LISON 36
Sé Pou Nou Onnèt An Tout Bagay
Tout moun vlé jan ki onnèt. Konsa, Jéhova vlé jan ki onnèt osi. Mé i pa toujou ézé pou nou onnèt adan on latè ki ni an pil moun ki pa onnèt. Alò, ki bennéfis nou kay wisivwè, si nou onnèt an tout bagay?
1. Pou ki wézon i enpòtan pou nou onnèt?
Lè nou onnèt, nou ka moutwé Jéhova nou enmenʼy èk nou ka pòtéʼy wèspé. Katjilé asou sa: Jéhova konnèt tout bagay nou ka katjilé asou èvèk tout bagay nou ka fè. (Hibrou 4:13) Osi, Jéhova ka wè lè nou ka fè éfò pou nou wèsté onnèt, èk sa ka fè tjèʼy kontan. Pwovèb 3:32 di nou: ‘Jéhova ka détèsté an moun ki malis. Mé i sé bon jan moun ki dwèt.ʼ
2. An ki diféwan mannyè nou sa moutwé nou onnèt?
Jéhova vlé nou ‘palé lavéwité-a épi yonn a lòt.ʼ (Zèkaraya 8:16, 17) Kisa sa vlé di? Ében, lè nou ka palé épi fanmi nou, moun nou ka twavay épi, fwè èk sè nou an kongwigasyon-an ében ofisyé gouvèdman, nou pa ni pou manti ében ba yo enfòmasyon ki pa aplon. Apa di sa, moun ki onnèt pa ka vòlè, èk yo pa ka fè bòbòl. (Li Pwovèb 24:28 èk Èfésòs 4:28.) Osi, yo ka péyé tout taks gouvèdman mandé. (Ronm 13:5-7) An sé mannyè sala èk an lòt mannyè osi, nou ka moutwé “nou vlé fè bon an tout bagay.”—Hibrou 13:18.
3. Ki bennéfis nou kay wisivwè lè nou onnèt?
Lè moun sav nou onnèt, sa kay fèʼy pli ézé pou yo konfyé nou. Kongwigasyon-an menm kon an fanmi, konsa lè nou onnèt nou ka fè tout moun santi sòv èk konfòtab. An plis di sa, nou ka osi ni on konsyans ki nèt. Èvèk lè nou onnèt, nou ka fè moun “wèspèkté konmisyon Bondyé”, èvèk sa kay fè yo vlé konnèt Bondyé nou, Jéhova.—Titòs 2:10.
ANNOU APWANN PLI
Apwézan, ou kay apwann mannyè Jéhova ka santi lèʼw onnèt, èk sé bennéfis-la ou kay wisivwè lèʼw onnèt. Èk osi, ou kay apwann mannyè ou sa moutwé ou onnèt an diféwan sitiwasyon an lavi.
4. Lè nou onnèt sa ka fè tjè Jéhova kontan
Annou li Sam 44:21 èvèk Malakay 3:16, èk apwé nou kay kozé asou sé kwèsyon sala:
-
Pouki i pa ka fè sans pou séwé lavéwité-a?
-
Menm si i difisil délè, ki mannyè ou kwè Jéhova ka santi lèʼw chwazi pou palé lavéwité-a?
Lè manmay palé lavéwité-a, yo ka fè tjè pawan yo kontan. Konsa lè nou palé lavéwité-a, nou ka fè tjè Jéhova kontan
5. Nou sipozé onnèt an tout sitiwasyon
An pil moun kwè i pa ka toujou fè sans pou wèsté onnèt. Mé annou konsidiwé poutji nou sipozé onnèt an tout sitiwasyon. Annou gadé VIDIYO-A, Ki Sa Ki Ka Bay Tjè Kontan?—An Bon Konsyans.
Annou li Hibrou 13:18, èk apwé nou kay diskité mannyè nou sa onnèt . . .
-
an fanmi nou.
-
an twavay ében an lékòl.
-
an lòt sitiwasyon.
6. Lè nou onnèt sa ka pòté bennéfis
Délè, nou pé santi si nou onnèt sa ka mennen pwòblenm. Mé lè nou onnèt, nou ka wè sa sé pli mèyè bagay-la pou fè. Annou li Sam 34:12-16, èk apwé nou kay kozé asou kwèsyon sala:
-
Lèʼw onnèt, ki mannyè sa ka fè laviʼw pli mèyè?
-
Lè an mawi èk an madanm onnèt sa kay fè mawiyaj yo vini pli fò
-
Twavayè ki onnèt kay fè mèt twavay yo konfyé yo
-
Sitwayen ki onnèt kay ni on bon wépitasyon épi ofisyé gouvèdman
ADAN MOUN KA DI: “Si mwen di yon ti mansonj, sa pa vlé di anyen kouman!”
-
Pouki ou kwè Jéhova hayi tout mansonj, jis ti mansonj?
CHONJÉ SÉ PWEN SALA
Jéhova vlé janʼy wèsté onnèt an tout sa yo ka fè èk di.
Annou Wivizé Sa Nou Ja Apwann
-
An ki diféwan mannyè nou sa moutwé nou onnèt?
-
Pouki i pa ka fè sans pou séwé lavéwité-a?
-
Pouki ou vlé wèsté onnèt an tout sitiwasyon?
LÒT ENFÒMASYON OU SA GADÉ
Ki mannyè pawan sa enstwi ich yo pou palé lavéwité-a?
Pouki i bon pou tjenn tout pwonmèt nou fè?
Apwann poutji nou sipozé péyé taks, menm si gouvèdman-an pé mal sèvi lajan-an.
Apwann sa ki motivé an nonm ki pa té onnèt pou fè chanjman èk viv on lavi ki onnèt?
“Mwen Apwann Jéhova Sé An Dyé Ki Plen Mizèwikòd Èk Ka Pawdonnen” (Gad-la, li 1 Mé, 2015)
