Awˬ lawn 38
A shaꞈ lehˬ awˬ hpfuhˇ hkʼaˆ jaˇ ve laꞈ shawnˍ hpehꞈ ve
Ngaˬ hui a shaꞈ teꞈ ve pa taw, ha lehˬ ve laiˉ ceuˬ te gʼa ve yoˬ. Ngaˬ hui shoꞈ shaꞈ ve gʼa hpuˇ ve htawˇ, a shaꞈ teꞈ hkʼaˇ hkʼaw ha lehˬ ve teˇ ceuˬ ceuˬ te gʼa sheˍ ve yoˬ. Hkʼe kʼo, ngaˬ hui a shaꞈ htaꞈ awˬ hpfuhˇ shiˍ ve tehꞈ hkʼaˬ hkʼe te hpeuꞈ maw piˇ gʼa ve le? Leh aˬ htoꞈ ma pa taw ngaˬ hui chi hkʼe te ve lehˬ a yeˇ uiˍ jaˇ ve le?
1. Aˬ htoꞈ ma te ngaˬ hui a shaꞈ htaꞈ awˬ hpfuhˇ shiˍ cawˇ ve le?
A shaꞈ lehˬ haꞈ pehnˇ uiˍ jaˇ ve Awˬ pa Yaˬhoˉvaˬ ngaˬ hui htaꞈ peꞈ laˇ ve laꞈ shawnˍ hpehꞈ ve pa taw, ngaˬ hui awˬ hpfuhˇ shiˍ cawˇ ve yoˬ. Yawˇ lehˬ teˇ ceuˬ le le htaꞈ hpanˍ leh “a shaꞈ teꞈ ve awˬ ceuˬ hkʼa peu˗eˬ ve awˬ hkuiˉ puiˍ hpehꞈ ve yoˬ.” (Chiˇ mvuh ve 36:9) “Yawˇ lehˬ awˬ ceuˬ hkʼa peu˗eˬ htaꞈ a shaꞈ teꞈ piˇ leh, teˇ ceuˬ le le piˇ ve yoˬ.” (Tcuh yaˇ 17:25, 28) Ngaˬ hui a shaꞈ teꞈ chehˇ gʼa tuˬ, leh ha lehˬ ve a shaꞈ cawˬ tuˬ, Yaˬhoˉvaˬ lehˬ ngaˬ hui loˍ ve teˇ ceuˬ le le htaꞈ peꞈ laˇ ve yoˬ.—Tcuh yaˇ 14:17 gʼaw sheˍ.
2. A shaꞈ htaꞈ ngaˬ hui awˬ hpfuhˇ shiˍ ve tehꞈ, hkʼaˬ hkʼe te hpeuꞈ maw piˇ gʼa ve le?
Nawˬ e nawˬ htaꞈ gʼoˇ peˬ hkʼaw hu chehˇ htaˇ kaꞈ, Yaˬhoˉvaˬ nawˬ htaꞈ a yeˇ yuˬ laˇ ve yoˬ. Yaˬhoˉvaˬ htaꞈ oˉ kʼoˍ pui ve chaw Daˍviˆ bon lawˬ leh kʼoˆ ve, “ngaˬ maˇ paw la sheˍ htaˇ kaꞈ nawˬ ngaˬ htaꞈ mawˬ taˍ peuˬ.” (Chiˇ mvuh ve 139:16) Nawˬ ve a shaꞈ Yaˬhoˉvaˬ awˬ pon awˬ hpfuhˇ hkʼaˆ jaˇ ve yoˬ. (Maꞈhtehˍ 10:29-31 gʼaw sheˍ.) Chaw teˇ gʼaˇ shu htaꞈ tiˇ pehˍ ve, maˇ heˆ leh yawˇ awˬ to htaꞈ tiˇ pehˍ ve kʼo, Yaˬhoˉvaˬ nyi ma luˬ jaˇ ve yoˬ. a (Tawˆ kʼai ve 20:13) Chi hkʼoˆ kaꞈ, ngaˬ hui shaˍ tiꞈ maˇ te leh a shu yawˇ awˬ to, maˇ heˆ leh shu htaꞈ kawˆ tuˬ gʼa hpuˇ tuˬ te piˇ ve kʼo, Yaˬhoˉvaˬ nyi ma luˬ jaˇ ve yoˬ. Chi htaꞈ pa taw, ngaˬ hui ve a shaꞈ htaꞈ hkʼa dehꞈ nyi haꞈ shaˉ leh, shu ve a shaꞈ htaꞈ kaꞈ yawˆ yan piˇ ve kʼo, awˬ hpfuhˇ hkʼaˆ jaˇ ve laꞈ shawnˍ chi htaꞈ awˬ hpfuhˇ shiˍ ve tehꞈ hpeuꞈ maw piˇ ve yoˬ.
