ZƐŊ-LƐƐI 35

Berei Kwa Pɔri Mɛni-kpɛtɛɛ Lɛlɛɛ-ŋa Kɛi Lai

ŊƆPÊLE KƐ

Ku kelee kwa mɛni-kpɛtɛɛ-ŋa kɛ. Mɛni-kpɛtɛɛ-ŋai ŋi damaa ɣele a kɛ a nɛlɛɛ kpaa nyɔmɔɔ kumɛni ma da kulaoi-laai a Ziova. Gɔɔŋ-maa ɓa, maa nɛ̃ɛi ku mɛni-kpɛtɛɛ kɛ a pa ɓɛi kwa pai kɛi naai, dii kwa pai gɛi a gɛɛ ku kapa sɔlɔ ɓo, kpaa a kɛ kwa pai tooi tua-laa su. Kwa mɛni-kpɛtɛɛ lɛlɛɛ-ŋa kɛ, a pa a lii-nɛ̃ɛ kukɛ-ɣeniɛi su, e ŋɔnɔ Ziova lii laa.

1. Ya pɔri tii kɛi leŋ a Ŋala-kɔlɔi a gɛɛ I mɛni-kpɛtɛɛ lɛlɛɛ-ŋa kɛ?

I lɛɛ pai mɛni-kpɛtɛɛ ta kɛi, Ziova fɛli kpɔŋ maa mɛni ma, I Ŋala-kɔlɔi lono a gɛɛ I ŋɔkili-ŋa-siai kɔlɔŋ e pilaŋ mɛni-kpɛtɛɛ ti ma. (Tare-woo-ŋa 2:3-6 lono.) Mɛni-kpɛtɛɛ ŋi taŋa su, ya pɔri tɔŋ-ŋa kaai nyii Ziova aa dɛɛ e pilaŋ mai. A kɛ ti, mɛni-kpɛtɛɛ lɛlɛɛi ya pɔri gɛi ɓa I dɔŋ ti mɛi kaa.

Kɛlɛ le ɓe pai kɛi a kɛ tɔŋ ta fe Ŋala-kɔlɔi su nyii mɛnii lɛi ya pɔri gɛi? Ziova a pai nii ‘iteniŋ tɔɔi ɓɛi maa nɛ̃ɛi I li naai.’ (Azaya 48:17) A pere sii kɛɛ leŋ? Ŋala-kɔlɔi ŋɔtɔ̃ya-ŋuŋ-ŋai da pɔri iteniŋ tɔɔi. Ŋala-kɔlɔi ŋɔtɔ̃ya-ŋuŋ-ŋai kaa a mɛni-nuŋ-ŋa nyii a Ɣala ŋɔkili-ŋa-siai lɛi. Tãi tamaa, kwa mɛni pɔlɔ ta lono Ŋala-kɔlɔi su, kwa Ɣala ŋɔkili-ŋa-siai kɔlɔŋ e pilaŋ kumɛni-kpɛtɛɛi ma. Kwa Ziova ŋɔkili-ŋa-siai kɔlɔŋ, kwa pai mɛni-kpɛtɛɛ-ŋa kɛi nyii pai nii laai.

2. Le mɛni-ŋa ɓe maa nɛ̃ɛi I ikili-ŋa sia e pilaŋ ma I lɛɛ pai mɛni-kpɛtɛɛ ta kɛi?

Ŋala-kɔlɔi e mo nyɛɛi: “Tare-nuu a zia-pere maa kpɛɛ.” (Tare-woo-ŋa 14:15) Nyiŋi sukulai ɓa, ku lɛɛ pai mɛni-kpɛtɛɛ kɛi, maa nɛ̃ɛi ku tãi siɣe ku kukili-ŋa sia e pilaŋ bere sii takpɛni-ŋai dia kwa pɔri mɛni-kpɛtɛɛ ŋi kɛi lai. Ya kɛ ikili-ŋa siai, ikpiŋ mare kɛ a mare-kɛɛ-ŋai ŋi: ‘Ŋala-kɔlɔi ŋɔtɔ̃ya-ŋuŋ-ŋai nenɛ ɓe bilaŋɔi mɛnii ŋi ma? Mɛni-kpɛtɛɛ ŋi nenɛ ɓe pai lii-see tɛɛi mbɔ? Le ɓe ŋamɛni-kpɛtɛɛi a pai gɛi a nua takpɛni-ŋa? Mɛni-ŋuŋ ɓa, ŋamɛni-kpɛtɛɛi ŋi a pai Ziova lii laai?’—Dutɛrɔnome 32:29.

Ziova nɔ ɓe maa nɛ̃ɛi e mɛni lɛlɛɛ da mɛni nyɔmɔɔ lɛ kua. Kwa Ɣala ŋɔtɔŋ-ŋai da ŋɔtɔ̃ya-ŋuŋ-ŋai kɔlɔŋ a nɛlɛɛ, ku gbɛtɛ kukili-ŋa a gɛɛ ku di mɛi kaa, gɛ ni kukaa kukili-ŋa-siai ŋa-kɔnii a nɛlɛɛ. Kukili-ŋa-siai ɓe a mɛni lɛlɛɛ da mɛni nyɔmɔɔ lɛ kua. (Lomaŋ 2:14, 15) Kwa kukili-ŋa-siai ŋa-kɔŋ a nɛlɛɛ, a pai kpɔnii kua a gɛɛ ku mɛni-kpɛtɛɛ lɛlɛɛ-ŋa kɛ.

