ROMNHORÉ 35

E marĩ te dza wapawaptob dzaꞌra wa te pitsutu wẽ dzaꞌra da wahöimanadzém na.

RURUꞌU

Wa norĩ hã, aihĩni wa natsi pitsutu dzaꞌra ni wahöimanadzém na. Wanhimipitsutudzém norĩ ãté te dza wama rowẽ wadzere dzaꞌra, niwamhã te dza wawi roꞌwaꞌrutu dzaꞌra Jeová ãma watsiwaihuꞌudzém na. Ãma ĩtsimiré, wa dza pitsutu dzaꞌra ni daro ꞌre ĩwahöimana dzaꞌra mono dzéb da hã, romhuri na watsiꞌmadöꞌö waihuꞌu petse dzaꞌra da niwamhã datsina damrodzém na. Wa te pitsutu wẽ dzaꞌra wamhã, wama rowẽ dzaꞌra di duré Jeová ma wa dza tãma rowẽ wadzere dzaꞌra ni.

1. E niha Ropotoꞌwai mreme te dza aipawapto pitsutu wẽ da.

Marĩ pitsutu wana ré, rowaptẽrẽ Jeová nhimipawaptobdzéb dzô. Taha parimhã, tsô airĩtĩ Ĩmreme ꞌremhã ĩtsimirotsaꞌrata dzô taha ãma. (Tsõré na Provérbios 2:3-6.) Nimahã na hã, te dza ĩꞌmadö Jeová nhimiroti tsõꞌawi. Ãne wamhã, pitsutu wẽ da te dza ĩtsadawa dzama. Bété tsõꞌawi Bíblia ꞌremhã te te höiꞌré õ wamhã ĩtsimiroti ĩꞌmanharĩdzéb da hã.

Tane nherẽ, Jeová ‘bödödi ĩwẽ na te dza ãma aima te te ꞌre rowatsuꞌu, nimomo ꞌre ĩꞌane mono da hã. Te dza te te ꞌre atsaprõni uꞌötsi.’ (Salmo 32:8) E niha. Bíblia nhimirowahutu nhimidzaprõni hawi. Bíblia nhimirowahutu nhimidzaprõni norĩ rowahudu ĩpire norĩ te te ĩhöiꞌré dzaꞌra Ropotoꞌwa nhimirotsaꞌrada marĩ norĩ na hã. Ropotoꞌwa nhimirotsaꞌrada wa natsi waihuꞌu dzaꞌra ni, Ĩmreme hã Bíblia hã, wa te ꞌre tsõré dzaꞌra mono wamhã. Jeová nhimirotsaꞌrada wa te tsadaihuꞌu petse dzaꞌra wamhã, tsada hã wa te tãma rowẽ dzaꞌra da wanhimipitsutudzém norĩ na.

2. E marĩ na te dza ĩrotsaꞌra marĩ pitsutu wana ré.

Ropotoꞌwai mreme te tinha: ‘Ĩtsimidzaꞌretse norĩ hã te tsitsõwamhã te te ꞌre robꞌmadöꞌö wẽ dzaꞌra.’ (Provérbios 14:15) Taha dzarina, marĩ pitsutu wana ré, wa dza atãma na rotsaꞌrata dzaꞌra ni wa te ꞌre ĩꞌapitsutu dzaꞌra mono da ãma hã. ꞌRöwi atsitsadanharĩ: ‘E ma hã Bíblia nhimirowahutu nhimidzaprõni taha na te ãma tihöiba. E mahã ĩ̱nhimipitsutudzéb dzarina ĩ̱ma rowẽ di dza. E ĩ̱nhimipitsutudzém na wa dza dawi ꞌwaꞌrutu. Danhipai u hã, e taha na Jeová ma wa dza tãma rowẽ dzani.’ — Provérbios 27:12.

