တၢ်မၤလိ ၃၇
ဘၣ်ဃးဒီး ကျိၣ်စ့ ဒီးတၢ်ဖံးတၢ်မၤန့ၣ် လံာ်စီဆှံတဲဝဲဒ်လဲၣ်
နသးကိၢ်တၢ်လၢ ကျိၣ်စ့ဒီး တၢ်ဖံးတၢ်မၤအဃိ တဘျီဘျီဧါ. ပကမၤလၢပှဲၤ ပနီၢ်ခိတၢ်လိၣ်ဘၣ် ဒီးတကတီၢ်ဃီန့ၣ် ပကမၤ ကစၢ်ယွၤအတၢ်မၤ လၢပသးဒီဖျၢၣ်အဂီၢ် တညီဝဲထီဘိဘၣ်. ဘၣ်ဆၣ် လၢလံာ်စီဆှံပူၤန့ၣ် အိၣ်ဒီး တၢ်ဟ့ၣ်ကူၣ်လၢ အကမၤစၢၤပှၤ.
၁. ဘၣ်ဃးဒီး တၢ်ဖံးတၢ်မၤန့ၣ် လံာ်စီဆှံတဲဝဲဒ်လဲၣ်.
ကစၢ်ယွၤ အဲၣ်ဒိးဝဲလၢ ပကအိၣ်ဒီး တၢ်သးခုလၢ ပတၢ်ဖံးတၢ်မၤအပူၤ. တကးဒံးဘၣ် လံာ်စီဆှံတဲဝဲလၢ “တၢ်လၢအဂ့ၤကတၢၢ် လၢပှၤတဂၤ မၤဝဲသ့န့ၣ် မ့ၢ်ဝဲ အက . . . သူၣ်ဖှံသးညီလၢ အတၢ်မၤအပူၤလီၤ.” (စံၣ်တဲၤတဲလီၤတၢ် ၂:၂၄) ယဟိဝၤယွၤန့ၣ် အမၤတၢ်ဆူၣ်မး. အဃိ ပမ့ၢ်ကွၢ်လိအီၤ ဒီးမၤတၢ်ဆူၣ်ဆူၣ်န့ၣ် ပမၤသးခုအသး ဒီးပနီၢ်ကစၢ်စ့ၢ်ကီး ပကသးခု.
တၢ်ဖံးတၢ်မၤန့ၣ် အရ့ဒိၣ် ဘၣ်ဆၣ် ပတဘၣ်ပာ်ဒိၣ် တၢ်ဖံးတၢ်မၤ အါန့ၢ်ဒံး ပတၢ်ဘူၣ်ထီၣ်ဘါထီၣ် ယဟိဝၤယွၤဘၣ်. (ယိၤဟၣ် ၆:၂၇) ကစၢ်ယွၤ အၢၣ်လီၤဝဲလၢ ပမ့ၢ်ပာ်ဆိအတၢ်မၤ လၢပတၢ်အိၣ်မူအပူၤန့ၣ် အဝဲကဟ့ၣ်ပှၤ ပနီၢ်ခိအတၢ်လိၣ်ဘၣ်တဖၣ်.
၂. ဘၣ်ဃးဒီး ကျိၣ်စ့န့ၣ် လံာ်စီဆှံတဲဝဲဒ်လဲၣ်.
လံာ်စီဆှံ တဲဝဲလၢ “ကျိၣ်စ့ မ့ၢ်တၢ်ဒီသဒၢ.” ဘၣ်ဆၣ် လံာ်စီဆှံ တဲစ့ၢ်ကီးပှၤလၢ ကျိၣ်စ့န့ၣ် တမ့ၢ်တၢ်လၢ အမၤသးခုပသး အနီၢ်ကီၢ်ဘၣ်. (စံၣ်တဲၤတဲလီၤတၢ် ၇:၁၂) အဃိ လံာ်စီဆှံ ဟ့ၣ်ပလီၢ်ပှၤလၢ ပတဘၣ်အဲၣ် ကျိၣ်စ့ဘၣ် ဒီးပကဘၣ် ‘သးမံဒီးတၢ်လၢ အအိၣ်ဒီးပှၤခဲအံၤ.’ (ဖး ဧ့ၤဘြံၤ ၁၃:၅.) ပမ့ၢ်သးမံဒီး တၢ်လၢအအိၣ်ဒီးပှၤန့ၣ် ပတလီကီအါထီၣ်တၢ်လၢၤဘၣ်. ဒီးအကမၤစၢၤပှၤ ဒ်သိး ပတဟးမၤထီၣ်နါစိၤကမၢ်ဘၣ်. (ကတိၤဒိ ၂၂:၇) တကးဒံးဘၣ် အကမၤစၢၤပှၤဒ်သိးဒီး ပကဟးဆှဲး တၢ်တၤကျိၣ်တၤစ့ ဒီးတၢ်ဖံးအီၣ်မၤအီၣ်လၢ အလီၤဘၣ်ယိၣ် ဒ်သိးပကန့ၢ်ဘၣ်စ့ဒီဒူၣ် ဒီးန့ၢ်ဘၣ်စ့ချ့ချ့.
