MATAUPU 35

Ke Fai a Fakaikuga ‵Lei

FAKATAGI/PEI

E isi ne fakaikuga e fai ne tatou katoa. Kae ko fakaikuga e uke konei e mafai o pokotia i ei tatou mo ‵tou va fakataugasoa mo Ieova. E pelā mo te fakaikuga ki te koga ka ‵nofo tatou i ei, te auala ke maua ei a tupe, io me ke avaga io me ikai. Kafai e ‵lei ‵tou fakaikuga e fai, ka maua ne tatou se olaga fiafia kae fiafia foki a Ieova.

1. E mafai pefea o fesoasoani atu te Tusi Tapu ke fai ne koe a fakaikuga ‵lei?

A koi tuai o fai se fakaikuga, ‵talo ke maua te fesoasoani mai i a Ieova kae sukesuke ki te Tusi Tapu ke maua ne koe tena kilokiloga e uiga ki te mea tenā. (Faitau te Faataoto 2:3-6.) I nisi taimi, e tuku mai ne Ieova se tulafono mautinoa. Tela la, a te ‵toe fakaikuga ‵lei e ‵tau o fai ne koe ko te fakalogo ki te tulafono tenā.

Kae e a māfai e seai se tulafono mautinoa mai te Tusi Tapu e uiga ki te mea e ‵tau o fai ne koe? Ka takitaki eiloa koe ne Ieova ki “te auala e ‵tau o sasale ei koe.” (Isaia 48:17) E pefea la? E mafai o isi ne akoakoga fakavae ke takitaki ei koe. A akoakoga fakavae i te Tusi Tapu ko muna‵tonu fakavae kolā e fakaasi mai i ei a mafaufauga mo lagonaga o te Atua. E masani sāle o iloa ne tatou a lagonaga o te Atua e uiga ki se mea māfai e fai‵tau tatou ki se tala i te Tusi Tapu. Kafai ko iloa ne tatou a lagonaga o Ieova, ko mafai ei o fai ‵tou fakaikuga kolā e fakafiafia ki a ia.

2. Ne a manatu ‵tonu e ‵tau o mafaufau koe ki ei a koi tuai o fai se fakaikuga?

E fai mai te Tusi Tapu: “Te tino atamai e mafaufau ‵loto ki ana kalafaga takitasi.” (Faataoto 14:15) Ko tena uiga, koi tuai o fai ne tatou se fakaikuga, e ‵tau o fakaaoga ne tatou se taimi ke mafau‵fau ki ‵tou filifiliga. I te taimi e iloilo ei ne koe a filifiliga takitasi, ke fesili ifo: ‘Ne a akoakoga fakavae mai te Tusi Tapu ka aoga ki te mea tenei? Se a te filifiliga ka maua ei ne au te filemu o te mafaufau? Ka pokotia pefea a nisi tino i taku fakaikuga? Kae sili atu i ei, e mata, ka fai ei a Ieova ke fiafia?’—Teutelonome 32:29.

E maua ne Ieova a te aiā ke fai mai ne ia a te mea ‵lei mo te mea masei. Kafai ko fakamasani tatou ki ana tulafono mo ana akoakoga fakavae, kae fakaiku aka ke tau‵tali atu ki ei, ko akoako ei ne tatou ‵tou loto lagona. A te loto lagona se lagonaga i loto i a tatou telā e fakaasi mai ei te mea tonu mo te mea ‵se. (Loma 2:14, 15) A te loto lagona telā ne akoako faka‵lei ka fesoasoani mai ke fai ne tatou a fakaikuga ‵lei.

KELI MALOSI IFO

Ke tauloto ki te auala e aoga ei a akoakoga fakavae i te Tusi Tapu mo te loto lagona ki te faiga o fakaikuga.

3. Ke takitaki koe ne te Tusi Tapu

E mafai pefea o takitaki tatou ne akoakoga fakavae i te Tusi Tapu māfai ko fai a fakaikuga? Pei te VITIO, ko sau‵tala ei ki fesili konei.

VITIO: Ke Takitaki Koe ne Akoakoga Fakavae i te Tusi Tapu (5:54)

Se a te saolotoga?
Kaia ne tuku mai ne Ieova ki a tatou a te saolotoga?
Ne a mea ne fakatoka ne ia ke fesoasoani mai ke fakaaoga ne tatou te ‵tou saolotoga i te ‵toe auala ‵lei?

