LESON 35
Akory Hangalan̈a Fanapahankevitry Tsara?
Atsika jiaby io samy mila manapakevitry. Maro amizio misy vokany amintsika tompiny ndreky amy fihavan̈antsika amy Jehovah. Ohatra izioty, manapakevitry atsika hipetraka aia, ino asa hatao, avio hanambady sa tsy hanambady. Izikoa tsara fanapahankevitry alaintsika, ho sambatra atsika sady hamparavoravo Jehovah.
1. Akory mety hampiasanao Baiboly baka ho tsara fanapahankevitry raisinao?
Alohany anao hanapakevitry, mivavaha amy Jehovah mangataka izy han̈ampy, avio tadiava amy Baiboly ao akory hevitrinany momba raha io. (Vakia Ohabolana 2:3-6.) Karaha ataony amy raha sasany, mazava tsara raha irahiny Jehovah hataonao. Ke izikoa zen̈y ny raha misy, anao mila man̈araka raha volan̈iny Jehovah izikoa fa hanapakevitry.
Fa karakory fo basy izikoa tsy koran̈iny Baiboly mivantan̈a raha tokony hataonao? Jehovah mbala hitariky anao amy ‘lalan̈a tokony himboanao fo.’ (Isaia 48:17) Akory han̈anovany zen̈y? Misy toro lalan̈a maro ao afaka man̈ampy anao. Toro lalan̈a zen̈y, fahamarin̈ana fototro man̈ambara hevitriny Jehovah ndreky raha tsapany. Matetiky atsika mamaky tantaranolo amy Baiboly in̈y, ahitantsika raha tsapany Jehovah momba raha araiky. Izikoa atsika mahay man̈avaka raha tsapany Jehovah, hangala fanapahankevitry mamparavoravo izy atsika.
2. Ino aby raha mila zahavantsika, alohany atsika hanapakevitry?
Baiboly mivolan̈a: “Olo misy jery mandiniky dianany tsiaraikiaraiky.” (Ohabolana 14:15) Dikanizen̈y, alohany atsika hanapakevitry, mila mangala fotoan̈a antsendriky atsika mandiniky ino aby safidy mety hataontsika. Isaka anao mandiniky araiky amindro io, man̈ontania ten̈a: ‘Ino toro lalan̈a Baiboly mikasiky izio? Aia amindro io mety hampilamin̈y sain̈inaka? Ino vokatrany fanapahankevitrinaka ty aminolo hafa? Fa ny farany maventy, hamparavoravo Jehovah ma fanapahankevitrinaka ty?’—Deoteronomia 32:29.
Jehovah manan̈a fahifan̈a han̈ambara amintsika raha tsara ndreky ratsy. Mampiofan̈a eritreritrintsika atsika koa mianatra tsarabe lalàn̈anany ndreky tapakevitry han̈araka iro io. Eritreritry io fahaizan̈a an̈atintsika ao han̈avaka raha mety ndreky tsy mety. (Romanina 2:14, 15) Han̈ampy atsika hangala fanapahankevitry tsara eritreritrintsika io, izikoa izio avoaofan̈a tsara.
ALEVA ONON̈O
Diniha nan̈ino toro lalan̈a Baiboly ndreky eritreritrintsika io han̈ampy atsika hangala fanapahankevitry tsara.
3. Ataova pitariky anao Baiboly io
Akory hataony Baiboly io han̈ampy atsika hanapakevitry? Alifasa VIDEO io, avio iaraha dinihin̈y fan̈ontanian̈a aby ambany io.
-
Ino ma kadô maventy namiany Jehovah atsika?
-
Nan̈ino ma Jehovah nan̈ambela atsika hanapakevitry?
-
Ino raha namiany atsika ke han̈ampy atsika hangala fanapahankevitry tsara?
Ty misy ohatra araiky amy toro lalan̈a Baiboly. Vakia Efesianina 5:15, 16. Iaraha dinihin̈y aminjay akory mety ‘hampiasanao tsarabe fotoan̈anao’ baka anao:
-
hahavita hamaky Baiboly isanandra?
-
hanjary vady tsara, raimandreny tsara, na koa zanaka tsara?
-
hahavita han̈aton̈o fivorian̈a jiaby?
4. Ampiofàn̈a eritreritrinao baka ho tsara fanapahankevitry raisinao
Mety ho mora mangala fanapahankevitry, izikoa Soratra Masin̈y man̈ambara mivantan̈a raha tokony hatao. Fa izikoa tsy karaha zen̈y, akory tokony hatao? Alifasa VIDEO io, avio iaraha dinihin̈y fan̈ontanian̈a ambany io.
