HAAPIIRAA 35
Nafea ia rave i te mau faaotiraa maitai?
E rave rahi faaotiraa ta tatou e rave nei. E nehenehe teie mau faaotiraa e ohipa i nia ia tatou e to tatou auhoaraa e o Iehova. Ei hiˈoraa, e faaoti paha tatou ihea tatou e ora ˈi, nafea ia noaa mai ta tatou moni aore ra no nia i te faaipoiporaa. Ia rave tatou i te mau faaotiraa maitai, e ite tatou i te hoê oraraa oaoa e e faaoaoa tatou ia Iehova.
1. E nafea oe e faaohipa ˈi i te Bibilia no te tauturu ia oe ia rave i te mau faaotiraa maitai?
Hou a rave ai i te hoê faaotiraa, a ani ia Iehova i te tauturu e a hiˈo i te Bibilia no te ite eaha to ˈna manaˈo. (A taio i te Maseli 2:3-6.) I roto i te tahi mau tupuraa, e horoa Iehova i te mau faaueraa taa maitai. Mai te peu tera iho â, o te auraroraa i teie faaueraa te faaotiraa maitai roa ta oe e nehenehe e rave.
Tera râ, mai te peu aita e faaueraa taa maitai o te parau ra ia oe eaha ta oe e rave? E nehenehe Iehova e “aratai ia oe i te eˈa ia haere oe.” (Isaia 48:17) E nafea ïa? E nehenehe paha te mau faaueraa tumu e aratai ia oe. Te mau faaueraa Bibilia, o te parau mau faufaa roa o te faaite ra i te manaˈo e huru aau o te Atua. E pinepine, e haapii tatou i to te Atua manaˈo no te tahi mea, a taio ai tatou i te hoê aamu i roto i te Bibilia. Ia ite tatou i to Iehova manaˈo, e nehenehe tatou e rave i te mau faaotiraa o te faaoaoa ia ˈna.
2. Eaha te titauhia ia oe ia feruri hou a rave ai i te hoê faaotiraa?
Te parau ra te Bibilia: “E haapao maitai . . . te taata feruriraa haroˈaroˈa i to ˈna mau taahiraa tataitahi.” (Maseli 14:15) Te auraa, hou tatou a rave ai i te hoê faaotiraa, e rave tatou i te taime no te feruri no nia i ta tatou mau faaotiraa. A feruri ai oe i te mau ravea tataitahi, a uiui ia oe iho: ‘Eaha te faaueraa Bibilia e faaohipa? Eaha te ravea o te horoa mai i te hau o te feruriraa? E nafea ta ˈu faaotiraa e ohipa ˈi i nia ia vetahi ê? Te mea faufaa atu â, e nafea te reira e faaoaoa ˈi ia Iehova?’—Deuteronomi 32:29.
E tiaraa to Iehova no te parau ia tatou eaha te mea maitai e eaha te mea ino. Ia faaohipa tatou i ta ˈna mau ture e faaueraa tumu e ua faaoti tatou i te pee i te reira, e faaineine tatou i to tatou manaˈo haava. E faaite mai to tatou manaˈo haava eaha te mea maitai e te mea ino. (Roma 2:14, 15) E tauturu mai te hoê manaˈo haava o tei faaineinehia ia rave i te mau faaotiraa maitai.
A FAAHOHONU ATU Â
A haapii e nafea te mau faaueraa Bibilia e to tatou manaˈo haava e tauturu ai ia tatou ia rave i te mau faaotiraa.
3. A vaiiho i te Bibilia ia aratai ia oe
E nafea te mau faaueraa Bibilia e aratai ai ia tatou ia rave i te mau faaotiraa? A pata i te VIDEO, e a aparau i te mau uiraa i muri nei.
-
Eaha te tiaraa e maiti?
-
No te aha Iehova i horoa mai ai i te tiaraa e maiti?
-
Eaha ta ˈna i horoa mai no te tauturu ia tatou ia rave i te mau faaotiraa maitai roa ˈˈe?
No te ite i te hoê hiˈoraa o te hoê faaueraa Bibilia, a taio i te Ephesia 5:15, 16. E a aparau e nafea oe e faaohipa maitai ai i to oe taime no te . . .
-
taio tamau i te Bibilia.
-
riro ei hoa faaipoipo, metua, tamaiti aore ra tamahine maitai.
-
apiti i te mau putuputuraa a te amuiraa.
4. A faaineine i to oe manaˈo haava no te rave i te mau faaotiraa maitai
Mai te peu te vai ra te hoê faaueraa Bibilia taa maitai no nia i te tahi mau uiraa, mea ohie ïa ia rave i te hoê faaotiraa tano. Tera râ, mai te peu aita hoê aˈe faaueraa? A pata i te VIDEO, e a aparau i te uiraa i muri nei.
-
I roto i te video, eaha te mau taahiraa ta te tuahine i rave no te faaineine i to ˈna manaˈo haava e no te rave i te hoê faaotiraa o te faaoaoa ia Iehova?