၃. ပကျိၣ်ပစ့န့ၣ် ပသူအီၤလၢ ကမၤစၢၤပှၤဂၤ ကသ့ဒ်လဲၣ်.
ယဟိဝၤယွၤန့ၣ် အကဲကစၢ်ယွၤလၢ အသးအိၣ်ဟ့ၣ်တၢ် ဒီးပမ့ၢ် “ဟ့ၣ်တၢ်ညီ ဒီးသးအိၣ် ဟ့ၣ်နီၤလီၤတၢ်” န့ၣ်မ့ၢ်ဝဲပကွၢ်လိအီၤ. (၁ တံၤမသ့း ၆:၁၈) ပကျိၣ်ပစ့န့ၣ် ပသူအီၤလၢ ပကဆီၣ်ထွဲမၤစၢၤ တၢ်အိၣ်ဖှိၣ် ဒီးမၤစၢၤ ပှၤလၢအလိၣ်ဘၣ် တၢ်မၤစၢၤတဖၣ် လီၤဆီဒၣ်တၢ် ပဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်အပူၤ. တကးဒံးဘၣ် ဖဲပဟ့ၣ်တၢ်အခါ ယဟိဝၤယွၤ တကွၢ်ဝဲလၢ ပဟ့ၣ်တၢ်အါထဲလဲၣ်န့ၣ်ဘၣ်. ဘၣ်ဆၣ် အဝဲကွၢ်ဝဲလၢ ပတၢ်ပာ်သူၣ်ပာ်သး. အဃိ ပမ့ၢ်ဟ့ၣ်တၢ်လၢ ပသးဒီဖျၢၣ်န့ၣ် ပကသးခု ဒီးပကမၤသးခု ယဟိဝၤယွၤအသး.—ဖး မၤတၢ် ၂၀:၃၅.
ဃုသ့ၣ်ညါအါထီၣ်
ခဲအံၤ ပကတဲသကိး ဘၣ်ဃးဒီး ပမ့ၢ်အိၣ်ဒီး တၢ်ထံၣ်အကြၢးအဘၣ် ဘၣ်ဃးဒီးတၢ်ဖံးတၢ်မၤ ဒီးပမ့ၢ်သးမံဒီး တၢ်လၢအိၣ်ဒီးပှၤန့ၣ် ကကဲဘျုးလၢ ပဂီၢ်ဒ်လဲၣ်.
၄. မၤလၤကပီၤ ယဟိဝၤယွၤ ခီဖျိ ပတၢ်ဖံးတၢ်မၤ
ပတၢ်ရ့လိာ်သးဒီး ယဟိဝၤယွၤမ့ၢ်ဂ့ၤန့ၣ် ပကအိၣ်ဒီး တၢ်ထံၣ်အကြၢးအဘၣ် ဘၣ်ဃးဒီးတၢ်ဖံးတၢ်မၤ. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
-
လၢတၢ်ဂီၤမူအပူၤန့ၣ် ဘၣ်ဃးဒီး ကၠ့စၢၤ အတၢ်ပာ်သူၣ်ပာ်သး ဒီးအသကဲာ်ပဝးလၢ အတၢ်မၤလီၢ်န့ၣ် နဘၣ်သူၣ်ဘၣ်သး ဖဲလဲၣ်တခါလဲၣ်.
-
ဒ်သိး ကၠ့စၢၤ ကအိၣ်ဒီး တၢ်ထံၣ်လၢအကြၢးအဘၣ် ဘၣ်ဃးဒီး တၢ်ဖံးတၢ်မၤအဂီၢ် အမၤဝဲဒ်လဲၣ်.
ဖး ကလီးစဲ ၃:၂၃, ၂၄ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
ဘၣ်မနုၤအဃိ အရ့ဒိၣ်လၢ ပကဘၣ်မၤတၢ်လၢ ပသးဒီဖျၢၣ်လဲၣ်.
