DILONGESHA DIA 37
Tshidi Bible wamba bua mudimu ne makuta
Ukadiku musamishe mutu bua mudimu peshi bua makuta anyi? Kabitu anu bipepele bua kudikumbajila majinga etu ne kutendelela kabidi Yehowa mudibi bikengela to. Mu Bible mudi mibelu mimpe idi mua kutuambuluisha.
1. Ntshinyi tshidi Bible wamba bua mudimu?
Nzambi mmusue bua tuenze mudimu. Bible udi wamba ne: “Kakuena bualu budi buimpe kudi muntu budi bupite . . . kupetela disanka mu mudimu wende mukole.” (Muambi 2:24) Yehowa utu wenza mudimu mukole. Patudi tuenza mudimu mukole anu bu yeye, tudi tumusankisha ne tumvua petu disanka.
Mudimu udi ne mushinga. Kadi katuena ne bua kuwulekela wangata muaba wa ntendelelu wa Yehowa to. (Yone 6:27) Mmutulaye ne: tuetu bateke ntendelelu wende pa muaba wa kumpala, neatukumbajile majinga etu.
2. Makuta adi ne bua kuikala ne mushinga kayi mu nsombelu wetu?
Nansha mudi Bible uleja ne: ‘makuta adi bukubi,’ udi utudimuija ne: owu nkayawu kaena mua kutupetesha disanka to. (Muambi 7:12) Ke bualu kayi udi utubela bua kubenga kunanga makuta, ne bua ‘tusanke ne bintu bitudi nabi.’ (Balayi Ebelu 13:5.) Tuetu tusanka ne bitudi nabi, katuakusamisha mutu bua kupeta bintu bia bungi to. Katuakubuela mabanza tshianana tshianana to. (Nsumuinu 22:7) Tudi tuepuka njiwu ya manaya a makuta ne ya mayele mabi a dikeba kulua babanji ne lukasa.
3. Mmunyi mutudi mua kuenza malu mimpe ne makuta etu?
Yehowa udi Nzambi utu upeshangana, nunku tudi tumuidikija patudi ‘tupeshangana bintu, badiakaje bua kuabanyangana bintu ne bakuabu.’ (1 Timote 6:18) Tudi mua kufila makuta etu bua malu a tshisumbu ne bua kuambuluisha badi bakengela bintu, nangananga bena Kristo netu. Tshidi tshisankisha Yehowa ki mbungi bua bitudi tufila to, kadi ntshidi tshitusaka bua kufila. Tuetu tufila ne tshianza tshilekelela, netupete disanka ne netusankishe Yehowa.—Balayi Bienzedi 20:35.
BUELA MU BUONDOKE
Mona masanka a diteka mudimu wa bianza pa muaba wawu ne a disanka ne bitudi nabi.
4. Mudimu webe utumbishishe Yehowa
Mbimpe bulunda buetu ne Yehowa buleje mutudi tumona mudimu. Tangilayi FILME, pashishe nuandamune nkonko idi ilonda.
-
Mu filme eu, ntshinyi tshidi tshikukemeshe bua malu avua Jason wenza ku mudimu?
-
Ntshinyi tshivuaye muenze bua kuteka mudimu pa muaba wawu?
Balayi Kolosayi 3:23, 24, pashishe nuandamune lukonko elu:
-
Bua tshinyi mushindu utudi tumona mudimu wa bianza udi ne mushinga?
Mudimu udi ne mushinga. Kadi katuena ne bua kuwulekela wangata muaba wa ntendelelu wa Yehowa to
5. Kusanka ne bitudi nabi kudi kutuambuluisha
Bantu ba bungi batu badienzeja bua kuikala ne tente mu nzubu tente pambelu. Kadi mona mubelu udi Bible ufila. Balayi 1 Timote 6:6-8, pashishe nuandamune lukonko elu:
-
Bible udi utukankamija bua kuenza tshinyi?
Tudi anu mua kuikala ne disanka nansha tuetu ne bintu bikese menemene. Tangilayi FILME, pashishe nuandamune lukonko ludi lulonda.
-
Ntshinyi tshidi tshipetesha mêku aa disanka nansha mudiwu ne makuta makese?
Tshia kuenza ntshinyi tuetu ne makuta a bungi kadi tujinga anu makuabu? Yezu wakafila tshilejilu tshidi tshileja njiwu idiku. Balayi Luka 12:15-21, pashishe nuandamune lukonko elu:
-
Tshilejilu tshia Yezu etshi tshidi tshikulongesha tshinyi?—Tangila mvese wa 15.
Balayi Nsumuinu 10:22 ne 1 Timote 6:10 numone mudiyi ipetangana. Pashishe nuandamune nkonko eyi:
-
Buebe wewe, tshidi ne mushinga wa bungi ntshinyi? Nkudia bulunda ne Yehowa anyi nkuikala ne makuta a bungi? Bua tshinyi?
-
Kukeba makuta a bungi kudi ne ntatu kayi?
6. Yehowa neatukumbajile majinga etu
Ntatu ya malu a mudimu anyi a makuta idi mua kuteka ditabuja dietu kudi Yehowa mu diteta. Tangilayi FILME bua kumona mutudi mua kupita ne mateta a ditabuja aa, pashishe nuandamune nkonko idi ilonda.
-
Muanetu utudi bamone mu filme eu uvua mupete ntatu kayi?
-
Tshivuaye muenze bua kumanya mua kupita nayi ntshinyi?
Balayi Matayi 6:25-34, pashishe nuandamune lukonko elu:
-
Ntshinyi tshidi Yehowa mulaye badi bamuteka pa muaba wa kumpala?
BAMUE BATU BAMBA NE: “Mbimpe ngenze mudimu mukole bua kuambula bujitu bua dîku dianyi. Tshiena mua kuya mu bisangilu lumingu luonso to.”
-
Mmvese kayi udi ukujadikila ne: kuteka ntendelelu wa Yehowa pa muaba wa kumpala ke dipangadika ditambe buimpe?
TSHIA KUKUATA
Mudimu wa bianza ne makuta bidi ne mushinga, kadi kabiena ne bua kutupangisha bua kuenzela Yehowa mudimu to.
Diambulula
-
Ntshinyi tshidi mua kukuambuluisha bua kuteka mudimu pa muaba wawu?
-
Kusanka ne biudi nabi kudi kukuambuluisha mushindu kayi?
-
Mmunyi muudi mua kuleja ne: udi witaba mulayi wa Yehowa wa kutabalela bantu bende?
BIA KUTANGILA KABIDI
Bible udi wamba ne: makuta mmabi anyi?
“Makuta adi muji wa malu mabi onso anyi?” (Tshiena-bualu tshia mu jw.org)
Mona mushindu wa dipeshangana bintu udi usankisha Nzambi.
“Ntshinyi tshidi Bible wamba bua dipeshangana bintu?” (Tshiena-bualu tshia mu jw.org)
Manaya a makuta kaatu ne njiwu anyi?
“Tshitu Bible wamba bua manaya a makuta” (Tabulukayi!, 3/2015)
Mona tshiakasaka muntu kampanda bua kulekela manaya a makuta ne dinyengangana bintu.
“Mvua munange manaya a dinyema pa tubalu be!” (Tshibumba tshia Nsentedi, 1/11/2011)
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
