XIDONDZRO 37

Vonela Dzra Bibele Hi Ntizro Ni Mali

PLAY

Xana u sama u hlatiyela hi kola ka ntizro kumbe mali? Swi nga ha kazrata ku kuma leswi hi swi vilelaka hi tlhela hi gandzrela Yehovha hi lani swi mu fanelaka ha kone. Kambe Bibele dzri ni swilayu leswinene, leswi nga hi pfunaka.

1. Xana Bibele dzri li yini hi ntizro?

Xikwembu Nkulukumba a djula hi nyonxela ntizro wezru. A Bibele dzri li: ‘A ku na ku mhunu lexi tlulaka . . . ku titsrhavela ntizrweni wakwe.’ (Eklesiasta 2:24) Yehovha a tizra hi nkhinkhi. Loko hi mu yetisela hi ku va na hine hi tizra hi nkhinkhi, ha mu nyonxisa ku tlhela ku nyonxa na hine hi ntizro wezru.

Ntizro i wa lisima. Nambitanu, a hi fanelanga ni kutsrongo ku wu nyika lisima ku tlula ku gandzrela Yehovha. (Yohan 6:27) Yehovha a hi dumbisa leswaku loko hi zrangisa ku mu gandzrela a wuton’wini byezru, a ta hi nyika leswi hi swi vilelaka a wuton’wini.

2. Xana hi fanela ku yi vonisa kuyini mali?

Nambileswi Bibele dzri hlayaka leswaku a mali ya mpfenkela, dzri tlhela dzri hi dzrimuxa leswaku yone wuswayone a yi nge hi yentxi hi nyonxa. (Eklesiasta 7:12) Xileswo, hi kutxiwa kuva hi nga yi zrandzri mali, kambe hi ‘tsrhava hi leswi hi nga naswu’. (Dondzra Ba-Heberu 13:5.) Loko hi yentxa leswo, a hi nge ti tsrhamela ku hlatiyela hi ku tivona ingiki hi na switsrongo. A hi nge ti tipeta ka swikweneti na swi nga vileleki. (Amaproverbia 22:7) Hi tlhela hi fambela kule ni timhangu ta mintlangu ya ku bedja hi mali ni ku phasiwa hi mintxhumu leyi nga twisisekiki hi ku djula ku ganya swa kola na kola.

3. Hi nga yi tizrisisa kuyini mali akuva hi pfuna van’wana?

Yehovha i Xikwembu Nkulukumba lwa hananaka, nakone hi fanela ku mu yetisela hi ku va ‘lava yavelaka swavu, va hanana’. (1 Timoteo 6:18) Hi nga pfunisa hi ku tizrisa mali yezru, hi ku seketela bandla ni ku pfuna lava vilelaka, ngopfungopfu vamakwezru. Xa lisima ka Yehovha a hi ntsrengo wa mali leyi hi yi nyikelaka, kambe a langusa leswi hi susumetelaka ku nyikela mali yoleyo. Loko hi nyikela na swi sukela mbilwini, hi ta nyonxa hi tlhela hi nyonxisa Yehovha.—Dondzra Amintiṛo 20:35.

KELISISA

Vona leswaku ha yini swi li swinene ku beka ntizro mbangwini wa wone ni ku yaneliseka hi leswi hi nga naswu.

4. Dzrumisa Yehovha hi ndlela leyi u tizraka ha yone

Wunghanu byezru na Yehovha byi fanela ku khumba vonela dzrezru hi ntizro. Vonani VHIDIYU, mi gama mi bulisana hi swivutiso leswi landzrelaka.

VHIDIYU: Tizrela Yehovha Hi Wutomi Byaku Hinkwabyu (4:39)

Ka vhidiyu, i yini lexi ku nyonxisiki ka ndlela leyi Jonas a tikhomiki ha yone a ntizrweni?
A yentxe yini leswaku a beka ntizro mbangwini wa wone?

