CIIYO 38
Amutondeshe Kulumba Pacipo ca Buumi
Mukwiinga tuli boomi, kuli shibotu shiinji nsheenga twacikonsha kucita alimwi sheenga shatupa kusangalala. Alimwi nabi ndyetutokwiinda mumapensho, kuli shimwi mubuumi sheenga shatupa kusangalala. Ino inga twatondesha buyani ayi tulalumba pacipo ca buumi? Alimwi ino nciinshi ciyandika abuumbi ncotweelete kucitila boobo?
1. Ino nceebonshi tulyeelete kulumba pacipo ca buumi?
Tulyeelete kulumba pa buumi mukwiinga ncipo kuswa kuli Ishiwesu shilusuno, Yehova. Lesa ngo “kantupu kapa buumi”—ngowakalenga shintu shoonse. (Kulumbaisha 36:9) “Lesa ngomunya uyu ngootupa buumi amuuya ngotuyoya alimwi ashintu shimwi shoonse.” (Milimo 17:25, 28) Yehova alatupa nshetuyandika kwaamba ayi tutolelele kuba boomi. Alatucafwa kusangalala mubuumi.—Amubelenge Milimo 14:17.
2. Ino inga twacita buyani kwaamba ayi tutondeshe Yehova ayi tulalumba pacipo ca buumi?
Yehova alamubikila maano kuswabo bushiku ndyemwakatalika kupangwa mumala muli banyina wanu. Kwiinda mukutanjililwa a mushimu usalashi, Defedi uyo wakalinga womwi pabasebenshi bakwe Lesa, wakaamba ayi: “Mwakambona kaantana kushalwa.” (Kulumbaisha 139:16) Buumi bwanu bulayandika abuumbi kuli Yehova. (Amubelenge Mateyo 10:29-31.) Inga camucisa abuumbi na muntu uli woonse mukashanga wasala kumana buumi bwakwe na bwa muntu umwi. a (Kulonga 20:13) Alimwi inga camucisa abuumbi Yehova na katucita shintu sheenga shabika buumi bwesu na bwa bamwi mumapensho. Na katulama kabotu buumi bwesu akulemeka buumi bwa bamwi, tulatondesha ayi tulalumba pacipo ici cibotu abuumbi.
AMWIIYILEWO ASHIMWI
Amubone nsheenga mwaciita kwaamba ayi munootondesha kulumba pacipo ca buumi.
3. Amubulame kabotu buumi bwanu
Beneklistu bakalyaaba balasebensesha buumi bwabo kusebensela Yehova. Mukwiinga balaaba mibili yabo mbuli milambu ilibetele kuli Lesa, balyeelete kwiilama kabotu. Amubelenge Bene Loma 12:1, 2, akubandika miipusho iyi:
-
Ino nciinshi ceelete kumupa kubikila maano kubuumi bwanu?
-
Ino inga mwatondesha buyani ayi mulabikila maano kubuumi bwanu?
4. Amubikile maano kushintu shoonse nshemucita kwaamba ayi mutalengeshi umwi kulicisa nabi kufwa
Baibo ilatuyuminisha ayi tulyeelete kuleya kucita shintu sheenga shatubika mumapensho. Amweebele VIDYO kwaamba ayi mwiiye mbweenga mwalishitilisha.
Amubelenge Tushimpi 22:3, akubandika mbweenga mwebo abamwi mwalishitilisha . . .
-
ndyemuli paŋanda.
-
kuncito.
-
ndyemutoosekana shisekano.
-
ndyemwatanta na ndyemutookweensha motoka.
5. Amutondeshe ayi mulalemeka buumi bwa mwaana uli mumala
Defedi wakasansulula ayi Yehova alabona shintu shoonse shicitika mwaana kaacili mumala muli banyina. Amubelenge Kulumbaisha 139:13-17, akubandika mwiipusho uyu:
-
Kweelana a Yehova mbwaabona, sa buumi bwa muntu bulatalika paciindi mwanakashi ndyaamitabo na pabushiku mwaana ndyaashalwa?
