ZANNOO 37
Bo Ka A Baabole Yel Kyaare Toma Ane Libie?
Toma yɛlɛ ane libi yɛlɛ eɛ yɛlɛ naŋ dɔɔnɔ noba yaga zaa. A yɛlɛ ŋa daaŋ pɔgɛɛ ho meŋ bee? A ba e mɔlɔ fẽẽ zaa ka ho toɔ̃ tonɔ toma a kaara ho meŋɛ, a kyɛ lɛ de puoruu naŋ seŋ neŋ meŋ a korɔ Jehoova. A Baabole taaɛ kawane naŋ na toɔ̃ soŋ te bee? Vɛŋ ka te nyɛ.
1. Bo ka a Baabole yel kyaare toma?
Naaŋmen boɔrɔŋ ka te poɔ pɛlɛ neŋ toma na te naŋ tonɔ na. A Baabole yelka, “yeli kyebe a seɛ ko nensaalaa a gaŋ oŋ na . . . taa popeɛloŋ o tonkpeɛne eŋɛŋ.” (Ikilisiasitiz 2:24) Jehoova tonɛɛ tonkpeɛne yaga. Ka teneeŋ tɔgloo a tonɔ tonkpeɛne, a na vɛmeŋ ka Jehoova poɔ pɛle, te meŋ na taa la popeɛloŋ.
Toma yɛlɛ fɛrɛɛŋ yaga zaa. Kyɛ, a ba seŋ ka te vɛŋ ka te toma yɛlɛ ferɛ te yaga zaa a gaŋ puoruu na teŋ de korɔ Jehoova na. (Gyɔɔn 6:27) Jehoova eŋɛɛ noɔre ka, ka teneeŋ de o puoruu de weɛ te zemmo poɔŋ, o na ko teŋ te yelfɛree zaa.
2. Wala teŋ na baŋ e a taa teɛroŋ naŋ soma a kyaare libie?
Yelmeŋɛ la, a Baabole yeleeŋ ka ‘libie na baŋ go teŋ,’ kyɛ a Baabole lɛ vɛŋɛɛŋ teŋ baŋ ka libie yoŋ koŋ toɔ̃ vɛŋ ka te taa popeɛloŋ. (Ikilisiasitiz 7:12) Azuŋ, a Baabole eŋ teŋ faŋa ka te ta nɔŋ libie, kyɛ lɛ ko teŋ kawane ka te “vɛŋ ka [te] niŋe paale ne bon [te] naŋ taa.” (Kanne Hiburu 13:5.) Ka teneeŋ vɛŋ ka te niŋe paale neŋ bon na teŋ taa na, te eŋɛ koŋ kyoɔre ka teneeŋ ba nyɛ boma na zaa teŋ boɔrɔ na. Te koŋ dire sama meŋ. (Yeng Yelibie 22:7) Te koŋ de te menne te eŋ gbaŋ ŋmeɛbo eŋɛŋ, kyɛbee ka teneeŋ wa woŋ ka toma mine bebeŋ a na toɔ̃ vɛŋ ka te nyɛ libie wieoŋ, te koŋ de te menne te eŋ a poɔŋ.
3. Bo yelsonne mine la teŋ na baŋ de libie na teŋ taa na e neŋ?
Jehoova eɛ Naaŋmen naŋ yuoro o nu a terɛ boma. Ka teneeŋ meŋ “taa nimibaaloŋ kyɛ pono [te] boma,” lɛ na wuliŋ ka te tɔglɛɛ Jehoova. (1 Timoti 6:18) Te na baŋ yi la te poɔ zaa a de libie na teŋ taa na sonnɔ te yɔɔmine naŋ be a lantaapuoruu poɔŋ, a kyɛ lɛ sonnɔ noba naŋ be awonaa poɔŋ meŋ, a meŋɛmeŋɛŋ te Kristabitaaba. Lɛ na a libiri naŋ e kpoŋ seŋ na naane ka Jehoova maŋ kaara, kyɛ o maŋ kaarɛɛ poteɛrɛ na teŋ taa kyɛ terɛ na. Ka teneeŋ yi te sukyie zaa poɔŋ a yuoro te nuure a terɛ boma, te na taaɛ popeɛloŋ yaga, Jehoova meŋ poɔ na pɛleŋ.—Kanne Toma 20:35.
