ƐLĀ Ō NWU ƆMƐ 37

Ɔdi Nɛ Ubáyíbu Ka Lɛyikwu Uklɔ Mla Ije A

GBƆƆ

A junwalu lɛ iyi uwɔ jeeje lɛyikwu uklɔ amāŋ ije ɛ? Ó gē tɔɔtɛ ō ya ɛgbá ku alɔ mla ō gba Ujehofa ɛ̄gbā ɔwɛ nɛ ó dɔka ŋ. Ubáyíbu da alɔ ɔwɛ ōhī nōo lɔfu ta alɔ abɔ.

1. Ɔdi nɛ Ubáyíbu ka lɛyikwu uklɔ a?

Ɔwɔico dɔka ku alɔ jɔɔnyɛ uklɔ ku alɔ. Ubáyíbu kahinii: “Ɔdā ɔhá dúúmā í yɔ̄ nōo lɔhi lɛ ɔ̄cɛ fíyɛ́ o yɔ̄ ī . . . jɔ́ɔnyɛ kú ɔdā nɛ̄ ó yúklɔ́ nū ā ŋ́.” (Ɔ̄cokóītá 2:24) Ujehofa gē yuklɔ lɔɔlɔhi. Eko duuma nɛ alɔ gbla ɔ ya ŋma lɛ ō yuklɔ ku alɔ lɔɔlɔhi, alɔ gē ya ɔdā nōo he ɔ ɔtu klla gē gweeye mla iyi alɔ duu.

Uklɔ wɛ ɔdā nōo cɛgbá. Amáŋ, alɔ hii cɛ kóō kwu piya ɔdā ō cɛgbá fiyɛ ɛ̄gbā ō gba ku alɔ lɛ Ujehofa ŋ. (Ujɔ́ni 6:27) Ó cokonu ku ɔdaŋ ku alɔ kwu ɛ̄gbā ō gba ku nu i ta aflɛyi ipu oyeeyi ku alɔ, ó géē ya ɛgbá ku alɔ lɛ alɔ.

2. Ɔdi nōó wɛ ka ɔcɛ kóō leyi má ije ɔwɛ olɔhi a?

Naana nɛ Ubáyíbu ka “ije gē gbō ɔ̄cɛ ɛyí ā,” ó klla da alɔ ka ije foofunu i gáā ya ku alɔ lɛ eeye ŋ. (Ɔ̄cokóītá 7:12) Ohigbu ɔɔma, Ubáyíbu ta alɔ ɔtu kwu ɔtu ku alɔ hii yihɔtu ku ije ŋ. Amáŋ, ó da alɔ kahinii: “Ɔdā nɛ̄ aá lɛ ā kóō jɛ̄ aá eyī.” (Jé Ācɛ Uhíbru 13:5.) Eko duuma nɛ ɔdā nɛ alɔ lɛ a jɛ alɔ, ɔtu i gáā biya lɛ alɔ ohigbu ku alɔ gbɛla ku alɔ i lɛ ɔdā nɛ alɔ cika ō lɛ a ŋ. Alɔ i klla gáā bi ule iciici ŋ. (Aíita 22:7) Alɔ i gáā gwonu tu ipu ukpa ku anya ō ta ŋ. Alɔ i klla gáa nyɔ i dɔka uklɔ amāŋ ɔhi ō ta nɛ ācɛ gē ka icɛ kóō gē ya ka ɔcɛ kóō lɛ ije fiya fiya ŋ, ohigbu ka unwalu nɛhi gē ta ɔ ɔkwu.

3. Ɛgɛnyá nɛ alɔ lɔfu nwula abɔ mla ije ku alɔ a?

