TAKGALHTAWAKGA 35
¿La tlan liwana nalaksakaw tuku natlawayaw?
Kimputumkan wi tuku kililaksakatkan kkilatamatkan. Lhuwa tuku laksakaw natlawa pi tlan o nitlan nakinkakitaxtuniyan chu nachuna natlawa pi tlan o nialh tlan natalalinaw Jehová. Akgtum liʼakxilhtit, max nalaksakaw niku natawilayaw, tuku naliskujaw chu komo natamakgaxtokgaw o ni. Komo liwana nalaksakaw tuku natlawayaw napaxuwayaw chu namakgapaxuwayaw Jehová.
1. ¿La namakgtayayan Biblia liwana nalaksaka tuku natlawaya?
Akxni nina laksaka tuku natlawaya, kaskini xtamakgtay Jehová chu kaputsa kBiblia tuku lakpuwan xlakata tuku pimpat tlawaya (kalikgalhtawakga Proverbios 2:3-6). Namin kilhtamaku naʼakxilha pi Jehová liwana kinkawaniyan tuku kilitlawatkan. Akxni chuna la, tlan nakitaxtuniyan komo nakgalhakgaxpata.
Pero ¿tuku la komo kBiblia ni min akgtum limapakgsin nema nawaniyan tuku militlawat? Maski chuna, Jehová napulalinan «ktiji niku militlawanat» (Isaías 48:17). Xla nalipulalinan xtastakyaw, uma tastakyaw nakinkamakgtayayan naʼakgatekgsaw tuku lakapastaka Jehová chu tuku makgkatsi. Min kilhtamaku, akxni likgalhtawakgayaw tuku lichuwinan Biblia, katsiyaw tuku lakpuwan Jehová xlakata tuku max tlawaputunaw. Akxni akgatekgsaw uma, laksakaw tuku xla lakgati.
2. ¿Tuku kuenta kilitlawatkan akxni nina laksakaw tuku natlawayaw?
Biblia wan pi «tiku skgalala liwana lakapastaka tuku natlawa» (Proverbios 14:15). Uma wamputun pi akxni nina laksakaw tuku natlawayaw liwana nalilakpuwanaw. Akxni nina laksaka tuku pimpat tlawaya, kalilakpuwanti umakgolh takgalhskinin: «¿Tuku tastakyaw xalak Biblia nakimakgtaya? ¿Nakimakgtaya tuku naklaksaka tlan natawila kintalakapastakni? ¿Nakamakgstuntlawa amakgapitsin tuku naklaksaka? Chu tuku tlakg xlakaskinka, ¿namakgapaxuwa Jehová?» (Deuteronomio 32:29).
Dios lakgchan nakinkawaniyan tuku tlan chu tuku nitlan. Akxni liwana lakgapasaw xlimapakgsin, xtastakyaw chu xatapaxuwan kgalhakgaxmataw, kinkamakgtayayan nakgalhiyaw tlan talakapastakni. Talakapastakni wa tuku kinkamakatsiniyan tuku tlan chu tuku nitlan (Romanos 2:14, 15). Komo liwana nastakyawayaw kintalakapastaknikan, nakinkamakgtayayan liwana nalaksakaw tuku natlawayaw.
TLAKG KALAKPUTSANANIW
Kaʼakxilhwi pi tastakyaw xalak Biblia chu talakapastakni lu xlakaskinka akxni wi tuku nalaksakaw natlawayaw.
3. Kamasta talakaskin kapulalin Biblia
¿La nakinkapulalinan xtastakyaw Biblia akxni wi tuku nalaksakaw natlawayaw? Kaʼakxilhtit VIDEO chu kalichuwinantit uma:
-
¿Tuku kinkamaxkinitan talakaskin Jehová natlawayaw?
-
¿Tuku xlakata Jehová kinkamaxkiyan talakaskin kiʼakstukan nalaksakaw tuku natlawayaw?
-
¿Tuku kinkamaxkinitan Dios nema nakinkamakgtayayan liwana nalaksakaw tuku natlawayaw?
Kalikgalhtawakgatit Efesios 5:15, 16 xlakata naʼakxilhatit akgtum tastakyaw xalak Biblia. Alistalh kalichuwinantit la liwana namaklakaskinaw kinkilhtamakujkan xlakata...
-
... nalikgalhtawakgayaw Biblia chali chali.
-
... naliskujaw tlakg tlan natlatni, kamanan, chixku o puskat nawanaw.
-
... naʼanaw ktamakxtumit xalak congregación.
4. Kastakyawa mintalakapastakni xlakata liwana nalaksaka tuku natlawaya
Akxni tekgsaw akgtum limapakgsin xalak Biblia tlakg ni tuwa makgkatsiyaw nalaksakaw tuku xatlan. Pero ¿tuku natlawayaw komo ni anan akgtum limapakgsin? Kaʼakxilhtit VIDEO chu kalichuwinantit uma:
-
Chuna la akxilhwi kvideo, ¿tuku tlawalh tala puskat xlakata kstakyawalh xtalakapastakni chu xlaksakli tuku makgapaxuwa Jehová?
