DILONGESHA DIA 36
Ikala muena bululame mu malu onso
Muntu yonso utu musue balunda bena bululame. Yehowa pende mmusue bua balunda bende bikale bena bululame. Kadi ki mbipepele bua kuikala ne bululame mu bulongolodi mudi ba bungi kabayi nabu to. Mmabenesha kayi atuapeta tuetu bikale ne bululame mu malu onso?
1. Mbualu kayi bunene budi butusaka bua kuikala bena bululame?
Patudi tuenzela bakuabu malu ne bululame, tudi tuleja Yehowa ne: tudi bamunange ne tudi tumunemeka. Manya ne: Yehowa mmumanye bionso bitudi tuelela meji ne tuenza. (Ebelu 4:13) Udi umona patudi tuenza malu ne bululame, ne udi usanka. Dîyi diende didi diamba ne: “Yehowa udi ukina muntu muena malu a bibenda, kadi bulunda buende bushême budi kudi bena bululame.”—Nsumuinu 3:32.
2. Mmalu kayi atudi ne bua kuenza ne bululame dituku dionso?
Yehowa mmusue bua ‘tuambilangane bulelela.’ (Zekâya 8:16, 17) Bidi biumvuija tshinyi? Patudi tuyukila ne bena mu dîku dietu, bena mudimu netu, bena Kristo netu, anyi bena mbulamatadi, katuena tubashima anyi tubatapa bibenda to. Bena bululame kabatu biba bakuabu anyi babadia bintu to. (Balayi Nsumuinu 24:28 ne Efeso 4:28.) Batu bafuta bitadi bionso. (Lomo 13:5-7) Eyowa, tudi ne bua “kuenda mu bululame mu malu onso.”—Ebelu 13:18.
3. Kuikala bena bululame kudi ne mabenesha kayi?
Bantu bobu batumanye ne: tudi bena bululame, nebatueyemene. Netuambuluishe bena mu tshisumbu bua badiumvue mu bukubi, anu mutu bena mu dîku badi banangangane. Netuikale ne kondo ka muoyo katoke. Bululame buetu budi kabidi mua “kulengeja dilongesha dia Nzambi Mupandishi wetu,” ne kukoka bakuabu mu ntendelelu mulelela.—Tito 2:10.
BUELA MU BUONDOKE
Mona tshidi kuikala muena bululame kukuenzela wewe ne Yehowa, ne longa muudi mua kuenda mu bululame mu nsombelu kabukabu.
4. Bululame budi busankisha Yehowa
Balayi Misambu 44:21 ne Malaki 3:16, pashishe nuandamune nkonko eyi:
-
Buebe wewe, bua tshinyi ki mbimpe kuela meji ne: tudi mua kusokoka bulelela?
-
Buebe wewe, mmunyi mudi Yehowa umvua patudi tuamba anu bulelela, nansha biobi mua kutulelela lutatu?
Bana badi bamba bulelela badi basankisha baledi babu. Tuetu tuamba bulelela, tudi tusankisha Yehowa
5. Ikala muena bululame dîba dionso
Ba bungi batu bela meji ne: bululame kabutu buambuluisha misangu yonso to. Kadi mona bua tshinyi tudi ne bua kuikala bena bululame dîba dionso. Tangilayi FILME.
Balayi Ebelu 13:18, pashishe nuyukile mutudi mua kuikala bena bululame . . .
-
mu dîku dietu.
-
ku mudimu anyi mu kalasa.
-
mu nsombelu mikuabu.
6. Bululame budi bufuta
Tudi mua kuanji kumona bu ne: bululame budi mua kututuadila ntatu. Kadi ndekelu wa bionso, butu bufuta. Balayi Misambu 34:12-16, pashishe nuandamune lukonko elu:
-
Mmunyi mudi kuikala muena bululame kulengeja nsombelu webe?
-
Padi mulume ne mukajende benza malu ne bululame dibaka diabu didi dishindama
-
Muena mudimu udi ne bululame nebamueyemene kudi mfumuende wa mudimu
-
Bena bululame batu ne lumu luimpe kudi bena mbulamatadi
BAMUE BATU BAMBA NE: “Tumue tumashimi katutu tubi to.”
-
Buebe wewe, bua tshinyi Yehowa mmukine mashimi onso?
TSHIA KUKUATA
Yehowa mmusue bua balunda bende bikale ne bululame mu bionso bidibu bamba ne benza.
Diambulula
-
Mmu malu kayi atudi ne bua kuikala bena bululame?
-
Buebe wewe, bua tshinyi ki mbimpe kuela meji ne: tudi mua kusokoka bulelela?
-
Bua tshinyi udi musue kuikala muena bululame dîba dionso?
BIA KUTANGILA KABIDI
Mmunyi mudi baledi mua kulongesha bana babu bua bikale bena bululame?
Mmabenesha kayi atudi tupeta patudi tukumbaja bituakalaya?
Mona ni tudi anu ne bua kufuta bitadi nansha bobu benza nabi mudimu bibi.
“Bitadi: tudi ne bua kubifuta anyi?” (Tshibumba tshia Nsentedi, 1/10/2011)
Ntshinyi tshiakambuluisha muntu uvua ne nsombelu mubi bua ashintuluke ne apete nsombelu muimpe?
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
