PONJI MI 38
Nyuth foyofoc pi kwo kum etie giramiya pa Yehova
Lembe ma beco upong’ swa ma romo nyang’uwa man ma wacopo timo pilembe watie kwo. Kadok i saa mi peko, wang’ ma pol lembe moko nwang’ere kokoro ma wacopo foyo ko pilembe watie kwo. Dong’ wacopo nyutho nenedi foyofoc mwa ni Yehova pi kwo m’emiyo iwa? Man thelembe ma kani ma pire tek nisagu zoo m’ucikere nicwaluwa ninyutho foyofocne?
1. Pirang’o wacikara ninyutho foyofoc pi kwo mwa?
Wacikara ninyutho foyofoc pilembe kwo tie giramiya ma ber dit m’uai i bang’ Wegwa ma jamer, Yehova. En re m’etie thekiri kunoke acaki “mi kwo,” pilembe ecwiyo en piny ceke ma kwo n’i igi. (Zaburi 36:9) “En re m’emiyo kwo man yuyo ku piny ceke ni dhanu zoo.” (Tic mi Jukwenda 17:25, 28) M’umedo maeno, Yehova ubemiyo iwa piny ceke ma watie ku yenyne kara wamedara nikwo. Re m’usagu zoo, wabekwo akwoa kende ngo, ento eketho bende waromo njoyo kwone.—Som Tic mi Jukwenda 14:17.
2. Wacopo nyutho foyofoc mwa nenedi ni Yehova pi kwo m’emiyo iwa?
Niai ma megwa unwang’u ic mwa ci, Yehova ubedieng’ piwa. Uketho ku kony mi tipo ma leng’, jatic pare ma nyinge Daudi ugam uwacu ire kumae i rwo pare: “Kinde ma fodi abedo ni gin ma ayine mbe i maa, nwang’u dong’ weng’i nena.” (Zaburi 139:16, B.L.L.) Eyo, kwo peri pire tek lee dit i wang’ Yehova. (Som Matayo 10:29-31.) Pieno, lembe ton i iye lee mandha ka ng’atu moko ung’iyo nikabu kwo pa ng’atu mange cen, kunoke ung’iyo ninegere kadok gire de. a (Ai 20:13) Yehova foyo ngo bende tekene wabeketho kwo mwa i ariti m’umbe nidieng’, kunoke wabemaku ngo yub pi nigwoko kwo mwa man mi jumange i kum ret ma romo wok. Ento ka wabekimbo kwo mwa akimba man wabeworo bende kwo mi jumange, nwang’u wabenyutho foyofoc mwa pi giramiya maeno ma ber akeca ma tie kwo.
MED NYANG’ PERI
Wakenen kawoni yo mange m’iromo nyutho ko foyofoc peri pi kwo ma Yehova umiyo iri.
3. Dieng’ i kum yotkum peri
Calu ma wadaru ng’olo ni Yehova nia wabitimo yeny pare saa ceke, wacikara nitiyo ku kwo mwa zoo pi nitimo ire. Biblia uwacu nia Jukristu gicikiri ‘nithiero kumgi ubed calu lam . . . ma leng’’ ni Mungu. Pieno wacikara nigwoko kwo mwane agwoka. Som Jurumi 12:1, 2, man i ng’eye wuwec iwi penji m’ulubo e:
-
Nimakere ku verse maeni, pirang’o icikiri nidieng’ i kum yotkum peri?
-
Kekwan yore moko m’icopo nyutho ko nia ibedieng’ i kum yotkum peri.
4. Gwok kwo peri ku mi jumange i kum ret kunoke tho
Biblia ubecimo wang’wa nia waur timo ceke mir ariti ma copo nyayu peko i kumwa man i kum jumange. Nen VIDEO pi ning’eyo lembe moko m’icopo timo pi nigwokiri museme.
Som Lembrieko 22:3, man i ng’eye wuwec iwi penji m’ulubo e: Icopo gwoko kwo peri ku mi jumange nenedi . . .
-
i pacu peri?
-
i tic?
-
kinde m’ibetuko kunoke iberieyo kumi?
-
kinde m’iberingo ku mutukari, moto, gari, kunoke ka juyeyi ayeya?
