LEKCIJA 37
So phenel e Biblija pal e buťi the pal o love
Trapines tut varekana sostar te dživel? Šaj el phares te postarinel pes pal peskeri fameľija a tiš furt te del le Jehovas pro peršo than. So akor? E Biblija amenge sikavela.
1) So arakhas andre Biblija pal e buťi?
O Del kamel, kaj amara buťatar te radisaľuvas. E Biblija phenel, hoj „nane ňič feder predal o manuš, sar ... te arakhel radišagos andre peskeri phari buťi.“ (Kazateľ 2:24) O Jehovas hino tiš igen buťakero. Te rado keras buťi, avka sar ov, keras leske radišagos a hin amenge mištes pro jilo.
E buťi amenge kampel. Aľe ňigda našťi domukhas, hoj e buťi ela predal amende buter sar o Jehovas. (Ján 6:27) O Jehovas diňa lav, hoj te les daha pro peršo than, dela amen savoro, so čačes kampel.
2) Sar te dikhel pro love?
Andre Biblija hin, hoj o love amenge kampel. Aľe tiš, hoj o love na kerena amaro dživipen bachtalo. (Kazateľ 7:12) Del amen goďi, kaj pes te na zakamas andro love, aľe phenel: „Aven spokojna oleha, so tumen hin.“ (Pregen Hebrejom 13:5) Soske? Bo te sam spokojna oleha, so amen hin, na ela amenge phares pro jilo, hoj amen nane buter, aňi na avaha hamišna. Tiš na laha hijaba bare love pro kečen. (Príslovia 22:7) Aňi na čhivaha love andro stroji aňi na podavkeraha, kaj sig te zbarvaľuvas.
3) So lačho šaj keras le lovenca?
O Jehovas hino Del, so jilestar davkerel. The amen kamas jilestar te davkerel u te rodel, kaha pes šaj ulavas. (1. Timotejovi 6:18) So šaj keras? Šaj čhivas andre schranka. Rade pomožinas amare phralenge the pheňenge, kas nane a tiš aver manušenge. O Jehovas na dikhel pre oda, keci das, aľe či das jilestar. A te das jilestar, sam bachtale a o Jehovas hino pre amende barikano. (Pregen Skutky 20:35)
DODŽAN TUT BUTER
So tuke oda dela, te predal tute e buťi na ela buter sar o Jehovas a tiš, hoj aveha spokojno oleha, so tut hin.
4) Andre buťi sikav, hoj sal le Jehovaskero
Te rado dikhas le Jehovas, dičhola oda the andre amari buťi. Mukh o VIDEJO a paľis vakeren jekhetane.
-
So tut zaiľa pre oda, sar o Jason dikhelas pre peskeri buťi a sar pes odoj chovinelas?
-
So kerďa, kaj e buťi predal leste te na el buter sar o Jehovas?
Pregen Kolosanom 3:23, 24 a paľis vakeren jekhetane:
-
Sar ala lava sikaven, soske nane jekh sar keras e buťi?
E buťi amenge kampel. Aľe ňigda lake na das ajso than, so hino ča le Jehovaskero
5) Av spokojno oleha, so tut hin
But manuša dživen ča predal oda, kaj te zaroden so nekbuter love. Aľe e Biblija sikavel vareso aver. Pregen 1. Timotejovi 6:6–8 a paľis vakeren jekhetane:
-
So amenge phenel e Biblija, kaj te keras?
The te dživas čorikanes, šaj avas bachtale. Mukh o VIDEJO a paľis vakeren jekhetane.
-
Adi fameľija dživel čorikanes, aľe the avka hiňi bachtaľi. Soske?
A so te amen nane smirom a kamas furt buter a buter? O Ježiš phenďa pribehos, savestar sikhľuvas, sar na kamas te doperel. Pregen Lukáš 12:15–21 a paľis vakeren jekhetane:
-
So sikhľiľal ale pribehostar? (Dikh o tekstos 15.)
Pregen Príslovia 10:22 the 1. Timotejovi 6:10 u dikh andre soste hine zajekh. A paľis vakeren jekhetane:
-
So mišľines, so hin buter? Te el lačho le Jehovaha abo o barvaľipen? Soske?
-
So pes šaj ačhel, te ča izdraha pal o love?
6) O Jehovas amen dela sa, so kampel
Te našaďamas e buťi a ela amen frima love, sikavela pes, sar paťas le Jehovaske. Mukh o VIDEJO a dikh, so te kerel, kaj tiro paťaviben te ačhel zoralo. Paľis vakeren jekhetane.
-
So pes ačhiľa le phraleske andro videjo?
-
So kerďa, kaj leskero paťaviben te ačhel furt zoralo?
Pregen Matúš 6:25–34 a paľis vakeren jekhetane:
-
Savo lav diňa o Jehovas olenge, so les den pro peršo than?
VAREKO ŠAJ PHENEL: „Kampel mange te zarodel. So dava le čhavenge. Našťi avav pro dojekh zhromažďeňe.“
-
Savo biblicko tekstos tuke del zor, hoj te des le Jehovas pro peršo than, hin oda oda nekfeder, so šaj keres?
SO SIKHĽIĽAM
E buťi the o love amenge kampel, aľe ňigda oda našťi el predal amende buter sar o Jehovas.
So bi phenehas
-
Sar kames te dikhel pre buťi?
-
So lačho tuke oda dela, te aveha spokojno oleha, so tut hin?
-
Sar sikaveha, hoj paťas, hoj o Jehovas dela peskere niposke sa, so kampel?
DIKH TUKE BUTER
Phenel e Biblija, hoj o love hine nalačhe?
Soske hino o Del igen rado, kana davkeras?
Čačes nane ňič nalačho pre oda, sar bavinas o automati?
„Čo o tom hovorí Biblia? Hazardné hry“ (Prebuďte sa! z marca 2015)
Pregen tuke, soske jekh čorkošis the gembler prekerďa peskero dživipen.
„Mojou vášňou boli dostihové kone.“ (Strážna veža z 1. novembra 2011)
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