Jeová ma ĩꞌrudzahi te tãma ꞌre höimana te te pitsutu da e marĩ ĩwẽ duré e marĩ ĩwatsédé. Ĩtsimiroti duré ĩtsimirowahudu wa te tsadaihuꞌu petse dzaꞌra wamhã wa te tsadawa dzamarĩ dzaꞌra tsina, watsitsãmridzém na wa dza petse wẽ dzaꞌra ni. E marĩ datsitsãmridzé. Waꞌreb dzaꞌra ꞌre ĩhöimana mono marĩ wa te ãma ꞌre ĩwaihuꞌu dzaꞌra mono da hã marĩ ĩbö dzô duré marĩ ĩꞌupa dzô. (Romanos 2:14, 15) Watsitsãmridzé wẽ wamhã wa dza pitsutu wẽ dzaꞌra ni.

WAIHUꞌU DURÉ

Te dza ĩꞌmadö e niha Bíblia nhimirowahutu nhimidzaprõni norĩ duré watsitsãmridzé te dza wapawaptob dzaꞌra wa te pitsutu wẽ dzaꞌra da.

3. Tsadawa dzamarĩ Bíblia nhimirowahutu nhimidzaprõni

E niha Bíblia nhimirowahutu nhimidzaprõni norĩ te dza wapawaptob dzaꞌra wa te pitsutu dzaꞌra da wamhã. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ norĩ ãma piꞌrebamhã.

ĨROPODO: Tsadawa dzamarĩ Bíblia nhimirowahutu nhimidzaprõni norĩ (5:54)

E marĩ datsima ĩwẽ pitsudu.
E marĩ wa Jeová te tsaꞌré watsima ĩwẽ dzarina wa te pitsutu dzaꞌra da.
E marĩ Jeová te wama tsõmri dzaꞌra watsima ĩwẽ dzarina wa te pitsutu wẽ dzaꞌra da.

Bíblia nhimirowahutu nhimidzaprõni ꞌmadöꞌö da, atsiré tsõré aba Provérbios 21:5. Taha parimhã atsima robdzanhamri aba e niha ‘te dza atsima ĩrowaꞌõ’ atsibödö uprotsi wẽ da . . .

Ropotoꞌwai mreme bötö tsidöpötsi natsi tsõré da.
damro, damama niwamhã daꞌra ĩwẽ na aihöimana da.
datsiꞌrãꞌõtõ norĩ natsi ꞌmadöꞌö da.

4. Atsitsanho na atsitsãmridzém na pitsutu wẽ da

Ropotoꞌwai mreme tsõꞌawi marĩ na te te roti wamhã tsadaihuꞌu wapu di ĩꞌmanharĩdzéb da hã. Tsõꞌawi te te roti õ wamhã bété. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã.

ĨROPODO: “Atsitsãmri wẽ na ꞌre anomro mono” (5:13)

Ĩropoto na, e marĩ wahidiba ma ꞌmanha titsitsãmridzém na tsitsanho da Jeová ma te te tãma rowẽ da.

E marĩ wa, wa te dawi waptẽrẽ dzaꞌra õ di dza waꞌupana da te pitsutu dzaꞌra da. Atsiré tsõré aba Hebreus 5:14. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

Wapu di wa te dawi waptẽrẽ dzaꞌra da waꞌupana da te pitsutu dzaꞌra da. Tadzahã e marĩ dzô watsiꞌuihö na wa dza pibu dzaꞌra ni.
E marĩ ĩré hã te te aipawaptob da atsitsãmridzém na atsitsanho da duré pitsutu wẽ da.

