IRUẸMWI 37

Emwi Ne Baibol Khare Vbekpa Iwinna Kevbe Igho

KPẸRE

Ẹmwẹ igho ra iwinna he ya ruẹ gha si osi ẹdẹ ra? Ẹi re emwi nọ khuẹrhẹ, ne ọmwa sẹtin gha gbaroghe egbe ẹre, nọ vbe gha rhie ugamwẹ nọ khẹke ne Jehova. Ibude nibun rre Baibol ni gha sẹtin ru iyobọ ne ima.

1. De emwi ne Baibol khare vbekpa iwinna?

Osanobua hoo ne ima gha sọyẹnmwẹ iwinna ima. E Baibol wẹẹ: “Emwi nọ maan sẹ ne ọmwa gha sẹtin ru, ọrọre . . . nọ ya okhuan nọ khuaẹn gha zọmọ.” (Asan-Ibo 2:24) E Jehova wa kakabọ winna. Ma gha wegbe obọ vbene irẹn ye, ẹko ghi gha rhiẹnrhiẹn ọnrẹn, ma ghi vbe gha mwẹ isọkẹn.

Iwinna wa ru ekpataki. Sokpan ọ ma khẹke ne ima gi ẹre ru ekpataki sẹ ugamwẹ e Jehova. (Jọn 6:27) E Jehova yan rẹn wẹẹ, ma gha mu ugamwẹ irẹn ye okaro, irẹn gha kpemehe emwi hia ne ima gualọ ne ima.

2. De aro nọ khẹke ne ima ya gha ghee igho?

E Baibol khare wẹẹ, igho gha sẹtin “ru ẹre, ne ẹkun sẹ ruẹ otọ,” ọrheyerriọ, ọ vbe gi ima rẹn wẹẹ, igho ọkpa i sẹtin ya ima gha sọyẹnmwẹ. (Asan-Ibo 7:12) Ọni ẹre ọ si ẹre ne Baibol na wẹẹ, ne ima ghẹ hoẹmwẹ igho, sokpan ne ima “gi emwi ne [ima] mwẹ gha [sẹ ima] ọkẹn.” (Tie Hibru 13:5.) Emwi ne ima mwẹ gha sẹ ima ọkẹn, ma i khian gha kpokpo egbe ba ẹmwẹ emwi ne obọ ima ma sẹ. Ma i khian gheghe de fi osa. (Itan 22:7) Ma i khian vbe de fi ẹbe ne uzọgbẹn na fi si ye ọmwa egbe, kevbe osi nọ lele emwamwa ọghe ẹfe ẹgiẹgiẹ khian.

3. De vbene ima khian ya sẹtin gha ya igho ru ẹse hẹ?

Osa nọ zẹ emwi obọ, ẹre Jehova khin. Ma ghaa “zẹ emwi obọ,” ma na vbe mu egbe ne ima “ya ghae ne emwa ọvbehe,” te ima ya egbe taa re. (1 Timoti 6:18) Te ima zẹ emwi obọ vbe ima ghaa ya igho ima ru iyobọ ye emwamwa iko, ma na vbe gha yae ru iyobọ ne emwa ni gualọ iyobọ, katekate etẹn ne ima gba ga. Ẹi re inu igho ne ima ya ru ẹse, ẹre Jehova ghee, sokpan emwi nọ ya ima ru ẹse nii, ẹre irẹn ghee. Ma ghaa ya ekhọe hia zẹ emwi obọ, ma ghi gha ghọghọ, ẹko ghi vbe gha rhiẹnrhiẹn e Jehova.—Tie Iwinna 20:35, NW.

GUALỌ OTỌ RE SAYỌ

Gia ziro yan ere na miẹn vbọ, vbe ima ghaa mu ẹmwẹ iwinna ye oreghe kevbe deghẹ ima na gi emwi ne ima mwẹ gha sẹ ima ọkẹn.

4. Gi odẹ ne u ya winna gha rhie uyi ne Jehova

Ọ khẹke ne odẹ ne ima ya winna gha rhie ẹre ma wẹẹ, ọsie Jehova ẹre ima khin. Kpee VIDIO na, iyeke ọni, uwa ghi ziro yan inọta ni lelẹe.

E VIDIO: Ya Ekhọe Hia Winna Ne Jehova (4:39)

Vbe vidio na, vbọ yẹẹ ruẹ vbe odẹ ne Jason ya gha winna kevbe odẹ nọ ya gha yin vbe isiwinna?
Vbọ ru nọ rhie ẹre ma wẹẹ, ọ mu ẹmwẹ iwinna ye oreghe?

Tie Kọlose 3:23, 24, iyeke ọni, uwa ghi ziro yan inọta na:

Vbọzẹ nọ na ru ekpataki ighẹ odẹ ne ima ya winna?