တၢ်ဖံးတၢ်မၤန့ၣ် အရ့ဒိၣ်. ဘၣ်ဆၣ် ပတဘၣ်ပာ်ဒိၣ် တၢ်ဖံးတၢ်မၤ အါန့ၢ်ဒံး ပတၢ်ဘူၣ်ထီၣ်ဘါထီၣ် ယဟိဝၤယွၤဘၣ်
၅. ပမ့ၢ်သးမံဒီး တၢ်လၢအအိၣ်ဒီးပှၤန့ၣ် ကကဲဘျုးလၢပဂီၢ်
ပှၤအါဂၤန့ၣ် ဒ်သိးအဝဲသ့ၣ်ကန့ၢ်ဘၣ် ကျိၣ်စ့ဒီဒူၣ်အဂီၢ် အဝဲသ့ၣ် မၤတၢ်ဆူၣ်မး. ဘၣ်ဆၣ် လံာ်စီဆှံဟ့ၣ်ပှၤ တၢ်ဟ့ၣ်ကူၣ် လၢအဂၤတမံၤ. ဖး ၁ တံၤမသ့း ၆:၆-၈ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
လံာ်စီဆှံ ဟ့ၣ်ဂံၢ်ဟ့ၣ်ဘါပှၤ ဒ်လဲၣ်.
ပတၢ်မ့ၢ်တအိၣ် အါအါဘၣ်သနာ်က့ ပအိၣ်ဒီး တၢ်သးခုသ့. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
-
ဟံၣ်ဖိဃီဖိ ခံဒူၣ်အံၤ အကျိၣ်အစ့ တအိၣ်အါအါဘၣ် သနာ်က့ ဘၣ်မနုၤအဃိ အဝဲသ့ၣ် သးခုလဲၣ်.
ပကျိၣ်စ့ မ့ၢ်အိၣ်လံ သနာ်က့ ပမ့ၢ်အဲၣ်ဒိး လီကီအါထီၣ်ဒံးမီၤ. ယ့ၣ်ၡူးတဲဘၣ်ပှၤ တၢ်အဒိတခါလၢ အပာ်ဖျါထီၣ်ဝဲလၢ ပမ့ၢ်အိၣ်ဒီး တၢ်ပာ်သူၣ်ပာ်သးဒ်အံၤန့ၣ် အကဲဝဲ တၢ်လၢအလီၤဘၣ်ယိၣ်. ဖး လူၤကၣ် ၁၂:၁၅-၂၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
တၢ်အဒိလၢ ယ့ၣ်ၡူးတဲဝဲတခါအံၤန့ၣ် နမၤလိဘၣ်မနုၤလဲၣ်.—ကွၢ် အဆၢဖိ ၁၅.
ဖးဒီးထိၣ်သတြီၤ ကတိၤဒိ ၁၀:၂၂ ဒီး ၁ တံၤမသ့း ၆:၁၀. ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
ပအိၣ်ဒီးတၢ်ရ့လိာ်သးဒီး ယဟိဝၤယွၤလၢအဂ့ၤ မ့တမ့ၢ် ပအိၣ်ဒီးကျိၣ်စ့ဒီဒူၣ်န့ၣ် နဆိကမိၣ် အရ့ဒိၣ်ဖဲလဲၣ်တခါလဲၣ်. ဘၣ်မနုၤအဃိ နဆိကမိၣ်ဒ်န့ၣ်လဲၣ်.
-
ပမ့ၢ်ဃုထဲ ကျိၣ်စ့န့ၣ် ပကထံၣ်ဘၣ် တၢ်ကီတၢ်ခဲ မနုၤလဲၣ်.
၆. ယဟိဝၤယွၤ ကဟ့ၣ်ပှၤ တၢ်လၢပလိၣ်ဘၣ်တဖၣ်
တၢ်ကီတၢ်ခဲ ဘၣ်ဃးဒီး ကျိၣ်စ့ ဒီးတၢ်ဖံးတၢ်မၤန့ၣ် အမၤကွၢ်ဝဲ ပတၢ်နာ် ယဟိဝၤယွၤ. အဃိ ပမ့ၢ်အိၣ်ဒီး တၢ်ကီတၢ်ခဲ ဘၣ်ဃးဒီး ကျိၣ်စ့ ဒီးတၢ်ဖံးတၢ်မၤန့ၣ် ပကဘၣ်မၤဒ်လဲၣ်. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
-
လၢတၢ်ဂီၤမူအပူၤန့ၣ် ဒီပုၢ်ဝဲၢ်ခွါတဂၤထံၣ်ဘၣ် တၢ်ကီတၢ်ခဲဒ်လဲၣ်.
-
ဒ်သိးအလဲၤခီဖျိဝဲ တၢ်ကီတၢ်ခဲတဖၣ်န့ၣ် ကသ့ဂ့ၤဂ့ၤအဂီၢ် အမၤတၢ်မနုၤလဲၣ်.
ဖး မးသဲ ၆:၂၅-၃၄ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
ပှၤလၢအပာ်ဆိ ယဟိဝၤယွၤ လၢအတၢ်အိၣ်မူအပူၤန့ၣ် ယဟိဝၤယွၤ အၢၣ်လီၤအဝဲသ့ၣ် လၢအကမၤဝဲဒ်လဲၣ်.
