КИЧЭЭЛ 35
Шын шиитпирни канчаар хүлээп алырыл?
Каяа чурттаар, кандыг ажылче кирип алыр, өгленир азы өгленмес дээн ышкаш шиитпирлерни кижи бүрүзү кылыр. Шын шиитпир үндүргеш, аас-кежиктиг болуп, Иегованы өөртүр бис.
1. Шын шиитпир үндүрерде Библия канчаар дузалаар?
Шиитпир үндүрерде Иеговадан мөргүп дилээш, Ооң бодалын билип алыңар. (Номчуптуңар: Чугаалар 2:3—6.) Чамдык айтырыгларга Иегова чүнү кылыр-кылбазын дорт айтып турар. Ындыг таварылгада Бурганның канчаар айытканы ышкаш шиитпирлээр болзувусса эки болур.
Силерни дүвүредип азы сонуургадып турар айтырыгга Библияда дорт харыы чок болза, канчаар? Иегова бисти чоруур ужурлуг оруувусче дүрүмнери таварыштыр башкарып турар (Исайя 48:17). Бурганның дүрүмнери дээрге үндезин алыс шын билиглер. Бир-ле айтырыгга хамаарыштыр Библиядан Иегованың бодалын номчааш, Ооң күзелин билип алыр болзувусса, шын шиитпирлерни хүлээп шыдаар бис.
2. Шиитпир үндүрерде чүнү кичээнгейге алыры чугула?
Бурганның Сөзүнде: «Бодамчалыг кижи базым бүрүзүн ыяк бодап алыр» — дээн (Чугаалар 14:15). Ынчап кээрге, шиитпир хүлээрде далашпас болза эки. «Мээң байдалымга кандыг дүрүм тааржыр? Шиитпиримге таарзынып турар мен бе? Мээң шиитпирим өске кижилерге кандыг салдарлыг болурул? Иегова аңаа таарзынар бе?» деп боданып көрүңер (Ыдыктыг хоойлуну катаптааны 32:29).
Иегова шын, мегени айтыр долу эргелиг. Кажан бис Бурганның дүрүмнерин билип алгаш, аңаа дүүштүр чурттаар болзувусса, арын-нүүрүвүстү өөредип турар бис. Арын-нүүр дээрге шын, мегени айтып турар иштики делегейивис (Римчилерге 2:14, 15). Эки өөреткен арын-нүүр шын шиитпирлер хүлээринге дузалаар.
ХАНЫ ШИНЧИЛЕҢЕР
Бурганның дүрүмнери болгаш арын-нүүрүвүс шиитпир хүлээп алырынга канчаар дузалаарын көрээлиңер.
3. Бурганның дүрүмнери бисти углап-баштап турар
Бурганның дүрүмнери шын шиитпир үндүреринге бисти канчаар углап-баштап турар? ВИДЕОНУ көргеш, айтырыгларга харыылаптыңар.
-
Хостуг эрге дээрге чүл?
-
Иегова биске чүге хостуг эргени берген?
-
Хостуг эргевисти шын кылдыр ажыглаарынга, Иегова биске чүнү берген?
Бир дүрүмнү көрээлиңер. Эфесчилерге 5:15, 16-ны номчааш, үеңерни эң эки кылдыр канчаар эрттирип болурун тайылбырлаңар:
-
Библияны үргүлчү номчуурда;
-
өг-бүледе хүлээлгелерни эки күүседирде;
-
хуралдарже баарда.
4. Арын-нүүрүңерни өөредиңер
Библияда тода айтыышкын бар болза, шын шиитпир хүлээри берге эвес. Силерниң байдалыңарга хамаарыштыр айтыышкын чок болза канчаар? ВИДЕОНУ көргеш, айтырыгга харыылаптыңар.
-
Иегованы өөртүр шиитпир үндүрерде угбавыс арын-нүүрү эки сүмелекчи болзун дээш чүнү кылган?
Бистиң орнувуска шиитпир үндүрер кылдыр өске улусту дилээри чүге шын эвес? Еврейлерге 5:14-тү номчааш, харыылаптыңар:
-
Бистиң орнувуска шиитпир үндүрерин өске улустан дилээр болзувусса, чүнү өөренип ап шыдавас бис?
