LISON 37

Sa Bib-la Ka Di Konsèné Twavay Èk Lajan

JWÉ

Ès ou janmen ni tèt cho konsèné twavay èk lajan? Délè i difisil pou nou potjiwé pou kò nou èk an menm di tan bay Jéhova adowasyon-an i méwité. Mé Bib-la ka ban nou bon konsèy ki sa édé nou.

1. Kisa Bib-la ka di konsèné twavay?

Bondyé vlé nou enjwi twavay nou. Ékléziyastis 2:24 di: ‘La pa ni anyen ki pli bon pasé sa, pou on moun . . . ni tjè kontan pou tout twavay wèd-la i ka fè-a.ʼ Jéhova ka twavay wèd. Konsa, lè nou imité Jéhova èk twavay wèd osi, nou ka fè tjèʼy kontan èk sa ka ban nou on chay satisfaksyon.

I enpòtan pou nou twavay. Mé nou pa janmen sipozé mété twavay nou avan adowasyon nou pou Jéhova. (Jan 6:27) Jéhova pwonmèt nou ki, lè nou mété sèvis nou pou li pwèmyé an lavi nou, i kay ban nou tout sa nou bizwen pou nou viv.

2. Ki mannyè nou sipozé gadé lajan?

Bib-la di, ‘lajan sé an pwotèksyon,ʼ kanmenm i ka vèti nou, lajan tousèl pa sa ban nou lakontantman. (Ékléziyastis 7:12) Alò, Bib-la pa ka ankouwajé nou pou enmen lajan. Pito sa, i ka ankouwajé nou pou “kontanté èk sa [nou] ni.” (Li Hibrou 13:5.) Konsa, lè nou toujou kontanté épi sa nou ni, nou pa kay ni tèt cho ki ka vini lè moun ka kouwi dèyè lajan. An plis di sa, nou pa ka mété kò nou an dèt ki pa nésésè. (Pwovèb 22:7) Èk osi, nou ka chapé danjé-a ki ka vini lè moun jwé pou lajan, èk fè lòt bagay pou vini wich vit.

3. Ki mannyè nou sa donnan épi lajan nou?

Jéhova sé on Dyé ki donnan, èk nou ka imitéʼy lè nou “toujou pawé pou sépawé” sa nou ni épi lézòt. (1 Timòfi 6:18) Konsa nou ka byen sèvi lajan nou lè nou sipòté kongwigasyon-an, èk lè nou édé lézòt moun ki bizwen èd, sitou sé fwè èk sè nou-an. Mé sa ki pli enpòtan pou Jéhova, sé wézon-an nou ka bay, èk pa kantité-a nou ka bay. Alò, lè nou bay épi tout tjè nou, nou kay ni tjè kontan èk sa kay bay Jéhova tjè kontan osi.—Li Twavay 20:35.

ANNOU APWANN PLI

Apwézan, annou apwann sé bennéfis-la nou kay èspéyansé lè nou ni on bon atitid pou twavay èk lè nou satisfè épi sa nou ni.

4. Onnowé Jéhova an mannyè-a ou ka twavay

Bon wilasyon nou épi Jéhova sipozé enflouwansé atitid nou pou twavay. Annou gadé VIDIYO-A, Twavay Épi Tout Tjèʼw Bay Jéhova èk apwé nou kay kozé asou sé kwèsyon sala:

VIDIYO: Twavay Épi Tout Tjèʼw Bay Jéhova (4:39)

Kisa ou té kontan konsèné atitid Jason èk kondwit li an plas twavay li?
Kisa Jason té fè pou fè asiwé twavay li pa té pwèmyé bagay-la an laviʼy?

Annou li Kòlòsé 3:23, 24, èk apwé nou kay kozé asou kwèsyon sala:

Ki atitid lévanjil sala ka ankouwajé nou pou ni lèʼy vini pou twavay?

