XOOK 35
Bix jeʼel k-chʼaʼik maʼalob decisiónoʼobeʼ
Tuláakloʼon k-chʼaʼik decisiónoʼob. Yaʼab tiʼ le baʼaxoʼob k-chʼaʼtuklikoʼ jeʼel u afectartik bix k-bisikba yéetel Jéeobaeʼ bey xan k-kuxtal. Por ejemploeʼ tuláakloʼon k-chʼaʼtuklik tuʼux ken kajlakoʼon, bix jeʼel k-kaxtik k-kuxtaleʼ bey xan wa yaan u tsʼoʼokol k-beel. Wa k-chʼaʼik maʼalob decisiónoʼobeʼ yaan u kiʼimaktal k-óol yéetel yaan u kiʼimaktal u yóol Jéeoba.
1. ¿Bix jeʼel u yáantkech le Biblia utiaʼal a chʼaʼik maʼalob decisiónoʼobeʼ?
Táanil tiʼ a chʼaʼik junpʼéel decisióneʼ kʼáat u yáantaj Jéeoba yéetel kaxt teʼ Biblia baʼax ku tuklik yoʼolal le baʼax ken a beetoʼ (xok Proverbios 2:3-6). Yaan horaeʼ Jéeobaeʼ juntaatsʼ u yaʼalik baʼax unaj u beetaʼal. Kéen úuchuk beyoʼ maas maʼalob ka a beet le baʼax ku yaʼalikoʼ.
Chéen baʼaleʼ, ¿kux túun wa maʼ juntaatsʼ u yaʼalik le Biblia baʼax unaj a beetkoʼ? Wa beyoʼ maʼ a tuklik tumen Jéeobaeʼ deporsi yaan u «nuʼuktikech teʼ bej tuʼux unaj a binoʼ» (Isaías 48:17). ¿Bix túun ken u beetil? Yaan u beetik yéetel le principioʼob wa kaʼansajoʼob yaan teʼ Bibliaoʼ. Le kaʼansajoʼobaʼ letiʼe baʼax áantkoʼon utiaʼal k-naʼatik bix u tuukul yéetel bix u yuʼubikuba Jéeobaoʼ. Le kéen k-naʼat tubeel baʼax ku tuklik Jéeoba yoʼolal wa baʼaxeʼ yaan k-chʼaʼik maʼalob decisiónoʼob.
2. ¿Baʼax unaj k-chʼaʼik en cuenta kéen k-chʼaʼ junpʼéel decisión?
Le Bibliaoʼ ku yaʼalik: «Le máax yaan u naʼatoʼ ku jach ilik tuʼux ku tsʼáaik u yook» (Proverbios 14:15). Leloʼ u kʼáat u yaʼaleʼ táanil tiʼ k-chʼaʼik junpʼéel decisióneʼ kʼaʼabéet k-ilik tuláakal baʼax táakaʼaniʼ. Por ejemploeʼ maʼalob ka k-tukle: «¿Baʼax ku yaʼalik le Biblia yoʼolal le baʼax ken in beetaʼ? ¿Maʼ wa ken u chiʼichnakkúunten? ¿Bix ken u afectartil u maasil? Yéetel u maas kʼaʼanaʼanileʼ, ¿yaan wa u kiʼimakkúuntik u yóol Jéeoba?» (Deuteronomio 32:29).
Tiʼ Jéeoba yaan u derechoil u yaʼalik baʼax maʼalob yéetel baʼax maʼ maʼalobiʼ. Le kéen k-kan u leyoʼob yéetel le kéen k-beet le baʼax ku yaʼalikoʼ ku yantaltoʼon junpʼéel maʼalob conciencia. Le concienciaoʼ letiʼe baʼax aʼaliktoʼon baʼax uts yéetel baʼax kʼaasoʼ (Romanos 2:14, 15). Wa k-kaʼansik tubeeleʼ yaan u yáantkoʼon k-chʼaʼ maʼalob decisiónoʼob.