Iwinna wa ru ekpataki. Sokpan ọ ma khẹke ne ima gi ẹre ru ekpataki sẹ ugamwẹ ne ima rhie ne Jehova

5. A wa miẹn ere vbọ vbe emwi ne ima mwẹ gha sẹ ima ọkẹn

Emwa nibun keghi hia vbe odẹ ke odẹ ne iran fe ya obọ mu iso. Sokpan ibude ne Baibol rhie ne ima lughaẹn. Tie 1 Timoti 6:6-8, iyeke ọni, uwa ghi ziro yan inọta na:

De ibude ne Baibol rhie ne ima?

Ọ gha khọnrẹn ne ima gha re emwa ni ma fe, ma gha ye sẹtin gha ghọghọ. Kpee VIDIO na, iyeke ọni, uwa ghi ziro yan inọta nọ lelẹe.

E VIDIO: “Gie Emwi Ne U Mwẹ Gha Suẹ Ọkẹn” (3:20)

Vbọzẹ ne avbe ẹgbẹe na miẹn vbe vidio na, na gha sọyẹnmwẹ, agharhemiẹn wẹẹ obọ ma sẹ iran re?

Ma ghaa re emwa ni fe, vbọ khian gha ye hẹ, deghẹ ima na ye gha hoo ne ima fe sayọ? Jesu gi ima rẹn ẹbe na lae miẹn. Tie Luk 12:15-21, iyeke ọni, uwa ghi ziro yan inọta na:

Vbua miẹn ruẹ vbe erre ne Jesu zẹ?—Ghee uviẹn 15.

Tie Itan 10:22 ne u yae taa 1 Timoti 6:10. Iyeke ọni, uwa ghi ziro yan avbe inọta na:

De ne uwẹ yayi wẹẹ ọ ru ekpataki sẹ? Na gha re ọsie Jehova, ra na fe ya obọ mu iso? Vbua gu kha vberriọ?
De ọlọghọmwa ne igho na khu khian si ye ọmwa egbe?

6. E Jehova gha kpemehe emwi hia ne ima gualọ ne ima

Ọlọghọmwa ọghe igho kevbe iwinna sẹtin yae gha lọghọ, ne ima gha mwẹ amuẹtinyan daa e Jehova. Kpee VIDIO na, ne u ya rẹn emwi nọ khẹke ne u ru, vbe u ghaa rre uwu ọlọghọmwa vberriọ, iyeke ọni, uwa ghi ziro yan inọta ni lelẹe.

E VIDIO: E Jehova Gha Kpemehe Ne Ima (6:30)

De isievẹn eso ne ọtẹn nokpia na, werriẹ aro daa vbe vidio na?
Vbọ ru iyobọ nẹẹn ya la avbe isievẹn na gberra?

Tie Matiu 6:25-34, iyeke ọni, uwa ghi ziro yan inọta na:

De emwi ne Jehova wẹẹ irẹn khian ru ne emwa ni mu ugamwẹ ọghe irẹn ye okaro?

EMWA ESO KEGHI KHA WẸẸ: “Te I gha winna, ne I mieke na sẹtin gha gbaroghe ẹgbẹe mwẹ. Rhunmwuda ọni, I i sẹtin gha yo iko vbe uzọla uzọla.”

De ako ọghe evbagbẹn nọhuanrẹn nọ ya ruẹ yayi wẹẹ, azẹ nọ ghi maan sẹ ne u gha ru, ọre ne u mu ugamwẹ e Jehova ye okaro?

OLIKA ẸMWẸ

Igho maan, iwinna maan, sokpan ọ ma khẹke ne iran mu idobo ye ugamwẹ ne ima rhie ne Jehova.

Ogbewerriẹ

Vbọ khian ru iyobọ nuẹn ya mu ẹmwẹ iwinna ye oreghe?
De ere ne u khian miẹn vbe emwi ne u mwẹ gha sẹ ruẹ ọkẹn?
Vbua khian ya rhie ẹre ma hẹ wẹẹ, u mu ẹtin yan e Jehova wẹẹ ọ gha kpemehe ne emwa rẹn, zẹvbe nọ ru eyan rẹn?

Ẹdẹ na ruẹ iruẹmwi na fo:

Emwi Ne U Gha Ru

Deghẹ a na miẹn wẹẹ, ke uki eso gha dee nia, iwinna ruẹ ya ruẹ gbe ẹdẹ iko re vbe ẹghẹ hia, hia vbe odẹ ke odẹ ne u ru afiwerriẹ eso.

Emwi Ọvbehe Ne U Gha Ru:

Emwi Ọvbehe Ne U Gha Ru