IREN MEHN KASUKUHL 36
Kin Mehlel ni Soahng Koaros
Aramas koaros kin men kompoakparail kan en kin mehlel. Siohwa pil ketin kupwurki kompoakepah kan en kin mehlel. Ahpw met sohte mengei nan sampah ehu me aramas tohto sohte kin mehlel. Ia kamwahupen en kin mehlel ni soahng koaros?
1. Ia kahrepe keieu kesempwal en kin mehlel?
Ni atail kin mehlel ong meteikan, kitail kin kasalehiong Siohwa me kitail poakohng oh wauneki ih. Karasepe: Siohwa ketin mwahngih mehkoaros me kitail kin medewe oh wia. (Ipru 4:13) E ketin mwahngih atail kin pilada en kin mehlel, oh e ketin kalahnganki met. Sapwellime Mahsen mahsanih me Siohwa kin ketin kompoakepahnki “aramas me kin peikiong Koht ni mehkoaros oh kin wia me pwung ahnsou koaros, me kin lokaia pwung oh mehlel.”—Melkahka 15:1, 2.
2. Ia duwen atail pahn kin mehlel nan atail mour en ehuehu rahn?
Siohwa ketin kupwurki kitail en kin ‘lokaia mehlelpene nanpwungatail.’ (Sekaraia 8:16, 17) Ia wehwehn met? Sohte lipilipil ma kitail kin koasoiong atail peneinei, iangatail tohndoadoahk, riatail Kristian kan de tohndoadoahk en koperment kan, kitail sohte kin likamw de kihda ire sapwung kan. Aramas mehlel sohte kin pirapa meteikan de pitih irail. (Wadek Lipai 19:11 oh Episos 4:28.) Oh re kin pwain arail daksis kan koaros. (Rom 13:5-7) Kitail ‘kin mehlel ni mehkoaros’ sang ni mwekid pwukat oh soahng teikan.—Ipru 13:18.
3. Ia kamwahupen en kin mehlel?
Aramas akan kin likih kitail ni ar kin esehkin kitail nin duwen aramas mehlel kei. Kitail kin kahrehiong koaros en sohte perki mehkot nan mwomwohdiso duwehte peneinei limpoak ehu. Kitail kin ahneki nsenmwakelekel. Atail kin mehlel pil kin “kalinganahda padahk en atail Sounkomour Koht,” oh kin kahrehiong meteikan ren men esehla Siohwa.—Taitus 2:10.
KALAUDEHLA OMW ESE MET
Kilang ia sapwellimen Siohwa pepehm duwen omw kin mehlel, ia duwen mehlel eh wia kamwahupomw oh ia duwen omw kak mehlel nan irair koaros.
4. Mehlel kin kaperenda kupwuren Siohwa
Wadek Melkahka 44:21 oh Malakai 3:16, oh mwuri koasoiapene peidek pwukat:
-
Dahme kahrehda kitail en dehr medewe me kitail kak ekihsang Siohwa mehkot?
-
Ia sapwellimen Siohwa pepehm ni atail pilada en kin koasoi mehlel, mendahki ma e apwal?
Ni seri kan ar kin koasoi mehlel, re kin kaperenda ar pahpa nohno. Ni atail kin koasoi mehlel, kitail kin kaperenda kupwuren Siohwa
5. Omw wiewia en kin mehlel ahnsou koaros
Me tohto kamehlele me aramas sohte kak mehlel ni ahnsou koaros. Ahpw tehk dahme kahrehda kitail anahne mehlel ni ahnsou koaros. Kilang KISIN KASDO.
Wadek Ipru 13:18, oh mwuri koasoia ia duwen atail kak mehlel . . .
-
nan atail peneinei.
-
nan atail wasahn doadoahk de sukuhl.
-
nan irair teikan.
6. Mehlel kin wia kamwahupatail
En kin mehlel kak kahrehda kahpwal. Ahpw ni imwilah, met me keieu mwahu me ke kak wia. Wadek Melkahka 34:12-16, oh mwuri koasoiapene peidek wet:
-
Ia duwen mehlel eh kak kihong uhk nan mour mwahu?
-
Ohl oh lih pwopwoud mehlel kin kakehlaka ara pwopwoud
-
Kaunen doadoahk kin likih tohndoadoahk mehlel kan
-
Aramas mehlel kan kin adamwahu rehn tohndoadoahk en koperment kan
EKEI ARAMAS KIN NDA: “Kisin likamw sohte wiahda mehkot.”
-
Dahme kahrehda ke kamehlele me Siohwa ketin kalahdeki soangen likamw koaros?
DAHME KE SUKUHLKIER
Siohwa ketin kupwurki kompoakepah kan en kin mehlel ni soahng koaros me re nda oh wia.
Kousapahl
-
Ia duwen atail pahn kin mehlel?
-
Dahme kahrehda kitail en dehr medewe me kitail kak ekihsang Siohwa mehkot?
-
Dahme kahrehda ke pahn kin men mehlel ahnsou koaros?
PIL TEHK
Ia duwen pahpa nohno kan ar kak padahkihong neirail seri kan en kin mehlel?
Ia kamwahupen en kin kapwaiada atail inou kan?
Tehk ma kitail anahne pwain daksis kan mehnda ma mwohnio kin kadoadoahk ni ahl sapwung.
“Taxes—Must You Pay Them?” (The Watchtower, September 1, 2011)
Dahme kamwakid emen ohl me kin likamw mahso en wekidala eh mour oh kin wia doadoahk mehlel?
“I Learned That Jehovah Is Merciful and Forgiving” (The Watchtower, May 1, 2015)