UTIAʼAL A MAAS NAʼATIK
Koʼox ilik bix u yáantkoʼon le Biblia yéetel k-conciencia utiaʼal k-chʼaʼik maʼalob decisiónoʼob.
3. Chaʼa a wáantaʼal tumen le Bibliaoʼ
¿Bix jeʼel u yáantkech le Biblia kéen a chʼaʼ junpʼéel decisióneʼ? Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
¿Baʼax jatsʼuts siibal u tsʼaamajtoʼon Jéeoba?
-
¿Baʼaxten tu tsʼáajtoʼon le jatsʼuts siibalaʼ?
-
¿Baʼax u tsʼaamajtoʼon Jéeoba utiaʼal u yáantkoʼon k-yéey baʼax ken k-beete?
Xokeʼex Efesios 5:15, 16, kéen tsʼoʼokkeʼ tsikbalteʼex bix jeʼel «u meyaj[toʼon] tubeel le tiempo» utiaʼal...
-
... k-xokik le Biblia sáamsamaloʼ.
-
... k-ilik baʼax unaj u beetik le tsʼokaʼan u beeloʼoboʼ, le taatatsiloʼoboʼ bey xan le paalaloʼoboʼ.
-
... k-bin tiʼ le reuniónoʼoboʼ.
4. Kaʼans tubeel a conciencia utiaʼal a chʼaʼik maʼalob decisiónoʼob
Maas chéen chʼaʼabil u beetaʼal junpʼéel baʼal wa yaan junpʼéel teksto aʼalik baʼax unaj u beetaʼal. Chéen baʼaleʼ, ¿kux túun wa minaʼan junpʼéel teksto aʼalikeʼ? Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
Jeʼex t-ilil teʼ videooʼ, ¿baʼax tu beetaj le kiik utiaʼal u kaʼansik u conciencia yéetel utiaʼal u chʼaʼtuklik baʼax uts tu tʼaan Jéeoba?
¿Baʼaxten maʼ unaj k-aʼalik tiʼ uláakʼ máak ka u chʼaʼtukult baʼax ken k-beetiʼ? Xokeʼex Hebreos 5:14, kéen tsʼoʼokkeʼ ka tsikbaltikeʼex lelaʼ:
-
U jaajileʼ maas chéen chʼaʼabil u kʼáatik máak baʼax unaj u beetik. Pero, ¿baʼaxten maas maʼalob ka u kan máak u chʼaʼtukult tu juunal baʼax ken u beete?
-
¿Baʼax jeʼel u yáantkoʼon utiaʼal k-kaʼansik k-conciencia yéetel utiaʼal k-chʼaʼik maʼalob decisiónoʼobeʼ?
Le concienciaoʼ bey jeʼex junpʼéel mapa ku yeʼesiktoʼon baʼax bejil unaj k-biskeʼ
5. Respetart u conciencia u maasil
Maʼ tuláakal máak igualiʼ, le oʼolal maʼ igual baʼax ku chʼaʼtuklik u beetik máakiʼ. ¿Bix jeʼel k-respetartik u conciencia u maasileʼ? Koʼox ilik kaʼapʼéel bix jeʼel k-beetkeʼ.
Ejemplo 1: Koʼox aʼalikeʼ juntúul kiik jach uts tu tʼaan u bonkubaeʼ ku bin tiʼ junpʼéel múuchʼulil tuʼux le kiikoʼoboʼ jelaʼan u yilkoʼob u bonkuba máak.
Xokeʼex Romanos 15:1 yéetel 1 Corintios 10:23, 24, kéen tsʼoʼokkeʼ ka tsikbaltikeʼex lelaʼ:
-
Jeʼex u yaʼalik le tekstooʼ, ¿baʼax maʼalob ka u chʼaʼtukult le kiikoʼ? Kux túun teech, ¿baʼax jeʼel a beetik wa yaan máax maʼ maʼalob u yilik baʼax ka beetkiʼ?
