GURUY NI 35
Rogon ni Ngan Dugliy Ban’en nib Fel’ Rogon
Gad gubin ni bay ban’en nib t’uf ni ngad dugliyed. Boor ko pi n’ey e rayog ni nge yib angin ara wenegan ngodad nge tha’ u thildad Jehovah. Bod nrayog nib t’uf ni ngad dugliyed e gin ngad pared riy, ara rogon ni ngad yognaged e salpiy nib t’uf rodad, ara ngad dugliyed ko ngad uned ko mabgol fa danga’. Nap’an ni gad ra dugliy boch ban’en nib fel’ rogon, ma aram e rayog ni ngad pared ni gad ba felfelan’ mu kud felfelan’naged Jehovah.
1. Uw rogon nrayog ni ngam fanay e Bible ni ngam dugliy ban’en nib fel’ rogon?
U m’on ni ngam dugliy ban’en, mag ning e ayuw ngak Jehovah u daken e meybil mag yaliy e n’en be yog e Bible ya ngam nang rogon laniyan’ Jehovah ko fare n’em. (Mu beeg e Proverbs 2:3-6.) Bay boch ban’en nib tamilang e motochiyel riy ni ke pi’ Jehovah. Faanra arrogon, ma n’en th’abi fel’ ni ga ra dugliy e aram e ngam fol ko fare motochiyel.
Machane uw rogon ni faanra dariy ba motochiyel u Bible ni be yog ngom e n’en ngam rin’ ko fare n’em? Ra aram rogon, maku ra pow’iyem Jehovah ‘ko kanawo’ ni ngam man riy.’ (Isaiah 48:17) Ni uw rogon? Rayog nsana bay boch i kenggin e motochiyel nrayog ni nge pow’iyem. Pi kenggin e motochiyel u Bible e aram boch ban’en nib riyul’ ni be dag ngodad rogon ni ma lemnag Got ban’en. Ba ga’ nnap’an ni gad ra beeg murung’agen ban’en u Bible, ma aram e ngiyal’ ni gad ma nang rogon laniyan’ Got u ban’en. Ma nap’an ni gad ra nang rogon laniyan’ Jehovah, ma aram e rayog ni ngad dugliyed boch ban’en nib m’agan’ ngay.
2. Mang e susun ni ngam rin’ u m’on ni ngam dugliy ban’en?
Be gaar e Bible: “Girdi’ nib tamilangan’ e ri ma fal’eg i yaliy ban’en.” (Proverbs 14:15, BT) Re n’ey e be yip’ fan nu m’on ni ngad dugliyed ban’en, ma susun e ngar da fal’eged i lemnag e pi n’en ni bay nrayog ni ngad mel’eged. Nap’an ni ga be rin’ e re n’ey, mag fithem ni nge lungum: ‘Mang boch i kenggin e motochiyel u Bible ni bay rogon ko re n’ey? Mang e ba fel’ ni nggu rin’? Mang e ra rin’ e n’en nug ra dugliy ngak yugu boch e girdi’? Ma bin th’abi ga’ fan riy e, ra felfelan’ Jehovah ko n’en nug ra dugliy fa danga’?’—Proverbs 27:12.
Bay mat’awun Jehovah ni nge yog ngodad ko mang e ba fel’ ma mang e ba kireb. Nap’an ni gad ra nang e pi motochiyel nge kenggin e motochiyel rok nib fel’ rogon ma gad dugliy u wan’dad ni ngad folgad riy, ma aram e gad be skulnag e nangan’ rodad. Nangan’ rodad e aram e n’en ma yog ngodad ko ba fel’ e n’en kad rin’ed fa ba kireb. (Roma 2:14, 15) Ma faanra kad skulnaged e nangan’ rodad ma ra ayuwegdad ni ngad dugliyed ban’en nib fel’ rogon.
KUM FIL BOCH BAN’EN U MURUNG’AGEN
Mu fil rogon nra ayuwegdad e pi kenggin e motochiyel u Bible nge nangan’ rodad ni ngad dugliyed boch ban’en.
3. Nge pow’iyem e Bible
Uw rogon nrayog ni nge pow’iydad e pi kenggin e motochiyel u Bible u nap’an ni ngad dugliyed ban’en? Mu yaliyew e re VIDEO ney, mi gimew weliy e fulweg ko pi deer ni baaray.
-
Mang e puf rogon?
-
Mang fan ni ke pi’ Jehovah e puf rogon ngodad?
-
Mang e ke pi’ nra ayuwegdad ni ngad fanayed e puf rogon rodad nib fel’ rogon?
Baaray reb i kenggin e motochiyel u Bible. Be gaar e Efesus 5:15, 16 (NW): “Ere um ayuwgad ndab um ngongolgad ni bod e girdi’ nde gonop, machane ngaum ngongolgad ni bod e girdi’ nib gonop, mu um maruwelgad ko tayim romed nib fel’ rogon, ya tiney e rran e ba mo’maw’.” Mu weliyew rogon nrayog ni ngam maruwel ko ‘tayim rom nib fel’ rogon’ ni ngam . . .
-
beeg e Bible ni gubin e rran.
-
mang reb i leengiy ara figirngiy nib manigil, ara reb e gallabthir ara bitir nib manigil.
-
un ko muulung.
