SMALKANKA 37
Wark takaia bara lalah ba dukiara Baibil dîa wisa
¿Aima kum kum nahki lalah briaia ba dukiara wari takram ki? Ban kra karna sa man mampara dîa nit sma ba briaia, bara sim taimka ra Jehova ra aitani mayunaia. Baibil ba kupia kraukanka nani wankisa hilp wan muni ba.
1. ¿Wark takaia ba dukiara Baibil dîa wisa?
Gâd ba want sa yawan ba liliakira wark takbia. Baha mita Baibil wisa “upla ba diara kau yamni daukaia ba sika [...] ai rayaka ba lilia daukbia ai warkka mâ nani ba wal” (Smasmalkra 2:24). Jehova wark karna daukisa. Witin dauki ba baku yawan daukisa taim, yawan ba wark tatakra yamnikira takisa kan witin dîa laik ba yawan daukisa bara liliakira wan daukbia.
Yawan wark takaia ba lika diara tara sa, sakuna Jehova ra mayunaia ba purkara wan warkka ba kau tara kulkaia apia sa (Jan 6:27). Witin ra mayunaia ba pas tâura tara kulkisa kaka, pramis wan munisa yawan dîa nit ba wankaia.
2. ¿Baibil dîa wisa lalah briaia ba dukiara?
Baibil wisa lalah ba “wan kaina sunisa”, sakuna baha baman lilia lâka ba wankras (Smasmalkra 7:12). Baku bamna, Baibil ba wan kupia kraukisa: “Man nani dîa brisma ba wal liliam bas” (Hibru Nani 13:5). Wan rayaka ra yawan dîa bri ba wal lilia sa taim, yawan ba kupia turban lâka âpu sa diara wala pliki taukras bamna. Baha mita bahki yawan tras dimras (Sins Lâka 22:7). Baku sin lalah tâwan pulaia pâtka ba wina yawan pri sa, bara isti lalahkira takaia lukanka ba pât ra wan dingkras.
3. ¿Yawan nahki sip sa wan lalahka ba wina prisant yabaia?
Jehova ba Gâd kum kupia pihnikira sa, bara witin baku yawan sin “wilin kabia dîa bri nani ba upla wala nani aikuki yui briaia” sa (1 Timoti 6:18). Wilin lâka kat yawan sip sa wan prisantka yabaia kangrigisan nitka nani atkaia dukiara, bara muihni lakri nani ra sin tâ baikaia. Jehova kau kulki ba lika wan lukanka yamnikira ni yabi ba, sakuna lalah an yabi ba lika apia. Wan kupia wina prisant yabisa taim, yawan lilia takisa bara Jehova sin (Sturka Nani 20:35 aisi kaikma).
KAU LAN TAKS
Laki kaiks dîa muni aitani nit ba kat yawan wark takaia sa, bara dîa pat bri ba wal lilia kaia.
4. Wark tatakra pain bas, bara baku Jehova ra prana lâka yama
Jehova wal wan pânika lâka ba marikaia sa wark takaia ba yawan nahki kaikisa. LILKA ba kaikma, bara naha dukiara aisi banhma:
-
Lilka ra kaikan baku wark daukaia ba dukiara Jason luki kan ba wina, ¿man dîa lan takisma?
-
¿Witin dîa daukan aitani pitka kat wark takaia dukiara?
Kolosi 3:23, 24 aisi kaikma, bara naha dukiara aisi banhma:
-
¿Wark daukaia ba dukiara yawan dîa lukaia sa ki?
Yawan wark takaia ba diara tara sa, kuna Jehova mayunanka ba lika kau tara kulkaia sa
5. Yawan dîa bri ba wal lilia sa taim diara yamni takisa
Upla manis karna trai munisa lalah ailal apahkaia. Sakuna Baibil ba diara wala daukaia wan smalkisa. 1 Timoti 6:6-8 aisi kaikma, bara naha dukiara aisi banhma:
-
¿Naha tikska ra Baibil dîa wan smalkisa?
Yawan lalah wiria bribia sin lilia kaia sip sa. LILKA ba kaikma, bara naha dukiara aisi banhma:
-
Baha pamalika nani ba lalah wiria bribia sin, ¿dîa muni lilia sa ki?
Bara lalah pat aitani bri ba purkara, ¿yawan kau lalah want sa kaka? Baha lukanka upla bri ba dukiara Jisas ba maprika lilka kum win. Luk 12:15-21 aisi kaikma, bara naha dukiara aisi banhma:
-
¿Maprika lilka Jisas aisan ba wina man dîa lan takisma? (bors 15 ba kaiks).
Sins Lâka 10:22 bara 1 Timoti 6:10 aisi kaiki banhma bara wâlsut ba praki kaikma. Ningkara naha dukiara aisi banhma:
-
¿Dîa ba kau tânka tara brisa lukisma: Jehova pânika kaia, apia kaka lalahkira pali kaia? ¿Dîa muni?
-
¿Upla ba lalahkira pali takan daukisa kaka, dîa takaia sip sa?
6. Wan rayaka ra yawan dîa nit ba Jehova wankbia
Lalah trabilka bara wark âpu sa taim, chans kum takisa Jehova ra marikaia yawan nahki witin ra kasak luki ba. LILKA ba kaikma, bara lan takma yawan dîa daukaia sip sa baha trabilka nani bribia taim, ningkara naha dukiara aisi banhma:
-
Lilka ra kaikan baku, ¿kristian waitna ba dîa trabilka pura luaia kan?
-
¿Witin dîa daukaia kan baha trabilka pura luaia dukiara?
Matiu 6:25-34 aisi kaikma, bara naha dukiara aisi banhma:
-
Wan rayaka ra Jehova dukia nani ba pas tâura plikisa kaka, ¿witin dîa pramis wan munisa?
UPLA KUM KUM NAKU LUKISA: “Karna wark takaia sna pamaliki main kaikaia dukiara. Wik bani asla aidrubanka nani ra sip dimras”.
-
¿Dîa muni Jehova mayunanka ba pas tâura plikaia ba kau yamni sa? ¿Bara ani tikska hilp mai munisa baha daukaia?
DÎA LAN TAKRAM
Wark taki lalah daukaia ba nit sa, ban sakuna Jehova warkka daukaia ba lika yawan swiaia apia sa.
Wan kupia krawaia
-
¿Dîa hilp mai munaia sip sa aitani pitka kat wark takaia dukiara?
-
Diara pat brisma ba wal lilia sma kaka, ¿dîa yamnika sâkma?
-
Jehova pramis munisa ai uplika nani ra diara nit ba yabaia, ¿man nahki marikaia sip sma baha pramiska kasak lukisma ba?
KAU PLIKI KAIKS
Laki kaiks Baibil ba lalah mapara saura aisisa sapa.
Lan taks yawan nahki sip sa lalah ba pain yus munaia Gâd pain wan kaikbia dukiara.
“¿Baibil ba dîa wisa prisant yabaia dukiara?” (jw.org ra kaiks)
¿Lalah tâwan pulaia ba saura sa ki?
“Baibil smalkanka: Lalah tâwan pulaia” (¡Despertad!, marzo 2015)
Aisi kaiks nahki waitna kum lalah tâwan puli bara impliki kan ba ai rayaka ba chens takan.
“Baibil ba upla rayaka chens munisa” (La Atalaya noviembre 1, 2011)
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
