KAPITE 38
Ke Tou Fakamaʼuigaʼi Le Maʼuli
E lasi a neʼa mālilie e mafai ke ke fai ke ke fiafia ai koi ke maʼuli. Logo ai e tou tau mo ni faigataʼaʼia, kae e iai a ʼiki anoʼaga o le maʼuli e mafai ke tou mālieʼia. E tou fakasā fefeʼaki e tou fakamaʼuigaʼi le maʼuli? Ti koleā le tupuʼaga maʼuiga o latātou ʼaga ai o fai?
1. Koleā leia e tonu ai ke tou fakamaʼuigaʼi le maʼuli?
E tonu ke tou fakamaʼuigaʼi le maʼuli talie ko le neʼa alofa meia Seova, lotātou Tamana ʼapele i le alofa. Ko ia “le matapuna o le mauli,” na fakatupu e ia a neʼa maʼuʼuli fuli. (Pesalemo 36:10) ‘E soli e ia ki tagata fuli le maʼuli, mo le tukumanava ti mo neʼa fuli.’ (Tosi Gaoi 17:25, 28) E soli mai e Seova a neʼa alā e ʼaoga ki lotātou maʼuli. Kae leʼese gato ai, e toe fai e ia a neʼa fuli ke tou maʼuli fiafia ai.—Lau Tosi Gaoi 14:17.
2. E tou fakasā fefeʼaki kia Seova e maʼuiga kia tātou le maʼuli?
I le temi e fakatupu ai tātou, e maʼuiga lotātou maʼuli kia Seova. Na pati Tavite kiate ia: ‘Na tio ou mata ki loku faʼufaʼu i le manava o loku tinana.’ (Pesalemo 139:16) Ko lotātou maʼuli e maʼuiga lasi kia Seova. (Lau Mateo 10:29-31.) E loto mamae mokā tio aia e mateʼi e se tasi a se tasi ake tagata pe mokā pule se tasi ki lona maʼuli. a (Ekesote 20:13) E toe loto mamae mokā tio aia e tou fai ni neʼa e fakatupu tuʼutāmaki ki lotātou maʼuli pe leʼaise tou tokaga o puipui le maʼuli o ʼiki. Kā tou tokaga fakamālielie ki lotātou maʼuli ti mo fakaʼapaʼapa ki le maʼuli o lātou ake alā, e tou fakasā ai e maʼuiga kia tātou le maʼuli, le neʼa alofa o Seova.
MANATU LOLOTO
Ta tioʼi ni anoʼaga ke tou fakasā ai e maʼuiga kia tātou le neʼa alofa leia ko le maʼuli.
3. Tokaga ki lou maʼuli mālōlō fakatino
Na tou fakapapau kia Seova e tou fai tuʼumaʼu loa lona finegalo, ko ia e tou tausi loa kiate ia i lotātou maʼuli kātoa. E sakinake e tou soli lotātou tino ko se sakilifisio kiate ia, ko ia e tonu ke tou tokaga fakamālielie ki ai. Lau Loma 12:1, 2, ti fai a vesili anei:
-
Koleā e tonu ai ke ke tokaga ki lou maʼuli mālōlō fakatino?
-
Koā a ʼiki anoʼaga e mafai ke ke fai?
4. Tokaga kiate koe o felaʼaki mo la ake
E fakalotomakekeʼi tātou i le Tosi-Tapu ke tou tokaga ki neʼa alā e tou fai na mafai ke lavea pe ke mate ai se tasi o toe felaʼaki mo tātou. Tioʼi le GĀ ʼATA ke ke iloa ai le neʼa leia e tonu ke fai ke puipui ai a koe o felaʼaki mo la ake.
Lau Taagapati 22:3, ti mamāsau ki anoʼaga ke ke fai ke puipui ai a koe o felaʼaki mo ʼiki . . .
-
i lou loto fale.
-
i lou fale gaʼoi.
-
mokā ke fai mānogi.
-
mokā ke sofea.