4. Mu skulnag e nangan’ rom nge yag nim dugliy ban’en nib fel’ rogon
Faanra ba tamilang e motochiyel ni be yog e Bible u murung’agen ban’en, ma sana ba mom ni ngad dugliyed e n’en nib fel’ ni ngad rin’ed. Machane uw rogon ni faanra dariy e motochiyel riy? Mu yaliyew e re VIDEO ney, mi gimew weliy e fulweg ko re deer ni baaray.
-
Mang boch ban’en ni rin’ fare walag nib pin ya nge yag ni skulnag e nangan’ rok me dugliy ban’en nra m’agan’ Jehovah ngay?
Mang fan nsusun e dab dogned ngak be’ ni nge dugliy ban’en ni fan ngodad? Mu beegew e Hebrews 5:14, mi gimew weliy e fulweg ko gal deer ni baaray:
-
Yugu aram rogon nsana kab mom ni nga dogned ngak be’ ni nge dugliy e n’en ngad rin’ed, machane mang e ba t’uf ni ngad nanged rogon ni ngad rin’ed ni gadad rodad?
-
Mang e kan ngongliy nra ayuwegem ni ngam skulnag e nangan’ rom mag dugliy ban’en nib fel’ rogon?
Nangan’ rodad e bod e map ni ma ayuwegdad ni ngad nanged e gin ngad sorgad ngay
5. Mu tayfan e nangan’ rok yugu boch e girdi’
Ra be’ ma rogon e n’en nra dugliy. Ere uw rogon ni ngad ted fan e nangan’ rok yugu boch e girdi’? Mu lemnag l’agruw ban’en nrayog ni nge buch:
Bin 1: Reb e walag nib pin ni bay ba mit e mad ni baadag ni ma chuw ngay e ke yan nga reb e ulung ni boor e walag nib pin riy ni ma magawon lanin’rad u nap’an ni yad ra guy be’ ni ke chuw ko mad ni aram rogon.
Mu beegew e Roma 15:1 nge 1 Korinth 10:23, 24, mi gimew weliy e fulweg ko gal deer ni baaray:
-
Mang e rayog ni nge dugliy fare walag nib pin ni nge rin’ nrogon nib puluw ko pi thin nu Bible ney? Mang e ga ra rin’ ni faanra gimew bay be’ u taabang ndabi pag e nangan’ rok ni nge rin’ ban’en nra pagem e nangan’ rom ni ngam rin’?
Bin 2: Reb e walag ni pumoon e manang nde togopuluw ko Bible ni ngan unum e alkul, machane ir rok e ke dugliy ndabi unum. Ere nap’an nni pining nga reb e abich me guy boch e walag ni pumoon ni yad be unum e alkul.
Mu beegew e Eklesiastes 7:16 nge Roma 14:1, 10, mi gimew weliy e fulweg ko gal deer ni baaray:
-
Mang e rayog ni nge dugliy fare walag ni pumoon ni nge rin’ nrogon nib puluw ko pi thin nu Bible ney? Mang e ga ra rin’ ni faanra kam guy be’ ni be rin’ ban’en ndabi pagem e nangan’ rom ni ngam rin’?
Mang e ra ayuwegem ni ngam dugliy ban’en nib fel’ rogon?
1. Mog ngak Jehovah ni nge ayuwegem ni ngam dugliy e n’en ngam rin’.—James 1:5.
2. Mu gay murung’agen boch ban’en u Bible nge pi babyor rodad ya nge yag nim pirieg boch i kenggin e motochiyel nrayog ni ngam fanay. Ku rayog ni ngam ning e ayuw ngak boch e Kristiano ni kar ilal gad ko tirok Got ban’en.
3. Mu lemnag rogon e n’en ngam dugliy nge n’en nra rin’ ko nangan’ rom nge nangan’ rok yugu boch e girdi’.
MA GAAR BOCH E GIRDI’: “Bay mat’awum ni ngam rin’ e n’en ga baadag. Dariy rogon e n’en be lemnag e girdi’.”
-
Mang fan nsusun e ngad lemnaged rogon laniyan’ Got nge yugu boch e girdi’?
N’EN KAN FIL
Nap’an ni gad ra lemnag rogon laniyan’ Jehovah u ban’en mu kud lemnaged ko ra ayuweg yugu boch e girdi’ ara magawonnag lanin’rad, ma aram e gad ra dugliy ban’en nib fel’ rogon.
Ngan Sul u Daken
-
Uw rogon ni ngam dugliy boch ban’en nib m’agan’ Jehovah ngay?
-
Uw rogon ni ngam skulnag e nangan’ rom?
-
Uw rogon ni ngam tayfan e nangan’ rok yugu boch e girdi’?
MU GAY MURUNG’AGEN
Uw rogon ni ngam dugliy boch ban’en nra chugurnag e tha’ u thilmew Got?
“Mu Dugliy Boch Ban’en ni Yira Pining e Sorok Riy Ngak Got” (Fare Wulyang ko Damit, April 1, 2011)
Kum fil boch ban’en u murung’agen rogon ni ma fonownagdad Jehovah.
Mu guy e n’en ni ayuweg be’ nib pumoon ni nge dugliy ban’en nib mo’maw’.
Kum fil boch ban’en u murung’agen rogon ni ngad rin’ed e n’en nib m’agan’ Jehovah ngay ni yugu aram rogon ndariy ba motochiyel ni be yog e n’en ngad rin’ed.
“Do You Always Need a Bible Command?” (The Watchtower, December 1, 2003)
