LEKSYON 35
Kon Paonan-o Maghihimo hin Mag-opay nga Desisyon
Kita ngatanan naghihimo hin mga desisyon. Damu hini nga desisyon an may daku nga epekto ha aton ngan ha aton pakigsangkay kan Jehova. Pananglitan, bangin kinahanglan magdesisyon kita kon diin maukoy, kon paonan-o susuportaran ha pinansyal an aton kalugaringon, o kon mag-aasawa o diri. Kon naghihimo kita hin mag-opay nga desisyon, magkakaada kita malipayon nga kinabuhi ngan mapapalipay naton hi Jehova.
1. Paonan-o mo magagamit an Biblia basi mabuligan ka nga maghimo hin mag-opay nga desisyon?
Antes maghimo hin desisyon, pag-ampo kan Jehova para hin bulig ngan usisaha an Biblia basi mahibaroan an iya panhunahuna. (Basaha an Proberbios 2:3-6.) Ha pipira nga kahimtang, hi Jehova naghahatag hin klaro nga sugo. Ha sugad nga mga kahimtang, an pagsugot hito amo an pinakamaopay nga desisyon nga imo mahihimo.
Ano man kon waray klaro nga sugo an Biblia kon ano an imo bubuhaton? Hi Jehova maggigiya gihapon ha imo “ha dalan nga sadang mo laktan.” (Isaias 48:17) Paonan-o? Bangin may mga prinsipyo nga makakaggiya ha imo. An mga prinsipyo ha Biblia mga basihan nga kamatuoran nga nagsusumat han panhunahuna ngan inaabat han Dios. Kasagaran na nga nahibabaroan naton an inaabat han Dios mahitungod han usa nga butang kon nagbabasa kita hin asoy ha Biblia. Kon nasasabtan naton an inaabat ni Jehova, makakahimo kita hin mga desisyon nga makakapalipay ha iya.
2. Ano an angay mo hunahunaon antes maghimo hin desisyon?
An Biblia nasiring: “An maaramon nga tawo naghuhunahuna hin maopay han iya tagsa nga pitad.” (Proberbios 14:15) Karuyag sidngon nga antes kita maghimo hin desisyon, kinahanglan naton hunahunaon an aton mga opsyon. Samtang imo gintuturotimbang an tagsa nga opsyon, pakianhi an imo kalugaringon: ‘Ano nga mga prinsipyo ha Biblia an makakabulig ha akon? Hain hini nga opsyon an makakahatag ha akon hin murayaw nga hunahuna? Paonan-o makakaapekto ha iba an akon mga desisyon? Labaw ha ngatanan, makakapalipay ba ito kan Jehova?’—Deuteronomio 32:29.
Hi Jehova may katungod ha pagsumat ha aton kon ano an maopay ngan kon ano an maraot. Kon nasasabtan naton hin maopay an iya mga balaud ngan prinsipyo ngan determinado kita nga sundon ito, ginbabansay naton an aton konsensya. An konsensya amo an aton kapasidad ha pag-abat kon ano an husto ngan sayop. (Roma 2:14, 15) An binansay nga konsensya makakabulig ha aton ha paghimo hin mag-opay nga desisyon.
DUGANG NGA USISAHA
Hibaroi hin dugang kon paonan-o an mga prinsipyo ha Biblia ngan an aton konsensya mabulig ha aton ha paghimo hin mga desisyon.
3. Pagpagiya ha Biblia
Paonan-o an mga prinsipyo ha Biblia maggigiya ha aton ha paghimo hin mga desisyon? I-play an VIDEO, katapos, hisguti niyo an masunod nga mga pakiana.
-
Ano an kagawasan ha pagbuot?
-
Kay ano nga gintagan kita ni Jehova hin kagawasan ha pagbuot?
-
Ano an iya igintagana nga makakabulig ha aton basi magamit naton an aton kagawasan ha pagbuot ha pinakamaopay nga paagi?
Basi makita an usa nga ehemplo hin prinsipyo ha Biblia, basaha an Efeso 5:15, 16. Katapos, hisguti niyo kon paonan-o ‘magagamit ha pinakamaopay nga paagi an aton panahon’ ha . . .
-
regular nga pagbasa ha Biblia.
-
pagin mas maopay nga bana, asawa, kag-anak, o anak.
-
pag-atender ha mga katirok ha kongregasyon.
4. Bansaya an imo konsensya basi makahimo hin mag-opay nga desisyon
Kon may-ada klaro nga sugo ha Kasuratan mahitungod han usa nga butang, bangin masayon la an paghimo hin husto nga desisyon. Pero ano man kon waray klaro nga sugo? I-play an VIDEO, katapos, hisguti niyo an masunod nga pakiana.