-
Шын шиитпирлер үндүреринге, арын-нүүрүвүстү өөредиринге чүү дузалаар?
Арын-нүүрүвүс, навигатор ышкаш, чуртталгавыска шиитпир үндүреринге дузалаар
5. Өске улустуң арын-нүүрүн хүндүлеңер
Кижилерниң шиитпирлери аңгы-аңгы болур. Өске улустуң арын-нүүрүн канчаар хүндүлээрил? Ийи байдалды көрээлиңер.
Байдал 1. Бир чыышта угбалар колдуунда косметика ажыглавас, ынаар будуттунарынга ынак угбавыс көжүп келген.
Римчилерге 15:1 биле 1 Коринфичилерге 10:23, 24-тү номчааш, харыылаптыңар:
-
Бо шүлүктерни өөренип көргеш, угбавыс кандыг шиитпирге кээп болур? Өске кижиниң арын-нүүрүнге эпчок, а силерге анаа болза канчаар алдынар силер?
Байдал 2. Арагалыг суксунну өйлүг ижерин Библия хоруваанын акывыс билир-даа болза, ону ишпес деп шиитпирлеп алган. Акывыс шайлаашкынга кээрге, өске акылар араганы ижип турар.
Экклесиаст 7:16 биле Римчилерге 14:1, 10-ну номчааш, харыылаптыңар:
-
Бо шүлүктерни өөренип көргеш, акывыс кандыг шиитпир хүлээп болур? Арын-нүүрүңерге эпчок чүүл өске кижиге анаа болза, канчаар силер?
Канчаар эки шиитпир үндүрер?
1. Шиитпир үндүрерде дузаны Иеговадан дилеңер (Иаков 1:5).
2. Байдалыңарга тааржыр дүрүмнерни Библиядан, ном-дептеривистен дилеп көрүңер. Дуржулгалыг христианнар-биле база сүмележип болур.
3. Шиитпириңер арын-нүүрүңерге азы өске улустуң арын-нүүрүнге кандыг салдарлыг болурун боданыңар.
ЧАМДЫК УЛУС МЫНЧА ДЕП БОЛУР: «Чүнү-даа кылыры — сээң эргең-дир. Өске улустуң бодалы херекчок»
-
Бурганның база өске кижилерниң сеткилин бодаары чүге чугула?
КОЛ БОДАЛ
Шын шиитпир үндүрерде Иегованың бодалын билип ап, алдынып турарывыс өске улуска кандыг салдарлыын боданыры чугула.
Катаптаашкын
-
Иегованы өөртүр шиитпирлерни канчаар үндүрер?
-
Арын-нүүрнү канчаар өөредирил?
-
Өске улустуң арын-нүүрүнге хүндүткелди канчаар көргүзүп болур силер?
НЕМЕЛДЕ
Иегова-биле найыралыңарны быжыглаар шиитпирлерни канчаар хүлээр силер?
«Бурганны алдаржыдар шиитпирлерни хүлээңер» («Таңныыл суургазы» апрель 15, 2011 чыл)
Иегова бистиң чуртталгавысты канчаар башкарып турар?
Аныяк эр кижиге берге шиитпир үндүреринге чүү дузалаанын көрүңер.
Бижилгеде дорт айтыышкын чок таварылгада Иегованы өөртүр шиитпирни канчаар үндүрерин номчуп көрүңер.
«Сеңээ базым санында айтыышкын херек бе?» («Таңныыл суургазы» декабрь 1, 2003 чыл)
Силерге солун бооп болур
ҮРГҮЛЧҮ САЛЫР АЙТЫРЫГЛАР
Иегованың Херечилериниң библейжи кичээлдери канчаар эртип турар?
Иегованың Херечилеринде Ыдыктыг Бижилге-биле таныжып алырынга дузалаар ажыктыг курс бар. Өөредилге үезинде бодуңарның Библияңарны ажыглап, кичээлдерже өг-бүлеңерни, эштериңерни чалап ап болур силер.
