MURU 37
Vyevyo Baibulo Linaongaathu Vakhani ya Chito Koma Teto Ndalama
Kodi muwambeela kumbanyavo vakhani yokuza chito koma teto ndalama? Wonga vyoona, thawi dimo-i vinonirucha panga vyetene vyevyo ninaande iyo ira nilambelenga Yehova vathawi imo-ive ineyo niesaesanga inda chito ira nifwanye vyofuneya vamoyo. Komave Baibulo likaana malangizo anayo kananikami-e vakhani dedi.
1. Kodi Baibulo linawonga vyoi avi vakhani ya chito?
Yehova unafuna ira nisangalalenga na chito ineyo nina-inda iyo. Baibulo linawonga ira “wa muthu kavali yapama kwaranya . . . omeli-a murimae chifukwa yoi u-inda chito mwatindi.” (Namalaleya 2:24) Yehova uno-inda chito mwatindi. Eeno na-iyene na-indanga chito mwatindi, ninoomeli-a Yehova teto na-iyene ninosangalala.
Pivyoona ira chito chofuneya. Komave kaninafuneela iona ira chofuneya vinjinji kwaranya Yehova. (Yohani 6:27) Liye oonilonjeza ira na-elanga vyongo vyokuza lambela vamalo owambeela, unoza aniva-e vyevyo ninafuneela iyo.
2. Nionenga ndalama mofwaneelela
Baibulo linaonga ira ‘ndalama dinonititi-eda.’ Komave linoonga teto ira ndalama kadinanikami-a kala osangalala. (Namalaleya 7:12) Pivyovweya ira linoniwenjeli-a ira kaniomeliwengana ndalama teto linonilimbi-a ira: “Mukale okutira na vyevyo mun’na nyo vathawi ineyo.” (Welengani Aheberi 13:5.) Naonanga ira vyevyo nin’na iyo pivyokwakwanela, ninopewa kumbanya, wewo unaza chifukwa yofuna kaana vyongo vinjinji. Koma teto ninopewa ngongole do-ofuneela. (Miyambo 22:7) Ninopewa teto mavuto anayo kanaza chifukwa yochova juga, koma teto panga geeni ineyo inapangi-a athu lemela mwachangu.
3. Kodi ninatonyi-ede avi ira nili ova-a vo-indi-eda chito ndalama di-u?
Yehova ngu Mulungu wova-a, moi ninotonyi-eda ira ninomusazi-eda vokala “ova-a, okozeya gawela amo-iwa.” (1 Timoteyu 6:18) Ninoira vyevi vopeleka ndalama di-u ira dikami-ede vapingo koma teto vokami-eda anayo kanavuteya, simbwasimbwa abali na arongoli-u. Yehova unosangalala vinjinji aonanga yolinga ineyo ninapelekela iyo ndalama ndi-u ookala injiva wa ndalamado. Napelekanga ndalama ndi-u na murima wetene, ninokala osangalala koma teto ninoomeli-a Yehova. — Welengani Vyoira 20:35.
FUNJEDANI VYOWENJEDELEYA
Onani riya okaana maganizo ofwaneelela vakhani ya chito, koma teto riya oona vyevyo nin’na iyo kala vyokwakwanela.
4. Mwalimbi-edanga chito munolemekeza Yehova
Omeliwana Yehova unokoza nikami-eda ira nikaena maganizo ofwaneelela. Onelani VIDIYO, era eeno tapanyani vyofuka vyo-arelavi.
-
Muvidiywela, chin’ni iuomeleni na vyevyo Jason unaira liye akala uchito koma teto mwemo unaonela liye chitoyo?
-
Kodi airile n’ni ira chito kimulepeli-e panga vyongo vyofuneya vinjinji?
Welengani Akolose 3:23, 24, era eeno tapanyani yofuka yo-arelela:
-
Chifukwa n’ni kaana maganizo ofwaneelela vakhani ya chito kofuneya?