Dondzrani Ba-le-Kolosa 3:23, 24, mi gama mi bulisana hi xivutiso lexi:

Ha yini vonela dzrezru hi ntizro dzri li dzra lisima?

Ntizro i wa lisima. Nambitanu, a hi fanelanga ni kutsrongo ku wu nyika lisima ku tlula ku gandzrela Yehovha

5. Ku yaneliseka hi leswi hi nga naswu swi hi yentxa hi nyonxa

Vanyingi va zama ku hlengeletela mali yinyingi hi lani va nga kotaka ha kone. Kambe Bibele a dzri yimi na swone leswo. Dondzrani 1 Timoteo 6:6-8, mi gama mi bulisana hi xivutiso lexi:

Xana Bibele dzri hi kutxa ku yentxa yini?

Hi nga nyonxa nambi loko leswi hi nga na swone swi nga gami mbangu. Vonani VHIDIYU, mi gama mi bulisana hi xivutiso lexi.

VHIDIYU: Yaneliseka “Hi Leswi U Nga Na Swone” (3:20)

I yini lexi yentxaka mindangu leyi yi nyonxa nambiloko yi nge na mali ya ku gama mbangu?

Swi nga kuyini loko hi ni swinyingi kambe ha ha djula swimbeni? Yesu a kombise khombo dzra leswo hi ku tizrisa xifananiso. Dondzrani Luka 12:15-21, mi gama mi bulisana hi xivutiso lexi:

U dondzre yini ka xifananiso xa Yesu? —Vonani ndzrimana 15.

Dondzrani Amaproverbia 10:22 mi yi twananisa ni 1 Timoteo 6:10. Ntsrhaku, bulisanani hi swivutiso leswi:

U vona leswaku i yini swi nga ni lisima ngopfu? I wunghanu na Yehovha kumbe i ku va ni mali yinyingi? Ha yini u hlaya leswo?
He wani makhombo ya ku tsrhamela ku djula mali?

6. Yehovha a ta hi nyika leswi hi swi vilelaka

Swikazratu swa ntizro ni mali swi nga dzringa ndlela leyi hi dumbaka Yehovha ha yone. Vonani VHIDIYU akuva mi vona leswi hi nga swi yentxaka loko hi kumana ni mindzringo leyi fanaka, mi gama mi bulisana hi swivutiso leswi landzrelaka.

VHIDIYU: Yehovha A Ta Hi Nyika Leswi Hi Swi Vilelaka (6:21)

Ka vhidiyu, he swini swikazratu leswi makwezru a kumaniki na swone?
I yini leswi a nga swi yentxa akuva a hlula swikazratu?

Dondzrani Matewu 6:25-34, mi gama mi bulisana hi swivutiso leswi landzrelaka:

Yehovha a dumbisa ku va yentxela yini lava zrangisaka ku gandzrela yene a wuton’wini byavu?

VAN’WE VA LI: “Ni fanela ku tizra ni ta wundla ndangu wanga. A ni nge swi koti ku ya mintlhanganwini vhiki ni vhiki.”

He wani matsralwa lama ku kholwisaka leswaku ku beka Yehovha a mbangwini wa ku sungula i xiboho lexinene?

NKATSRAKANYU

Ntizro ni mali swa djuleka kambe a swi fanelanga swi hi hingeleta ku gandzrela Yehovha.

Mpfuxeto

I yini lexi nga ku pfunaka ku dzringanisela a mhakeni ya ntizro ni ku gandzrela Yehovha?
Xana swi ta ku pfuna hi ndlela yini loko u yaneliseka hi leswi u nga na swone?
U nga swi kombisisa kuyini leswaku wa xi dumba xidumbiso xa Yehovha xa ku wundla vhanu vake?

Xidondzro lexi xi hele hi:

Lwela leswi

Kambisisa leswaku a ntizro wu ku yentxe u luza mintlhanganu yingani hweti leyi khalutiki. Loko swi yentxekile, lwela ku yampswisa xiyimu.

Swin’wana:

Swin‘wana Leswi U Nga Swi Yentxaka