Henˇ shiˍ maˇ la tuˬ
A shaꞈ htaꞈ nawˬ awˬ hpfuhˇ shiˍ ve tehꞈ hkʼaˬ hkʼe hpeuꞈ maw piˇ gʼa tuˬ le, teˇ geh henˇ sheˍ.
3. Nawˬ ve awˬ to htaꞈ chehˇ sha tuˬ hkʼa dehꞈ nyi haꞈ shaˉ sheˍ
Awˬ to chiˇ aꞈ piˇ˗oˬ ve Hkriꞈ yaˇ lehˬ, yawˇ a shaꞈ teꞈ chehˇ ve teˇ co˗e Yaˬhoˉvaˬ ve kanˉ te ve yoˬ. Yawˇ ve awˬ to lehˬ tanˇ tuˬ hkʼa shuˍ Gʼuiˬ sha htaꞈ chiˇ aꞈ piˇ ve yoˬ. Roˉmaꞈ liꞈ 12:1, 2 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma pa taw nawˬ awˬ to htaꞈ chehˇ sha tuˬ hkʼa dehꞈ nyi haꞈ shaˉ cawˇ ve le?
-
Nawˬ awˬ to htaꞈ nyi haꞈ shaˉ tuˬ aˬ htoꞈ ma te gʼa ve le?
4. Kawˆ tuˬ maˇ gʼa hpuˇ leh, maˇ gʼa suh tuˬ shaˍ tiꞈ te ve
Ngaˬ hui awˬ to leh shu awˬ to maˇ gʼa naˬ leh maˇ gʼa suh tuˬ, shaˍ tiꞈ gʼa te cawˇ ve tehꞈ Liꞈ hpu hkʼaw maˍ laˇ ve yoˬ. Ngaˬ hui teˇ ceuˬ le le hkʼaw hkʼaˬ hkʼe te shaˍ tiꞈ te gʼa ve shiˍ tuˬ, VDO hpaw sheˍ.
Tawˇ naˉ ve liꞈ 22:3 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Nawˬ aˉ hkʼaw chehˇ htaˇ, nawˬ awˬ to leh shu awˬ to kawˆ tuˬ maˇ gʼa hpuˇ tuˬ hkʼaˬ hkʼe te gʼa ve le?
-
Nawˬ kanˉ te kuiˬ lo chehˇ htaˇ, nawˬ awˬ to leh shu awˬ to kawˆ tuˬ maˇ gʼa hpuˇ tuˬ hkʼaˬ hkʼe te gʼa ve le?
-
Nawˬ awˬ gʼaˇ caw htaˇ, nawˬ awˬ to leh shu awˬ to kawˆ tuˬ maˇ gʼa hpuˇ tuˬ hkʼaˬ hkʼe te gʼa ve le?
-
Teˇ kaˬ kaˬ kʼai˗a te htaˇ, nawˬ kaˇ gʼaꞈ paˍ maˇ heˆ leh kaˇ ciˇ paˍ hpehꞈ ve htawˇ, nawˬ awˬ to leh shu awˬ to kawˆ tuˬ maˇ gʼa hpuˇ tuˬ hkʼaˬ hkʼe te gʼa ve le?
5. Maˇ paw la sheˍ ve yaˇ ehˉ ve a shaꞈ htaꞈ awˬ hpfuhˇ shiˍ ve
Daˍviˆ kʼoˆ ve, awˬ e gʼoˇ peˬ hkʼaw hu chehˇ ve yaˇ ehˉ ve a shaꞈ htaꞈ hpehꞈ la ve teˇ ceuˬ le le Yaˬhoˉvaˬ a yeˇ te ve yoˬ. Chiˇ mvuh ve liꞈ 139:13-17 gʼaw leh na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ lehˬ ngaˬ hui ve a shaꞈ hkʼaˬ htaˆ tanˬ ve tehꞈ shawˍ ve le, gʼoˇ peˬ hkʼaw chehˇ htaˇ laˇ, maˇ heˆ leh paw la htaˇ laˇ?
