NSUNZO 38
Kavaha Ttima Nvaho wa Egumi
Egumi enonivaha gari ya okana mapadduwo a mwigumini owagalaliha. Masiki nigafwanyiwaga makattamiho, ninokana mudhidhi wokala wowagalalene. Egali dhawene, ninatonyihedhe dhavi wi ninovaha ttima mvaho wa egumi? Mwahaya wa makamaka wa okosa ejuwene buvi?
1. Ninfwanyelela eni ovaha ttima egumi?
Ninovaha ttima egumi, sabwani mvaho wa babihu wokwela, Yehova. Iyene “fukuwa enkaliha egumi”—obe ddittanddile egumi. (Masalmo 36:9) ‘Iyene onovaha okalawo, muya wovuma na dhina dhetene.’ (Merelo 17:25, 28) Nlebo ntti ninowoniha wi Yehova ononivaha dhotene dhinfunihu wi nikalegewovi. Mbwenye Yehova vina onokosa dhinji opitta eso, ononivaha dhotene dhinfunihu wi nikaane wagalala mwigumini.—Kengesa Merelo 14:17.
2. Ninawodhe dhavi omutonyihedha Yehova wi ninovaha ttima egumi?
Mudhidhi dhahi mwimeleli wa Mulugu wakuweliwa David wahilobela: “Nyuwo mwaddona dditiwaga-wene.” (Masalmo 139:16) Ejo enlagiha wi Yehova onowutanaala masiki mudhidhi waliwe mbani mwa mamayawo. Egumi yawo jamakamaka vamentoni va Yehova. (Kengesa Mateu 10:29-31.) Yehova onokwela venjene egumi, nona onosilidhiwa venjene agamoona muttu ampaga mukwaye obe agavipa mwinyene. * (Obudduwa 20:13) Yehova agahikubanya vaddiddi konoona nihivyang’aneIaga vina nigeekaga egumi yehu vamodha na egumi ya attu ena vangovini. Nigabarela egumi yehu vina niriha ya attu ena ninotonyihedha wi ninovaha ttima mvaho obu.
KASUNZAVI
Koona dhilobo dhina dhinawukamihedhe woniha wi onovaha ttima nvaho wa egumi.
3. Kariha egumi yawo
Ninga alabeli a Yehova, nihigana olabihedha egumi yehu wi nimulabele iyene. Egali ninga onvaha Mulugu egumi yehu ninga mukutto. Kengesa Roma 12:1, 2, mugamala mutanaalele mavuzo aba:
-
Mowiwanana na nlebo ntti, txini enawuttukulele oriha egumi yawo?
-
Mikalelo dhina dha okosa ejuwene sivi?
4. Kala pasope wi onatote ngovi
Bibilia ononikokomeza orabela dhilobo dhowopiha. Karumiha VIDIYU wi wone dhilobo dhigafwanyeliwe okosa na nibarelo.
Kengesa Gano 22:3, mugamala mutanaalele enawukamihedhe weyo na attu ena ovibarela . . .
-
vatakulu.
-
omabasani.
-
oganddamurhaga maningo.
-
ogeddihaga obe ogakala mukaroni.
5. Kariha egumi ya mwana ohinabaliwa
David ohitapulelamo wi Yehova onotanaala dhotene dhinimpadduwela mwana ahinatti obaliwa. Kengesa Masalmo 139:13-17, mugamala mutanaalele mavuzo aba:
-
Vamentoni va Yehova, egumi enroma muyana agakaana yari obe mwana agabaliwa?
Malamulo avahile Yehova ana Izrayel masaka a mundduni, anabarela mayi na mwana aali ahinatti obaliwa. Kengesa Obudduwa 21:22, 23, mugamala mutanaalele mavuzo aba:
-
Moonelo wa Yehova sabwa ya muttu onimpa mwana s’ohifuna ahinatti obaliwa wali ovi?
-
Yehova oniwamo dhavi akala muttu onokosa ejuwene na ofuna? *
-
Weyo ononamo dhavi moonelo obu wa Yehova?
Masiki muyana onziwa wi egumi ja ttima, onodhaga wubuwela orayila yari. Kengesa Izaiya 41:10, mugamala mutanaalele nivuzo ntti:
-
Akala muyana onodideliwa wi arayile yari, bani onamukumbiriye nikamihedho? Sabwaya jani?
ATTU ENA ANLOGA WI: “Muyana wotene okana ofuru wa orayila yari— sabwani maningoya baye.”
-
Txini enuttukulela oziwa wi Yehova onovaha ttima egumi ya muyana vina ya mwana?
OGWADDELA
Bibilia ononisunziha okwela, oriha, vina obarela egumi, mvaho obu wa ttima onivahile Yehova. Ejo enowiwanana na egumi yehu vina na ya attu ena.
Kobuwela Dhisunziliwe
-
Egumi ya attu, ekaleleni elobo ya ttima vamentoni va Yehova?
-
Yehova oniwamo dhavi, muttu agavipa obe agampa muttu mwina?
-
Sabwaya jani weyo ogavahaga ttima mvaho wa egumi?
TAMELÁ ONONELAMO DERETU
Ninawodhe dhavi omwiwelela Yehova sabwa ya mvaho wa egumi?
Mulugu onomulevelela muyana orahilile yari?
“O que é que a Bíblia diz sobre o aborto?” (Mitoma dha mu jw.org)
Koona monelo wa Yehova mwaha wa egumi, obuwene onanikamihedhe nigafunaga osakula mavego ehu.
“‘Desportos radicais’—Vale a pena correr o risco?” (Despertai!, 8 de Outubro de 2000)
Kito akala muttu onokana dhubuwelo dhovipa? Koona nikamihedho ninanvahe Bibilia.
^ Yehova onononelamo wiwa opa onimuttukulela muttu ofunaga ovipa mwinyene, iyene onowatanaala abale ana murima wosuveya. (Masalmo 34:18) Wi wone nikamihedho ninavahe Yehova abale ana mubuwelo wovipa, koona epaddi “Tamelá Ononelamo Deretu” mutoma: “Eu quero morrer—Será que a Bíblia pode me ajudar se estou tendo pensamentos suicidas?”
^ Muyana orahilile yari kanfwanyela ovipwattelihetxa muladdu sabwani—Yehova onomulevelela. Wi ononelemo deretu kengesa mpaddi wa “Tamelá Ononelamo Deretu” mutoma onloga: “O que a Bíblia diz sobre o aborto?”
