LƐSIN 37
Wetin di Baybul Se bɔt Wok ɛn Mɔni?
Yu dɔn ɛva fil se yu de wɔri tumɔs bɔt wok ɛn mɔni? I nɔ kin izi fɔ gɛt di tin dɛn we wi nid ɛn wɔship Jiova di we aw i want wi fɔ wɔship am. Di Baybul gi wi fayn advays dɛn we go ɛp wi.
1. Wetin di Baybul se bɔt wok?
Gɔd want wi fɔ ɛnjɔy di wok we wi de du. Di Baybul tɔk se “di bɛst tin fɔ mɔtalman fɔ du na fɔ it, drink, ɛn ɛnjɔy wetin i dɔn wok fɔ.” (Ɛkliziastis 2:24) Jiova de wok tranga wan. We wi falamakata am fɔ wok tranga wan, wi de mek i gladi ɛn wi de fil gud bɔt wisɛf.
Wok impɔtant. Bɔt wi nɔ fɔ ɛva alaw wi wok fɔ impɔtant pas wi wɔship to Jiova. (Jɔn 6:27) Jiova prɔmis wi se we wi put am fɔs, i go gi wi ɔl di tin dɛn we wi nid fɔ liv.
2. Wetin na di rayt we fɔ tink bɔt mɔni?
Pan ɔl we di Baybul se “mɔni de protɛkt” pɔsin, i wɔn wi bak se nɔto mɔni nɔmɔ de mek wi gladi. (Ɛkliziastis 7:12, NWT) Na dat mek di Baybul de ɛnkɔrej wi se wi nɔ fɔ lɛk mɔni bɔt wi fɔ “satisfay wit di tin dɛn we de naw.” (Rid Ibruz 13:5.) We wi kɔntinyu fɔ satisfay wit wetin wi gɛt, dat de mek wi lɛf fɔ wɔri bikɔs wi tink se wi nɔ gɛt bɔku tin dɛn. Wi go avɔyd dɛt dɛn we wi nɔ nid fɔ gɛt. (Prɔvabs 22:7) Ɛn wi go avɔyd di prɔblɛm dɛn we pipul dɛn de gɛt we dɛn put an pan gambul ɛn di program dɛn usay dɛn kin prɔmis pipul dɛn se dɛn go jɛntri kwik kwik wan ilɛksɛf dɛn nɔ wok bɛtɛ.
3. Aw wi go yuz wi mɔni fɔ ɛp ɔda pipul dɛn?
Jiova na Gɔd we fri-an, ɛn wi go falamakata am we wi “gɛt fri-an” ɛn “rɛdi fɔ sheb” wetin wi gɛt. (1 Timoti 6:18) Wi kin yuz wi mɔni fɔ ɛp ɔda pipul dɛn bay we wi de sɔpɔt di kɔngrigeshɔn ɛn bay we wi de ɛp ɔda pipul dɛn we nid ɛp, mɔ di wan dɛn we wi ɔl de sav Jiova. Jiova nɔ de luk ɔmɔs wi de gi, bɔt i bisin mɔ bɔt wetin mek wi de gi. We wi gi frɔm wi at, wi go gladi ɛn wi go mek Jiova gladi.—Rid Akt 20:35.
LAN MƆ
Lan bɔt di bɛnifit dɛn we wi kin gɛt we wi tink di rayt we bɔt wok ɛn we wi satisfay wit wetin wi gɛt.
4. Ɔnɔ Jiova bay di we aw yu de wok
Wi padi biznɛs wit Jiova fɔ afɛkt di we aw wi de si wok. Ple di VIDIO, dɔn una tɔk bɔt di kwɛstyɔn dɛn we de dɔŋ.
-
Insay di vidio, wetin yu lɛk bɔt di we aw Jesin bin de si wok ɛn di we aw i bin de biev na in wokples?
-
Wetin i bin du fɔ mek in wok nɔ bi di tin we impɔtant pas ɔl to am?
Rid Koloshians 3:23, 24, dɔn una tɔk bɔt dis kwɛstyɔn:
-
Wetin mek di we aw wi de si wok impɔtant?