5. Fakaʼapaʼapa ki le maʼuli o se gā toe koi nofo i loto o le manava o lona tinana
Na fai e Tavite ni māsau e fakasā ai e maʼuiga kia Seova a le maʼuli ti mo anoʼaga fuli e soko ki se gā toe i le manava o lona tinana. Lau Pesalemo 139:13-17, ti fai le vesili leinei:
-
E manatu ko ia a Seova e kamata le maʼuli o se tasi i le temi leia e fakatupu ai pe ko le temi leia e fānauʼi mai ai e lona tinana?
Na soli e Seova ni lao ki le kau Iselaele, ke puipui ai a fafine alā e faitoe. Ko ia, e puipui ai a tinana mo alātou fānau koi nofo i loto o le manava. Lau Ekesote 21:22, 23, ti fai a vesili anei:
-
Koleā le manatu a Seova mokā e mateʼi sala e se tasi a se fānau koi nofo i le manava o lona tinana?
-
Koleā loa ka logoʼi e Seova mokā fai e se tasi le neʼa lenā talie na loto ki ai? b
-
Koleā lau manatu ki le faʼasiga manatu a le Atua?
E iai a ʼiki fafine e maʼuiga kia lātou le maʼuli, kae i ʼiki anoʼaga, e mafai ke lotou manatu ko le puleʼaki faʼi e tasi ko le fakavilo o le toe. Lau Esaia 41:10, ti fai a vesili anei:
-
Kāpau e ekenaki se fafine ke fakavilo lona toe, ko ai e tonu ke kole ki ai ke tokoi atu? Koleā lona tupuʼaga?
E PATI A ʼIKI: “E mafai faʼi ki se fafine lana fakavilo lona toe talie ko ia leia e pule ki lona tino.”
-
Koleā e ke tui māʼoki e maʼuiga tatau kia Seova le maʼuli o le tinana mo lona gā toe koi nofo i lona manava?
MANATU TĀFITO
E pati i le Tosi-Tapu ko le maʼuli ko se neʼa alofa meia Seova. Ti e tonu ke tou mālieʼia, mo fakaʼapaʼapa ki ai ti mo puipui lotātou maʼuli mo le maʼuli o la ake.
Fakamanatu
-
Koleā e maʼuiga kia Seova le maʼuli o le tagata?
-
Koleā e logoʼi e Seova mokā mateʼi e se tasi a se tasi ake tagata?
-
Koleā e ke lotofakafetaʼi ki le neʼa alofa o Seova leia ko le maʼuli?
A ʼIKI MANATU
E fefeʼaki lau fakamālō kia Seova ki lana soli mai le maʼuli?
Le tali ki le vesili leinei: E mafai ko ia ke lotofakamolemole a Seova ki se fafine na fakavilo lona toe?
“Le manatu a le Tosi-Tapu o uiga mo le fakavilo toe” (Aletike i le neti jw.org)
E tokoi fefeʼaki mai le manatu a le Atua ke tou filifili fakamālielie atātou faimānogi?
Koleā e tou fai mokā e fia fakamate se tasi? E tokoi fefeʼaki le Tosi-Tapu ki ai?
“E kau fia mate—E mafai ko ia ke tokoi mai le Tosi-Tapu?” (Aletike i le neti jw.org)
a E tokaga māʼoki a Seova kia lātou alā e lotomamae. (Pesalemo 34:19) E matala aia ki manatu fakatupu mamae e ekenaki ai a ʼiki ke lotou fia fakamate ti e fia tokoi aia kia lātou. Kāpau e ke fia iloa pe fefeʼaki lana tokoi mai, lau le aletike: “E kau fia mate—E mafai ko ia ke tokoi mai le Tosi-Tapu?” e tuʼu i le koga: A ʼIki Manatu o le kapite leinei.
b E leʼaise tonu ke lotogaʼegaʼe aia leia na fakaviloʼia sona toe mo tukugaveliʼi aia totonu. E mafai ke fakamolemole a Seova kiate ia. Kāpau e ke fia maʼua ni ʼiki a fakamatala, tioʼi le aletike “Le manatu a le Tosi-Tapu o uiga mo le fakavilo toe” i le koga: A ʼIki Manatu, o le kapite leinei.