ZANNE YƐLƐ YAGA POƆ
Ho na zanne nyɛɛ lɛ hoŋ na toɔ̃ taa teɛroŋ soŋ a kyaare toma, ane lɛ hoŋ na toɔ̃ vɛŋ ka ho niŋe paale neŋ boma hoŋ taa na.
4. Vɛŋ ka sori na hoŋ maŋ tu kyɛ tonɔ toma na eŋnɛ Jehoova gyeremɛ
Jehoova zɔmenne ba maŋ de ba toma yɛlɛ deɛnɛ neŋ fẽẽ zaa. Ŋmɛ a VIDIO, a kyɛ gyieli a soorebie naŋ tu na yɛlɛ.
-
A yi a vidio poɔŋ, wala hoŋ teɛre kyaare gyogo na Jason naŋ taa o tomazieŋ ane lɛ na oŋ da maŋ tonɔ o toma na?
-
Wala ka Jason da e a wuli ka o ba vɛŋ ka o toma deɛ o wagre zaa?
Kanne Kolosi 3:23, 24, a kyɛ gyieli a soorebiri ŋa yɛlɛ:
-
Bo gyogo aŋ seŋ ka te maŋ de tonɔ toma zaa ba naŋ ko te ka te toŋ? Bonso hoŋ yel lɛ?
Toma yɛlɛ fɛrɛɛŋ yaga zaa. Kyɛ, a ba seŋ ka te tere sori ka te toma yɛlɛ ferɛ te yaga zaa a gaŋ puoruu na teŋ de korɔ Jehoova na
5. Ka teneeŋ vɛŋ ka te niŋe paale ne boma na teŋ taa na, te na nyɛ la tɔnɔ yaga
Noba yaga maŋ mɔɔrɛɛ ba mɔɔbo zaa ka ba nyɛ libie yaga. Kyɛ, a Baabole ko teŋ kawane ka lɛ eebo ba soma. Kanne 1 Timoti 6:6-8, a kyɛ gyieli a soorebiri ŋa yɛlɛ:
-
Bo ka a Baabole ko te kawane ka te e?
Te na baŋ taaɛ popeɛloŋ, haali ka teneeŋ ba taa bontaree yaga. Ŋmɛ a VIDIO, a kyɛ gyieli a soorebiri naŋ tu na yɛlɛ.
-
Aneazaa ka a booree deme ŋa ba taa libie yaga, kyɛ boŋ vɛŋ baŋ taa popeɛloŋ?
Kyɛ, te de ka te taaɛ bontaree yaga, a kyɛ naŋ boɔrɔ mine meŋ ka te poɔ, bo yɛlɛŋ na baŋ yi a poɔŋ wa? Yezu da de la yelmannaa kaŋa wuli toɔrɔ naŋ na toɔ̃ yi a poɔŋ a pɔge te. Kanne Luka 12:15-21, a kyɛ gyieli a soorebiri naŋ tu na yɛlɛ:
-
Bo yɛlɛ hoŋ zanne yi Yezu yelmannaa na poɔŋ?—Kaa o wɛlbo 15.
Kanne Yeng Yelibie 10:22 a de manne neŋ 1 Timoti 6:10. Ka yɛ naŋ wa kanne baare, yɛ gyieli a soorebie naŋ tu na yɛlɛ:
-
A yɛlɛ ayi ŋa buo soba la e nimizeɛ yaga zaa, ho neŋ Jehoova naŋ na e zɔmenne, bee hoŋ na taa libie yaga? Bonso hoŋ yel lɛ?