Ujehofa wɛ Ɔwɔico nōo gē nwula abɔ, alɔ kē lɔfu gbla ɔ ya. Ubáyíbu kahinii: ‘Nwula abɔ lɛ ācɛ nɛ ɛgbá ce uwa a, ku a kéē le tutu ō kɔ ɔdā nɛ a lɛ a mla ācɛ ɔhá.’ (1 Utímōti 6:18) Alɔ lɔfu nwula abɔ mla ije ku alɔ ŋma lɛ ō je otabɔ lɛ ujɔ mla ō je otabɔ lɛ ācɛ ɔhá nɛ ɛgbá ce uwa a, ofiyɛ duu ayinɛ alɔ ipu ujɔ. Ó wɛ ije ɛmula nɛ alɔ je a wɛ ɔdā nɛ Ujehofa yɔ i má a ŋ, amáŋ ɔtu nɛ alɔ bi le je ije a. Eko duuma nɛ alɔ je ŋma ipu ɔtu ku alɔ, alɔ géē lɛ eeye, alɔ klla i ya ɔdā nōo he Ujehofa ɔtu duu.—Jé Úklɔ́ kú Ācotɛ̄hɔ̄ 20:35.

JÉ GƆBU

Má itene nōo gē wa ŋma ō lɛ uklɔ ta ɛga ō kpaakpa nōó cika ō yɔ a mla itene nōo gē wa ɔdaŋ ku ɔdā nɛ alɔ lɛ a jɛ alɔ eyī.

4. Lɛ ojilima ce Ujehofa ŋma lɛ ɔwɛ nɛ a gē yuklɔ a

Ɛma ku alɔ mla Ujehofa cika ō lɛ abɔ kwu ɛgɛ nɛ ɔtu gē ya alɔ lɛyikwu uklɔ a. Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.

UVIDIO: Yuklɔ Lɛ Ujehofa Mla Ɛjɛɛji Ɔtu Ku Uwɔ (4:39)

Ipu uvidio a, ɔdi he uwɔ ɔtu lɛyikwu uce ō ya ku Jason mla ɛgɛ nɛ ó gē ya odee lɛ ɛgiyi uklɔ a?
Ɔdi nɛ ó ya o ya ɛɛ kóō lɛ uklɔ ku nu ta ɛga okpaakpa nōó cika ō ta a?

Jé Ācɛ Ukólōsi 3:23, 24, cɛɛ ku aa kɔka lɛyikwu ɔka nyā:

Ɔdiya nɛ ɛdɔ ɔtu nɛ alɔ bi lɛyikwu uklɔ wɛ ɔdā nōo cɛgbá a?

Uklɔ wɛ ɔdā nōo cɛgbá. Amáŋ, alɔ hii cɛ kóō kwu piya ɔdā ō cɛgbá fiyɛ ɛ̄gbā ō gba ku alɔ lɛ Ujehofa ŋ

5. Ɔdaŋ ka ɔdā nɛ alɔ lɛ a jɛ alɔ, alɔ géē lɛ itene

Ācɛ ōhī gē ceyitikwu kéē lɛ ije nwune tōōtɔ̄ɔ̄ ɛgɛ néē lɛ gla a. Amáŋ, Ubáyíbu ta alɔ ukɔ́ ɛyɛɛyi. Jé 1 Utímōti 6:6-8, cɛɛ ku aa kɔka lɛyikwu ɔka nyā:

Ɔdi nɛ Ubáyíbu ta alɔ ɔtu kwu ɔtu ku alɔ ya a?

Ɔdaŋ ku alɔ i kóō lɛ nwune ŋ naana, alɔ lɔfu lɛ eeye. Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.

UVIDIO: “Ɔdā Nɛ A Lɛ A Kóō Jɛ Uwɔ Eyī” (3:20)

Naana nɛ apɔlɛ a i lɛ ije nwune ŋ ma, ɔdi gē cɛ lɛ uwa gweeye a?

Amáŋ, ɔdaŋ ku alɔ lɛ nwune nɛ alɔ kē dɔka ō lɛ tōōtɔ̄ɔ̄ bɛɛ? Ujisɔsi ka alɔ ɔ̄kā éyi nōo mafu unwalu nōo gē bɛɛcɛ ŋma anu a. Jé Ulúku 12:15-21, cɛɛ ku aa kɔka lɛyikwu ɔka nyā:

Ɔdi nɛ a nwu ŋma ɔ̄kā ku Ujisɔsi a?—Má ɔgba 15.

