DYONDZO 35
Hi Nga Swi Endla Njhani Swiboho Leswinene?
Hinkwerhu hi fanele hi teka swiboho evuton’wini. Swo tala swa swiboho sweswo swi nga hi khumba hi ndlela leyikulu, swi tlhela swi khumba ni vunghana bya hina na Yehovha. Hi xikombiso, swi nga ha lava hi hlawula leswaku hi ta tshama kwihi, hi ta tirha ntirho wa njhani kumbe hi ta lava ku nghenela vukati kumbe hi nga byi ngheneli. Loko hi endla swiboho leswinene, hi ta tsaka hi tlhela hi tsakisa Yehovha.
1. Yi nga ku pfuna njhani Bibele leswaku u endla swiboho leswinene?
Loko u nga si endla xiboho, khongela eka Yehovha u kombela leswaku a ku pfuna u tlhela u kambisisa leswaku u ri yini hi mhaka yoleyo eBibeleni. (Hlaya Swivuriso 2:3-6.) Eka timhaka tin’wana Yehovha u hi byela hi ku kongoma leswi hi faneleke hi swi endla. Loko swi ri tano, xiboho lexinene lexi munhu a faneleke a xi endla i ku yingisa leswi a hi byelaka swona.
Ku vuriwa yini loko Bibele yi nga swi boxanga hi ku kongoma leswi u faneleke u swi endla? Ni le ka xiyimo xexo, Yehovha u ta ku kongomisa “endleleni leyi u faneleke u famba hi yona.” (Esaya 48:17) U ta swi endla njhani sweswo? Ku nga ha va ni misinya ya milawu leyi nga ku kongomisaka. Misinya ya milawu ya Bibele, i ntiyiso lowu hlamuselaka ndlela leyi Xikwembu xi ehleketaka ha yona ni ku titwa ha yona. Mikarhi yo tala hi dyondza ndlela leyi Xikwembu xi titwaka ha yona hi mhaka yo karhi loko hi hlaya rungula ro karhi eBibeleni. Loko hi tiva ndlela leyi Yehovha a titwaka ha yona, hi ta kota ku endla swiboho leswi n’wi tsakisaka.
2. U fanele u ehleketisisa hi yini loko u nga si teka xiboho?
Bibele yi ri: “Lowo tlhariha u anakanyisisa hi leswi a nga ta swi endla.” (Swivuriso 14:15) Leswi swi vula leswaku loko hi nga si endla xiboho, hi fanele hi rhanga hi ehleketisisa hi leswi hi lavaka ku swi endla. Loko u ri karhi u ehleketisisa hi leswi u lavaka ku swi endla, tivutise: ‘I misinya ya milawu yihi ya Bibele leyi tirhaka eka mhaka leyi? Eka leswi ndzi nga ta swi hlawula hi swihi leswi nga ta ndzi nyika ku rhula? Xiboho xa mina xi ta va khumba njhani van’wana? Kasi xa nkoka swinene, xana xi ta n’wi tsakisa Yehovha?’—Deteronoma 32:29.
Yehovha u ni mfanelo yo hi byela leswi nga swinene ni leswi nga riki swinene. Loko hi ya hi tiva milawu ni misinya ya milawu ya yena ni ku tiyimisela ku hanya hi yona, hi letela mapfalo ya hina. Ripfalo i nchumu lowu hi byelaka loko nchumu wo karhi wu ri wunene kumbe wu nga ri wunene. (Varhoma 2:14, 15) Ripfalo leri leteriweke kahle ri ta hi pfuna ku endla swiboho leswinene.
ANAKANYISISA
Dyondza ndlela leyi misinya ya milawu ya Bibele ni ripfalo swi hi pfunaka ha yona ku endla swiboho.
3. Pfumelela Bibele yi ku kongomisa
Bibele yi nga hi pfuna njhani loko hi endla swiboho? Tlanga VHIDIYO, ivi mi bula hi xivutiso lexi landzelaka.
-
Hi yihi nyiko ya risima leyi Yehovha a hi nyikeke yona?
-
Hikwalaho ka yini Yehovha a hi nyike nyiko leyi?
-
I yini lexi a hi nyikeke xona leswaku hi kota ku endla swiboho leswinene?
Hlaya Vaefesa 5:15, 16 leswaku u vona xikombiso xa nsinya wa nawu wa Bibele. Kutani mi bula hi ndlela leyi u nga wu “tirhisaka ha yona nkarhi wa wena hi ndlela leyinene” leswaku . . .
-
u hlaya Bibele siku ni siku.
-
u va nuna, nsati, mutswari kumbe n’wana lonene.
-
u va kona etinhlengeletanweni ta vandlha.
4. Letela ripfalo ra wena leswaku u kota ku endla swiboho leswinene
Swa olova ku endla xiboho lexinene loko Bibele yi swi boxa hi ku kongoma leswi u faneleke u swi endla. Kambe ku vuriwa yini loko ku nga ri na nawu lowu kongomeke? Tlanga VHIDIYO, ivi mi bula hi xivutiso lexi landzelaka.