Chito chofuneya. Komave kan’nafuneela iona ira chofuneya vinjinji kwaranya lambela Yehova
5. Naonanga vyongo nin’na iyo kala vyonikwakwanela ninokala osangalala
Athu anjinji kanoira iliyetene ineyo kanawandeathu ira kafwanye ndalama dinjinji. Koma Baibulo kalinanilimbi-a ira vyevi. Welengani 1 Timoteyu 6:6-8, era eeno tapanyani yofuka yo-arelela:
-
Kodi Baibulo linanilimbi-a panga n’ni?
Ngakale nangana vyongo vyoyeva ninowanda kala osangalala. Onelani VIDIYO, era eeno tapanyani yofuka yo-arelela.
-
Chin’ni inapangi-a mabanjala kala osangalala ngakale ira kanafwanya ndalama doyeva?
Kodi vanakala vuto liivi akala nin’na vinjinji koma funangave wenjedela vimo-i? Yesu oowonga fanizo lelo linatonyi-eda opi-a wamurima unola. Welengani Luka 12:15-21, era eeno tapanyani yofuka yo-arelela:
-
Kodi mufunjedile n’ni mufanizo la Yesuli? — Onani vesi 15.
Welengani Miyambo 10:22 teto mufwanafwani-ede na 1 Timoteyu 6:10. Era eeno tapanyani vyofuka vyo-arelavi:
-
Kodi munaganiza ira yofuneya vinjinji chin’ni, kala vausamwali na Yehova kapena kaana ndalama dinjinji? Chifukwa n’ni munaonga eeno?
-
Kodi muthu unoyo unakalela saela ndalama unagumana na mavuto aavi?
6. Yehova unoza aniva-e vyevyo ninafuneela iyo
Sauweleya wa chito koma teto mavuto osauweleya wa ndalama, vinokoza shisha iroromelo yi-u. Onelani VIDIYO ira muone vyevyo ninaire iyo nagumananga na mavuto anala, era eeno tapanyani vyofuka vyo-arelavi.
-
Muvidiywela, kodi m’balila agumanile na mavuto aavi?
-
Kodi airile n’ni ira awande mali-a mavuto anala?
Welengani Mateyu 6:25-34, era eeno tapanyani yofuka yo-arelela:
-
Kodi Yehova alonjezile ira athu anayo kana-ela vyofuna vyaye vamalo owambeela unaza aairele n’ni?
ATHU AMO-IWA KANAONGA IRA: “Ndinofuneela inda chito mwatindi ira ndisamalele banja langa. Eeno kan’nakwakwani-e dowa umisonkano mulungu uliwetene.”
-
Tilemba liivi lelo linausimikizelani ira ela vyongo vyokuza lambela vamalo owambeela chiyongo yazelu ineyo muthu unaire liye vamoywae?
VYEVYO NIFUNJEDILE IYO
Chito koma teto ndalama pivyofuneya koma kanilole ira vinilepeli-enga lambela Yehova.
Vyofuka Vyoweli-eda
-
Chin’ni inaukami-eni ira muonenga chito mofwaneelela?
-
Kodi ona vyongo vyevyo nin’na iyo kala vyonikwakwanela unanikami-eda avi?
-
Munatonyi-ede avi ira munororomela vyevyo Yehova alonjezile liye vyoi unoza asamalele atumikaye?
ONANI VIMO-I
Saelani ira muone akala Baibulo linaonga ira ndalama tidotakala.
“Kodi Ndalama ndi Zimene Zimabweretsa Mavuto Onse?” (Khani yavawebusaiti)
Onani mwemo nina-indi-edele iyo chito ndalama di-u ira niomeli-enga Mulungu.
“Kodi Baibulo Limanena Zotani pa Nkhani ya Kupatsa?” (Khani yavawebusaiti)
Kodi chova juga nkun’na vuto lililetene?
“Zimene Baibulo Limanena — Kutchova Juga” (Galamukani!, March 2015)
Onani vyevyo vyakami-ile muthu m’mo-iwa iya chova juga koma teto ba.
“Ndinkakonda Kwambiri Mpikisano wa Mahatchi” (Nsanja ya Olonda, November 1, 2001)
