ບົດທີ 37

ຄຳພີໄບເບິນບອກຫຍັງເລື່ອງການເຮັດວຽກແລະການຫາເງິນ?

ເປີດ

ເຈົ້າເຄີຍຮູ້ສຶກຕຶງຄຽດແລະກັງວົນກ່ຽວກັບເລື່ອງວຽກຫຼືເລື່ອງເງິນບໍ? ອາດບໍ່ແມ່ນເລື່ອງງ່າຍທີ່ເຮົາຈະເບິ່ງແຍງໂຕເອງໃຫ້ມີສິ່ງຈຳເປັນແລະມີເວລານະມັດສະການພະເຢໂຫວານຳ. ແຕ່ຄຳພີໄບເບິນມີຄຳແນະນຳທີ່ດີຫຼາຍທີ່ຈະຊ່ວຍເຮົາໄດ້.

1. ຄຳພີໄບເບິນບອກຫຍັງກ່ຽວກັບການເຮັດວຽກ?

ພະເຈົ້າຢາກໃຫ້ເຮົາມີຄວາມສຸກກັບການເຮັດວຽກ. ຄຳພີໄບເບິນບອກວ່າ “ສຳລັບມະນຸດບໍ່ມີຫຍັງຈະດີໄປກວ່າ . . . ມີຄວາມສຸກທີ່ໄດ້ເຮັດວຽກໜັກ.” (ຜູ້ເທສະໜາປ່າວປະກາດ 2:24, ລ.ມ.) ພະເຢໂຫວາເປັນພະເຈົ້າທີ່ດຸໝັ່ນເຮັດວຽກ. ຖ້າເຮົາເປັນຄົນດຸໝັ່ນເຮົາກໍກຳລັງຮຽນແບບເພິ່ນ ເມື່ອເຮັດແບບນັ້ນເຮົາກໍຈະເຮັດໃຫ້ເພິ່ນມີຄວາມສຸກແລະເຮົາເອງກໍຈະມີຄວາມສຸກຄືກັນ.

ການເຮັດວຽກເປັນເລື່ອງສຳຄັນ. ແຕ່ເຮົາຕ້ອງບໍ່ໃຫ້ເລື່ອງນີ້ສຳຄັນກວ່າການນະມັດສະການພະເຢໂຫວາ. (ໂຢຮັນ 6:27) ເພິ່ນສັນຍາວ່າຖ້າເຮົາໃຫ້ການນະມັດສະການເພິ່ນເປັນສິ່ງສຳຄັນທີ່ສຸດໃນຊີວິດ ເພິ່ນຈະເບິ່ງແຍງເຮົາໃຫ້ມີສິ່ງຈຳເປັນ.

2. ຄວາມຄິດທີ່ຖືກຕ້ອງກ່ຽວກັບເລື່ອງເງິນແມ່ນຫຍັງ?

ຄຳພີໄບເບິນບອກວ່າ “ເງິນເປັນເຄື່ອງປ້ອງກັນ” ແຕ່ກໍເຕືອນເຮົານຳວ່າຄວາມສຸກບໍ່ໄດ້ຂຶ້ນຢູ່ກັບເງິນເທົ່ານັ້ນ. (ຜູ້ເທສະໜາປ່າວປະກາດ 7:12, ລ.ມ.) ນອກຈາກນັ້ນ ຄຳພີໄບເບິນຍັງບອກເຮົາອີກວ່າເຮົາຕ້ອງບໍ່ເປັນຄົນຮັກເງິນ ແຕ່ໃຫ້ “ພໍໃຈໃນສິ່ງທີ່ມີຢູ່.” (ອ່ານເຮັບເຣີ 13:5) ຖ້າເຮົາພໍໃຈໃນສິ່ງທີ່ມີຢູ່ ເຮົາຈະບໍ່ກັງວົນຫຼາຍເກີນໄປວ່າຈະມີເງິນພໍໃຊ້ບໍ. ເຮົາຈະບໍ່ເປັນໜີ້ຖ້າບໍ່ຈຳເປັນແທ້ໆ. (ສຸພາສິດ 22:7) ເຮົາຈະບໍ່ຫຼິ້ນການພະນັນຫຼືເຂົ້າໄປຫຍຸ້ງກ່ຽວກັບທຸລະກິດບາງຢ່າງທີ່ສັນຍາວ່າຈະເຮັດໃຫ້ລວຍໄວ.

3. ເຮົາຈະໃຊ້ເງິນຂອງເຮົາເພື່ອຊ່ວຍເຫຼືອຄົນອື່ນໄດ້ແນວໃດ?