Ejemplo 2: Koʼox aʼalikeʼ juntúul sukuʼuneʼ u yojleʼ le Bibliaoʼ maʼ tu prohibirtik u yuʼukʼul junpʼíit alcohol. Kex beyoʼ ku chʼaʼtuklik maʼ u yukʼik mix junpʼíitiʼ. Junpʼéel kʼiin túuneʼ ku invitartaʼal utiaʼal junpʼéel reunión social yéetel ku yilkeʼ u maasil sukuʼunoʼobeʼ táan u yukʼikoʼob baʼaloʼob yaan alcohol ichil.
Xokeʼex Eclesiastés 7:16 yéetel Romanos 14:1, 10, kéen tsʼoʼokkeʼ ka tsikbaltikeʼex lelaʼ:
-
Jeʼex u yaʼalik le tekstoʼoboʼ, ¿baʼax unaj u beetik le sukuʼunoʼ? Kux túun teech, ¿baʼax jeʼel a beetik wa yaan máax ku beetik junpʼéel baʼal maʼ maʼalob a wilkiʼ?
¿Baʼax unaj a beetik utiaʼal a chʼaʼik maʼalob decisiónoʼob?
1. Kʼáat tiʼ Jéeoba ka u yáantech (Santiago 1:5).
2. Ilawil baʼax ku yaʼalik le Biblia yéetel le publicaciónoʼob yoʼolal le baʼax a kʼáat a beetoʼ. Jeʼel xan u páajtal a kʼáatik áantaj tiʼ le sukuʼunoʼob yiijchajaʼan u tuukuloʼoboʼ.
3. Tukult bix ken u afectartil a conciencia le baʼax ken a beetoʼ yéetel bix ken u afectartil u maasil.
BAʼAX SUUK U YAʼALAʼAL: «Techeʼ jeʼel u páajtal a beetik jeʼel baʼaxak a kʼáateʼ. ¡Baʼax a kʼáajtiʼ baʼax ku yaʼalik u maasiliʼ!».
-
¿Baʼaxten unaj k-chʼaʼik en cuenta bix u yuʼubikuba Dios yéetel bix u yuʼubikuba u maasil?
BAʼAX TSOʼOLI
Wa k-chʼaʼik en cuenta baʼax ku tuklik Jéeoba yéetel bix ken u afectartil u maasil le baʼax ken k-beetoʼ yaan k-chʼaʼik maʼalob decisiónoʼob.
Baʼax ta kanaj
-
¿Bix jeʼel a chʼaʼik maʼalob decisiónoʼobeʼ?
-
¿Bix jeʼel a kaʼansik a concienciaeʼ?
-
¿Bix jeʼel a weʼesik ka chʼaʼik en cuenta u conciencia u maasileʼ?
KAN U MAASIL
¿Bix le decisiónoʼob unaj a chʼaʼik utiaʼal a maas biskaba yéetel Jéeobaoʼ?
Ilawil bix u kaʼanskoʼon Jéeoba.
Ilawil baʼax áant juntúul máak u chʼaʼ junpʼéel decisión.
Jéeobaeʼ ku garantizartik toʼon tuláakal baʼax maʼalob (5:46)
Ojéelt baʼax jeʼel a beetik wa minaʼan junpʼéel ley aʼalik jach baʼax u kʼáat Jéeobaeʼ.
Maʼ xaaneʼ jeʼel u yutstal xan ta wicheʼ
KʼÁATCHIʼOB SUUK U BEETAʼAL
¿Bix u tsʼáaikoʼob xook u testigoʼob Jéeoba yéetel le Bibliaoʼ?
Le xook ku tsʼáaik u testigoʼob Jéeobaoʼ gratis, jeʼel u páajtal a usartik a Bibliaeʼ yéetel jeʼel u páajtal a invitartik wa máax utiaʼal u láakʼintikech teʼ xookoʼ.
