PES 36
Ba maliga ngéda yosôna
Hiki mut a ngwés bana mawanda ma ma mpot maliga. Yak Yéhôva a ngwés le mawanda mé ma pot maliga. Ndi hala a ntomb bé munu nkoñ ’isi i het ngandak bôt i ntembee. Inyuki i yé nseñ le mut a ba maliga hiki ngéda?
1. Imbe njom i tôbôtôbô i ntinde bés i ba maliga hiki ngéda?
I ngéda di mpot maliga hiki ngéda, di ñéba Yéhôva le di ngwés nye di tinak nye lipém. Yimbe le: Yéhôva a nyi i mam momasôna di nhoñol, ni ma di mboñ. (Lôk Héber 4:13) A ntehe i ngéda di mpohol i ba maliga, a ngwés ki hala. Bibel i nkal le: “Yéhôva a ñoo mut mandon, ndi a yé liwanda li bôt ba téé sép.”—Bingéngén 3:32.
2. Hiki kel, lelaa di nla éba le di yé maliga?
Yéhôva a mbat bés le di ‘kalna maliga bés ni bés.’ (Sakaria 8:16, 17) Kii hala a nkobla? Hala a nkobla le di nlama pot maliga i ngéda di nkwel ni bôt ba lihaa jés, bôt bés ni bo di nsal, lôk kéé i likoda, tole bangomin. I mut a yé maliga, a nibil bé bôt bape. (Añ Bingéngén 24:28 ni Éfésô 4:28.) A nsaa kii yosôna ngomin a mbat nye. (Rôma 13:5-7) I sem kwep, “di ngwés ba maliga ikété mam momasôna.”—Lôk Héber 13:18.
3. Umbe nseñ u yé i ba maliga?
I ngéda bôt ba nyimbe le di yé maliga hiki ngéda, ba mbôdôl bés ñem. I ba maliga hiki ngéda i mboñ le bijô bi lihaa bi niñ ikété gwéha, i nhôla likoda i ba nsañ. Hala a nhôla ki i bana loñge kiññem. I ngéda di yé maliga, di ‘nlémés biniigana bi Nyambe Ntohol wés,’ hala a nti bôt bape ngôñ i sélél Yéhôva.—Titô 2:10.
KÔNDE TÉM
Di béñge inyuki i ba maliga i nkônha Yéhôva maséé, di tehe ki lelaa di nla ba maliga.
4. I ba maliga i nlémél Yéhôva
Añ Tjémbi 44:21 ni Malaki 3:16, i mbus ni kwélél mambadga mana:
-
Inyuki di nlama bé hoñol le di nla sôô Yéhôva ngim jam?
-
U nhoñol le kii Yéhôva a nôgda i ngéda di mpohol i pot maliga ki le hala a ta bé bun?
I ngéda boñge ba mpot maliga, ba nkônha bagwal bap maséé. I ngéda yak bés di mpot maliga, di nkônha Yéhôva maséé
5. Di ba maliga hiki ngéda
Ngandak bôt i nhoñol le i pot maliga i ta bé nseñ. Ndi, béñge inyuki di nlama ba maliga hiki ngéda. Tuk VIDÉÔ.
Añ Lôk Héber 13:18, i mbus u éba lelaa u nla unda le u yé maliga . . .
-
ni lihaa joñ.
-
i bôlô tole i suklu.
-
mangéda mape.
6. I ba maliga i nlona bés bisai
Di nla hoñol le ibale di mpot maliga, hala a’ lona bés mandutu. Ndi i ba maliga hiki ngéda i yé loñge jam. Añ Tjémbi 34:12-16, i mbus ni kwélél mbadga ini:
-
Lelaa i ba maliga i nla hôla we i niñ yoñ?
-
I ngéda babiina ba yé maliga wada ni nuu, hala a nkônde lédés libii jap
-
I ngéda mut nu a nsal a yé maliga, nwet wé bôlô a mbôdôl nye ñem
-
Bangomin ba ngwés i bôt ba yé maliga
BÔT BAPE BA NKAL LE: “Ngim mangéda, u nla tembee.”
-
Inyuki Yéhôva a ñoo bitembee?
I SEM KWEP
Yéhôva a ngwés le mawanda mé ma ba maliga hiki ngéda.
Mambadga ma mbigda
-
Imbe ngéda u nla unda le u yé maliga?
-
Inyuki di nlama bé hoñol le di nla sôô Yéhôva ngim jam?
-
Inyuki u ngwés ba maliga hiki ngéda?
KONDE YEÑ
Lelaa bagwal ba nla niiga bon bap i ba maliga?
Inyuki i yé nseñ i yônôs mimbônga nwés?
Béñge manjom ma ntinde bés i saa tas i ngomin, to ibale i mam a mboñ ni moni nwés ma nlémél bé bés.
Kii bi tinde mut wada i héñha niñ yé ni i yila mut a yé maliga?
“Ba bi niiga me le Yéhôva a yé konangoo a nwéhlak” (Nkum Ntat 1 Mpuye, 2015)
Yak ini i nla lémél we
MAMBADGA BÔT BA MBÉNA BAT
Lelaa Mbôgi Yéhôva i ntégbaha bôt yigil i Bibel?
Mbôgi Yéhôva i nla hôla we i nigil Bibel ibabé i saa; yigil i ntagbe kiki nkwel ipôla bôt iba, u nla ki gwélél to imbe ngobol i Bibel. U kon bañ woñi i naña lihaa joñ jolisôna tole mawanda moñ.