ພະເຢໂຫວາເປັນພະເຈົ້າທີ່ໃຈກວ້າງ ຖ້າເຮົາ “ເປັນຄົນໃຈກວ້າງ ຮູ້ຈັກແບ່ງປັນ” ເຮົາກໍກຳລັງຮຽນແບບເພິ່ນ. (1 ຕີໂມທຽວ 6:18) ເຮົາສາມາດໃຊ້ເງິນທີ່ມີເພື່ອຊ່ວຍຄ່າໃຊ້ຈ່າຍໃນປະຊາຄົມແລະຊ່ວຍເຫຼືອຄົນທີ່ເດືອດຮ້ອນ ໂດຍສະເພາະພີ່ນ້ອງຄລິດສະຕຽນ. ສຳລັບພະເຢໂຫວາ ບໍ່ວ່າເຮົາຈະໃຫ້ໄດ້ຫຼາຍຫຼືໜ້ອຍ ກໍບໍ່ແມ່ນສິ່ງສຳຄັນທີ່ສຸດ. ຖ້າເຮົາໃຫ້ຈາກໃຈ ເຮົາກໍເຮັດໃຫ້ເພິ່ນມີຄວາມສຸກແລະເຮົາເອງກໍຈະມີຄວາມສຸກຄືກັນ.—ອ່ານກິດຈະການ 20:35

ຮຽນຮູ້ຫຼາຍຂຶ້ນ

ມາເບິ່ງນຳກັນວ່າ ມີປະໂຫຍດຫຍັງແດ່ຖ້າເຮົາມີຄວາມຄິດທີ່ຖືກຕ້ອງກ່ຽວກັບການເຮັດວຽກແລະພໍໃຈໃນສິ່ງທີ່ມີຢູ່.

4. ຍົກຍ້ອງພະເຢໂຫວາຈາກການເຮັດວຽກຂອງເຈົ້າ

ສາຍສຳພັນຂອງເຮົາກັບພະເຢໂຫວາຄວນສົ່ງຜົນຕໍ່ຄວາມຄິດຂອງເຮົາໃນເລື່ອງວຽກ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ເຮັດວຽກສຸດຄວາມສາມາດເພື່ອພະເຢໂຫວາ (4:39)

ຈາກວິດີໂອ ເຈົ້າປະທັບໃຈຫຍັງກ່ຽວກັບຄວາມປະພຶດຂອງເຈສັນໃນບ່ອນເຮັດວຽກແລະຄວາມຄິດຂອງລາວຕໍ່ການເຮັດວຽກ?
ລາວເຮັດແນວໃດເພື່ອຈະຈັດເວລາໃນການເຮັດວຽກໄດ້ຢ່າງເໝາະສົມ?

ອ່ານໂກໂລຊາຍ 3:23, 24 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງຈຶ່ງສຳຄັນທີ່ເຮົາຕ້ອງດຸໝັ່ນເຮັດວຽກ?

ການເຮັດວຽກເປັນເລື່ອງສຳຄັນ. ແຕ່ເຮົາຕ້ອງບໍ່ໃຫ້ເລື່ອງນີ້ສຳຄັນຫຼາຍກວ່າການນະມັດສະການພະເຢໂຫວາ

5. ຖ້າເຮົາພໍໃຈໃນສິ່ງທີ່ມີຢູ່ ເຮົາຈະໄດ້ຮັບປະໂຫຍດ

ຫຼາຍຄົນພະຍາຍາມຈະຫາເງິນໃຫ້ໄດ້ຫຼາຍໆ. ແຕ່ຄຳພີໄບເບິນບໍ່ໄດ້ແນະນຳໃຫ້ເຮົາເຮັດແບບນັ້ນ. ອ່ານ 1 ຕີໂມທຽວ 6:6-8 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຄຳພີໄບເບິນແນະນຳເຮົາໃຫ້ເຮັດຫຍັງ?

ເຖິງວ່າເຮົາຈະບໍ່ຄ່ອຍມີເງິນ ແຕ່ເຮົາກໍມີຄວາມສຸກໄດ້. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້.

ວິດີໂອ: “ໃຫ້ພໍໃຈໃນສິ່ງທີ່ມີຢູ່” (3:20)

ເຖິງວ່າຈະບໍ່ຄ່ອຍມີເງິນ ແຕ່ອັນໃດເຮັດໃຫ້ຫຼາຍຄອບຄົວມີຄວາມສຸກ?