¿Tuku xlakata niti naskiniyaw pi wi tuku kalaksakli kimpalakatakan? Kalikgalhtawakgatit Hebreos 5:14 chu kalichuwinantit uma:
-
Maski tlakg ni tuwa kitaxtu wi tiku nakinkawaniyan tuku natlawayaw, ¿tuku xlakata talakaskin pi chatunu akinin nakatsiyaw tuku xatlan?
-
¿Tuku tamakgtay kgalhiyaw xlakata nastakyawayaw kintalakapastaknikan chu nalaksakaw tuku tlan?
Kintalakapastaknikan xtachuna la maktum mapa nema kinkamakgtayayan nakatsiyaw niku naʼanaw
5. Kamaxki kakni xtalakapastaknikan amakgapitsin
Xlakata ni lakxtum akinin, tanu tanu tuku laksakaw. ¿La tlan nalimasiyayaw pi maxkiyaw kakni xtalakapastaknikan amakgapitsin? Kalichuwinaw akgtiy liʼakxilhtit.
Pulaktum: Chatum tala puskat tiku lakgati talakgamani o talakgatsokga tsuku an kʼakgtum congregación niku natalan lakpuskatin nitlan akxilhkgo talakgamanikan.
Kalikgalhtawakgatit Romanos 15:1 chu 1 Corintios 10:23, 24 chu kalichuwinantit uma:
-
Chuna la wan umakgolh textos, ¿tuku tlan xlaksakli natlawa tala puskat? Chu wix, ¿tuku xtlawa komo chatum lataman ni maxki talakaskin xtalakapastakni natlawa tuku wix tlawaya?
Pulaktiy: Chatum tala katsi pi Biblia ni liwan nawakan kuchu komo ni namalakatsalikan, pero xla laksaka ni naway. Akgtum kilhtamaku wanikan pi kaʼalh katawayan makgapitsi natalan chu kaʼakxilha pi natalan wamakgo kuchu.
Kalikgalhtawakgatit Eclesiastés 7:16 chu Romanos 14:1, 10 chu kalichuwinantit uma:
-
Chuna la wan umakgolh texto, ¿tuku tlan xlaksakli natlawa uma tala? Chu wix, ¿tuku natlawaya komo naʼakxilha pi achatum tlawa tuku mintalakapastakni ni maxkiyan talakaskin natlawaya?
¿Tuku namakgtayayan nalaksaka tuku tlan?
1. Kaskini Jehová pi kamakgtayan nalaksaka tuku natlawaya (Santiago 1:5).
2. Kaputsa kBiblia chu kkilikgalhtawakgakan nema anta takilhtinit xlakata natekgsa makgapitsi tastakyaw nema namakgtayayan. Na tlan nakakgalhskina natalan tiku tliwakga kgalhikgo xtakanajlakan.
3. Kalilakpuwanti pi tuku nalaksaka natlawa pi tlan o nitlan natawila mintalakapastakni chu xtalakapastaknikan amakgapitsin.
MAKGAPITSIN WANKGO: «Wix lakgchanan nalaksaka tuku tlawaputuna. ¡Ni kuenta katlawa tuku lakapastakkgo amakgapitsin!».
-
¿Tuku xlakata kuenta kilitlawatkan tuku makgkatsi Dios chu tuku makgkatsikgo amakgapitsi latamanin?
TUKU KATSINIW
Liwana laksakaw tuku natlawayaw akxni katsiyaw tuku lakpuwan Jehová chu akxni kuenta tlawayaw xtalakapastaknikan amakgapitsin.
¿Tuku xkgalhtinanti?
-
¿La tlan nalaksaka tuku makgapaxuwa Jehová?
-
¿Tuku militlawat xlakata nastakyawaya mintalakapastakni?
-
¿Tuku tlan natlawaya xlakata nalimasiyaya pi maxkiya kakni xtalakapastaknikan amakgapitsin?
TLAKG KAKATSINI
¿Tuku namakgtayayan xlakata akxni wi tuku nalaksaka namatliwakglha la talalipina Dios?
«Kalimalankiw Dios tuku lakapastakaw natlawayaw» (Makatsinina, 15 xla abril kata 2011)
Tlakg kakatsi la kinkastakyawayan Jehová.
Kaʼakxilhti tuku makgtayalh chatum chixku liwana xlaksakli tuku xʼama tlawa.
Kaʼakxilhti la namakgapaxuwayaw Jehová asta maski akxni xla ni liwana kinkawaniyan tuku kilitlawatkan.
«¿Putum kilhtamaku talakaskin akgtum limapakgsin?» (Makatsinina, 1 xla diciembre kata 2003)
You May Also Like
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
