Cabʌl chuqui utsʼatax bʌ miʼ mejlel lac mel cheʼ cuxulonla. Anquese tajol mi lac ñusan wocol tac, tijicña miʼ mejlel lac bej ñusan. ¿Bajcheʼ miʼ mejlel lac pʌsben Jehová chaʼan mi laj qʼuel ti ñuc jiñi cuxtʌlel? ¿I chucoch ñucʌch i cʼʌjñibal cheʼ mi lac pʌs chaʼan mi laj qʼuel ti ñuc?

1. ¿Chucoch yom mi laj qʼuel ti ñuc jiñi cuxtʌlel?

Yom mi laj qʼuel ti ñuc jiñi cuxtʌlel come jumpʼejlʌch lac majtan tsaʼ bʌ i yʌqʼueyonla jiñi lac Tat, Jehová. Jiñi Biblia miʼ yʌl tiʼ tojlel: «Yaʼan cuxul bʌ jaʼ a wicʼot, i yejtalʌch j cuxtilel lojon», come Jehová jiñʌch tsaʼ bʌ i mele (pʌtʌ) pejtelel chuqui cuxul bʌ (Salmo 36:9). «Jin miʼ yʌqʼuen lac piʼʌlob jiñi cuxtʌlel, icʼ yicʼot pejtelel chuqui an» (Hechos 17:25, 28). Jin chaʼan, Jehová jiñʌch muʼ bʌ i yʌqʼueñonla chuqui i cʼʌjñibal lac chaʼan chaʼan cuxulonla. I jiñʌch muʼ bʌ i coltañonla chaʼan tijicña mi lac ñusan ti laj cuxtʌlel (pejcan Hechos 14:17).

2. ¿Bajcheʼ miʼ mejlel lac pʌsben Jehová chaʼan mi laj qʼuel ti ñuc jiñi cuxtʌlel?

Ti jimbʌ ora cheʼ bʌ jiñi a mamá tsiʼ yubi chaʼan embarazada chaʼañet, Jehová tsiʼ qʼueleyet. Jin chaʼan juntiquil i wiñic Dios i cʼabaʼ David tsiʼ yʌlʌ: «Tsaʼ qʼueleyon cheʼ bʌ woli jaxto j colel tiʼ malil i ñʌcʼ c ñaʼ» (Salmo 139:16, TNM). Jehová miʼ wen qʼuel ti ñuc a cuxtʌlel (pejcan Mateo 10:29-31). Wen cʼux miʼ yubin cheʼ an majqui miʼ tsʌnsan yambʌ lac piʼʌl, o miʼ tsʌnsan i bʌ (Éxodo 20:13). a Cheʼ jaʼel, cʼux miʼ yubin cheʼ mi lac bajñel acʼ ti wocol laj cuxtʌlel yicʼot cheʼ maʼañic mi lac wen qʼuel chuqui mi lac mel chaʼan mi laj cʌntʌben i cuxtʌlel yambʌlob. Cheʼ bʌ mi laj cʌntan lac bʌ yicʼot mi laj cʌntʌben i cuxtʌlel yambʌlob, mi lac pʌs chaʼan mi laj qʼuel ti ñuc jiñi cuxtʌlel, jiñi utsʼatax bʌ majtañʌl.

 LAʼ LAC ÑUMEN ÑAʼTAN

3. Cʌntan a bʌ chaʼan cʼocʼ maʼ wajñel

Jiñi xñoptʼañob am bʌ i yʌlʌyob chaʼan mi caj i melbeñob i yeʼtel (troñel) Jehová miʼ cʼʌñob i cuxtʌlel cheʼ bajcheʼ yom Dios. Tsaʼix i yʌcʼʌyob i bʌcʼtal cheʼ bajcheʼ chʼujul bʌ i majtan Dios, i jin chaʼan yom miʼ cʌntañob. Pejcanla Romanos 12:1, 2 i tem alʌla iliyi:

• ¿Chucoch yom maʼ cʌntan a bʌ chaʼan cʼocʼ maʼ wajñel?

• ¿Bajcheʼ miʼ mejlel a mel?

 5. Qʼuele ti ñuc i cuxtʌlel jiñi alʌl maxto bʌ i yila pañimil

David tsiʼ yʌlʌ bajcheʼ yilal miʼ qʼuel Jehová jiñi alʌl anto bʌ tiʼ ñʌcʼ i mamá. Pejcanla Salmo 139:13-15, 17 i tem alʌla iliyi:

• Tiʼ tojlel Jehová, ¿jalaqui miʼ tejchel i cuxtʌlel juntiquil alʌl, jimba cheʼ miʼ yilan pañimil o cheʼ bʌ jiñi i mamá embarazada miʼ cʌytʌl?

Jehová tsiʼ yʌcʼʌ mandar tac ti wajali yaʼ ti Israel muʼ bʌ i cʌntan jiñi xʼixicob embarazadajoʼ bʌ yicʼot jiñi i yalobil cʌntʌbil bʌ i chaʼañob. Pejcanla Éxodo 21:22, 23, TNM i tem alʌla iliyi:

• ¿Bajcheʼ yilal miʼ qʼuel Jehová cheʼ bʌ an majqui miʼ yʌcʼ ti chʌmel juntiquil alʌl cʌntʌbilto bʌ tiʼ ñʌcʼ i ñaʼ anquese mach yʌlolic i chaʼan?

• ¿I bajcheʼ yubil miʼ yubin cheʼ an majqui miʼ yʌlol tsʌnsan b jiñi alʌl maxto bʌ i yila pañimil?

• Ixcu jatet, ¿bajcheʼ yilal maʼ qʼuel muʼ bʌ i ñaʼtan Dios?

Qʼuelela jiñi VIDEO.

Jinto jaʼel juntiquil xʼixic muʼ bʌ i qʼuel ti ñuc jiñi cuxtʌlel miʼ mejlel i ñaʼtan chaʼan cheʼ miʼ choc i yalobil jiñʌch jiñi ñumen wem bʌ. Pejcanla Isaías 41:10 i tem alʌla iliyi:

• Mi juntiquil xʼixic miʼ xijqʼuel chaʼan yom miʼ choc i yalobil, ¿majqui yom miʼ cʼajtiben i coltaya? ¿Chucoch?

 TSAʼ BɅ LAJ CɅÑɅ

Jiñi laj cuxtʌlel jumpʼejlʌch lac majtan tsaʼ bʌ i yʌqʼueyonla Jehová. Jiñi Biblia miʼ pʌsbeñonla chaʼan yom mi laj qʼuel ti ñuc, mi laj cʌntan yicʼot mi laj cʼuxbin jiñi laj cuxtʌlel yicʼot i cuxtʌlel yambʌlob.

¿Chuqui tsaʼ cʌñʌ?

• ¿Bajcheʼ la cujil chaʼan Jehová miʼ qʼuel ti ñuc jiñi laj cuxtʌlel?

• ¿Bajcheʼ yubil miʼ yubin i bʌ Jehová cheʼ an majqui miʼ yʌlol tsʌnsan i bʌ o miʼ tsʌnsan yambʌ i piʼʌl?

• ¿Chucoch maʼ qʼuel ti ñuc jiñi a cuxtʌlel?