Ke onoono ki se akoakoga fakavae i te Tusi Tapu, faitau te Efeso 5:15, 16. Ko sau‵tala ei ki te auala e mafai o fakaaoga faka‵lei ou “taimi” ke . . .

faitau faeloa ki te Tusi Tapu.
momea aka tou ‵lei pelā me se avaga, se mātua, se tamaliki tagata, io me se tamaliki fafine.
kau ki fakatasiga a te fakapotopotoga.

4. Akoako tou loto lagona ke fai a fakaikuga ‵lei

Kafai e isi se fakatonuga mautinoa mai te Tusi Tapu e uiga ki se mea, ka mafai o faigofie ke lavea atu te filifiliga tonu. Kae e a māfai e seai se fakatonuga mautinoa? Pei te VITIO, ko sau‵tala ei ki te fesili tenei.

VITIO: “Fakatumau se Loto Lagona ‵Ma” (5:13)

I te vitio, ne a mea ne fai ne te tuagane ke akoako ei tena loto lagona kae ke fai se fakaikuga telā e fakafiafia atu ki a Ieova?

Kaia e se ‵tau ei o fesili atu tatou ki nisi tino ke fai a fakaikuga mō tatou? Faitau te Epelu 5:14, ko sau‵tala ei ki fesili konei:

E tiga loa e faigofie ke fesili atu ki nisi tino ke fai ne latou a fakaikuga mō tatou, ne a mea e ‵tau o iloa ne tatou o fakavasega?
Ne a fesoasoani e mafai o fakaaoga ne koe ke akoako ei tou loto lagona kae fai a fakaikuga ‵lei?

E pelā mo te mape, e fesoasoani mai te ‵tou loto lagona ke fakaiku aka a mea e ‵tau o fai i te olaga

5. Ke āva ki loto lagona o nisi tino

E kese‵kese a fakaikuga ka fai ne tino kese‵kese. E fakaasi atu pefea ne tatou te āva ki loto lagona o nisi tino? Mafaufau ki tulaga e lua konei:

Tulaga 1: Ko fanatu se tuagane telā e fiafia o fakaaoga a mea vali laugutu mo fulumata ki se fakapotopotoga telā e se fia‵fia a tuagane e tokouke ki vaegā mea penā .

Faitau te Loma 15:1 mo te 1 Kolinito 10:23, 24, ko sau‵tala ei ki fesili konei:

E ‵tusa mo tusi fai‵tau konei, se a te mea kāti ka fakaiku aka ne te tuagane tenā? Ne a au mea ka fai māfai e ‵nofo tasi koe mo se tino telā e se talia ne tena loto lagona ke fai ne ia se mea telā e talia ne tou loto lagona?

Tulaga 2: E iloa ne se taina me e se taku fakamasei i te Tusi Tapu a te fakaaogaga ‵tau o meainu ma‵losi, kae e fakaiku ne ia ke se fakaaoga eiloa ne ia. Ne ‵kami a ia ki se maopoopoga kae lavea ne ia a taina i ei e fakaaoga a meainu ma‵losi.

Faitau te Failauga 7:16 mo te Loma 14:1, 10, ko sau‵tala ei ki fesili konei:

E ‵tusa mo tusi fai‵tau konei, se a te mea kāti ka fakaiku aka ne te taina tenā? Ne a au me ka fai māfai e lavea ne koe se tino e fai ne ia se mea telā e se talia ne tou loto lagona?

Ne a mea e ‵tau o fai ke iku atu ki fakaikuga ‵lei?

1. Akai ki a Ieova ke fesoasoani atu i te faiga o tau fakaikuga.—Iakopo 1:5.

2. Sukesuke ki te Tusi Tapu mo tusi faka-te-Tusi Tapu ke maua a akoakoga fakavae kolā e mafai o fesoasoani atu. E mafai foki o faipati koe ki nisi Kelisiano ata‵mai.

3. Mafaufau ki auala e mafai ei o pokotia tou loto lagona mo te loto lagona o nisi tino i se fakaikuga.

MEA E FAI MAI NE NISI TINO: “E saoloto koe o fai so se mea e manako koe ki ei. E se tāua a lagonaga mo mafaufauga o nisi tino.”

Kaia e ‵tau ei mo tatou o mafau‵fau ki lagonaga o te Atua, penā foki loa mo nisi tino?

MANATU AOGA

E fai ne tatou a fakaikuga ‵lei māfai ko iloa ne tatou a lagonaga o Ieova e uiga ki se mea kae mafaufau foki me ka fesoasoani io me ka fakalogo‵mae atu ‵tou faifaiga ki nisi tino.