DILONGI 35

Bue wulenda bakila zinzengolo zimboti

WILA MU

Betu boso tueta baka zinzengolo. Zinzengolo zinkaka, banga kuela, tomba kisalu, ayi tomba nzo yoyi wumvuanda, yilenda tunatina mambu maphasi voti mamboti mu luzingu lueto. Zinzengolo zieto, zilenda kutufikika voti kututatula kuidi Yehova.

1. Bue Bibila kieta tusadisila mu diambu di tubaka zinzengolo zimboti?

Tuamina wubaka nzengolo, lomba kuidi Yehova katuadisa ayi sadila Bibila mosi wumona bue keta muena mambu. (Tanga Zingana 2:3-6.) Thangu zinkaka, wulenda mona nsiku wo wuntombana mosi wubaka nzengolo. Ti buawu buididi, mayiluta mboti wutumukina nsiku beni wowo mueni mu Bibila.

A buabu, ti Bibila kikadi tubila bumboti mboti diambu diodi fueti vanga? Yehova wela kutuadisa kaka “mu nzila yoyi wufueti landakana.” (Yesaya 48:17) Bukiedika Bibila kidi na zitsikudukusu zio zilenda kusadisa. Tsikudukusu yi Bibila yidi kiedika kimfunu kioki kimmonisa phila Nzambi keta muena ayi phila keta yindudila. Mu masolo ma Bibila muawu tueta muena mbueno yi Nzambi mu mambu ma mu phila mu phila. Betu zaba mbueno yi Nzambi mu diambu dimosi, tulenda baka nzengolo mu diambu diodi dikunyangidika.

2. Mu mambu mbi wulenda keta yindudila tuamina wubaka nzengolo?

Bibila kitubidi ti: “Mutu widi bunzumbi weta kikenga.” (Zingana 14:15) Yawu yinsundula ti, wufueti keta yindulanga bumboti tuamina baka nzengolo. Mosi wuzaba keni nzengolo beni yilenda kunatina mamboti voti mambu mambimbi, wukiyuvula biuvu biabi: “Zitsikudusu mbi zi Bibila zilenda kutsadisa mu diambu diadi? Ti mbeki nzengolo beni, ndikuiza kitatikisa ko mu mayindu? Nzengolo yoyi ndikuiza baki, bankaka bue bakuiza muena yawu? Mu buela, nzengolo beni yilenda yangidika Yehova?”—5 Mose 32:29.

Yehova niandi widi luve lumonisa batu bazaba ti diambu diadi dimbimbi voti dimboti. Ti tulongukidi zaba minsiku miandi, zitsikudukusu ziandi ayi kuzisadila, buawu matulongila kansasa kieto, yinsundula, mbembo yoyi tukala mu mayindu yo yeta kutusadisa tuzaba diambu dimbimbi ayi dimboti. (Loma 2:14, 15) Kansasa kioki kiyuku sobula mambu mamboti kilenda tusadisa tuvanga mambu mamboti.

TUVISA MBOTI MBOTI

Tuluta tadila mfunu wu zitsikudukusu zi Bibila ayi mfunu wu kansasa mu thangu tutidi baka nzengolo mu diambu dimosi.

3. Bika Bibila kitutuadisa

Bue zitsikudukusu zi Bibila zilenda tusadisila tubaka zinzengolo zimboti? Tala VIDEO ayi vana mimvutu mu biuvu biabi bilandikini.

VIDEO: Tiká mitinda ya Biblia etambwisa yo (5:54)

Kiphuanza kisobula muna mbi?
Bila mbi Yehova kavanina kiphuanza kisobula kuidi batu?
Yehova mbi katuvana mu diambu di tusadila kiphuanza kieto bumboti mboti?

Tanga Efeso 5:15, 16. Ziverse ziazi, zidi ayi tsikudukusu yi Bibila yi tubidi ti: “Zaba sadila bumboti thangu’aku.” Bue wulenda sadila tsikudukusu yayi . . .

Mosi wutanganga Bibila thangu ka thangu?
Mosi wubakanga thangu yi viokisa kuidi nkazi’aku, bana baku, voti bambuta ziaku?
Mosi wukutakananga mu zikhutukunu zi kimvuka?

4. Longa kansasa kiaku muingi wubakanga zinzengolo zimboti

Khumbu ziwombo, yikala ko phasi mu baka nzengolo thangu Bibila kiveni nsiku wo wutadidi diambu beni. A buabu, mbi wufueti tula ti buawu ko buididi? Tala VIDEO ayi vana mimvutu mu biuvu biabi bilandikini.

VIDEO: “Batelá lisosoli ya malamu” (5:13)

Emma mbi katula mu diambu di kalonga kansasa kiandi ayi kabaka nzengolo mu diambu di yangidika Yehova?

Bila mbi tufueti mangina tomba batu bankaka babaka nzengolo va buangu kieto? Tanga Ebelewo 5:14 ayi vana mimvutu mu biuvu biabi:

Thangu zinkaka yikala ko phasi mu yuvula batu mbi tutula mu diambu dimosi, kadiambu ko buawu, vayi beto veka diambu mbi tufueti bela diluaku disuasikisa?
Bisadulu mbi bilenda tusadisa tubaka bulongila kansasa kieto ayi tubaka zinzengolo zimboti?

Banga karti, kansasa kieto kieta tusadisa tubaka zinzengolo zimboti

5. Tadilanga phe kansasa ki batu bankaka

Betu boso tubakanga ko zinzengolo zi phila mosi. Bue tulenda monisina ti tueta tadila kansasa ki batu bankaka? Tutadila bifuani biodi:

Fuanusu kitheti: Khomba mosi wu nketo nioni widi Mbangi Yehova, weta tia vuata phatula mu thangu kalembo sadi voti bo kalembo viokisa thangu ayi bakundi bandi. Bo kame kuenda mu kimvuka kimona, phila beni yina yivuatila yilembo tesi sakuba kuidi bakhomba ba kimvuka beni.

Tanga Loma 15:1 ayi 1 Kolinto 10:23, 24, ayi vana mimvutu mu biuvu biabi:

Enati landikini mabanza madi mu ziverse ziozi, phangi beni nzengolo mbi kalenda baka? Enati lumbu kimosi weka va ntuala mutu mosi ayi mueni diambu dimosi dikuntesa sakuba didi kuidi ngeyo, diodi dikadi tatikisa kansasa kiaku, nzengolo mbi wulenda baka?

Fuanusu kimmuadi: Kadiambu ko Bibila kisikandika ko nua malavu, khomba mosi wu bakala beki nzengolo yilembo nua malavu. Buabu bantedisidi ku feti mosi, ayi mueni Bambangi zi Yehova bankaka balembo nua malavu.

Tanga Mpovi 7:16 ayi Loma 14:1, 10, ayi vana mimvutu mu biuvu biabi:

Enati khomba beni tidi ziverse ziozi zinsadisa, mbi kafueti tula? Enati lumbu kimosi mueni mutu mosi wulembo vangi diambu dimosi diodi kansasa kiaku kaki yangalalanga ko, mbi wufueti tula?

Muingi wubaka nzengolo yimboti

1. Lomba kuidi Yehova katuadisa.—Zaki 1:5.

2. Tula zithombolo mu Bibila ayi mu minkanda mieto mu diambu di mu zaba zitsikudukusu mbi zitadidi diambu beni. Lenda kuaku tomba phe lusadusu kuidi bakhomba bobo bayonzuka mu kiphevi.