LECCIÓN 37
Bi rnhe Biblia ki chhin lhen domiʼ
A yoose katiʼ chi bebanhelho tan ku dia kioʼ chhin o domiʼ. Nakalha rhonse zeedi idzelherha ta ryadzarkinherha lhen gderha ki Jeobá ta rhedoleʼ. Lo Biblia zaa ta wazeke gon rhoʼo yodarhi katiʼ rhaka kan.
1. Bi rnhe Biblia ki chhin
Dios rheenheneʼ siʼrha banheza ki chhin kierha. Lhekaʼ, lo Biblia rnhe «ku dia ta másrhe chhiaʼ ki benachi kasla […] ta gonhe banheza ki chhin kieʼ» (Eclesiastés 2:24). Jeobá nakeʼ beneʼ wenchhin. Katiʼ rhonrha kanhaʼ rhonhe na nakarha beneʼ wenchhin, rhonrha ta leʼ rhaxhenhene na lé rzua rhoʼo yatzayolaj.
Rhon bayochhi gonrha chhin, sanlhe ku rhala gderha lataj lé gaka ta másrhe yiajlo kasla ta tzeanelachhirha Jeobá (Juan 6:27). Jeoba rkiebeʼ gone ta ryadzarkinherha cheʼ rzuarhane yiajlo.
2. Nákaʼ rhala ileʼrha domiʼ
Nikla lo Biblia rnhe «domiʼ rhonchiʼ rhoʼo», lhezekan rnhe dominhaʼ ku seke gzua rhoʼo yatzayolaj (Eclesiastés 7:12). Lhekaʼ, Biblia rnhe ku yekerha domiʼ na rhee rhoʼo kni: «Lesua yatzayolaj lhen ta napalhe» (blaba Hebreos 13:5). Katiʼ zuarha yatzayolaj lhen ta naparha, ku lachhirha rhebanherha tan rheenherha gáparha másrhe. Na lhezekan ku rchhia xhguiaʼ kuinrha (Proverbios 22:7). Lhezekan be rguitajrha nia ki domiʼ nika rheguilhajrha gongasrha gan domiʼ stikadothelha.
3. Nákaʼ ugonherhachhin domiʼ na gákarha yalhajlachhiʼ
Jeobá nakeʼ to Dios yalhajlachhiʼ, rhonrha kaʼ rhonhe katiʼ nakarha «yalhajlachhiʼ» lhen «rderha ta naparha ki yezikalha beneʼ» (1 Timoteo 6:18). Wazeke ugonherhachhin domiʼ kierha katiʼ rhonrha yodarhi gaxhaj ta rkin lo congregación lhen gonrha yodarhi ka beneʼ ryadzekene, másrhe ka bichilezaarha. Ta másrhe rheyolachhiʼ Jeobá naka bi nia kie rderha, laga gakatiʼ rderha. Cheʼ nakarha yalhajlachhiʼ na katiʼ rderha roaj lo lexhdotherha wazuarha yatzayolaj lhen wagzuarha yatzayolaj Jeobá (blaba Hechos 20:35).
KSEEDIRHA MÁSRHE KI TANÍ
Ni uyorha bi banheza siʼrha cheʼ rzuarha chhin kierha ga nakalaze lhen suarha yatzayolaj lhen ta naparha.
4. Goka beneʼ wenchhin na gonloxhen Jeobá
Yelazuagago kierha lhen Jeobá rhon rhoʼo yodarhi na ileʼrha chhin kaʼ nakalaze. Le uyo VIDEO na le ktzalaj ki taní:
-
Bi ta rhaxhenterhelho kaʼ rleʼ lhen kaʼ rhon Jason lo chhin kieʼ.
-
Bi bhenhe na gzueʼ chhin kieʼ ga nakalaze.
Le ulaba Colosenses 3:23, 24 na le ktzalaj ki taní:
-
Bixhkieʼ rhon bayochhi gonrha chhin «dolachhirha».