Twavay enpòtan. Mé nou pa sipozé kité twavay nou vini pli enpòtan pasé adowasyon nou pou Jéhova

5. Lè nou kontanté épi sa nou ni, nou ka twapé bennéfis

La ni moun ki ka éséyé anmasé pli èk pli lajan. Mé, Bib-la pa ka ankouwajé nou pou fè sa. Annou li 1 Timòfi 6:6-8, èk apwé nou kay kozé asou kwèsyon sala:

Kisa Bib-la ka ankouwajé nou pou fè?

Menm si nou pa ni djè, nou sa ni lakontantman. Annou gadé VIDIYO-A, Sé Pou Nou “Kontanté Èk Sa [Nou] Ni” èk apwé nou kay kozé asou kwèsyon sala:

VIDIYO: Sé Pou Nou “Kontanté Èk Sa [Nou] Ni” (3:20)

Menm si sé fanmi sala pa té ni djè lajan, kisa ki té ba yo lakontantman?

Mé annʼ di nou ni on chay lajan, èk nou vlé plis toujou? Ében, Jézi bay yon listwa ki ka moutwé mannyè atitid sala byen danjéwé. Annou li Louk 12:15-21, èk apwé nou kay kozé asou kwèsyon sala:

Silon vèwsé 15, kisa ou apwann an listwa-a Jézi té bay?

Annou li Pwovèb 10:22 èk 1 Timòfi 6:10, èk apwé nou kay kozé asou sé kwèsyon sala:

Kisa ou kwè ki pli enpòtan, pou on moun ni an chay lajan, ében pouʼy ni on bon wilasyon épi Jéhova?
Ki pwòblenm nou kay èspéyansé si nou toujou vivi dèyè lajan?

6. Jéhova kay potjiwé sa nou bizwen

Si nou pèd twavay nou, ében nou pa ni asé lajan pou achté sa nou bizwen, èk nou chonjé Jéhova la épi nou pou édé nou, sa kay soulajé nou. Annou gadé VIDIYO-A, Jéhova Kay Potjiwé Sa Nou Bizwen pou nou wè sa nou sa fè lè nou ni pwòblenm kon sa. Èk apwé nou kay kozé asou sé kwèsyon sala:

VIDIYO: Jéhova Kay Potjiwé Sa Nou Bizwen (6:21)

An vidiyo-a, ki pwòblenm fwè-a té ni pou aji épi?
Kisa fwè-a té fè pou wanjé pwòblenm-lan?

Annou li Mafyou 6:25-34, èk apwé nou kay kozé asou kwèsyon sala:

Kisa Jéhova pwonmèt pou fè ban nou si nou météʼy pwèmyé an lavi nou?

ADAN MOUN KA DI: “Mwen ni pou twavay wèd pou sipòté fanmi mwen. Mwen pa sa atandé mitin toulé simenn.”

Ki lévanjil ki ka moutwéʼw, i toujou pli mèyè pou mété adowasyonʼw pou Jéhova pwèmyé?

CHONJÉ SÉ PWEN SALA

Twavay èk lajan enpòtan, mé nou pa sipozé kité yo anpéché nou sèvi Jéhova.

Annou Wivizé Sa Nou Ja Apwann

Kisa ou sa fè pou fè asiwé twavay ou pa pwèmyé bagay-la an laviʼw?
Ki bennéfis ou ka twapé lèʼw satisfè épi saʼw ni?
Jéhova pwonmèt pou potjiwé bay pèp li. Ki mannyè ou sa moutwé ou ni konfyans an pwonmèt sala?

Nou fini lison sala asou dat sala:

Mi Yonndé Bagay Ou Sa Fè

Katjilé asou déotwa mwa ki pasé, èk gadé pou wè si ou ja mantjé an chay mitin pou lapéti twavay ou. Èk si ou ja mantjé an chay mitin, fè an plan pou pa kité twavay ou anpéchéʼw atandé mitin.

Lòt bagay ou sa fè:

Lòt Bagay Mwen Vlé Fè