LEKSYON 38
Pasaeamati ro Regalo nga Kabuhi
Abu kita it manami nga mga bagay nga maobra ag ma-enjoy tungod buhi kita. Maskin may mga problema, pwede gihapon kita mangin masadya. Paano naton ipakita kay Jehova nga ginapasaeamatan naton ro regalo nga kabuhi? Ag ano ro pinakaimportante nga rason para obrahon ra?
1. Ham-an dapat naton pasaeamatan ro kabuhi?
Dapat naton pasaeamatan ro kabuhi tungod regalo ra halin sa mapinalanggaon natong Ama nga si Jehova. Imaw ro “ginhalinan it kabuhi”—gintuga na ro tanan nga may kabuhi. (Salmo 36:9) “Imaw gid ro nagatao it kabuhi ag ginhawa, ag it iba pa nga mga butang sa tanan nga mga tawo.” (Binuhatan 17:25, 28) Gintao ni Jehova ro tanan natong kinahang-eanon para mabuhi. Pero bukon eang it ruyon, may gin-obra pa imaw agud ma-enjoy naton ra.—Basaha ro Binuhatan 14:17.
2. Paano naton ipakita kay Jehova nga ginapasaeamatan naton ro regalo nga kabuhi?
Kat sa tiyan ka paeang ni nanay mo, palangga ka eon ni Jehova. Sa sangka pangamuyo nga ginpasueat ni Jehova, ginhambae ni David kana: “Nakita eon ako it imong mga mata maskin ginanabdos paeang ako.” (Salmo 139:16) Importante gid kay Jehova ro imong kabuhi. (Basaha ro Mateo 10:29-31.) Masakitan gid si Jehova kon hungod naton nga tapuson ro atong kabuhi o ana it iba. a (Exodo 20:13) Masakitan pa gid si Jehova kon ibutang naton sa peligro ro atong kabuhi o indi naton paghaeongan ro kabuhi it iba. Kon ginahaeongan naton ro atong kabuhi ag ginarespeto ro kabuhi it iba, ginapakita naton nga nagapasaeamat kita sa manami nga regalo nga kabuhi.
TUN-I PA GID
Sayura ro iba pang mga paagi nga mapakita nga ginapasaeamatan mo ro regalo nga kabuhi.
3. Haeongi ing eawas
Tungod nagpromisa kita kay Jehova nga obrahon naton pirme kon ano ro anang gusto, ginagamit naton ro atong bilog nga kabuhi agud alagaron imaw. Kapareho ra sa pagpresentar it atong eawas bilang sangka buhi nga haead sa Dyos. Basaha ro Roma 12:1, 2, ag talakaya rayon rayang mga pangutana:
-
Ano dapat ro magpahueag kimo nga haeongan ing eawas?
-
Ano ro pila nga paagi agud maobra mo ra?
4. Maghaeong agud indi madisgrasya o mamatay
Ginapalig-on kita it Biblia nga likawan ro delikado nga mga ueobrahon. Tan-awa ro VIDEO agud masayran mo kon paano malikawan ro disgrasya.
Basaha ro Hulubaton 22:3, ag talakaya rayon kon paano ka ag ro iba makahaeong . . .
-
sa inyong baeay.
-
sa imong trabaho.
-
kon nagahampang it sports.
-
kon nagadrayb o nagasakay sa saeakyan.
5. Respetuha ro kabuhi it owa pa hatawo nga eapsag
Naghambae si David nga interesado gid si Jehova sa kabuhi ag kon paano nagaporma ro eapsag sa tiyan it anang nanay. Basaha ro Salmo 139:13-17, ag talakaya rayon rayang pangutana:
-
Para kay Jehova, hin-uno nagaumpisa ro kabuhi it sangka tawo, kat ginanabdos paeang imaw o kat haunga eon?
Sa Israel kato, may sugo si Jehova nga nagaprotekta sa nanay ag sa anang unga nga owa pa hatawo. Basaha ro Exodo 21:22, 23, ag talakaya rayon rayang mga pangutana:
-
Ano ro pagtan-aw ni Jehova sa sangka tawo nga nakapatay it buko’t hungod sa eapsag nga owa pa hatawo?
-
Ano mat-a ro pagtan-aw na sa mga tawo nga hungod nga nagaobra kara? b
-
Ano ing mahambae sa pagtan-aw it Dyos parti kara?
Maskin ro sangka bayi nga nagaapresyar sa haega it kabuhi hay basi makabatyag nga aborsyon eang gid ro anang solusyon. Basaha ro Isaias 41:10, ag talakaya rayon rayang mga pangutana:
-
Kon gina-pressure ro sangka bayi nga magpa-abort, kanyo dapat imaw mangayo it bulig? Ham-an?
KON MAY MAGHAMBAE: “Pagusto mat-a imaw kon magpa-abort—ana mat-a ron nga eawas.”
-
Ano ro nagkumbinsi kimo nga importante gid kay Jehova ro kabuhi it nanay pati man it anang owa pa hatawo nga eapsag?
SUMARYO
Ginatur-an kita it Biblia nga palanggaon, respetuhon, ag protektahan ro regalo nga kabuhi ni Jehova. Eakip kara ro atong kabuhi ag ro kabuhi it iba.
Review
-
Ham-an importante gid kay Jehova ro kabuhi it tawo?
-
Ano ro batyagon ni Jehova kon hungod nga tapuson it sangka tawo ro anang kabuhi o ro kabuhi it iba?
-
Ano ro ing ginapasaeamatan sa regalo nga kabuhi?
SAYURA
Paano naton mapasaeamatan si Jehova sa regalo nga kabuhi?
Sayura ro sabat sa pangutana nga, Mapatawad baea it Dyos ro sangka bayi nga nagpa-abort?
“Ano ro Ginahambae it Biblia Parti sa Aborsyon?” (Artikulo sa website)
Sayura kon ano ro pagtan-aw ni Jehova sa atong kabuhi nga dapat makaapekto sa atong pagpili it kalingawan.
Sayura kon paano makabulig ro Biblia sa sangka tawo nga gustong magpakamatay.
a Nagakabaeaka gid si Jehova sa mga tagipusuon nga nagaantus. (Salmo 34:18) Naintindihan na ro baeatyagon it mga gustong magpakamatay, ag gusto na nga buligan sanda. Para masayran kon paano sanda ginabuligan ni Jehova, basaha ro artikulo nga “Gusto Ko Na Mapatay—Makabulig Bala ang Biblia sa Akon kon Nagapensar Ako nga Manginmatay?” sa Sayura nga seksyon it rayang leksyon.
b Ratong mga nagpa-abort o nagpahueog it unga hay indi man kinahang-ean nga makonsensya gid tungod pwede pa sanda mapatawad ni Jehova. Para sa dugang nga impormasyon, basaha ro artikulo nga “Ano ro Ginahambae it Biblia Parti sa Aborsyon?” sa Sayura nga seksyon it rayang leksyon.
