MATAUPU 37

Pati i te Tusi Tapu ki Galuega mo Tupe

FAKATAGI/PEI

Kai manavase malosi aka eiloa koe e uiga ki galuega mo tupe? E mafai o faigata ke tausi atu ki ‵tou manakoga faka-te-foitino kae ke tuku atu foki ki a Ieova a te tapuakiga e ‵tau o maua ne ia. E tuku mai i te Tusi Tapu a pati fakatonutonu aoga kolā e mafai o fesoasoani mai ki a tatou.

1. Ne a pati e fai mai i te Tusi Tapu e uiga ki galuega?

E manako te Atua ke fia‵fia tatou ki ‵tou galuega. E fai mai te Tusi Tapu me “e seai se mea e ‵lei atu ki te tagata i lō . . . te fiafia i ana galuega ‵mafa.” (Failauga 2:24) A Ieova e galue malosi. Kafai e fakaakoako tatou ki a ia mai te ga‵lue malosi, ko fakafiafia ne tatou a ia kae maua foki ne tatou se lagonaga fakamalie loto.

E tāua a galuega. Kae e se ‵tau o fakatāua malosi ne tatou i lō te ‵tou tapuakiga ki a Ieova. (Ioane 6:27) Ne tauto mai a ia me kafai e fakamuamua ne tatou a ia, ka tausi mai a ia ki ‵tou manakoga faka-te-foitino.

2. Se a te kilokiloga paleni ki tupe?

E tiga eiloa e fai ‵tonu mai te Tusi Tapu me i “tupe se puipuiga,” kae e fakailoa mai foki i ei, me e se mafai fua o maua ne tatou a te fiafia mai tupe. (Failauga 7:12) Tela la, e fakamalosi mai i ei ki a tatou ke mo a ma fia‵fai ki tupe “kae ke lotoma‵lie ki mea ko maua.” (Faitau te Epelu 13:5.) Kafai e lotoma‵lie faeloa tatou ki mea ko maua, ka se mafai o maua ne tatou te loto fanoanoa ona ko te manako lasi. E ‵kalo keatea tatou mai te faiga o kaitalafu e uke. (Faataoto 22:7) Kae puipui ei tatou mai i ikuga fakama‵taku o te kemupolo mo te kausaki atu ki auala faitogafiti ke maumea vave.

3. E fakaaoga pefea ne tatou a tupe mo te kaimalie?

A Ieova, se Atua kaimalie, kae fakaakoako tatou ki a ia māfai e ‘kaima‵lie, kae toka o tufa atu ‵tou mea.’ (1 Timoteo 6:18) E mafai o fakaaoga ‵tou tupe mo te kaimalie mai te ‵lago atu ki te fakapotopotoga, kae fesoasoani atu ki nisi tino kolā e ma‵nako ki ei, maise ‵tou taina tapuaki. E sili atu te fiafia o Ieova ki te pogai e tuku atu ei ‵tou mea, kae e se ko te aofaki. Kafai e tuku atu ‵tou mea mo te kaimalie mo ‵tou loto kātoa, ka fia‵fia tatou kae ka fai foki ne tatou a Ieova ke fiafia.—Faitau te Galuega 20:35.

KELI MALOSI IFO

Onoono ki mea aoga e maua ne tatou māfai e tumau faeloa i se kilokiloga ‵lei ki galuega kae lotomalie ki mea ko maua.

4. Ke fakaaloalo ki a Ieova i te auala e galue ei koe

E ‵tau o fakamalosi aka ne te ‵tou va fakataugasoa mo Ieova a ‵tou kilokiloga ki galuega. Pei te VITIO, ko sau‵tala ei ki fesili konei.

VITIO: Galue mo te Loto Katoa mō Ieova (4:39)

I te vitio, kaia ne fiafia ei koe ki faifaiga mo amioga a Iasona i tena koga galue?
Ne a ana mea ne fai ke fakatumau tena kilokiloga ‵lei ki galuega?