ꞌRi ahö nhibödödi poto ré ne watsitsãmridzé hã te wapawaptob dzaꞌra wahöimanadzém na watsitsaprõni dzaꞌra da

5. Wadzé na ĩhöiba amo norĩ tsitsãmridzé

Dahöiba mono bö aimawi na te rotsaꞌrata dzaꞌra ni. Taha wa, aimawi na te duré pitsutu dzaꞌra ni. E niha wa dza höiꞌré dzaꞌra ni wa te ĩwadzéb dzaꞌra na hã ĩhöiba amo norĩ tsitsãmridzé. ꞌMadöꞌö maparane romhöimanadzé:

Romhöimanadzé 1: Ãma rotsaꞌrata: dahidiba nimahã datsiꞌudzadzém na tsiꞌudza dze ti. Tawamhã datsiꞌrãꞌõtõdzé aimawi u te dza watobro tame tsãmra uꞌötsi da. Tadzahã, tamemhã dahidiba norĩ hã te rotsaꞌrata dzaꞌra ĩtsiꞌudzadzé hã ĩböiꞌõ na.

Atsiré tsõré aba Romanos 15:1 duré 1 Coríntios 10:23, 24. Taha parimhã atsima robdzanhamri aba ãhã dadzadanharĩ ãma piꞌrebamhã:

Ãhã romnhihötö norĩ dzarina, e marĩ ãté ãhã dahidiba te dza tsima pitsutu. Ãma rotsaꞌrata niꞌwai me ĩꞌaihöimana na. Ĩtsimirotsaꞌrata dzarina, marĩ ĩꞌmanharĩ da hã ĩböiꞌõ. Tadzahã atsimirotsaꞌrata dzarina marĩ ĩꞌmanharĩ da hã ĩbö. E marĩ a hã te dza ĩꞌmanha ãne wamhã.

Romhöimanadzé 2: Ãma rotsaꞌrata: watsitsãnawãi ma waihuꞌu petse di Bíblia te te dawi ĩtsawi õ na hã ödzé hötsi ãma tsipa ãna. Tadzahã te tsima pitsutu ödzé te te hötsi tõ da. Tawamhã datsitsãnawã norĩ te dza tsô tihörö dzaꞌra datsaihuridzéb da hã. Tamemhã te dza ꞌmadö nimahã datsitsãnawã norĩ ödzé te te ĩꞌöhuri na hã.

Atsiré tsõré aba Provérbios 3:7 duré Romanos 14:1, 10. Taha parimhã atsima robdzanhamri aba ãhã dadzadanharĩ ãma piꞌrebamhã:

Ãhã romnhihötö norĩ dzarina, e marĩ ãhã watsitsãnawã ãté te dza pitsutu. E marĩ bété a hã te dza ĩꞌmanha ꞌmadöꞌö wamhã niꞌwa marĩ te te ĩꞌmanharĩ na hã atsitsãmridzéb dzarina aima ĩböiꞌõ hã.

E niha te dza ĩpitsutu wẽ.

1. Rowaptẽrẽ Jeová wi te te aipawaptob da pitsutu wẽ da. — Tiago 1:5.

2. Tsô airĩtĩ rowahutu nhimidzaprõni norĩ dzô Bíblia ꞌremhã duré wanhimiromnhorédzéb ꞌremhã. Te dza duré ĩrobdzanha niꞌwa Cristo dzadawa dzamarĩꞌwa ĩtsimidzadze prédu ma.

3. Ãma rotsaꞌrata e niha atsimipitsutudzé te dza rétsi atsitsãmridzé duré ĩhöiba amo norĩ tsitsãmridzé.

NIꞌWAM NORĨ TE NHARĨ DZAꞌRA ÃNE: “Aihöimana atsima ĩwẽ dzarina. Marĩ õ di danhimirotsaꞌrada.”

E marĩ wa, wa dza rotsaꞌrata dzaꞌra ni Ropotoꞌwa nhimirotsaꞌrata na duré danhimirotsaꞌrata na marĩ wa te pitsutu dzaꞌra wana ré.

ĨWAIHUꞌUDZÉ HÃ

Wa te pitsutu wẽ dzaꞌra da, wa dza waihuꞌu dzaꞌra ni Jeová nhimirotsaꞌrada marĩ na duré e niha wanhimipitsutudzé te dza dapawapto niwamhã te dza dawi roꞌwaꞌrutu.