Keti nge me kudiyangisaka dezia sambu na kisalu mpi mbongo? Yo lenda vanda mpasi sambu beto zwa bima ya beto kele ti yo mfunu mpi kusadila Yehowa na ntima ya mvimba. Biblia ke pesaka bandongisila ya mfunu yina lenda sadisa beto.

1. Inki Biblia ke tubaka sambu na kisalu?

Nzambi ke zolaka nde beto sepela ti kisalu na beto. Biblia ke tuba nde: “Kima ya kuluta mbote sambu na muntu kele ve, katula kaka . . . kuwa kiese sambu na kisalu na yandi ya ngolo.” (Longi 2:24) Yehowa ke salaka ngolo. Kana beto ke sala ngolo bonso yandi, beto ta sepedisa yandi mpi beto mosi ta vanda na kiese.

Kisalu kele mfunu. Kansi beto fwete bika ve ata fioti nde yo kuma mfunu mingi kuluta kusambila Yehowa. (Yoane 6:27) Yehowa ke tubaka nde yandi ta pesa beto bima yina beto kele ti yo mfunu sambu na kuzingila kana beto ke tula yandi na kisika ya ntete.

2. Inki Biblia ke tubaka sambu na mbongo?

Biblia ke tubaka nde “mbongo ke taninaka.” Kansi yo ke songaka beto mpi nde mbongo yo mosi lenda pesa beto ve kiese. (Longi 7:12) Yo yina, Biblia ke lombaka beto na kuzola ve mbongo kansi na ‘kusepela ti bima yina beto kele na yo.’ (Tanga Baebreo 13:5.) Kana beto ke landa kusepela ti bima yina beto kele na yo, beto ta kudiyangisa ve mingi ata beto kele ve ti bima ya kufwana. Beto ta baka mpi ve bamfuka ya kukonda mfunu. (Bingana 22:7) Diaka, beto ta bwa ve na mutambu ya kubula bansaka ya mbongo to ya kusala kisalu yina kele kigonsa kaka sambu beto kuma bamvwama nswalu.

3. Inki beto fwete sala ti mbongo ya beto kele ti yo?

Yehowa kele Nzambi yina ke kabaka mpi beto ke landaka mbandu na yandi ntangu beto ke ‘kabaka mpi ke vandaka ya kuyilama sambu na kukabila bankaka.’ (1 Timoteo 6:18) Beto lenda sadila mbongo na beto na mutindu ya mbote kana beto ke sadila yo sambu na kusadisa dibundu mpi bantu ya kele na mfunu ya lusadisu, mingi-mingi bampangi na beto Bakristu. Yehowa ke sepelaka mingi ti bangindu yina ke pusaka beto na kupesa kansi ve mingi ya mbongo yina beto ke pesaka. Kana beto ke kaba na ntima ya mvimba, beto ta vanda na kiese mpi ta sepedisa Yehowa.​—Tanga Bisalu 20:35.

 LONGUKA MAMBU MINGI

4. Mutindu na beto ya kusala kisalu lenda kumisa Yehowa

 5. Mambote ya kusepela ti bima ya beto kele na yo

Bantu mingi ke sosaka kukuma ti mbongo mingi. Kansi Biblia ke lombaka beto ve na kusala mutindu yai. Beno tanga 1 Timoteo 6:6-8 mpi na nima beno pesa mvutu na ngiufula yai:

• Inki Biblia ke lomba beto na kusala?

6. Yehowa ta pesa beto bima ya beto kele na yo mfunu

 NA BUNKUFI

Kisalu ya kinsuni mpi mbongo kele mfunu. Kansi beto fwete bika ve ata fioti nde yo kuma mfunu mingi kuluta kusambila Yehowa.

Inki Nge Me Simba?

• Inki lenda sadisa nge na kulanda kutadila kisalu na mutindu ya mbote?

• Inki mambote nge ta baka kana nge ke sepela ti bima ya nge kele na yo?

• Yehowa ke tubaka nde yandi ta pesa bansadi na yandi bima ya bo kele na yo mfunu. Ebuna, nki mpila nge lenda monisa nde nge ke tudilaka yandi ntima?