ပှၤတနီၤတဲဝဲလၢ– “ယဘၣ်မၤတၢ်ဆူၣ်ဆူၣ် လၢယကလုၢ်အီၣ်လုၢ်အီ ယဟံၣ်ဖိဃီဖိအဂီၢ် အဃိ ယလဲၤထီၣ် တၢ်အိၣ်ဖှိၣ် ကိးနွံဒဲးတချုးဘၣ်.”
-
နမ့ၢ်ပာ်ဆိ ယဟိဝၤယွၤ လၢနတၢ်အိၣ်မူပူၤန့ၣ် အကဲဝဲ တၢ်ဆၢတဲာ်လၢအဂ့ၤကတၢၢ်လီၤ. နကနာ်ဒ်န့ၣ်အဂီၢ် လံာ်စီဆှံအဆၢလၢ အမၤစၢၤနၤန့ၣ် မ့ၢ်ဖဲလဲၣ်တဆၢလဲၣ်.
တၢ်ဂ့ၢ်လၢအရ့ဒိၣ်
ပလိၣ်ဘၣ် တၢ်ဖံးတၢ်မၤ ဒီးပလိၣ်ဘၣ် ကျိၣ်စ့. ဘၣ်ဆၣ် ပတဘၣ်ပျဲလၢ တၢ်ဖံးတၢ်မၤ ဒီးကျိၣ်စ့န့ၣ် ကမၤတံာ်တာ်ပှၤလၢ ပကဘူၣ်ထီၣ်ဘါထီၣ် ယဟိဝၤယွၤအဂီၢ်ဘၣ်.
တၢ်ကွၢ်ကဒါက့ၤ
-
ဒ်သိး ပကအိၣ်ဒီး တၢ်ထံၣ်အကြၢးအဘၣ် ဘၣ်ဃးဒီး တၢ်ဖံးတၢ်မၤအဂီၢ် တၢ်မနုၤ ကမၤစၢၤပှၤလဲၣ်.
-
ပမ့ၢ်သးမံဒီး တၢ်လၢအအိၣ်ဒီးပှၤန့ၣ် အကကဲဘျုးလၢ ပဂီၢ်ဒ်လဲၣ်.
-
နနာ်လၢ ယဟိဝၤယွၤ ကဟ့ၣ်အခ့အပှၤ တၢ်လၢအဝဲသ့ၣ် လိၣ်ဘၣ်ဝဲန့ၣ် နပာ်ဖျါထီၣ် ကသ့ဒ်လဲၣ်.
ဃုသ့ၣ်ညါ
ဖးကွၢ် တၢ်ဂ့ၢ်လၢ အဘၣ်ဃးဒီး လံာ်စီဆှံ ပာ်ဖျါထီၣ်ဝဲလၢ ကျိၣ်စ့န့ၣ် အကဲတၢ်အၢတၢ်သီဧါ.
“ကျိၣ်စ့န့ၣ် အကဲတၢ်အၢတၢ်သီ အဂံၢ်တခါဧါ” (တၢ်မၤလိလၢ အအိၣ်လၢ online အဖီခိၣ်)
ဃုသ့ၣ်ညါအါထီၣ် ဘၣ်ဃးဒီး ပဟ့ၣ်တၢ်န့ၣ် မၤသးခုကစၢ်ယွၤအသး ကသ့ဒ်လဲၣ်.
“ဘၣ်ဃးဒီး ပဟ့ၣ်တၢ်န့ၣ် လံာ်စီဆှံ တဲဝဲဒ်လဲၣ်” (တၢ်မၤလိလၢ အအိၣ်လၢ online အဖီခိၣ်)
တၢ်တၤကျိၣ်တၤစ့န့ၣ် အမၤဘၣ်ဒိပှၤသ့ဧါ.
“ဘၣ်ဃးဒီး တၢ်တၤကျိၣ်တၤစ့န့ၣ် လံာ်စီဆှံ တဲဝဲဒ်လဲၣ်” (ပၢၢ်ထီၣ်! လါမၢ်ၡး ၂၀၁၅)
ဖးကွၢ် ဘၣ်ဃးဒီး ပှၤလၢ အတၤကျိၣ်တၤစ့ ဒီးအလံၣ်အီၣ်လီအီၣ်တၢ်တဂၤ အတၢ်အိၣ်မူ ဆီတလဲဒ်လဲၣ်အဂ့ၢ်.
“ယဘၣ်သူၣ်ဘၣ်သး တၢ်ဒိးပြၢကသ့ၣ်” (တၢးထီခိးတၢ်, လါနိၣ်ဝ့ဘၢၣ် ၁, ၂၀၁၁)