ЛЕКЦИЈА 37
Со вакерела и Библија баши бути хем башо паре
Дали сиан сине некогаш секиримо баши бути или башо паре? Шај те овел аменге пхаро ко исто време те грижина амен башо амаре потребе хем те служина е Јеховаске аѓаар сар со ов мангела. И Библија дела амен практична советија со шај те поможинен аменге.
1. Со вакерела и Библија баши бути?
О Девел мангела те уживина ки бути. И Библија вакерела кај „нане ништо пошукар таро адава о мануш... те уживинел ко шукар буќа таро пло трудо“ (Проповедник 2:24). О Јехова да керела бут бути. Кеда џаја пало лескоро пример аѓаар со сием буќарне, кераја ле бахтало хем амен да сием задоволна.
И бути тани важно. Ама, на ваљани никогаш те дозволина те овел поважно таро амаро служибе е Јеховаске (Јован 6:27). Кеда аменге најважно ко живото те служина е Јеховаске, ов ветинела кај ка грижинел пе башо амаре материјална потребе.
2. Сар ваљани те дикха ко паре?
И Библија вакерела кај „о паре тане заштита“, ама исто аѓаар вакерела кај амаро бахталипе на зависинела само таро паре (Проповедник 7:12). Адалеске и Библија поттикнинела амен те на манга о паре, него те ова задоволна адалеа со иси амен. (Читин Евреите 13:5.) Кеда сием задоволна адалеа со иси амен, нане те манга те овел амен са повише хем повише, соске адава ка керел те осетина амен разочариме хем те кхува ко борчија бизи потреба (Изреки 22:7). Исто аѓаар, нане те пера ки замка те кхела комари, наградна игре хем те прифатина понуде со нане реална кола со ветинена аменге кај сигате ка барваљова.
3. Сар шај те сикава кај сием дарежлива?
О Јехова тано дарежливо Девел. Амен шај те џа пало лескоро пример кеда сием дарежлива хем спремно делинаја е јаверенцар адава со иси амен (1. Тимотеј 6:18). Амен шај те користина амаре паре аѓаар со ка да доброволна прилогија ко собрание хем аѓаар со ка поможина е јаверенге кеда ваљани ленге помош — посебно амаре пхраленге хем пхењенге. Е Јеховаске нане важно кобор даја, него соске даја. Кеда даја дарежливо таро вило, амен ка ова бахтале хем о Јехова ка овел задоволно амендар. (Читин Дела 20:35.)
ДОЗНАЈН ПОВИШЕ
Дикх соске тано шукар те овел амен о исправно стави баши бути хем те ова задоволна адалеа со иси амен.
4. Фалин е Јехова аѓаар со ка ове шукар работнико
Амаро амалипе е Јеховаја ваљани те влијајнел упро амаро стави спрема и бути. Дикх о ВИДЕОКЛИПИ, а пало адава керен лафи башо акала пучиба:
-
Со свиџинела пе туке највише ко е Џејсонескоро стави баши бути хем ко адава сар понашинела пе ки бути?
-
Со поможинѓа е Џејсонеске те овел ле исправно стави спрема и бути?
Читин Колошаните 3:23, 24, а пало адава керен лафи башо акава пучибе:
-
Соске тано важно сар дикхаја ки бути?
И бути тани важно. Ама, на ваљани никогаш те дозволина те овел поважно таро амаро служибе е Јеховаске
5. Ако сием задоволна адалеа со иси амен ка ова бахтале
Бут мануша трудинена пе те кхеден кобор со шај повише паре. Ама, и Библија поттикнинела амен те кера нешто јавер. Читин 1. Тимотеј 6:6-8, а пало адава керен лафи башо акава пучибе:
-
Со поттикнинела амен и Библија те кера?
Чак ако иси амен бут хари шај те ова бахтале. Дикх о ВИДЕОКЛИПИ, а пало адава керен лафи башо акава пучибе:
-
Иако нане лен бут паре, со поможинела акале фамилиенге те овен бахтале?
Со ако иси амен доволно, ама мангаја повише? О Исус вакерѓа јекх споредба која со сикавела кобор акава тано опасно. Читин Лука 12:15-21, а пало адава керен лафи башо акава пучибе:
-
Со сиклиљан тари е Исусескири споредба? (Дикх о стихо 15.)
Читин Изреки 10:22 хем 1. Тимотеј 6:10, а пало адава керен лафи башо акала пучиба:
-
Со мислинеа, сој тано поважно: Те овел тут паше амалипе е Јеховаја или те овел тут бут паре? Соске мислинеа аѓаар?
-
Саве проблемија ка овен амен ако прастаја пало паре?
6. О Јехова ка грижинел пе башо амаре потребе
Кеда ачховаја бизи бути хем иси амен финансиска проблемија, амари вера ко Јехова шај те овел испитими. Дикх о ВИДЕОКЛИПИ те шај те дознајне со шај те кера ако иси амен асавке проблемија, а пало адава керен лафи башо акала пучиба:
-
Саве проблемија сине е пхрале?
-
Со керѓа те шај те икљовел ко крајо акале проблеменцар?
Читин Матеј 6:25-34, а пало адава керен лафи башо акава пучибе:
-
Со ветинела о Јехова кај ка керел околенге со чхивена ле ко прво тхан ко пло живото?
НЕСАВЕ ШАЈ ВАКЕРЕНА: „Мора те керав бут бути те шај те грижинав ман мле фамилијаке. Нашти те џав ко секова состанок ко курко“.
-
Кова стихо уверинела тут кај секогаш тано најшукар те чхива е Јехова ко прво тхан ко амаро живото?
СО СИКЛИЛЕМ
И бути хем о паре тане важна хем потребна. Ама, никогаш на ваљани те дозволина ола те циден амен таро Јехова.
Сар ка одговорине?
-
Со шај те поможинел туке те овел тут исправно стави баши бути?
-
Соске тано шукар те ове задоволно адалеа со иси тут?
-
Сар шај те сикаве кај иси тут доверба ко е Јеховаскоро ветување кај ка грижинел пе пле слугенге?
ИСТРАЖИН
Дознајн дали и Библија вакерела кај о паре тане лошна?
Дикх саво дејбе керела бахтало е Јехова.
Дали тано опасно те кхела комари?
„Што вели Библијата — коцкање“ (Разбудете се! таро март 2015)
Читин со поможинѓа јекхе комарџиа хем криминалцо те менинел пло живото.
„Тркачките коњи ми беа голема страст“ (Стражарска кула таро 1 ноември 2011)
Шај исто ка интересинел тут
НАЈЧЕСТА ПУЧИБА
Сар изглединела о библиско курси со нудинена е Јеховаскере сведокија?
Џикоте икерела пе о бесплатно библиско курси, шај те користине било кова превод тари Библија. Ко курси шај те канине некас тари тли фамилија или несаве амале.