Wok impɔtant. Bɔt wi nɔ fɔ ɛva alaw am fɔ impɔtant pas wi wɔship to Jiova
5. We wi satisfay wit wetin wi gɛt, dat de bɛnifit wi
Bɔku pipul dɛn de du ɔl wetin dɛn ebul fɔ lɛ dɛn gɛt bɔku bɔku mɔni. Bɔt di Baybul gi wi difrɛn advays. Rid 1 Timoti 6:6-8, dɔn una tɔk bɔt dis kwɛstyɔn:
-
Wetin di Baybul ɛnkɔrej wi fɔ du?
Ilɛksɛf wi nɔ gɛt bɛtɛ, wi kin stil gladi. Ple di VIDIO, dɔn una tɔk bɔt di kwɛstyɔn we de dɔŋ.
-
Pan ɔl we dis famili nɔ gɛt bɛtɛ, wetin mek dɛn gladi?
Wetin go apin if wi gɛt wetin wi nid bɔt wi stil want mɔ? Jizɔs bin pul wan stori we sho di denja we de biɛn dis. Rid Lyuk 12:15-21, dɔn una tɔk bɔt dis kwɛstyɔn:
-
Wetin yu dɔn lan frɔm Jizɔs in stori?—Rid vas 15.
Rid ɛn kɔmpia Prɔvabs 10:22 (NWT) ɛn 1 Timoti 6:10. Dɔn una tɔk bɔt dɛn kwɛstyɔn dɛn ya:
-
Wetin yu tink se impɔtant mɔ? Yu padi biznɛs wit Jiova ɔ fɔ gɛt bɔku bɔku mɔni? Wetin mek?
-
Us prɔblɛm dɛn wi go gɛt if wi de rɔn afta mɔni?
6. Jiova go gi wi wetin wi nid
We wi nɔ gɛt wok ɔ wi nɔ gɛt mɔni, dat kin ɛp wi fɔ no if wi abop pan Jiova. Ple di VIDIO fɔ si wetin wi kin du we wi gɛt dɛn kayn prɔblɛm dɛn de, dɔn una tɔk bɔt di kwɛstyɔn dɛn we de dɔŋ.
-
Insay di vidio, us prɔblɛm dɛn di brɔda bin gɛt?
-
Wetin i bin du fɔ sɔlv dɛn prɔblɛm dɛn de fayn fayn wan?
Rid Matyu 6:25-34, dɔn una tɔk bɔt dis kwɛstyɔn:
-
Wetin Jiova prɔmis fɔ du fɔ di wan dɛn we de put am fɔs na dɛn layf?
SƆM PIPUL DƐN KIN SE: “A nid fɔ wok fɔ sɔpɔt mi famili. A nɔ go ebul fɔ go ɔl di mitin dɛn ɛvri wik.”
-
Us skripchɔ mek yu biliv gud gud wan se fɔ put yu wɔship to Jiova fɔs na di bɛst tin we yu go disayd fɔ du?
WETIN YU DƆN LAN?
I impɔtant fɔ wok ɛn gɛt mɔni, bɔt wi nɔ fɔ ɛva alaw dɛn tin dɛn de fɔ mek wi nɔ pe atɛnshɔn fɔ sav Jiova.
Rivyu
-
Wetin go ɛp yu fɔ tink di rayt we bɔt wok?
-
Aw we yu satisfay wit wetin yu gɛt de bɛnifit yu?
-
Aw yu go sho se yu abop pan Jiova in prɔmis fɔ se i go gi in pipul dɛn wetin dɛn nid?
DU MƆ RISACH
Lan mɔ fɔ si if di Baybul se mɔni na bad tin.
“Na Mɔni De Kam wit Ɔlkayn Bad Tin?” (Atikul na di wɛbsayt)
Lan aw wi go yuz wi mɔni fɔ mek Gɔd gladi.
“Wetin di Baybul Se bɔt fɔ Gi?” (Atikul na di wɛbsayt)
Yu tink se i nɔ bad fɔ ple gambul?
Wetin bin mek wan man we bin de ple gambul ɛn tif bin chenj di we aw i bin de liv in layf?
“A Bin Rili Lɛk fɔ Du Ɔs Res” (Di Wachtawa, Novɛmba 1, 2011)
You May Also Like
KWƐSTYƆN DƐN WE PIPUL DƐN KIN AKS ƆLTƐM
Wetin na Baybul Stɔdi?
Lan di ansa dɛn to kwɛstyɔn dɛn we gɛt fɔ du wit wi Baybul stɔdi program.