MƐNI TAMAA MAA-KƆRI

Berei kaa Ŋala-kɔlɔi ŋɔtɔ̃ya-ŋuŋ-ŋai da kukili-ŋa-siai da kpɔŋ la kua a gɛɛ ku mɛni-kpɛtɛɛ lɛlɛɛ-ŋa kɛ.

3. Nɛɛ naa Ŋala-kɔlɔi e iteniŋ tɔɔ

Ŋala-kɔlɔi ŋɔtɔ̃ya-ŋuŋ-ŋai da pɔri kuteniŋ tɔɔi leŋ kwa kɛ mɛni-kpɛtɛɛ-ŋa kɛi? VILOI su kaa, gɛ ni ka lono e pilaŋ mare-kɛɛ-ŋai ŋi dia.

VILOI: Nɛɛ Naa Ŋala-kɔlɔi Ŋɔtɔ̃ya-ŋuŋ-ŋai Di Iteniŋ Tɔɔ (5:54)

Ɓɛlɛ-see-sɛŋ mɛni kpanaŋɔɔ kɛɛ leŋ ɓe Ziova aa dɛɛ kupɔ?
Le mɛni ɓe Ziova aa nɛɛ la naa a gɛɛ ku kukpɔɔi mɛni-kpɛtɛɛ kɛ?
Le ɓe aa dɛɛ kupɔ a gɛɛ ku pɔri mɛni-kpɛtɛɛ lɛlɛɛ-ŋa kɛi?

A gɛɛ I Ŋala-kɔlɔi ŋɔtɔ̃ya-ŋuŋ gɔɔŋ-maa kaa, Ifisiɛŋ 5:15, 16 lono. Gɛ ni ka lono e pilaŋ berei ma ya pɔri ‘tii kɛi la a itãi a nɛlɛɛ’ a gɛɛ ikɛ . . .

Ŋala-kɔlɔi lono a tãi kelee.
a tua-laa su nuu lɛlɛɛ, loŋ-kaa-nuu lɛlɛɛ, loŋ surɔŋ kpaa loŋ nɛni lɛlɛɛ.
li goyaŋ-ŋai kelee su.

4. Ikili-ŋa-siai ŋa-kɔŋ a gɛɛ I mɛni-kpɛtɛɛ lɛlɛɛ-ŋa kɛ

Tɔŋ ta a kɛ Ŋala-kɔlɔi su e pilaŋ mɛni-kpɛtɛɛ ta ma, mɛni-kpɛtɛɛ ti kɛi fa kɛ a gbanaŋɔɔ. Kɛɛ le ɓe pai kɛi a kɛ tɔŋ ta fe naai? VILOI su kaa, gɛ ni ka lono e pilaŋ mare-kɛɛ ŋi ma.

VILOI: “Kakili-ŋa-siai E Kɛ A Maa Waa” (5:13)

Viloi su, le mɛni-ŋa ɓe sisɛi e gɛ a gɛɛ e ŋɔkili-ŋa-siai ŋa-kɔŋ, e mɛni-kpɛtɛɛ kɛ nyii Ziova lii laai?

Le mɛni ɓe maa fe nɛ̃ɛ ni la a gɛɛ ku nua mare kɛ di mɛni-kpɛtɛɛ-ŋa kɛ kuɛ nyii maa nɛ̃ɛi kua kpiŋ ku gɛi? Ibulu 5:14 lono, gɛ ni ka lono e pilaŋ mare-kɛɛ-ŋai ŋi dia:

Berei maŋ va kɛ la a gbanaŋɔɔ a gɛɛ ku nua mare kɛ a gɛɛ di mɛni-kpɛtɛɛ kɛ kuɛi, le ɓe maa nɛ̃ɛi kua kpiŋ ku gɔlɔŋ?
Le ɓe naa nyii a pɔri kpɔnii ya a gɛɛ I ikili-ŋa-siai ŋa-kɔŋ, I mɛni-kpɛtɛɛ lɛlɛɛ-ŋa kɛ?

Kukili-ŋa-siai a kuteniŋ tɔɔ kɛ-ɣeniɛ su yɛɛ berei pere-lɛ kɔlɔ a gɛ lai

5. Ɓaa-kɛ-maa tɛɛ nua pɔ dikili-ŋa-siai mɛni ma

Nuu kelee ŋɔmɛni-kpɛtɛɛ kɛ pere kaa a dakpɛni. Kwa pɔri ɓaa-kɛ-maa tɛɛi leŋ nua pɔ dikili-ŋa-siai mɛni ma? Gɔɔŋ-maa feerɛ kaa:

Mɛni-kɔɔŋ-maai 1: Sisɛ ta aa pa korai-toli-kpɔŋ su nyii ŋuŋ moɔɔ wɛli kaa ma. Kɛɛ mɛnii ŋi wɛli fe sisɛ-ŋai damaa ɣele dia korai-toli-kpɔŋ su.