ຈະເປັນແນວໃດຖ້າເຮົາມີເງິນຫຼາຍຢູ່ແລ້ວ ແຕ່ກໍຍັງຢາກມີຫຼາຍຂຶ້ນອີກ? ພະເຢຊູເລົ່າເລື່ອງໜຶ່ງທີ່ເຮັດໃຫ້ເຫັນວ່າຄວາມຄິດແບບນີ້ເປັນອັນຕະລາຍ. ອ່ານລູກາ 12:15-21 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເຈົ້າຮຽນຫຍັງໄດ້ຈາກເລື່ອງທີ່ພະເຢຊູເລົ່າ?—ເບິ່ງຂໍ້ 15

ອ່ານແລະປຽບທຽບສຸພາສິດ 10:22 ກັບ 1 ຕີໂມທຽວ 6:10. ແລ້ວລົມກັນກ່ຽວກັບຄຳຖາມຕໍ່ໄປນີ້:

ເຈົ້າຄິດວ່າ ລະຫວ່າງການໄດ້ສະໜິດກັບພະເຢໂຫວາກັບການມີເງິນຫຼາຍໆ ອັນໃດສຳຄັນກວ່າກັນ? ເປັນຫຍັງເຈົ້າຈຶ່ງຄິດແບບນັ້ນ?
ການຢາກໄດ້ເງິນຫຼາຍໆແລະບໍ່ຮູ້ຈັກພໍ ຈະເຮັດໃຫ້ມີບັນຫາຫຍັງແດ່?

6. ພະເຢໂຫວາຈະເບິ່ງແຍງເຮົາໃຫ້ມີສິ່ງຈຳເປັນ

ເມື່ອເຮົາມີບັນຫາເລື່ອງວຽກຫຼືເລື່ອງເງິນ ຕອນນັ້ນແຫຼະທີ່ເຮົາຈະຮູ້ວ່າເຮົາໄວ້ວາງໃຈພະເຢໂຫວາແທ້ໆຫຼືບໍ່. ເປີດວິດີໂອເພື່ອເບິ່ງວ່າເຮົາຈະເຮັດຫຍັງໄດ້ເມື່ອເຮົາຕ້ອງເຈິກັບບັນຫາເຫຼົ່ານັ້ນ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ພະເຢໂຫວາຈະເບິ່ງແຍງໃຫ້ເຮົາມີສິ່ງຈຳເປັນ (6:21)

ຈາກວິດີໂອ ພີ່ນ້ອງຊາຍຄົນໜຶ່ງຕ້ອງເຈິກັບບັນຫາຫຍັງແດ່?
ລາວເຮັດຫຍັງເພື່ອຈະຮັບມືກັບບັນຫາໄດ້?

ອ່ານມັດທາຍ 6:25-34 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຖ້າເຮົາໃຫ້ການນະມັດສະການພະເຢໂຫວາເປັນສິ່ງສຳຄັນທີ່ສຸດໃນຊີວິດ ເພິ່ນສັນຍາວ່າຈະເຮັດຫຍັງເພື່ອເຮົາ?

ບາງຄົນເວົ້າວ່າ: “ໄປປະຊຸມທຸກເທື່ອບໍ່ໄດ້ດອກ. ຄົນເຮົາຕ້ອງທຳມາຫາກິນ.”

ຂໍ້ຄຳພີໃດທີ່ເຮັດໃຫ້ເຈົ້າໝັ້ນໃຈວ່າ ດີທີ່ສຸດທີ່ຈະໃຫ້ການນະມັດສະການພະເຢໂຫວາເປັນສິ່ງສຳຄັນທີ່ສຸດໃນຊີວິດ?

ສະຫຼຸບ

ວຽກອາຊີບແລະເງິນເປັນສິ່ງສຳຄັນ ແຕ່ເຮົາບໍ່ຄວນໃຫ້ສິ່ງເຫຼົ່ານີ້ສຳຄັນຫຼາຍກວ່າການຮັບໃຊ້ພະເຢໂຫວາ.

ຄຳຖາມທົບທວນ

ອັນໃດຈະຊ່ວຍເຮົາໃຫ້ມີຄວາມຄິດທີ່ຖືກຕ້ອງໃນເລື່ອງວຽກ?
ຖ້າເຮົາພໍໃຈໃນສິ່ງທີ່ມີຢູ່ ເຮົາຈະໄດ້ຮັບປະໂຫຍດແນວໃດ?
ເຈົ້າຈະເຮັດໃຫ້ເຫັນແນວໃດວ່າ ເຈົ້າໄວ້ໃຈຄຳສັນຍາຂອງພະເຢໂຫວາທີ່ຈະເບິ່ງແຍງຄົນຂອງເພິ່ນ?

ມື້ທີ່ຮຽນຈົບບົດນີ້:

ສິ່ງທີ່ເຈົ້າເຮັດໄດ້

ລອງຄິດເບິ່ງວ່າໃນໄລຍະບໍ່ເທົ່າໃດເດືອນທີ່ຜ່ານມາເຈົ້າຂາດການປະຊຸມເລື້ອຍໆເພາະຕ້ອງໄປເຮັດວຽກບໍ? ຖ້າເປັນແບບນັ້ນ ໃຫ້ລອງຄິດເບິ່ງວ່າເຈົ້າຈະເຮັດຫຍັງໄດ້ແດ່ເພື່ອຈະບໍ່ຂາດການປະຊຸມ.

ອື່ນໆ:

ສິ່ງທີ່ເຈົ້າເຮັດໄດ້