Faitau te Kolose 3:23, 24, ko sau‵tala ei ki te fesili tenei:

Kaia e tāua ei ‵tou kilokiloga ki galuega?

E tāua a galuega. Kae e se ‵tau o fakatāua malosi ne tatou i lō te ‵tou tapuakiga ki a Ieova

5. A te lotomalie ki mea ko maua e aoga ki a tatou

E taumafai a tino e tokouke ke maua a tupe e uke. Kae e ‵kese a te mea telā e fakamalosi mai i te Tusi Tapu. Faitau te 1 Timoteo 6:6-8, ko sau‵tala ei ki te fesili tenei:

Se a te mea e fakamalosi mai i te Tusi Tapu ke fai ne tatou?

Kafai foki e se uke ‵tou kope, e mafai eiloa o fia‵fia tatou. Pei te VITIO, ko sau‵tala ei ki te fesili tenei.

VITIO: Ke “Lotoma‵lie ki Mea ko Maua ne Koutou” (3:20)

Faitalia me e se uke olotou tupe, ne a mea ne fai ei ke fia‵fia a kāiga konei?

Kae e a māfai ko uke ‵tou kope, kae koi ma‵nako foki ki nisi mea? Ne fakamatala mai ne Iesu a te mea fakamataku tenei. Faitau te Luka 12:15-21, ko sau‵tala ei ki te fesili tenei:

Ne a au mea ne tauloto mai te tala fakatusa a Iesu?—Onoono ki te fuaiupu 15.

Faitau kae fakatusa te Faataoto 10:22 ki te 1 Timoteo 6:10. Ka oti, ko sau‵tala ei ki fesili konei:

Se a tau faka‵tau, tefea te ‵toe mea tāua? Se va fakataugasoa mo Ieova io me ko tupe e uke? Kaia?
Ne a fakalavelave e māfua mai i te manako faeloa ki tupe e uke?

6. Ka tausi eiloa tatou ne Ieova

A fakalavelave i te galuega mo mea tau tupe e mafai o tofotofo aka ei ‵tou fakatuanaki ki a Ieova. Pei te VITIO ke iloa ne tatou o fakafesagai atu ki vaegā tofotofoga penā o te fakatuanaki, ko sau‵tala ei ki fesili konei.

VITIO: Ka Tausi Eiloa Tatou ne Ieova (6:21)

I te vitio, ne a tulaga faiga‵ta ne fe‵paki mo te taina?
Ne a ana mea ne fai ke manumalo a ia i tulaga faiga‵ta konā?

Faitau te Mataio 6:25-34, ko sau‵tala ei ki te fesili tenei:

Se a te tautoga a Ieova ki te mea ka fai ne ia ki tino kolā e fakamuamua ne latou a ia?

MEA E FAI MAI NE NISI TINO: “E ‵tau o galue malosi au ke tausi ki toku kāiga. E se mafai o kau atu au ki fakatasiga a te fakapotopotoga i vaiaso katoa.”

Se a te tusi faitau e fakatalitonu atu ki a koe me i te fakamuamua o te tapuakiga ki a Ieova ko te ‵toe fakaikuga ‵lei eiloa?

MANATU AOGA

A galuega mo tupe ne mea aoga, kae e se ‵tau o fakalavelave mai ki te ‵tou taviniga ki a Ieova.

Fesili

Ne a mea e fesoasoani atu ke tumau koe i se kilokiloga ‵lei ki galuega?
E aoga pefea ki a koe a te lotomalie ki mea ko maua?
E fakaasi atu pefea ne koe tou loto talitonu ki te tautoga a Ieova me ka tausi ne ia ana tino?

Taimi ne oti ei te mataupu:

Mea e Mafai o Fai

Iloilo aka me e mata, ne fai ne tau galuega ke galo sāle koe i fakatasiga i nai masina ko ‵teka. Kafai e penā loa, taumafai ke momea aka te ‵lei o te tulaga tenā.

Nisi mea:

Nisi mea e mafai o fai ne koe