É kọ à íe tṍó eo beè ié tã̀àgã̀ bùlà ea kil ló bé eo é láá ié tóm àbèè kpègè naa? Àé láá dú nu ànà-ànà nèài ge ẹ̀b nú ea kil ló bẹẹ bíi vaá láá fã̀ Jìhóvà mm̀ sĩ́deè ea bọ́ló. Kpá Káí néi gbò dùùlà bá deè tṍ ea é láá nvèè bá nèi.

1. Éé ní e Kpá Káí kọ́ kilma ló tóm ẽ́?

Bàrì gbĩ́ kọọ̀ é dé kpéè ló bẹẹ tóm. Kpá Káí kọ́ọ̀, “náa íe nú ea dú lé èlmà ge kọọ̀ nen . . . dé kpéè ló a àgẹ tóm.” (Ẹ̀klìzíástìs 2:24) Jìhóvà ólò sí tóm agẹlẹ bá. Tṍó e nóò ẹlẹ mm̀ ge sí tóm agẹlẹ bá, à ólò naa kọọ̀ nyíée á ẹẹ vaá lóói ólò dĩ̀ìnà.

À palàge dú bíi kọ é sí tóm. Sõò náa bọ́ló kọ á bọọí ló èlmà ge fã̀ Jìhóvà. (Jọ́ọ̀n 6:27) Jìhóvà zigà kọ àé ẹbvìè nú ea kilìèí ló, be è tú gè fãàe naamá túá kà nú mm̀ bẹẹ dùm.

2. Móbá ní ea bọ́ló kọ é ẹ̀bmà kpègè e?

Náa kal ló béè kọọ̀ Kpá Káí kọ́ọ̀ “kpègè ólò kpènà nen,” à ãané nái gé kọọ̀ áá kpègè náa é láá naa kọọ̀ nyíéi á ẹẹ. (Ẹ̀klìzíástìs 7:12) Vóà naa, Kpá Káí síèi kpóó ló kọ é gá vùlè kpègè, tãa vó ‘nú e íè á gbõomáí ló.’ (Bugi Híbrù 13:5.) Tṍó e nú e íè gbõomáí ló, àé náa kọ é gá ié tã̀àgã̀ bùlà ge kpáá íe gã́bug nu. Àé náa kọ é gá dõogẽ bọọlẹ kpègè. (Próvẹẹ̀b 22:7) Vaá àé náa kọọ̀ é gá dọ bá gẹẹ-gẹẹ ló ea di ló ge bìlà kpègè nè ge naa gbò nú ea é náa kọ é vàlẹ̀ bá ié kpègè e bè née é mon tã̀àgã̀ boo.

3. Mósĩ́ deè ní eé láá tú bẹẹ kpègè nvèèmà bá nè dõòna gbò e?

Jìhóvà dú Bàrì ea ólò dõo nu taalẹ bá, vaá beele nóò ẹlẹ tṍó e dõò nu “taalẹ bá vaá . . . di kpènà ló gè dõo nu nè nen.” (1 Tímotì 6:18) Èé láá tú bẹẹ kpègè nvèèmà bá nè dõòna gbò tení dú ló gè nè lọ̀là-lọ̀là mm̀ ge nvèèmà sãa kúm bõ̀ònatõ̀ò nè ge nvèè bá nè gbò e bíi di ló, èlmà tõ̀ò pá vígà. Jìhóvà palàge ié lèèma mm̀ bùlà e neemà nu, níì áá gã́bug nu e neè nì. Tṍó e dõò nu lọa bùlà, nyíéi é ẹ́ẹ vaá nyíè Jìhóvà é ẹ́ẹ nagé.—Bugi Tóm 20:35.

 KPÁÁ NÓ BỌ̀Ọ̀VẸ̀

4. Nvèè ka ló Jìhóvà tení dú ló bé eo síì tóm naa

 5. Ge kọọ̀ nú e íè gbõomáí ló ólò dọ̀ bélè nèi

À ólò leemá gbele tõ̀ò nen gè ié gã́bug kpègè. Sõò Kpá Káí néi dùùlà bá deè tṍ ea dú kele ló níá. Bugi 1 Tímotì 6:6-8, vaá ò gbóó aalai nakà bíbví:

• Éé ní e Kpá Káí síèi kpóó ló kọ é naa ẽ́?

6. Jìhóvà é ẹb nú ea kil ló bẹẹ bíi

 NÚ E NI NÓ

À dú bíi kọọ̀ é ié kpègè nè tóm gè sì, sõò náa bọ́ló kọ á ọọvẹ ló bẹẹ gè fã̀ Jìhóvà.

Ge Òòa Boo

• Éé ní ea é láá nvèè bá nè ni kọ ó ẹ̀b tóm boo bá ea bọ́ló é?

• Gè kọọ̀ nú eo íè gbõomá ní ló é dọ bélè nè ni naa vàẹ?

• Mósĩ́ deè ní eo é láá zogè kọ ò dẹlẹ̀ẹ̀ nyíé boo zìgànù Jìhóvà kọ àé ẹb nú ea kil ló pá a gbò e?