PELAJAR 38
Beterima Kasihka Pemeri Nyawa
Kati nuan setuju nyawa nya pemeri ti berega? Taja pan kitai napi penanggul ba pengidup, tang agi bisi utai ke ngasuh kitai gaga ati. Baka ni kitai ulih ngayan ngagai Jehovah kitai beterima kasihka pemeri nyawa tu? Lalu nama kebuah tu amat beguna?
1. Nama kebuah kitai patut beterima kasihka pemeri nyawa?
Kitai patut beterima kasihka nyawa laban nyawa nya pemeri ari Apai kitai, Jehovah. Iya endang “pun pengidup.” (Masmur 36:9) Bup Kudus madahka, “Iya empu ke meri pengidup enggau seput, enggau semua utai bukai, ngagai semua mensia.” (Surat Kereja Rasul 17:25, 28) Jehovah ukai semina meri kitai nyawa, tang Iya mega nentuka kitai bisi semua utai ke diguna ngambika ulih terus idup enggau lantang.—Bacha Surat Kereja Rasul 14:17.
2. Baka ni kitai ulih nunjuk ngagai Jehovah kitai beterima kasihka nyawa ti diberi Iya?
Kenyau ari maya kitai dalam kandung indai, Jehovah udah ibuhka kitai. Ba Bup Kudus, Raja David madahka: “Nuan endang udah meda aku sebedau aku ada.” (Masmur 139:16) Ba Jehovah nyawa amat berega. (Bacha Matthew 10:29-31.) Nyadi, gambarka penusah ati Jehovah enti seiku orang munuh diri tauka munuh orang bukai. a (Pemansut 20:13) Kelimpah ari nya, Jehovah tentu amat tusah ati enti kitai ngaga utai ti tau nganu nyawa diri empu tauka orang bukai. Lebuh kitai nyaga, ngelindung sereta bebasaka nyawa, kitai nunjukka diri beterima kasihka pemeri nyawa.
BELAJAR MAYUH AGI
Belajarka chara nuan ulih nunjukka diri beterima kasihka nyawa sereta pengidup.
3. Jaga meh pengerai nuan
Lebuh kitai nyerahka diri ngagai Jehovah, kitai besemaya deka ngena pengidup, nyawa sereta tubuh kitai gawa ke Iya. Bacha Rome 12:1, 2, lalu kerandauka tanya tu:
-
Nama kebuah nuan patut nyaga pengerai nuan?
-
Baka ni nuan ulih ngereja nya?
4. Seliahka utai ti tau nganu nyawa
Bup Kudus meransang kitai nyeliahka pengawa ti tau nganu nyawa. Mainka VIDEO kena nemu sekeda chara ngemeratka pengelikun.
Bacha Jaku Dalam 22:3, lalu kerandauka chara kena nyaga pengelikun lebuh . . .
-
ba rumah.
-
ba endur gawa.
-
besukan.
-
ngena perengka pengangkut.
5. Bebasaka nyawa anak mit ke agi dalam kandung
David madahka, Jehovah ibuhka semua utai ti nyadi ngagai anak mit ke benung besai dalam kandung indai. Bacha Masmur 139:13-17, lalu kerandauka tanya tu:
-
Ba Jehovah, kati nyawa berengkah lebuh indai betubuh bisi tauka semina pengudah anak nya ada?
Adat Jehovah ngagai orang Israel kelia ngelindung indu ti betubuh bisi sereta anak ke dalam kandung iya. Bacha Pemansut 21:22, 23 ari nota kaki, b lalu kerandauka tanya tu:
-
Nama runding Jehovah ngagai orang ke enda sengaja ngasuh seiku indu lenyau kandung?
-
Nama runding Jehovah ngagai orang ke sengaja ngereja nya? c
-
Nama asai ati nuan pasal runding Petara?
Taja pan seiku indu nemu nyawa nya amat berega, tang iya engka ngasaika diri nadai chara bukai kelimpah ari muai kandung. Bacha Isaiah 41:10, lalu kerandauka tanya tu:
-
Enti seiku indu dipejal muai anak, iya ulih minta tulung ngagai sapa kena ngeringka pengeran iya kena ngereja utai ti betul? Nama kebuah?
BISI ORANG MADAH: “Enti indu nya deka muai kandung, tejuka aja meh, nya hak iya.”
-
Nama utai ti ngasuh nuan andal, ba Jehovah nyawa indai enggau anak iya ke bedau ada sama bela beguna?
LANSA
Bup Kudus ngajar kitai ngambika rindu, masa, sereta nyaga nyawa kitai enggau orang bukai laban nyawa nya pemeri ari Jehovah.
Ulang Kaji
-
Nama kebuah nyawa mensia berega ba Jehovah?
-
Nama asai ati Jehovah enti orang munuh diri tauka munuh orang bukai?
-
Nama kebuah nuan beterima kasihka pemeri nyawa ke diberi Petara?
ARAM BELAJAR
Baka ni kitai nunjuk ngagai Jehovah kitai beterima kasihka nyawa?
Peratika runding Bup Kudus pasal orang ke kala bebuaika anak?
“Nama Ajar Bup Kudus Pasal Bebuai Anak?” (Artikel ba laman web jw.org)
Peratika baka ni kitai ulih ngaga pemutus ti manah bekaul enggau pemerindang.
“‘Sukan Ekstrem’—Patut Nuan Berambunka Nyawa Ketegal Nya?” (Peratika!, 8 Oktober 2000)
Peratika baka ni Bup Kudus ulih nulung orang ke deka munuh diri.
a Jehovah amat ibuhka orang ke tusah ati. (Masmur 34:18) Iya nemu pemerinsa ti ditapi orang ke bisi runding deka munuh diri, lalu Iya deka nulung sida. Kena nemu mayuh agi, bacha artikel “Aku Enggai Agi Idup—Kati Ulih Bup Kudus Nulung Lebuh Aku Bisi Pengingin Deka Munuh Diri?” ba begian Aram Belajar ba pelajar tu.
b Pemansut 21:22, 23, NWT—Enti orang lelaki belaya, lalu ngemediska seiku indu ke ngandung, lalu anak iya ada muda, tang nadai lenyau nyawa, orang ke ngemediska iya enda tau enda diasuh mayar ukum nitihka pinta laki indu nya, sereta dikemendarka bala hakim. Tang enti indu nya tauka anak iya lenyau nyawa, ukum ti dikena nya; nyawa balas nyawa.
c Enti sesiku orang kala muai kandung, sida enda ibuh berasai besalah laban Jehovah sanggup ngampun sida. Kena nemu mayuh agi, bacha artikel “Nama Ajar Bup Kudus Pasal Bebuai Anak?” ba begian Aram Belajar ba pelajar tu.
Nuan Engka Rindu Meda Tu
UTAI KE SUAH DITANYA
Nama Reti Kursus Belajarka Bup Kudus ke Diatur Saksi-Saksi Jehovah?
Nengah kursus ke pechuma ti diatur Saksi-Saksi Jehovah, nuan ulih ngena sebarang salin Bup Kudus ke dikembuan nuan. Nuan mega diperansang mai semua diri sebilik sereta bala kaban nuan sama enggau kursus tu.