-
Ka teneeŋ boɔrɔ libie yaga zaa, boŋ na baŋ yi a poɔ wa?
6. Jehoova na vɛmeŋ ka te nu kpɛ boma yɛlɛ naŋ ferɛ te
Ka te toma yɛlɛ ane te libi yɛlɛŋ ba taa nimiri, a na baŋ vɛmeŋ ka a e kpeɛŋaa ka te dɛle Jehoova. Ŋmɛ a VIDIO a nyɛ lɛ teŋ na toɔ̃ e ka te toma yɛlɛŋ ba taa nimiri, ka a vidioŋ wa baare yɛ gyieli a soorebie ŋa yɛlɛ.
-
A yi a vidio poɔŋ, bo yelkpeɛne ka te yɔɔdɔɔ na da tuore?
-
Wala oŋ da e a toɔ̃ are a yelkpeɛne noɔreŋ?
Kanne Matio 6:25-34, a kyɛ gyieli a soorebiri naŋ tu na yɛlɛ:
-
Bo ka Jehoova eŋ noɔre ka o na e ko la neɛzaa naŋ de o yɛlɛ de weɛ o zemmo poɔŋ?
NOBA MINE MAŊ YELEŊ KA: “Aseŋ ka N toŋ tonkpeɛne a toɔ̃ kaa N booree deme soŋ. Azuŋ, N koŋ toɔ̃ gaa a lantaapuoruu lammore na daa zaa.”
-
A Baabole sɛgre buo soba la vɛŋ hoŋ sagedi ka, ka hooŋ de Jehoova puoruu de weɛ, lɛ na soŋ boŋ ka ho nyɛ boma na yɛlɛ na ferɛ bo na zaa?
A ZANNOO YELNIMIZEERE
Toma ane libie yɛlɛ fɛrɛɛŋ yaga zaa, kyɛ a ba seŋ ka te vɛŋ ka a pigi puoruu na teŋ de korɔ Jehoova na sori.
Bo Hoŋ Zanne
-
Wala hoŋ na toɔ̃ e a ta vɛŋ ka toma de ho wagre zaa?
-
Ka hooŋ vɛŋ ka ho niŋe paale neŋ boma na hoŋ taa na, bo tɔnɔ hoŋ na nyɛ?
-
Jehoova eŋɛɛ noɔre ka o na ko la o puorebiiri boma yɛlɛ naŋ ferɛ ba, wala hoŋ na toɔ̃ e a wuli ka ho sagɛɛ a yɛlɛ ŋa di?
YƐLƐ MINE NAŊ LƐ BEBE
A Baabole yeleeŋ ka libie ba soma bee? Kanne a yɛlɛ ŋa a nyɛ a noɔre iribo.
“Libie Nɔmmo La Faaloŋ Boorɔ Zaa Yiibu Zie Bee?” (Intanɛt zu gane)
Wala teŋ na toɔ̃ e a terɛ boma ka lɛ vɛŋ ka Naaŋmen poɔ pɛle?
“Boŋ Ka A Baabole Yel Kyaare Boma Terebo?” (Intanɛt zu gane)
Gbaŋ ŋmeɛbo eɛ yelfaa bee? Kanne a yɛlɛ ŋa a nyɛ a noɔre iribo.
“Boŋ Ka A Baabole Yel Kyaare Gbaŋ Ŋmeɛbo?” (Awake!, March 2015)
Dɔɔ kaŋa da eɛ naŋnyige kpeɛŋaa a kyɛ da ŋmeɛrɛ gbaŋ meŋ, kanne nyɛ bon naŋ da somoo oŋ leɛre o zemmo yɛlɛ.
“N Da Nɔŋ La Wie Zɔmmo Zogaŋtaa Yaga Zaa” (A Watchtower, November 1, 2011)