Iˉsaˍreˍlaˆ chaw awˬ co˗e htaˇ, Yaˬhoˉvaˬ piˇ taˍ ve awˬ liˇ tawˇ hkawˇ hkʼaw, yaˇ hu ma leh, gʼoˇ peˬ hkʼaw hu chehˇ ve yaˇ ehˉ htaꞈ nyi haꞈ shaˉ piˇ ve yoˬ. Tawˆ kʼai ve liꞈ 21:22, 23 b (Miˬ guiˬ awˬ suhˉ yuˬ tawˆ ve Liꞈ hpu) awˬ maiˉ htaꞈ gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Maˇ dawˇ maˇ gaˇ ve hkʼaw, maˇ paw la sheˍ ve yaˇ ehˉ shawˆ˗e ve kʼo, Yaˬhoˉvaˬ hkʼaˬ hkʼe dawˇ ve le?
-
Hkʼe kʼo, coˇ caˇ leh maˇ paw la sheˍ ve yaˇ ehˉ htaꞈ te shawˆ ve kʼo, Yaˬhoˉvaˬ hkʼaˬ hkʼe dawˇ ve le? c
-
Gʼuiˬ sha ve dawˇ hkʼaˇ htaꞈ nawˬ gʼa shiˍ htaˇ hkʼaˬ hkʼe dawˇ ve le?
Yaˇ miˇ teˇ gʼaˇ a shaꞈ awˬ hpfuhˆ hkʼaˆ jaˇ ve tehꞈ shawˍ ve htawˇ, yaˇ te shawˆ ve maˇ heˆ kʼo awˬ nu ve awˬ hkʼaˇ maˇ cawˬ tehꞈ dawˇ ve yoˬ hehˉ. Iˉsaˍyaˆ liꞈ 41:10 gʼaw leh na hkawˇ chi htaꞈ tawˇ yaw daꞈ sheˍ:
-
Yaˇ miˇ teˇ gʼaˇ yaˇ te shawˆ tuˬ, shu nyiˉ piˇ ve kʼo, yawˇ a shu geh ga laˇ tuˬ lawˬ cawˇ ve le? Aˬ htoꞈ ma pa taw le?
Chaw teˇ hpaˍ kʼoˆ ve: “Teˇ pawˆ pawˆ kʼo, yaˇ miˇ lehˬ yaˇ gʼa te shawˆ tuˬ te piˇ ve yoˬ.”
-
Yaˬhoˉvaˬ lehˬ yaˇ hu ma leh maˇ paw la sheˍ ve yaˇ ehˉ ve a shaꞈ htaꞈ awˬ hpfuhˇ hkʼaˆ jaˇ ve tehꞈ shawˍ ve yoˬ. Aˬ htoꞈ ma pa taw nawˬ chi hkʼe yonˍ ve le?
A yeˇ uiˍ ve awˬ lawn
Liꞈ hpu hkʼaw maˍ laˇ ve, Yaˬhoˉvaˬ peꞈ laˇ ve a shaꞈ laꞈ shawnˍ chi htaꞈ ngaˬ hui gʼa haꞈ ve, gʼa yawˆ yan ve, leh gʼa nyi haꞈ shaˉ ve yoˬ. Chi ve lehˬ ngaˬ hui ve a shaꞈ leh shu ve a shaꞈ htaꞈ kaꞈ yoˬ.
Kʼawꞈ gʼaꞈ na ve
-
Aˬ htoꞈ ma pa taw chaw yaˇ ve a shaꞈ lehˬ Yaˬhoˉvaˬ awˬ pon awˬ hpfuhˇ hkʼaˆ jaˇ ve le?
-
Chaw teˇ gʼaˇ coˇ caˇ leh a shu yawˇ ve awˬ to, maˇ heˆ leh awˬ nu ve chaw suh˗e tuˬ te piˇ ve kʼo, Yaˬhoˉvaˬ hkʼaˬ hkʼe dawˇ ve le?