5. Wor kwo pa nyathin ma n’i min
I wer moko ma Daudi uthungo, enyutho nia Yehova dieng’ lee i kum lembe ceke mi kwo pa nyathin ma fodi n’i min. Som Zaburi 139:13-17, man i ng’eye wuwec iwi penji m’ulubo e:
-
I wang’ Yehova, kwo pa ng’atini caku saa ma kani, nyo ceng’ ma ic pare upodho i min kunoke kinde m’enyolere?
Cik ma Yehova ugam umiyo con ni nyithindho mir Israel ubed ugwoko mego man bende ic ma giyeyo. Som Ai 21:22, 23, man i ng’eye wuwec iwi penji m’ulubo e:
-
Yehova ubed uneno nenedi ng’atu m’unego nyathin ma n’i min kadok akakaka ngo?
-
Iparu nia eromo winjere nenedi ka ng’atini ulund utimo lembe maeno akakaka? b
-
In ke paru peri tie ang’o iwi kite ma Mungu neno ko kwo pa nyathin ma n’i mini?
Kadok dhaku m’ung’eyo ma ber nia kwo pire tie tek lee, copo nwang’u saa moko nia gin mange m’ecopo timo mbe, ndhu kwayu ewodh iye cen. Som Isaya 41:10, man i ng’eye wuwec iwi penji m’ulubo e:
-
Ka jubediyo dhaku moko nia ewodh iye kunoke ebenwang’ere i wang’ lembe m’ubecwale niwodho iye, ecikere nikwayu kony i bang’ ng’a? Pirang’o?
DHANU MOKO BEYERO KUMAE: “Dhaku tie ku twero mi ng’iyo niwodho iye pilembe en re m’ebeyeyo icne.”
-
Ang’o m’ubecweli niyiyo nia kwo pa mego ku pa nyathin mi iye zoo pigi tie tek lee i wang’ Yehova?
I ADUNDO
Biblia ubeponjo nia wacikara nimaru kwo, niwore, man nigwoke agwoka, pilembe etie giramiya ma pire tek dit m’uai i bang’ Yehova. Nik’ebed kwo mwa giwa kunoke mi jumange, ceke pigi tek.
Penji mi poyowic
-
Ang’o m’ubenyutho nia kwo pa dhanu pire tek lee i wang’ Yehova?
-
Yehova winjere nenedi ka ng’atu moko ukabu kwo pare gire kunoke pa ng’atu mange akakaka?
-
Nyo kwo pire tek i weng’i bende? Pirang’o?
TIM SAYUSAC
Wacopo foyo Yehova nenedi pi kwo m’emiyo iwa?
Nyo Mungu copo timo kisa ni dhaku m’uwodho iye? Nwang’ dwokowang’ penji maeno i thiwiwec ma e:
Ning’eyo paru pa Mungu iwi kwo ucikere nicwaluwa wang’ii kit galuwang’ man tuko ma nenedi? Kenen.
“‘Tuko mir ariti’—Nyo ukwayu imond i iye?” (Cew!, nindo 8, dwi mir 10, 2000)
Nen kite ma Biblia copo konyo ko ng’atu m’utie ku paru mi negere cen.
“Abemito atho, nyo Biblia copo konya kinde m’atie ku paru mi negara cen?” (Thiwiwec mi jw.org)
a Yehova ubedieng’ lee mandha pi dhanu ceke ma cwinygi tur. (Zaburi 34:18) Eng’eyo nia adieng’acwiny m’akeca copo royo i dhanu moko, paru mi deyiri kunoke mi negiri ku yore mange. Pieno, ebemiyo kony ni dhanu maeno. Pi nineno kite ma kony parene copo miyo ni ng’atini kero mi riemo cen paru mi negiri, som thiwiwec “Abemito atho, nyo Biblia copo konya kinde m’atie ku paru mi negara cen?” Enwang’ere i thenge mi “Tim sayusac” i thum mi ponji maeni.
b Dhanu ma gigam giwodho ic i wang’e, gicikiri ngo niweko cwinygi umedere nipido akeca pi dubo maeno, pilembe Yehova romo timo igi kisa. Pi ninyang’ lee, som thiwiwec “Biblia uyero lembang’o iwi wodhoic?” Enwang’ere i thenge mi “Tim sayusac” i thum mi ponji maeni.
