ANG ỌJẸ́JẸ 37
Ẹla Ọlẹ ká ỊBayịbụụ Ya u-Uhye nya Ụkụrwọ Bala Okpoko
À la uko ọchịchị u-uhye nya ụkụrwọ bala okpoko ẹnẹhẹ lẹ? Ọ kaa lujwo ụka ọhẹ nyọka kpahị ju ịbaba nyahị bala ọ-ka myịmyị juwa gbịgba ha iJihova jaabwọ kọ chịla. ỊBayịbụụ ya ẹla u-uhye nya ang ịlẹ kahị ka jẹ́-ẹ họ nyọka dahị ụbwọ.
1. Ẹlịyẹ ịBayịbụụ à tị́ ya u-uhye nya ụkụrwọ?
Ohe Oluhye tịtọ kahị ka yé ọkẹkẹnị ẹ-ẹpwụ nya ụkụrwọ nyahị. ỊBayịbụụ ya nyori “ang ọhagu ọlẹ ká ọngịnyị ehe ka họ ri ọ-ka . . . [ya] ụya ju ụkụrwọ ọlẹ kọ họ.” (Ọngọlirya 2:24) IJihova kaa họ ụkụrwọ yẹẹyẹẹ. Ụka kahị gbịlọọ bwula ọ-họ ụkụrwọ yẹẹyẹẹ, ẹla nyahị ka kpọọ ịpyọ, ahị tị ka chị ọkẹkẹnị ịnyịnyị.
Ụkụrwọ baba. Ma, áhị ka hwoo nya ang ọlẹ kọ baba gụ ịgba ọgbagba nyahị ha iJihova ka. (ỊJọn 6:27) Ụka kahị hu ịgba ọ-gba ha iJihova nya ang ọlẹ kọ baba hahị gụgụ wuu ẹ-ẹpwụ nya ọhịhị, ọ myị ọnụ nyọka họ ịbaba nyahị hahị.
2. Ányị ahị tị́ ka bwu lirya ọkpakpa ẹ-ẹga nya okpoko?
Nanana nyori ịBayịbụụ ya “okpoko [nyị] kaa chewu ke ọngịnyị,” ọ gbileehi ụbwọ ụ-ụrụ ịnyịnyị nyori okpoko kem nyị́ ka jẹ́-ẹ ya ọkẹkẹnị hahị ka. (Ọngọlirya 7:12) Lẹẹlẹ, ịBayịbụụ juhi ọhụ nyori ahị nyị la ọháha ha okpoko ka, ọkọkọ nya ọọwa, ‘ang myị́ ang ọlẹ kahị nyị la juwa nyị nwahị ba ụ-ụwa mẹ.’ (Wa Ala iHiburu 13:5.) Kori ká ang ọlẹ kahị la juwa á nwahị ba ụ-ụwa, ahị ka la ịlọhị bwu ẹpwụ nya imahị omeme nyọka juwa maga nyọka la ang gụ ọwọwa. Ahị ka cheji ba hi uri ọkpakpa ododoodu. (Etu 22:7) Ịnyịnyị, ahị ka cheji ba hi akama ọlẹpwụ nya ẹchị nya okpoko ọdada bala ọ-pịrị ju nyọka họ ang ịlẹ kahị ka yé okpoko ahyaahị la ọ-bịrị ụka ka.
3. Ányị ahị tị́ ka bwu kpa okpoko nyahị họ ang o-ju apyobwuna ha angịkịla?
IJihova ri ọngọ kaa hu ha, ahị wẹẹ gbịlọọ ụka kahị “pyẹ ụbwọ . . . maa hu ha angịkịla, bala ọ-ga angịnyị ahị.” (1 iTimoti 6:18) Ahị ka jẹ́-ẹ kpa okpoko nyahị da ọjịra-jịra bala angịkịla ịlẹ kị la ọbaba ụbwọ, ọgụgụụgụ ri aanahị. Irya ọlẹ kahị kpa hu ha iJihova à kaa yẹ lẹ, o-okpoko ịmanyị ọlẹ kahị jụ hu ha ka. Ụka kahị hu ha bwu ọkịlẹtụ nyahị, ahị ka chị ọkẹkẹnị, ẹla nyahị tị ka kpụ iJihova ịpyọ.—Wa Ụkụrwọ nya Alẹrụ 20:35.
JẸ́ GỤ ỌỌWA
Yẹ apyobwuna nya ọ-lirya ọkpakpa ẹ-ẹga nya ụkụrwọ bala ang ọ-nwà ọngịnyị nwà.
4. Chị ihi ju iJihova bwula abwọlẹ á kaa họ ụkụrwọ
Igu oriri nyahị bala iJihova chịla kọ ka gu abwọlẹ kahị kaa họ ụkụrwọ. Yẹ IFIM ọwẹ, kanụ ya ẹla u-uhye nya ịtọ ẹla ịlẹ:
-
Ẹ-ẹpwụ nya ifim ọwẹ, ẹlịyẹ u-uhye nya abwọlẹ ká Jason kaa họ ụkụrwọ bala abwẹla nyamwụ ọ-ọlụkụrwọ à tị́ myịng lẹhị yẹẹyẹẹ?
-
Ịyẹ ọ tị́ họ nyọka họ ụkụrwọ kpoye nya oyi ka?
Wa Ala iKolosi 3:23, 24, kanụ ya ẹla u-uhye nya ịtọ ẹla ọlẹ:
-
Ịyẹ tị́ du ká irya ọlẹ kahị la jahị da ụkụrwọ baba yẹẹyẹẹ?