-
Aˬ htoꞈ ma pa taw a shaꞈ teꞈ ve laꞈ shawnˍ chi htaꞈ nawˬ awˬ hpfuhˇ shiˍ ve le?
Kʼawꞈ caˉ nyi gʼa ve
Yaˬhoˉvaˬ peꞈ laˇ ve a shaꞈ teꞈ ve laꞈ shawnˍ chi htaꞈ ngaˬ hui hkʼaˬ hkʼe te awˬ bon uiˍ jaˇ tehꞈ kʼoˆ piˇ gʼa ve le?
Yaˇ te shawˆ jaw ve yaˇ miˇ htaꞈ Gʼuiˬ sha venˇ baˆ hpehˇ piˇ tuˬ laˇ, na hkawˇ chi htaꞈ hkʼawꞈ laˇ hkawˇ ca sheˍ.
Pyawˍ ve awˬ ceuˬ htaꞈ leuˆ˗a tehꞈ te htaˇ, a shaꞈ htaꞈ caˉ daꞈ ve Gʼuiˬ sha ve dawˇ hkʼaˇ ngaˬ hui htaꞈ heuˆ la kuiˬ hkʼaˬ hkʼe cawˬ tcuh cawˇ ve le, gʼaw nyi sheˍ.
A shu yawˇ awˬ to tiˇ pehˍ gaˇ ve dawˇ hkʼaˇ cawˬ ve chaw htaꞈ, Liꞈ hpu hkʼaw hkʼaˬ hkʼe ga piˇ gʼa ve le, gʼaw nyi sheˍ.
a Nyi ma luˬ jaˇ ve chaw htaꞈ Yaˬhoˉvaˬ a yeˇ yuˬ piˇ jaˇ ve yoˬ. (Chiˇ mvuh ve 34:18) Chi hkʼe nyi ma luˬ jaˇ ve chaw lehˬ suh˗e gaˇ ve tehꞈ, Yaˬhoˉvaˬ shiˍ leh ga piˇ gaˇ jaˇ ve yoˬ. Yawˇ hkʼaˬ hkʼe ga piˇ ve htaꞈ shiˍ tuˬ, “Ngaˬ suh˗e gaˇ jaˇ—A shu yawˇ awˬ to tiˇ pehˍ gaˇ ve dawˇ hkʼaˇ htaꞈ Liꞈ hpu pa piˇ gʼa˗aw laˇ?” chi teˇ lawn hkʼaw cawˬ ve Kʼawꞈ caˉ nyi gʼa ve hkʼaw gʼaw nyi sheˍ.
b Tawˆ kʼai ve liꞈ 21:22, 23 (MGS): ‘Chaw nyiˇ gʼaˇ yaꞈ daꞈ leh, yaˇ hu chehˇ ve yaˇ miˇ teˇ gʼaˇ htaꞈ gʼa hteˆ heuˆ leh yaˇ miˇ oˇ ve yaˇ paw la ve yoˬ. Yaꞈ hkʼaˇ, awˬ e maˇ heˆ leh yaˇ ehˉ maˇ suh˗e ve kʼo, gʼa hteˆ heuˆ ve chaw oˇ ve lehˬ, yaˇ miˇ ma ve awˬ hpawˇ hkʼaˬ ma meuˉ kʼo chi ma gʼa keu piˇ ve yoˬ. Chi ve htaꞈ suhˉ jehˬ shehˍ hpaˇ kaꞈ nyi ma gʼa cawˇ piˇ ve yoˬ. Yaꞈ hkʼaˇ, suh˗e ve kʼo, a shaꞈ awˬ tan a shaꞈ gʼa hkanˍ tuˬ yoˬ.’
c Yaˇ te shawˆ jaw ve chaw hkʼaˬ htaˆ kaꞈ nyi ma luˬ tuˬ maˇ loˍ. Awˬ lawn kʼo, Yaˬhoˉvaˬ yawˇ htaꞈ venˇ baˆ hpehˇ piˇ gʼa ve yoˬ. “Yaˇ te shawˆ ve htaꞈ caˉ daꞈ ve Liꞈ hpu hkʼaw hkʼaˬ hkʼe kʼoˆ laˇ ve le?” chi teˇ lawn hkʼaw cawˬ ve Kʼawꞈ caˉ nyi gʼa ve hkʼaw gʼaw nyi sheˍ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
