EISHOMO 37
Eki Baibuli Erikugamba aha Kukora n’Esente
Oragizireho okwerarikirira ahabw’omurimo nari esente? Noobaasa kugumirwa kuringaaniza omurimo gw’okwebaisaho n’okuramya Yehova nk’oku arikusiima. Baibuli neeha obuhabuzi oburikukora oburikubaasa kutuhwera.
1. Baibuli neegamba ki aha kukora?
Ruhanga naayenda ngu tukunde emirimo ei turikukora. Baibuli neegira ngu ‘tihariho ekirikugasira omuntu ekirikukira okutunga okushemererwa omu bi afeereire kubi.’ (Omubuurizi 2:24) Yehova n’omweziriki. Twaba abeeziriki nkawe, nitumushemeza, kandi nitugira okumarwa.
Okukora ni kikuru. Kwonka titwine kutwara emirimo yaitu nka kikuru munonga kukira okuheereza Yehova. (Yohaana 6:27) Naaturaganisa ngu twayebembeza okumuheereza, naija kutuha eby’okutubaisaho.
2. Twine kugira miteekateekyere ki eringaniire aha sente?
N’obu Baibuli eraabe neegira ngu esente n’ez’oburinzi, kwonka neeturabura ngu tizo zonka ezirikutureetera okushemererwa. (Omubuurizi 7:12) N’ahabw’ekyo, nitwehanangirizibwa kutakunda esente, kureka ‘ebi twine bibe nibyo byatumara.’ (Shoma Abaheburaayo 13:5.) Twaguma tumazirwe n’ebi twine, nikituhwera kutagira amaganya g’okuguma nitwegomba ebi tutaine. Nitwetantara amabanja agatarikwetengyesa. (Enfumu 22:7) Kandi nitwerinda akabi k’okuteera zaara, n’okuza omu bigombe ebirikuhimbisiriza okugaigahara ahonaaho.
3. Esente nizibaasa kukoresibwa zita omu muringo gw’obufura?
Yehova ni Ruhanga efura, kandi nitumutooreza turikuba abantu “efura” abeeteekateekire kubagana n’abandi. (1 Timoseo 6:18) Nitubaasa kuba efura turikuhayo esente zaitu kushagika ekibiina, n’okuhwera abaine ebi bakyenire na munonga abarikuramya Yehova bagyenzi baitu. Yehova tarikufayo munonga aha bwingi bw’ebi turikuhayo, kureka ekigyendererwa kyaitu eky’okuhayo. Twaba efura tukahayo kuruga aha mutima, nitushemeza Yehova, kandi naitwe nitushemererwa.—Shoma Ebyakozirwe 20:35.
SHWIJUMA GYE
Reeba oku orikugasirwa waagira okumarwa, kandi okata omurimo omu mwanya gwagwo.
4. Himbisa Yehova omu mikorere yaawe
Omukago gwaitu na Yehova gwine kukwata aha ku turikutwara okukora. Zaana VIDIYO, kubaasa kugarukamu ebibuuzo ebirikukurataho.
-
Omu vidiyo, niki ekyakushemeza aha emiteekateekyere ya Jason n’oku arikutwaza aha murimo?
-
Akakora ki kubaasa kuta omurimo omu mwanya gwagwo oguhikire?
Shoma Abakolosai 3:23, 24, kubaasa kugarukamu ekibuuzo eki:
-
Ahabw’enki emiteekateekyere ei twine aha kukora eri mikuru?
Okukora ni kikuru. Kwonka titwine kwikiriza omurimo kuba mukuru kukira okuramya Yehova
5. Okumarwa nikutugasira
Abantu baingi nibateeraho kutunga esente nyingi nk’oku barikubaasa. Kwonka Baibuli neetuha obuhabuzi oburikutaana n’ekyo. Shoma 1 Timoseo 6:6-8, kubaasa kugarukamu ekibuuzo eki:
-
Baibuli neetuhiga kukora ki?
N’obu twakuba twine ebintu bikye, nitubaasa kushemererwa. Zaana VIDIYO, kubaasa kugarukamu ekibuuzo ekirikukurataho.
-
Niki ekirikureetera ab’amaka aga kushemererwa, n’obu baraabe bari abooro?
Kwonka shi ku waakuba oine ebintu bingi beitu orikwenda ebindi? Yesu akooreka akabi k’okukora ekyo. Shoma Luka 12:15-21, kubaasa kugarukamu ekibuuzo eki:
-
Waayega ki omu ky’okureeberaho kya Yesu?—Reeba omushororongo 15.
Shoma kandi ogyeragyeranise Enfumu 10:22 na 1 Timoseo 6:10, kubaasa kugarukamu ebibuuzo ebi:
-
Nooteekateeka ngu ekirikukira obukuru ni kiiha? N’okuba munywani wa Yehova nari n’okugira esente nyingi? Ahabw’enki nooteekateeka otyo?
-
Okuta omutima aha kusherura esente niharugamu buremeezi ki?
6. Yehova naija kutuhwera kutunga eby’okutubaisaho
Eibura ry’emirimo n’esente nibibaasa kworeka yaaba nitwikiririza omuri Yehova. Zaana VIDIYO kureeba oku turikubaasa kusingura ebigyezo nk’ebi, reero ogarukyemu ebibuuzo ebirikukurataho.
-
Omu vidiyo, ow’eishe-emwe akatunga buremeezi ki?
-
Akakora ki kusingura oburemeezi obwo?
Shoma Matayo 6:25-34, kubaasa kugarukamu ekibuuzo eki:
-
Yehova naaraganisa kukorera ki abarikwebembeza okukora ebi arikukunda?
ABAMWE NIBAGIRA NGU: “Nyine kukora munonga kubaisaho eka yangye. Tindikubaasa kuza omu nteerane z’ekibiina zoona buri saabiiti.”
-
Ni kyahandiikirwe ki ekirikukuhamiza ngu okwebembeza okuramya Yehova, butoosha nikuba kuri okucwamu kurungi?
OMU BUGUFU
Omurimo gw’okwebaisaho n’esente nibyetengyesa, kwonka titwine kwikiriza bikaturemesa kuheereza Yehova.
Okweijutsya
-
Niki ekirikubaasa kukuhwera kugira emiteekateekyere eringaniire aha kukora?
-
Okugira okumarwa nikiija kukugasira kita?
-
Noobaasa kworeka ota ngu nooyesiga okuraganisa kwa Yehova okw’okureeberera abantu be?
JUMBURA EBINDI
Shwijuma oreebe yaaba Baibuli neegira ngu esente ni mbi.
Manya okuhayo okurikushemeza Ruhanga.
Mbwenu shi okuteera zaara tikurimu kabi?
“Eki Baibuli Erikugamba aha Kuteera Zaara” (Awake!, Maaci 2015)
Yetegyereze ekyareeteire omuteezi wa zaara kandi omushuma kuhindura emitwarize ye.
“Nkaba Ninkundira Kimwe Empaka z’Okuvuga Embaraasi” (Omunaara gw’Omurinzi, Novemba 1, 2011)
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
