YACHANA PARTI 37
Bibliaga tarabanamanda cullquimanda imatata nin
Cullquimanda, tarabanamanda imasaibi yapactachu yuyarishcangui. Ñucanchi minishtishcagunata charingahua tarabana, chillaita Jehovata sirvina, sinzhi shina ricurin. Bibliaga caigunata pactachingahua alita cunashami yanapaitucunchi.
1. Tarabanamanda Bibliaga imatata nin
Diosca ñucanchi tarbanahuan cushi sintirichun munan. Bibliaga caitami nin, “shuc runa pai sinzhita tarbashcamanda cushi sintirishca ali man” (Eclesiastes 2:24). Jehovaga sinzhita tarabac man. Ñucanchihuas, Jehova shina sinzhita tarabashaga, paita cushiyachinchi, chasnallata cushillami sintirinchi.
Tarabanaga balishca man. Sinzhita tarabashahuas, Jehovata adoranata masta balichina anchi (Juan 6:27). Jehovaga nin, paita pundai churacpiga, ñucanchi causangahua minishtishcata cuitucushun.
2. Imahuata cullquita mana yapacta balichina anchi
Bibliaga ninmi, “cullquiga causangahua yanapanmi” nisha, pero chimandas nin, yapa cullquita charinaga mana cushiyachinzhu (Eclesiastes 7:12). Chiraicu, cullquillai yarisha causana randi, Bibliaga casnami cunaitucunchi: “Canguna charishca tupullahuan cushiyaichi” (Hebreos 13:5ta leipai). Ñucanchi charishca tupullahuan cushi sintirishaga, mas cullquita charinamanda mana yapacta yuyarisha causashunzhu. Chasnallata, mana yanga dihuiyashunzhu (Proverbios 22:7). Cullquita ganangahua mana apostasha pugllanchichu. Chasnallata, cungaimanda ashca cullquita charingahua mana imatas ranchichu.
3. Imasata cullquihuan shuccunata mana mitsasha yanapanata ushanchi
Jehovaga mana mitsac Dios chan. Ñucanchihuas, Jehova shina, ñucanchi charishcagunata ʻshuccunatas mana mitsashachu cumbirashunʼ (1 Timoteo 6:18). Congregacionbi gastogunata pagangahua, shuc minishtiuc runagunata yanapangahua, ñucanchi cullquihuan yanapanchi. Chimanda, ñucanchi huauquipanigunatami punda yanapanchi. Jehovaga ñucanchi masna cushcata mana ricunzhu, paiga ñucanchi corazonmanda cushcatami ricun. Corazonmanda shuccunata yanapashaga, cushimi sintirishun, chasallata Jehovahuas, cushimi sintiringa (Hechos 20:35ta leipai).
CAIMANDA MASTA YACHAI
Tarabana minishtirishca acpihuas, imahua tucui uras tarbashalla causana mana ali ashcata ricushun. Chasnallata, ñucanchi charishcagunahuanlla cushi sintirina ashcata yachashun.
4. Alita tarabac asha Jehovata balichi
Jehovahuan amigo tucungahua, mana tarabashalla causana chanchi. VIDEOTA ricuichi, huasha cai tapuigunamanda cuintanacuichi:
-
Jasonga sinzhita tarabashahuas imasata paiba tarabanata ricun.
-
Tarbashalla causana randiga, Jasonga imatata rara.
Colosenses 3:23, 24ta (TNM) leichi, a huasha cai tapuimanda cuintanacuichi:
-
Imahuata “tucui shunguhuan” tarabanaga balishca an.
Tarabanata minishtinchi. Sinzhita tarabashahuas, Jehovata adoranatami masta balichina anchi.
5. Ñucanchi charishcagunallahuan causashaga cushi mashun
Ashca runagunaga ashca cullquita charinata munanaun. Biblia randiga, chita mana rana changui ninmi. 1 Timoteo 6:6-8ta leichi, huasha cai tapuimanda cuintanacuichi:
-
Bibliaga imasata cunaitucunchi.
Mana yapacta charishahuas, cushi causanata ushanchi. VIDEOTA ricuichi, huasha cai tapuimanda cuintanacuichi:
-
Mana yapacta cullquita charishahuas, cai aillugunaga imahuata cushi anaun.
Minishtishcata charishahuas, mas charinata munashaga, imasashi tucunga. Cai mana ali ashcata yachachingahua, Jesusca caitami cuintara. Lucas 12:15-21ta leichi, huasha cai tapuimanda cuintanacuichi:
-
Jesus cuintashcaga canda imatata yachachin (Versiculo 15ta ricuichi).
Proverbios 10:22 y 1 Timoteo 6:10ta leichi. Cai ishcai textogunamanda yuyasha, cai tapuigunamanda cuintanacuichi:
-
Imata mas balishca an: Jehovahua amigo tucuna o ashca cullquita charina. Imahua.
-
Yapa cullquita charinata munashaga, ima turmintugunatata charishun.
6. Jehova ñucanchi minishtishcagunata cuitucushun
Tarabana mana tiashcamanda cullqui mana tiacpiga, Jehovaibi mas sinzhita quirina anchi. Cai sami llaquiguna tiacpi, imata ranata yachangahua VIDEOTA ricuichi. Huasha, cai tapuigunamanda cuintanacuichi:
-
Cai videoibi ricuric huauqui, ima turmintugunatata charira.
-
Ñaupagma catingahua imatata rara.
Mateo 6:25-34ta leichi, huasha cai tapuimanda cuintanacuichi:
-
Ñucanchi causaibi punda Jehovata churacpiga, paiga imatata cunga.
MAICANGUNAGA CASNAMI NINAUN: “Ñuca ailluta cuirangahua, ashcata tarabana mani. Chiraicu, caran semanaibi tandarinama mana rinata ushani”.
-
Bibliamanda ima textota yanapaitucungui, Jehovata adoranata punda churangahua.
IMATA YACHASHCANGUI
Tarabana, cullquiga minishtishca manaun. Pero caigunaga, Jehovata adoranamanda mana caruyachina chanaun.
Yachashcata cuintai
-
Mana tarabashalla causangahua, imata yanapaitucungui.
-
Charishca tupullahuan causanaga, imasata yanapaitucunchi.
-
Jehova paita sirviccunata ima minishtishcata cungaraushcata nin. Canga, pai nishcaibi quirishcata imasata ricuchinguima.
CANLLATA MASTA YACHAI
Bibliaga cullqui mana ali chan ninzhu.
“Cullquimandachu ashca turmintuguna tian” (jw.org internet pistuibi)
Mana mitsasha cushaga, Jehovatami cushiyachishun.
“Shuccunata cumbiranamanda Bibliaga imatata nin” (jw.org internet pistuibi)
Apostasha pugllanaga ali chan.
“Bibliaga caitami yachachin: Apostasha pugllanamanda” (¡Despertad!, marzo de 2015)
Cullquimanda pugllasha shuhuac runataga, paiba causaita alichingahua ima yanapashcata leipai.
“Caballui callpasha pugllauccunamanda apostanata munac arani” (La Atalaya, 1 de noviembre de 2011)
a Colosenses 3:23, 24 (TNM): “Canguna imatas raushahuas, Jehovaraicu tarbaushina tucui shunguhuan raichi, mana runagunaraicu tarbaushina. Jehovami cangunata shuc premiota shina cungaraucta yachanguichi. Amu Cristoraicu tarbaccuna aichi”.
