteronomo 32:29.

Jehova nguwe ulaacheelelo chakutubuzya zintu zilikabotu azitali kabotu. Kuti twaziba milawu amalayilile aaLeza mpawo twabeleka changuzu kuti twaatobelezye nga tulikuyiisya moyo wesu. Moyo ulikwaambwa aawa chaamba buntu bwamukati busiyanisya chibotu achibi. (Baroma 2:14, 15) Moyo uuyiisidwe kabotu ulakonzya kutugwasya kuti tusale munzila iilikabotu.

YIYA ZYIINGI

Bona kuti malayilile aamuBbayibbele amoyo wesu zitugwasya biyeni kuti tusale kabotu.

3. Zulwidwa aaBbayibbele

Malayilile aamuBbayibbele nga alakugwasya biyeni kuti usale kabotu? Mweebele VIDIYO, mpawo musandule mibuzyo iitobela.

VIDIYO: Zulwidwa aaMalayilile aamuBbayibbele (5:54)

Lwaangunuko lwakulisalila niinzi?
Nkamboonzi Jehova naakatupa lwaangunuko lwakulisalila?
Jehova utupedeenzi chitugwasya kuti tulubelesye kabotu lwaangunuko lwakulisalila?

Kuti ubone amwi malayilile aamuBbayibbele, bala Baefeso 5:15, 16. Mpawo ubone kuti nga ‘ulacibelesya biyeni ciindi ncojisi’ munzila iilikabotu kuti . . .

ukkale kubala Bbayibbele.
ube muzyali naakuti mwana uulikabotu.
unjile miswaangano.

4. Liyiisye kusala kabotu

Kulakonzya kutuubila kusala kabotu kuti kakuli mulawu ulaantanganana. Ani kuti kakutakwe mulawu ulantanganana ke? Mweebele VIDIYO, mpawo musandule mubuzyo uutobela.

VIDIYO: “Amuzumanane Kuba Amanjezyeezya Mabotu” (5:13)

Muvidiyo eeyi, muchizi ooyu wakachitaanzi kuti ayiisye moyo wakwe kuti asale munzila iibotezya Jehova?

Nkamboonzi nituteelede kukumbila bamwi kuti batusalile zintu nzitweelede kulisalila? Bala Bahebrayo 5:14, mpawo musandule mibuzyo iitobela:

Nikuba kuti tulakonzya kubuzya bamwi kuti batugwasye kusala, niinzi nzitweelede kuchita?
Niinzi chikonzya kukugwasya kuti uyiisye moyo wako akuti usale kabotu?

Myoyo yesu ili mbuli mepu, itutondeezya zintu nzitweelede kusala

5. Lemeka myoyo yabamwi

Akaambo kakuti tulisiyene, zintu nzitusala anzizyo zilisiyene. Kujana twatondeezya biyeni kuti tulayilemeka myoyo yabamwi? Atubone zyiimo zitobela:

Chiimo 1: Atuteedi muchizi uuyandisya kulinonoola walongela kuliimwi mbungano muli bachizi balebwa kuti babona muntu uulinonoola.

Bala Baroma 15:1 a 1 Bakorinto 10:23, 24, mpawo musandule mibuzyo iitobela:

Kweendelana amavesi aaya, muchizi wakeelede kusala biyeni? Niinzi nzukonzya kuchita kuti kuli awumwi muntu ukonzya kulebwa akaambo kachintu chiyandwa amoyo wako?

Chiimo 2: Umwi mukwesu ulizi kuti Bbayibbele talikasyi pe kunywa bukande kutakolwi pesi wasala kutanywa. Atuteedi watambwa kuli limwi pobwe mpawo wabona bakwesu kabalikunywa bukande.

Bala Mukambausi 7:16 a Baroma 14:1, 10, mpawo musandule mibuzyo iitobela:

Kweendelana amavesi aaya, mukwesu weelede kusala kuchitanzi? Niinzi nzukonzya kuchita kuti wabona umwi muntu kakuchita zintu zikonzya kukulebya?

Niinzi zikonzya kukugwasya kuti usale kabotu?

1. Kumbila Jehova kuti akugwasye kuti usale kabotu.—Jakobo 1:5.

2. Yanduulisisya muBbayibbele amumabbuku aapandulula Bbayibbele kuti ujane malayilile aakonzya kukugwasya. Alubo ulakonzya kukumbila kugwasigwa amaKristu basimide mubukombi.