Ụkụrwọ baba. Ma, áhị ka hwoo nya ang ọlẹ kọ baba gụ ịgba ọgbagba nyahị ha iJihova ka
5. Ang ọ-nwahị nwà kaa kpa apyobwuna wahị
Angịnyị lụmẹ-lụmẹ kaa maga nyọka la okpoko myị ang myị́ ang. Ma, ọhụ ọlẹ ká ịBayịbụụ juhi tị datị hi ọọwa. Wa 1 iTimoti 6:6-8, kanụ ya ẹla u-uhye nya ịtọ ẹla ọlẹ:
-
Ẹlịyẹ ịBayịbụụ à tị́ juhi ọhụ nyọka họ?
Kori kahị dọmwụ la ang lụmẹ ka, ahị ka jẹ́-ẹ chị ọkẹkẹnị. Yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.
-
Nanana nyori ugbiyegu ịwẹ-ẹ́ la okpoko lụmẹ ka, ịyẹ tị́ du kị chị ọkẹkẹnị?
Kori kahị la okpoko lụmẹ, kahị tị juwa tịtọ nyọka la gụ ọọwa bẹẹ? IJisọsị ya akama ọlẹpwụ nyamwụ. Wa iLuku 12:15-21, kanụ ya ẹla u-uhye nya ịtọ ẹla ọlẹ:
-
Ẹlịyẹ a tị́ jẹ́ bwu oja ọ-chụ pwokwita nya iJisọsị ọwẹ?—Yẹ ọgba 15.
Wa Etu 10:22 bala 1 iTimoti 6:10, kanụ ya ẹla u-uhye nya ịtọ ẹla ịlẹ:
-
Oyina lẹpwụ nya ang ịlẹ à tị́ baba gụ? Ọ-ka ri oligu nya iJihova lee ọ-ka la okpoko lụmẹ-lụmẹ tị́? Ịyẹ tị́ du?
-
Akama iyina à tị́ juwa ẹ-ẹpwu nya okpoko okuku?
6. IJihova ka họ ịbaba nyahị hahị
Akama ọlẹpwụ nya ụkụrwọ bala okpoko o-yé nwà-ka, ka jẹ́-ẹ ma ọmyịmyị nyahị ẹ-ẹga nya iJihova yẹ. Yẹ IFIM ọwẹ nyọka yẹ ang ọlẹ kahị ka họ ụka kahị la akama ịlịnyị, kanụ ya ẹla u-uhye nya ịtọ ẹla ịlẹ kị tọọ da.
-
Ẹ-ẹpwụ nya ifim ọwẹ, akama iyina ọọnahi ọlẹng ọwẹ à tị́ la?
-
Ịyẹ ọ tị́ họ nyọka kụrụ akama ịịwa?
Wa ịMatiyu 6:25-34, kanụ ya ẹla u-uhye nya ịtọ ẹla ọlẹ:
-
Ehe oyina iJihova à tị́ chị angịlẹ kị hu ịgba ọgbagba nyamwụ kụ ịlahị nya ang myị́ ang wuu?
ANGỊHYẸ KAA YẸKẸẸ: “M̀ baba nyọka họ ụkụrwọ yẹẹyẹẹ nyọka da ugbiyegu nyam ụbwọ. Ḿ ka jẹ́-ẹ ka ọjịra-jịra epwihi ọnyị myị́ ọnyị ka.”
-
Ụpwụ ịgọgo oyina à tị́ ya ọ-jẹ́ myị̀myị̀ hang nyori o-hu ịgba ọgbagba nya iJihova kụ ịlahị à há gụgụ wuu lẹ?
ẸLỊYẸ A TỊ́ JẸ́?
Ụkụrwọ bala okpoko baba, ma ahị myị kị ri ochuchuu hahị ẹ-ẹpwụ nya ịgba ọgbagba nya iJihova ẹnẹnẹhẹ ka.
Ẹlịyẹ A Tị́ Yụbwọ Chị?
-
Ịyẹ à tị́ ka dang ụbwọ nyọka họ ụkụrwọ meme labwọ?
-
Apyobwuna oyina a tị́ yé bwula ang ọ-nwang nwà?
-
Ányị a tị́ ka mẹ ahị ọdahile nyang jẹ ẹ-ẹga nya ehe ọchịchi nya iJihova nyọka họ ịbaba nya angịnyị nyamwụ haa?
JẸ́ ANG ỊLẸ DỌỌ U-UHYE
Wụla yẹ kori ká ịBayịbụụ-ụ́ ya nyori okpoko ọlala nyị tịpyọ.
“Okpoko à Ri Ụtẹ nya Ịhọbịrị Wuu Lẹ?” (Ụpwụ ọla intanẹtị)
Ụma nya o-hu ha oyina à tị́ kaa kpụ iJihova ịpyọ?
“Ẹlịyẹ ỊBayịbụụ à Tị́ Ya u-Uhye nya o-Hu Ha?” (Ụpwụ ọla intanẹtị)
Ẹchị nya okpoko ọdada há?
“Ẹla Ọlẹ ká ỊBayịbụụ Ya u-Uhye nya Ẹchị nya Okpoko Ọdada” (Awake! Ọya Ọhata, 2015)
Yẹ ịngịhyẹ ọlẹ kọ du ká ọlẹng ọhẹ hwabwọ la ọ-ka da ẹchị nya okpoko bala oyi oyiyi.