Rhon bayochhi gonrha chhin, sanlhe be rhala gderha lataj lé gaka ta másrhe yiajlo kasla tan tzeanelachhirha Jeobá.
5. Bi banheza siʼrha cheʼ suarha yatzayolaj lhen ta naparha
Beneʼ zian rbenookeʼ gápakagazeʼ domiʼ, sanlhe lo Biblia natzalha rseedie rhoʼo. Le ulaba 1 Timoteo 6:6-8 na le ktzalaj ki taní:
-
Bi rseedie rhoʼo Biblia.
Wazeke suarha yatzayolaj nikla kuteka bidia kierha. Le uyo VIDEO na le ktzalaj ki taní:
-
Bixhkieʼ zua yatzayolaj familiani nikla kuteka dia kieke domiʼ.
Naxh cheʼ chi diase kierha domiʼ lhen rheenherha gáparha másrhe. Jesús udixhajeʼ bixhkieʼ ku naka chhiaʼ gonrha kuenda kan. Le ulaba Lucas 12:15-21 na le ktzalaj ki taní:
-
Bi ryedieloʼ ki tan btzalaj Jesús (le uyo versículo 15).
Le ulaba Proverbios 10:22 lhezekan 1 Timoteo 6:10. Denhaʼ le ktzalaj ki taní:
-
Bi rhekelho zakatherhe: a suarha gago lhen Jeobá, o cheʼ gápagasrha domiʼ. Bixhkieʼ.
-
Nákaʼ rhaka ki bala beneʼ tan rzelachhike gápake domiʼ.
6. Jeobá wegone ta ryadzarkinherha
Katiʼ ku naparha chhin o domiʼ rhon rhoʼo yodarhi na inezerha gakatiʼ rxhenláchhirha Jeobá. Le uyo VIDEO na inezele nákaʼ térha lawe tazeedi, denhaʼ le ktzalaj ki taní:
-
Bi tazeedi yatzaga beneʼ rdeʼ lo video.
-
Bi bkin gonhe, kuenda yirhuaje lo tazeedi.
Le ulaba Mateo 6:25-34 na le ktzalaj ki taní:
-
Bi rkiebi Jeobá gdeʼ ki beneʼ rzuake leʼ yiajlo.
BALAKEʼ RNHEKE: «Rkin gongazachhin kuenda gdea ta ryadzarkinhe familia kiaʼ. Ku seke saa reunión yogoxhmán».
-
Bi texto gon lueʼ yodarhi kxhenláchhiloʼ tan gzualho yiajlo Jeobá yogoniaʼ nakarhe chhiaʼ.
TA CHI BYEDIERHA
Rhon bayochhi gonrha chhin lhen gáparha domiʼ, sanlhe be rhala gzaga na gzuarha yiajlo chhin ki Jeobá.
A rhanelho
-
Bi gon lueʼ yodarhi na ileʼlho chhin kaʼ nakalaze.
-
Bi banheza siʼrha cheʼ suarha yatzayolaj lhen ta naparha.
-
Cheʼ Jeobá rkiebeʼ gdeʼ ta ryadzarkinhe beneʼ wenchhin kieʼ, nákaʼ waka gluelhoʼ rxhenláchhiloneʼ.
BYEDIE MÁSRHE
Byedie cheʼ Biblia rnhe naka malha gáparha domiʼ.
Byo nákaʼ rheyolachhiʼ Jeobá gderha ta dia kierha.
«Bi rnhe Biblia ki tan gákarha yajlhalachhiʼ» (Artículo ki jw.org)
A naka malha kitajrha na gonrha gan domiʼ.
«Bi rnhe Biblia ki tan kitajrha nia ki domiʼ» (¡Despertad!, marzo ki 2015)
Byo bi bhen yodarhi to beneʼ na ksanhe tan rguitaje nia ki domiʼ lhen rbanheʼ.
«Yaxhenguesda witaj ki caballo» (La Atalaya, 1 ki noviembre ki 2011)