-
Tamy video in̈y, ino aby raha nataony ranabavy in̈y nampiofan̈any eritreritrinany, ke nan̈ampy izy nangala fanapahankevitry mamparavoravo Jehovah?
Nan̈ino atsika tsy tokony han̈iraka olo hangala fanapahankevitry amy plasintsika? Vakia Hebreo 5:14, avio iaraha dinihin̈y fan̈ontanian̈a aby ty:
-
Ndray mety ho mora man̈iraka olo hangala fanapahankevitry amy plasintsika, ino raha tokony ho haintsika tompiny man̈avaka izy?
-
Ino raha misy ke afaka han̈ampy anao hampiofan̈a eritreritrinao ndreky han̈ampy anao hangala fanapahankevitry tsara?
Eritreritrintsika io mira sarintany, ke man̈ampy atsika hanapakevitry amy fiain̈ana
5. Hajà eritreritrinolo
Tsy hitovy fanapahankevitrinolo jiaby. Akory han̈aboahantsika fa atsika man̈aja eritreritrinolo? Diniha raha aroe ty:
Raha 1: Misy ranabavy araiky efa zatra man̈amboatra sora nifindra fiangonan̈a. Iro ranabavy amy tany nifindrany io meloko mahita izy.
Vakia Romanina 15:1 ndreky 1 Korintianina 10:23, 24, avio iaraha dinihin̈y fan̈ontanian̈a ty:
-
Ino raha mety hataony ranabavy io, izy koa man̈araka raha koran̈iny andininy aby io? Ino raha tokony hataonao, izikoa misy raha mety aminy eritreritrinao kanefa tsy mety aminy eritreritrinolo?
Raha 2: Misy rahalahy araiky tsy mety migiaka toaka foeky, na Baiboly tsy misakana olo han̈ano zen̈y. Nisy rahalahy nan̈ano fety nikaiky izy, ke misy rahalahy maromaro tao hitany nigiaka toaka.
Vakia Mpitoriteny 7:16 ndreky Romanina 14:1, 10, avio iaraha dinihin̈y fan̈ontanian̈a ty:
-
Ino raha mety hataony rahalahy io, izikoa izy man̈araka raha koran̈iny andininy aby io. Ino raha tokony hataonao, anao koa mahita olo man̈ano raha tsy ikeny eritreritrinao?
Ino aby raha mila hataonao, baka anao hangala fanapahankevitry tsara?
1. Mivavaha amy Jehovah baka izy han̈ampy anao hanapakevitry amy raha tokony hataonao.—Jakoba 1:5.
2. Man̈anova fikarohan̈a amy Baiboly ndreky boky momba Baiboly, baka ho hitanao iro toro lalan̈a mety arehan̈a. Mety man̈ontany Kristianin̈y matotro koa anao.
3. Diniha ino vokatrany fanapahankevitrinao io aminy eritreritrinao ndreky eritreritrinolo.
MISY OLO MIVOLAN̈A: “Anao tompiny desizion. Tsisy idiranolo amy zen̈y.”
-
Nan̈ino atsika tokony handiniky vokatrany fanapahankevitrintsika io amy Jehovah ndreky aminolo?
INO RAHA NIANARANAO TATO?
Man̈ano fanapahankevitry tsara atsika izikoa efa baka nizaha hevitriny Jehovah ndreky nandiniky ino vokatranizio aminolo.
Fan̈ontanian̈a Fameren̈ana
-
Akory hangalanao fanapahankevitry mamparavoravo Jehovah?
-
Akory mety hampiofan̈anao eritreritrinao?
-
Akory han̈aboahanao fa anao man̈aja eritreritrinolo?
ZAHAVA
Akory hangalanao fanapahankevitry mankatsara fihavan̈anao amy Zan̈ahary?
“Mangalà Fanapahankevitry Man̈amia Voninahitry Jehovah” (Tilikambo Fiambesan̈a 15 Avrily 2011)
Diniha karakory ataony Jehovah man̈amia torohevitry atsika.
Zahava ino aby nan̈ampy lelahy ty nanapakevitry tamy raha sarotro.
Diniha akory hatao hamparavoravo Jehovah, koa tsy koran̈iny mivantan̈a raha tokony hatao.
“Lalàn̈a Baka amy Baiboly Fo ma Ilainao?” (Tilikambo Fiambesan̈a 1 Desambra 2003)
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