Jé klla má Aíita 10:22 mla 1 Utímōti 6:10. Cɛɛ ku aa kɔka lɛyikwu aɔka nōo ba nyā:

Ɔdi nɛ a gbɛla ka ō wɛ ɔdā ō cɛgbá fiyɛ duu a? Ō lɛ ɛma mla Ujehofa, kɛɛ ka ō lɛ ije nwune tōōtɔ̄ɔ̄? Ɔdiya a?
Unwalu nyá gē wa ŋma ō nu ije inya a?

6. Ujehofa géē ya ɛgbá ku alɔ lɛ alɔ

Unwalu ku uklɔ mla ije lɔfu je ɔtu okpoce ku alɔ má lɛ Ujehofa. Lɛ UVIDIO nyā mafu o ya ɛɛ ku alɔ má ɔdā nɛ alɔ géē ya eko nɛ alɔ yɔ i má ɛdɔ unwalu ɛgɛnyā, cɛɛ ku aa kɔka lɛyikwu aɔka nōo ba nyā.

UVIDIO: Ujehofa Géē Ya Ɛgbá Ku Alɔ Lɛ Alɔ (6:21)

Ipu uvidio a, unwalu ɛyɛɛyɛyi nyá nɛ ɔyinɛ nɔnyilɔ a má a?
Ɔdi nɛ ó ya o ya ɛɛ kóō lɛ unwalu ɛyɛɛyɛyi ku nu yale mɛɛlɛ a?

Jé Umátiyu 6:25-34, cɛɛ ku aa kɔka lɛyikwu ɔka nyā:

Ɔdi nɛ Ujehofa cokonu ō ya lɛ ācɛ nōo gē lɛ ɔ ta aflɛyi ipu oyeeyi ku uwa a?

ĀCƐ ŌHĪ GĒ KA: “N cɛgbá ō yuklɔ nwune o ya ɛɛ ku um ta apɔlɛ ku um abɔ. Ń gáā bēē gā ōjila ku ujɔ alaadi doodu ŋ.”

Ɛga ku Ubáyíbu nyá cɛ gā uwɔ kpɔtuce peee ka ō lɛ ɛ̄gbā ō gba ku Ujehofa ta aflɛyi ipu oyeeyi ku uwɔ wɛ ōmiya nōo lɔhi fiyɛ duu a?

ƆDI NƐ A NWU A?

Uklɔ mla ije wɛ ɔdā nōo cɛgbá, amáŋ é cika ō pi alɔ ŋma ō gba Ujehofa ɛ̄gbā ŋ.

Aɔka ō tu alɔ ɛlá kwu ɔdā nɛ alɔ nwu

Ɔdi gáā ta uwɔ abɔ ku a gē leyi má uklɔ ɔwɛ olɔhi a?
Itene nyá gē wa, ɔdaŋ ku ɔdā nɛ a lɛ a jɛ uwɔ a?
Ɛgɛnyá nɛ a géē mafu ɔtooce lɛ okonu ō ce ku Ujehofa kóō géē ya ɛgbá ku ācɛ ɔlɛ nu lɛ uwa a?

Um ya ɛlā ō nwu nyā mɛ ɛ̄cī:

Ɔdā nɛ a géē ya

Leyi yɛ ɔ ɔdaŋ ka uklɔ nɛ a yɔ i ya a ci uwɔ ŋma ō gā ōjila ku ujɔ igbalɛwa, ŋmiifi ɔya ōhī nōo gáā yɛ ɛ ma. Ɔdaŋ kóō lɛ a, lɛ ōmiya ya ku a lɛ āhɔ̄ a piyabɔ gā olɔhi fiyɛ.

Ɔdā ɔhá:

Ɔdā ɔhá nɛ a géē ya