ISOMO 36
Ube Muntu Ukutenda Bulili mu Binsania
Muntu unsania ekutundaga kuba na beida bekutenda bulili. Yehowa ekutundaga nu we beida bage batende bulili. Tondo bubo buli bubibu mu kisi kizile na bantu bekutenda buza. Kuli mutali mukizi kwa kuba muntu ukutenda bulili mu binsania?
1. Kabamba kakizi twatunganana nunse kutenda bulili?
Ndi twatenda bulili ku bango, nti twalosya Yehowa buno twamutunda nu tukumwanza. Kengela buno, Yehowa izi binsania bili mu makengelo meitu, nu binsania bitukukitaga. (Baebrania 4:13) Ekutumona gatukutenda bulili nu bubo bukumubogyabogya. Kitondo kyage Biblia kyatenda bunee: “Yehowa ekusomba bantu bakali [aba bengelezi, NWT] tondo eli gamozi na bantu beisanana.”—Misumo 3:32.
2. Bitondo bikizi bitukukitaga bindi binsania bitwatunganana kutenda kubyo bulili?
Yehowa atusega buno “muntu na muntu atende bulili ku munyage.” (Zekaria 8:16, 17) Bubo buli na bwisulilwa bukizi? Ibe buno tukutenda na bantu ba kikanga kyeitu, bakambi baneitu, mibuto nu babitu beitu Bakristo, aba bakambi ba mbulamatali, tatwatunganana kutenda buza aba kusola misagu za bwengelezi. Bantu bekutenda bulili tabatunganana kwiba bango aba kubengelela. (Soma Misumo 24:28 nu Baefeso 4:28.) Nu bekulega kodi insania zibatunganana kulega ku mbulamatali. (Baroma 13:5-7) Mu nzila zezo aba mu ingo, “tukutunda kukita busoga [aba kutenda bulili, NWT] mu bitondo binsania.”—Baebrania 13:18.
3. Kuli mutali mukizi kwa kuba muntu ukutenda bulili?
Ndi tukutendaga bulili, bango nti batulemanine. Nu lingo, nti twalisye lukita lwa bubobelelo nu lwa lutundo mu ikundamano. Tukubogelabogela tondi kalenganio kasoga. Kutenda kweitu bulili kuna ‘lebya meigisia ma Kalaga Monia weitu,’ nu kukasya bango beteli mu ikundamano batananizibwe na kukambela Yehowa.—Tito 2:10.
TUMENYININE
Lola kabamba kakizi kutenda bulili kukutananizya Yehowa nu buni b’unatenda bulili mu binsania biunakita mu kalamo kobe, nu mutali u unamona kwa kutenda bulili.
4. Kutenda bulili kukutananizya Yehowa
Soma Nimbo 44:21 nu Malaki 3:16, nu kusila ibuzye zeno mbuzya:
-
Kabamba kakizi tabuli busoga kukengela buno tunabisa bulili?
-
Ukukengela buno Yehowa ekwijungwaga buni ndi twasombola kutenda bulili, aba mu nkungu zili mbibu kukita bubo?
Ndi bana batenda bulili, nti babogyabogya babuti babo. Ndi twatenda bulili, nti twabogyabogya Yehowa
5. Tenda bulili mu nkungu insania
Bantu beingi bekukatiziaga buno tabunakulungana kutenda bulili bindi binsania. Tondo lola kabamba kakizi twatunganana kutenda bulili mu nkungu insania. Lola VIDEO.
Soma Baebrania 13:18, nu kusila lola buni butunaba bantu bekutenda bulili . . .
-
mu bikanga byeitu.
-
ku mulimo aba ku likolo.
-
mu ingo nzila.
6. Kutenda bulili kukutulisizyaga mutali
Mu nkungu imozi, kutenda bulili kunatulisizya mulondo. Tondo kukita bubo kwatulisizye mutali bindi binsania. Soma Nimbo 34:12-16, nu kusila ibuzye luno lubuzya:
-
Buni bunaba kalamo kobe ndi ukutendaga bulili?
-
Ndi ba mukazi n’iba bekutenda bulili, nti isonga lyabo lyalinda
-
Bakambi bekutenda bulili bekulemaninwa na beimanizi babo
-
Bantu bekutendaga bulili bekutundwaga na bakambi ba mbulamatali
NDI MUNTU AKUSOLELA BUNEE: “Takuli bubi ndi muntu eka tugu buza kakeke.”
-
Kabamba kakizi wakatizia buno Yehowa ekusombaga buza bwa nkita insania?
MAKENGELO MANENE
Yehowa ekutunda beida bage batende bulili mu binsania bibekukita nu tabeeke buza ku binsania.
Mbuzya za kwikengelesya
-
Twatunganana kutenda bulili ku bitondo bikizi?
-
Kabamba kakizi tabuli busoga kukengela buno tunabisa bulili?
-
Kabamba kakizi ukutunda kutenda bulili mu nkungu insania?
LONDA LINGO
Buni buneigisya babuti bana babo kutenda bulili?
Kuli mutali mukizi kwa kuzindilizya bibyo bitwalagile?
Lola kabamba kakizi twatunganana kulega kodi aba buno zikukambibwa bubi.
“Ndi Watunganana Kulega Kodi?” (Munara wa Mulinzi, 1 Mwezi wa 9, 2011)
Kikizi kyakasizye wamulume umozi utatendaga bulili, kukita migaluko mu kalamo kage nu kuba muntu ukutenda bulili?
“Nijigisizye Buno Yehowa Eli Mwija Lusimo nu Ukusigilila” (Munara wa Mulinzi, 1 Mwezi wa 5, 2015)