-
Ha video, ano an ginhimo han sister basi bansayon an iya konsensya ngan maghimo hin desisyon nga makakapalipay kan Jehova?
Kay ano nga diri angayan nga an iba an magdesisyon para ha aton? Basaha an Hebreo 5:14, katapos, hisguti niyo ini nga mga pakiana:
-
Bisan kon bangin mas masayon kon an iba an magdidesisyon para ha aton, ano an importante nga makilala naton mismo?
-
Ano an makakabulig ha imo basi mabansay mo an imo konsensya ngan makahimo hin mag-opay nga desisyon?
Sugad hin mapa, an aton konsensya nabulig ha aton ha paghimo hin mga desisyon ha aton kinabuhi
5. Respetoha an konsensya han iba
An tagsa nga tawo iba-iba an desisyon ha usa nga butang. Paonan-o naton maipapakita nga ginrirespeto naton an konsensya han iba? Hisgotan naton an duha nga sitwasyon:
Sitwasyon 1: Usa nga sister nga mahilig mag-make-up an binalhin ha usa nga kongregasyon diin damu nga sister an nalalainan pagkita ha naka-make-up.
Basaha an Roma 15:1 ngan 1 Corinto 10:23, 24, katapos, hisguti niyo ini nga mga pakiana:
-
Basado hini nga mga teksto, ano an puydi nga magin desisyon han sister? Ano an imo hihimoon kon may-ada ka kaupod nga diri kaya han iya konsensya an usa nga butang nga igintutugot han imo konsensya?
Sitwasyon 2: Usa nga brother an maaram nga an Biblia diri nasiring nga sayop an pag-inom hin makahurubog nga irimnon, pero nagdesisyon hiya nga diri uminom. Gin-imbitar hiya ha usa nga pagturotarampo diin nakita niya an mga brother nga nainom hin makahurubog nga irimnon.
Basaha an Eclesiastes 7:16 ngan Roma 14:1, 10, katapos, hisguti niyo ini nga mga pakiana:
-
Basado hini nga mga teksto, ano an puydi nga magin desisyon han brother? Ano an imo hihimoon kon may nakikita ka nga nagbubuhat hin usa nga butang nga diri igintutugot han imo konsensya?
Ano nga mga pitad an makakabulig basi makahimo hin mag-opay nga desisyon?
1. Pag-ampo kan Jehova nga buligan ka pagdesisyon kon ano an bubuhaton.—Santiago 1:5.
2. Pamiling ha Biblia ngan ha mga publikasyon nga basado ha Biblia hin mga prinsipyo nga aplikado ha imo kahimtang. Puydi ka liwat makiistorya ha eksperyensyado nga mga Kristiano.
3. Hunahunaa an magigin epekto hito nga desisyon ha imo konsensya ngan ha konsensya han iba.
AN IBA NASIRING: “Ikaw an magbubuot kon ano an imo karuyag buhaton. Diri importante kon ano an ginhuhunahuna han iba.”
-
Kay ano nga angay naton ikonsiderar an inaabat han Dios pati na an inaabat han iba?
SUMARYO
Makakahimo kita hin mag-opay nga desisyon kon nasasabtan naton an inaabat ni Jehova mahitungod han usa nga butang ngan ginhuhunahuna naton kon an aton ba mga ginbubuhat makakabulig ha iba o makakadaot.
Repaso
-
Paonan-o ka makakahimo hin mga desisyon nga makakapalipay kan Jehova?
-
Paonan-o mo babansayon an imo konsensya?
-
Paonan-o mo maipapakita nga ginrirespeto mo an konsensya han iba?
DUGANG NGA IMPORMASYON
Paonan-o ka makakahimo hin mga desisyon nga magpaparig-on han imo pakigsangkay ha Dios?
“Paghimo hin mga Desisyon nga Nagpapasidungog ha Dios” (An Barantayan, Abril 15, 2011)
Hibaroi hin dugang kon paonan-o hi Jehova naghahatag ha aton hin sagdon.
Kitaa kon ano an nakabulig ha usa nga lalaki ha paghimo hin makuri nga desisyon.
Hibaroi hin dugang kon paonan-o mapapalipay hi Jehova bisan ha mga butang nga waray hiya klaro nga sugo.
“Pirme Ka ba Nagkikinahanglan hin Balaud ha Biblia?” (An Barantayan, Disyembre 1, 2003)
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
