LEKSION 37
No Ania ti Ibaga ti Biblia Maipapan iti Trabaho ken Kuarta
Napadasam kadin ti nagdanag gapu iti trabaho wenno kuarta? Mabalin a saan a nalaka a paggiddanen ti agsapul iti pagbiagtayo ken ti agserbi ken Jehova. Adda makatulong a balakad ti Biblia kadatayo.
1. Ania ti kuna ti Biblia maipapan iti trabaho?
Kayat ti Dios a naragsaktayo iti trabahotayo. Ibaga ti Biblia nga “awanen ti nasaysayaat iti maysa a tao no di ti . . . mangtagiragsak iti bunga ti napasnek a panagtrabahona.” (Eclesiastes 2:24) Nagaget ni Jehova. No tuladentayo ti kinagagetna nga agtrabaho, maparagsaktayo isuna ken maragsakantayo met.
Napateg ti trabaho. Ngem saantayo koma nga ipalubos nga agbalin a napatpateg dayta ngem iti panagserbitayo ken Jehova. (Juan 6:27) Ikarkarina a no iyun-unatayo isuna, ipaaynanto dagiti kasapulantayo.
2. Ania koma ti umiso a lugar ti kuarta iti biagmo?
Ibaga ti Biblia a ti “kuarta ket proteksion.” Ngem ibagana met a saan laeng a dayta ti mangparagsak kadatayo. (Eclesiastes 7:12) No kasta, saantay koma nga ayaten ti kuarta, no di ket ‘kontentotayo koman kadagiti agdama a bambanag.’ (Basaen ti Hebreo 13:5.) No kontentotayo iti adda kadatayo, saantayo a maupay ta ditay pampanunoten a kurang ti adda kadatayo. Saantayo a mailumlom iti utang. (Proverbio 22:7) Maliklikantayo met ti agsugal ken makiraman kadagiti negosio nga alisto a panguartaan.
3. Ania ti nasayaat a pangusarantayo iti kuartatayo?
Naparabur a Dios ni Jehova, ket tultuladentayo no ‘naparaburtayo, nakasagana a mangted.’ (1 Timoteo 6:18) Mabalintayo nga usaren ti kuartatayo a mangsuporta iti kongregasion ken mangtulong kadagiti agkasapulan, nangnangruna dagiti kapammatiantayo. Saan a ti kaadu ti itedtayo ti napateg ken Jehova, no di ket ti motibotayo. No naimpusuan a mangtedtayo, agbalintayo a naragsak ken maparagsaktayo ni Jehova.—Basaen ti Aramid 20:35.
AMMUEM TI AD-ADU PAY
Kitaem ti pagsayaatanna no kontentoka ken no umiso ti lugar ti trabaho iti biagmo.
4. Pakaidayawan koma ni Jehova ti kababalinmo iti trabaho
Ti pannakigayyemtayo ken Jehova ket adda koma epektona iti kababalintayo iti trabaho. I-play ti VIDEO, sa pagsaritaan dagiti sumaruno a saludsod.
-
Iti video, ania ti nagustuam iti kababalin ni Jason iti trabaho?
-
Ania ti inaramidna tapno saan a ti trabahona ti agbalin a prioridadna?
Basaen ti Colosas 3:23, 24, sa pagsaritaan daytoy a saludsod:
-
Apay a napateg ti kababalintayo iti trabaho?
Napateg ti trabaho. Ngem ditay koma ipalubos nga agbalin a napatpateg dayta ngem iti panagserbitayo ken Jehova
5. Pagimbagantayo no kontentotayo
Agporporsegi ti adu a tattao nga agurnong iti adu a kuarta. Ngem sabali ti iparparegta ti Biblia. Basaen ti 1 Timoteo 6:6-8, sa pagsaritaan daytoy a saludsod:
-
Ania ti iparparegta ti Biblia kadatayo?
Uray bassit ti kuartatayo, posible latta nga agbalintayo a naragsak. I-play ti VIDEO, sa pagsaritaan ti sumaruno a saludsod.
-
Apay a naragsak dagitoy a pamilia uray bassit ti kuartada?
Ngem no ngay nabaknangtayon ngem kayattayo pay ti ad-adu? Adda inyestoria ni Jesus a mangipakita a delikado dayta. Basaen ti Lucas 12:15-21, sa pagsaritaan daytoy a saludsod:
-
Ania ti nasursurom iti ilustrasion ni Jesus?—Kitaen ti bersikulo 15.
Basaen ken pagkomparaen ti Proverbio 10:22 ken 1 Timoteo 6:10. Kalpasanna, pagsaritaan dagitoy a saludsod:
-
Para kenka, ania ti napatpateg? Pannakigayyem ken Jehova wenno adu a kuarta? Apay?
-
Ania dagiti pagdaksanna no kanayon a kayatmo ti ad-adu a kuarta?
6. Ni Jehova ti makaammo kadagiti kasapulantayo
Masubok ti panagtalektayo ken Jehova no agproblematayo maipapan iti trabaho ken kuarta. I-play ti VIDEO tapno makita no kasano a sanguen dagiti kasta a problema. Kalpasanna, pagsaritaan dagiti sumaruno a saludsod.
-
Iti video, ania dagiti problema a nakaipasanguan ti kabsat?
-
Ania ti inaramidna tapno mapagballigianna dagita?
Basaen ti Mateo 6:25-34, sa pagsaritaan daytoy a saludsod:
-
Ania ti ikarkari ni Jehova kadagidiay mangyun-una kenkuana?
KUNA TI DADDUMA: “Masapul nga agtrabahoak nga agtrabaho tapno masuportarak ti pamiliak. Isu a diak masango ti makigimong iti kada lawas.”
-
Ania a teksto ti nangkombinsir kenka a kanayon a kasayaatan ti panangyun-una iti panagserbi ken Jehova?
SUMARIO
Napateg ti sekular a trabaho ken kuarta. Ngem saan koma nga apektaran dagita ti panagserbitayo ken Jehova.
Rebiu
-
Ania ti makatulong kenka tapno kanayon a balanseka no maipapan iti trabaho?
-
Kasano a pagsayaatam no kontentoka?
-
Kasanom a maipakita nga agtaltalekka iti kari ni Jehova nga ipaayna ti kasapulan dagiti agserserbi kenkuana?
AGDISKOBREKA PAY
Kitaem no ibagbaga ti Biblia a dakes ti kuarta.
“Ti Kadi Kuarta ti Ramut ti Amin a Kinadakes?” (Artikulo iti website)
Ammuem no kasanotayo a mausar ti kuartatayo a mangparagsak iti Dios.
“Ania ti Kuna ti Biblia Maipapan iti Panangted?” (Artikulo iti website)
Awan kadi pagdaksan ti panagsugal?
“No Ania ti Kuna ti Biblia—Panagsugal” (Agriingkayo!, Marso 2015)
Kitaem no kasano a nagbalbaliw ti dati a sugador ken agtatakaw.
“Pagay-ayatko ti Lumba ti Kabalio” (Ti Pagwanawanan, Nobiembre 1, 2011)
Baka Kayatmo Met ti
MASANSAN A MAISALSALUDSOD
Ania ti Panagadal iti Biblia nga Iyaw-awis Dagiti Saksi ni Jehova?
Iti libre a panagadal nga iyaw-awis dagiti Saksi ni Jehova, mabalinmo nga usaren ti aniaman a patarus ti Biblia. Mabalinmo nga awisen ti amin a kapamiliam wenno ti asinoman a gayyemmo.