Milawo yakwe Yehova yakalinga kushitilisha bashali banakashi amwaana utana kushalwa. Amubelenge Kulonga 21:22, 23, akubandika miipusho iyi:
-
Ino Yehova wakalinga kumubona buyani muntu na cakutengashila wacaya mwaana utana kushalwa?
-
Ino inga walinyumfwa buyani na muntu wacita boobo mukashanga? b
-
Ino kushiba Lesa mbwaabona buumi kulamupa kulinyumfwa buyani?
Cimwi ciindi nabibo mwanakashi ucishi ayi buumi bulayandika inga walinyumfwa ayi kukusha lifumo nje nshila yeenkabo yeenga yamucafwa. Amubelenge Isaya 41:10, akubandika miipusho iyi:
-
Ino mbaani mwanakashi mbwaeelete kusengako lucafwo na atookakatishikwa kukusha lifumo? Ino nceebonshi?
BANTU BAMWI BALAAMBA AYI: “Mwanakashi alicite nkusu shakulisalila mwiine na alisuni kukusha lifumo nabi sobwe—ngumubili wakwe.”
-
Ino nciinshi camupa kushoma kwaamba ayi Yehova alabona ayi buumi bwa mushali mwanakashi alimwi amwaana ucili mumala bulayandika?
CITEENTE CINENE
Baibo ilaamba ayi tulyeelete kusuna, kulemeka, alimwi akushitilisha cipo ca buumi Yehova ncaakatupa. Ici cileelikaawo buumi bwesu alimwi abuumi bwa bamwi.
Kwiindulukaamo
-
Ino nceebonshi buumi bwa muntu bulayandika abuumbi kuli Yehova?
-
Ino Yehova alalinyumfwa buyani na muntu wacaya mubye mukashanga?
-
Ino nceebonshi mulalumba pacipo ca buumi?
AMULANGWETEEWO ASHIMWI
Ino inga twacita buyani kwaamba ayi tutondeshe Yehova ayi tulalumba pacipo ca buumi?
Amucane cikumbulo kumwiipusho uyu, Sa Lesa inga wamulekelela mwanakashi wakakusha lifumo?
“Ino Baibo Ilaamba Nshi Pamakani Akukusha Lifumo?” (Makani acanika pa jw.org)
Amwiiye kubona buumi bweenka mbuli Lesa mbwabubona mbokweelete kukuma shisekano nshetusala.
Amubone Baibo mbweenga yacafwa muntu utoyeeya shakulicaya.
“Ndisuni Kulicaya—Sa Baibo Inga Yancafwa na Ndaba Amiyeeyo Yakulicaya?” (Makani acanika pa jw.org)
a Yehova alabikila maano abuumbi kubaabo boonse bapengete mumoyo. (Kulumbaisha 34:18) Alanyumfwishisha mapensho alengesha bantu kutalika kuyeeya shakulicaya, alimwi alisuni kubacafwa. Kwaamba ayi mubone lucafwo lwakwe Yehova mbweenga lwacafwa muntu kukoma muyeeyo wakulicaya, amubelenge mutwi utokwaamba ayi “Ndisuni Kulicaya—Sa Baibo Inga Yancafwa na Ndaba Amiyeeyo Yakulicaya?” uyo uli palubasu lwa “Amulangweteewo Ashimwi” muciiyo ici.
b Abo bakakushawo lifumo tabeelete kulinyumfwa cibiibi cakwiindilila—Yehova inga wabalekelela. Kwaamba ayi mucane makani aanji, amubone mutwi utokwaamba ayi “Ino Baibo Ilaamba Nshi Pamakani Akukusha Lifumo?” palubasu lwa “Amulangweteewo Ashimwi” muciiyo ici.
You May Also Like
MIIPUSHO LIINJI BANTU NJOBEPUSHA
Ino Nshiinshi Nsheenga Mweeya Ndyemutokwiiya Baibo a Bakamboni Bakwe Yehova?
Ndyemutokwiiya Baibo a Bakamboni Bakwe Yehova kwakubula kulipila, inga mwasebensesha Baibo ili yoonse. Mulyangulukite kwiitako bamumukwashi wanu na beshicibusa banu bali boonse mbweenga mwasuna kucanikaawo paciiyo.