No te aha eiaha tatou ia ani i te tahi atu taata ia rave i te mau faaotiraa te tia ia tatou iho ia rave? A taio i te Hebera 5:14, e a aparau i teie mau uiraa:
-
Mai te peu mea ohie no tatou i te ani i te tahi taata ia rave i te mau faaotiraa no tatou, eaha te tia ia tatou iho ia ite?
-
Eaha te nehenehe e tauturu ia oe ia faaineine i to oe manaˈo haava e ia rave i te mau faaotiraa maitai?
Mai te hoê hohoˈa fenua, e tauturu mai to tatou manaˈo haava ia faaoti teihea roa tatou i roto i to tatou oraraa
5. A faatura i te manaˈo haava o vetahi
Mea taa ê te mau faaotiraa ta te mau taata tataitahi e rave nei. Nafea tatou e faaite ai i te faatura no te manaˈo haava o vetahi? A hiˈo e piti tupuraa:
Tupuraa 1: Te haere ra te hoê tuahine i roto i te hoê amuiraa, e mea au roa na ˈna e parai i to ˈna mata e e faauteute i to ˈna vaha, i reira e rave rahi tuahine o tei huru ê i to ratou iteraa i te tahi atu i te na reiraraa.
A taio i te Roma 15:1 e te Korinetia 1, 10:23, 24, e a aparau i teie mau uiraa:
-
Ia au i teie mau irava, eaha paha ta teie tuahine e faaoti i te rave? Eaha ta oe e rave mai te peu tei pihaiiho oe i te hoê taata aita to ˈna manaˈo haava e faatia ra ia ˈna ia rave i te mau mea o ta to oe manaˈo haava e farii ra ia rave?
Tupuraa 2: Ua ite te hoê taeae aita te Bibilia e faahapa ra ia inu i te ava ma te tano, ua maiti râ oia i te ore e inu i te reira. Ua titau-manihini-hia oia i te hoê tamaaraa e ua ite oia i te mau taeae e inu ra i te ava.
A taio i te Koheleta 7:16 e te Roma 14:1, 10, e a aparau i teie mau uiraa:
-
Ia au i teie mau irava, eaha paha ta teie taeae e faaoti i te rave? Eaha ta oe e rave ia ite oe i te tahi atu taata e rave ra i te tahi mea ta to oe manaˈo haava e ore e farii ia rave?
Eaha te mau taahiraa no te rave i te mau faaotiraa maitai?
1. A ani ia Iehova i te tauturu no te faaoti eaha te rave.—Iakobo 1:5.
2. A rave i te mau maimiraa i roto i te Bibilia e i roto i te mau papai niuhia i nia i te Bibilia no te ite mai i te mau faaueraa tumu o te nehenehe e faaohipa. A aparau atoa i te mau Kerisetiano paari.
3. A hiˈo eaha te faahopearaa o te faaotiraa ta oe e rave i nia i to oe manaˈo haava e te manaˈo haava o vetahi.
TE MANAˈO O VETAHI: “Nehenehe oe e rave mai ta oe e hinaaro. Eiaha oe e haapao i to vera ma manaˈo.”
-
No te aha ia haapao tatou i te manaˈo o te Atua e te manaˈo o vetahi?
HAAPOTORAA
E rave tatou i te mau faaotiraa maitai ia ite tatou i to Iehova mau manaˈo no nia i te tahi uiraa e ia feruri tatou e tauturu aore ra e haamauiui anei ta tatou mau haaraa ia vetahi.
Haamanaˈoraa
-
E nafea oe e rave ai i te mau faaotiraa o te faaoaoa ia Iehova?
-
E nafea oe e faaineine ai i to oe manaˈo haava?
-
E nafea oe e faaite ai i te faatura i te manaˈo haava o vetahi?
HIˈOPOA
Nafea oe e rave ai i te mau faaotiraa o te haapuai i to oe auhoaraa e te Atua?
“A rave i te mau faaotiraa o te faahanahana i te Atua” (Te Pare Tiairaa 1 no Eperera 2011)
A haapii hau atu â e nafea Iehova e horoa mai ai i te mau aˈoraa.
A haapii eaha tei tauturu i te hoê taata ia rave i te hoê faaotiraa fifi mau.
A haapii hau atu â e nafea ia faaoaoa ia Iehova aita anaˈe oia e horoa mai i te hoê faaueraa taa maitai no nia i ta oe e nehenehe e rave.
“Titau-noa-hia anei te hoê faaueraa Bibilia?” (Tumu parau o Te Pare Tiairaa)
E au atoa outou . . .
UIRAA A TE TAATA
Eaha te ravehia i te hoê haapiiraa Bibilia pûpûhia na te mau Ite no Iehova?
Maoti teie aparauraa Bibilia tamoni ore pûpûhia na te mau Ite no Iehova, nehenehe outou e faaohipa i ta outou iho Bibilia. A titau atoa mai i to outou utuafare aore ra hoa.