-
Eka vhidiyo leyi, i yini leswi makwerhu wa xisati a swi endleke leswaku a letela ripfalo rakwe ni ku endla xiboho lexi nga ta tsakisa Yehovha?
Hikwalaho ka yini hi nga fanelanga hi kombela van’wana va hi endlela swiboho? Hlaya Vaheveru 5:14, ivi mi bula hi swivutiso leswi:
-
Leswi swi olovaka ku kombela van’wana va hi endlela swiboho, i yini leswi hina hi faneleke hi kota ku tihambanisela swona?
-
I yini leswi nga ku pfunaka ku letela ripfalo ra wena ni ku endla swiboho leswinene?
Ku fana ni mepe, ripfalo ra hina ra hi pfuna ku tiva ndlela leyi hi faneleke hi famba ha yona evuton’wini
5. Xixima mapfalo ya van’wana
Vanhu a va endli swiboho swa ku fana. Hi nga ma xixima njhani mapfalo ya van’wana? Ehleketa hi swiyimo swimbirhi leswi landzelaka:
Xiyimo xo sungula: Makwerhu wa xisati loyi a rhandzaka ku tiphoxonga u rhurhela evandlheni leri vamakwerhu vo tala va xisati va khunguvanyekaka loko va vona van’wana va ti phoxongile.
Hlaya Varhoma 15:1 na 1 Vakorinto 10:23, 24, ivi mi bula hi swivutiso leswi:
-
Hi ku ya hi matsalwa lama, makwerhu wa xisati a nga hlawula ku endla yini? A wu ta endla yini loko u ri ni munhu loyi ripfalo rakwe ri n’wi sivelaka ku endla leswi ra wena ri ku pfumelaka ku swi endla?
Xiyimo xa vumbirhi: Makwerhu wa swi tiva leswaku Bibele a yi va siveli vanhu ku nwa byala hi ku ringanisela kambe u hlawula ku nga byi khumbi. U rhambiwile hi vamakwerhu leswaku va ya tiphina ivi a vona vamakwerhu van’wana va nwa byala.
Hlaya Eklesiasta 7:16 na Varhoma 14:1, 10, ivi mi bula hi swivutiso leswi:
-
Hi ku ya hi matsalwa lawa, i yini leswi makwerhu a nga hlawulaka ku swi endla? A wu ta endla yini loko u vona munhu un’wana a endla swilo leswi ripfalo ra wena ri ku sivelaka ku swi endla?
Hi swihi swilo leswi u faneleke u swi endla leswaku u ta kota ku endla swiboho leswinene?
1. Khongela eka Yehovha u n’wi kombela a ku pfuna u tiva xiboho lexi u faneleke u xi teka.—Yakobo 1:5.
2. Endla ndzavisiso eBibeleni ni le ka mikandziyiso leyi sekeriweke eBibeleni leswaku u kuma misinya ya milawu leyi tirhaka eka xiyimo xa wena. U nga tlhela u vulavula ni Vakreste lava nga ni ntokoto.
3. Ehleketisisa hi ndlela leyi xiboho xa wena xi nga ta khumba ripfalo ra wena ni ra van’wana ha yona.
VAN’WANA VA RI: “U ni mfanelo yo endla leswi u swi lavaka. A swi na mhaka leswaku vanhu van’wana va ri yini?”
-
Hikwalaho ka yini hi fanele hi khathala hi ndlela leyi Xikwembu xi titwaka ha yona ku katsa ni ndlela leyi van’wana va titwaka ha yona?
NKATSAKANYO
Hi kota ku endla swiboho leswinene loko hi tiva ndlela leyi Yehovha a titwaka ha yona hi mhaka yo karhi ni loko hi kambisisa loko swiboho swa hina swi ta pfuna van’wana kumbe swi va vavisa.
Mpfuxeto
-
U nga swi endla njhani swiboho leswi tsakisaka Yehovha?
-
U nga ri letela njhani ripfalo ra wena?
-
U nga swi kombisa njhani leswaku wa ma xixima mapfalo ya van’wana?
KUMA LESWI ENGETELEKEKE
U nga swi endla njhani swiboho leswi nga ta tiyisa vunghana bya wena ni Xikwembu?
“Endla Swiboho Leswi Kombisaka Leswaku U Xixima Xikwembu” (Xihondzo xo Rindza, April 15, 2011)
Dyondza ndlela leyi Yehovha a hi tsundzuxaka ha yona.
Twana leswi pfuneke wanuna un’wana ku endla xiboho lexi a xi nga olovi.
Twana leswaku hi nga n’wi tsakisa njhani Yehovha hambiloko a nga vulanga hi ku kongoma leswi hi faneleke hi swi endla emhakeni yo karhi.
“Xana U Lava Nawu Wa Bibele Minkarhi Hinkwayo?” (Xihondzo xo Rindza, December 1, 2003)
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