Lomaŋ 15:1 (NWT) da 1 Kɔleŋtiɛŋ 10:23, 24 lono, gɛ ni ka lono e pilaŋ mare-kɛɛ-ŋai ŋi dia:

Yɛɛ berei gaa la ŋala-kɔlɔ-kpua-ŋai ŋi sui, le ɓe sisɛi ti a pɔri gɛi? Le ɓe ya pai gɛi a kɛ ikaa nuu ta kɔlɛ nyii ŋɔkili-ŋa-siai fa nɛɛ naa a gɛɛ e mɛni ta kɛ nyii ikili-ŋa-siai a nɛɛ naa a gɛɛ I gɛi?

Mɛni-kɔɔŋ-maai 2: Bɔlɔ ta e gɔlɔŋ a gɛɛ Ŋala-kɔlɔi fe mo ni a gɛɛ kufe lɔɔ kpele, kɛɛ e gbɛtɛ gili-ŋa a gɛɛ ve pai lɔɔ kelee ta kpelei. Daa doli pele ta ma ɓɛi a bɔlɔ-ŋa kaai naa dikɛ lɔɔ kpele.

Ikilisiati 7:16 da Lomaŋ 14:1, 10 lono, gɛ ni ka lono e pilaŋ mare-kɛɛ-ŋai ŋi dia:

Yɛɛ berei ŋala-kɔlɔ-kpua-ŋai ŋi di mo lai, le ɓe bɔlɔi ti a pɔri gɛi? Le ɓe ya pai gɛi a kɛ ya nuu ta kaa gɛ mɛni ta kɛ nyii ikili-ŋa-siai fa nɛɛ naa a gɛɛ I gɛi?

Le mɛni-ŋa ɓe ya pɔri gɛi a gɛɛ I mɛni-kpɛtɛɛ lɛlɛɛ-ŋa kɛ?

1. Ziova fɛli kpɔŋ maa mɛni ma a gɛɛ I mɛnii kɔlɔŋ maa nɛ̃ɛi I gɛi.—Zĩi 1:5.

2. Mɛni maa-kɔri Ŋala-kɔlɔi da kukɔlɔ-ŋai su a gɛɛ I tɔ̃ya-ŋuŋ-ŋa kɔri nyii bilaŋɔi mɛni-kpɛtɛɛ ti mai. Ya pɔri ŋɔnɔ lonoi Korai-ɓela pɔ nyii-ŋai ditɔɔi kpanaŋɔɔi dɔ̃yai sui.

3. lkili-ŋa sia e pilaŋ mɛnii ma mɛni-kpɛtɛɛ ŋi a pai gɛi a ikili-ŋa-siai da nua takpɛni-ŋa diwɔi.

NUA TAŊA DA MO DIYƐƐI: “Ya pɔri mɛni kelee ta kɛi nyii ya ŋwɛlii. Gbɛɛ ɓe gbaaŋɔɔi nua dikili-ŋa-siai mɛni ma?”

Le mɛni ɓe maa nɛ̃ɛi la ku kukili-ŋa sia e pilaŋ Ɣala ŋɔkili-ŋa-siai ma, da nua takpɛni-ŋa diwɔi?

MƐNI-ŊUŊ-ŊAI YAA MAA-KƆRII

Kwa mɛni-kpɛtɛɛ lɛlɛɛ-ŋa kɛ a kɛ kwa Ziova ŋɔkili-ŋa-siai kɔlɔŋ e pilaŋ mɛnii ti ma, ku kukili-ŋa sia e pilaŋ mɛnii ma kumɛni-kpɛtɛɛi a pai gɛi a nua.

Gili-too-ŋa mare-kɛɛ-ŋai

Ya pɔri mɛni-kpɛtɛɛ-ŋa kɛi leŋ nyii pai Ziova lii laai?
Pere sii kɛɛ leŋ ɓe ya pɔri ikili-ŋa-siai ŋa-kɔni lai?
Ya pɔri ɓaa-kɛ-maa tɛɛi leŋ nua pɔ dikili-ŋa-siai mɛni ma?

Zɛŋ-lɛɛi kpɛɛ folo:

Mɛni-kpɛtɛɛ ŋi kɛ

I kili-ŋa sia e pilaŋ mɛni-kpɛtɛɛ ta ma nyii maa nɛ̃ɛi I gɛ tãi kpua yee mui. Tii kɛ a mɛni-ŋuŋ saaɓai nyii gaa basii ŋi sui: “ Le Mɛni-ŋa Ɓe Ya Pɔri Gɛi A Gɛɛ I Mɛni-kpɛtɛɛ Lɛlɛɛ-ŋa Kɛ?”

Mɛni-kpɛtɛɛ takpɛni:

Your other goal