DILONGESHA DIA 38
Ikala wangata dipa dia muoyo ne mushinga
Muoyo mmuwule tente ne malu malenga a dikema. Nansha patudi mu ntatu, kudi anu malu adi mua kutusankisha patudi ne muoyo. Mmunyi mutudi mua kuleja ne: tudi tuangata dipa dia muoyo ne mushinga? Mbualu kayi bunene budi ne bua kutusaka bua kuenza nanku?
1. Bua tshinyi mbimpe kuangata muoyo ne mushinga?
Mbimpe kuangata muoyo ne mushinga bualu ndipa didi Yehowa Tatu wetu wa dinanga mutupeshe. Yeye ke “mpokolo wa muoyo,” bualu wakafuka bionso bidi ne muoyo. (Misambu 36:9) “Yeye muine ke udi upesha bantu bonso muoyo, ne mueyelu ne bintu bionso.” (Bienzedi 17:25, 28) Yehowa udi utupa bitudi tukengela bua kushala ne muoyo. Pa kumbusha atshi, udi kabidi utukuatshisha ne bionso bidi bikengedibua bua muoyo kuikalwu utusankisha.—Balayi Bienzedi 14:17.
2. Mmunyi mutudi mua kuleja Yehowa ne: tudi tuangata dipa dia muoyo ne mushinga?
Yehowa wakatuadija kukutabalela anu katshia ku dimitshibua diebe. Ku bukole bua nyuma wa Nzambi, Davidi (mutendeledi wende wa kale) wakamuambila ne: “Mêsu ebe mine akammona pantshivua mukuji.” (Misambu 139:16) Yehowa udi wangata muoyo webe ne mushinga wa bungi. (Balayi Matayi 10:29-31.) Muntu yeye mushipe mukuabu ku bukole, anyi mudishipe yeye muine, Yehowa udi unyingalala bikole. a (Ekesode 20:13) Yehowa udi unyingalala kabidi patudi tuditeka mu njiwu kakuyi bualu anyi katuyi tubabidila bua kukuba mioyo ya bakuabu. Patudi tutabalela muoyo wetu ne tunemeka wa bakuabu, tudi tuleja mutudi tuangata dipa dia dikema dia muoyo edi ne mushinga.
BUELA MU BUONDOKE
Mona muudi mua kuleja ne: udi wangata dipa dia muoyo ne mushinga.
3. Tabalela makanda ebe a mubidi
Bena Kristo badi badilambule kudi Yehowa badi bamuenzela mudimu ne muoyo wabu wonso mujima. Mbienze anu bu ne: badi bafila mibidi yabu bu mulambu kudi Nzambi. Balayi Lomo 12:1, 2, pashishe nuandamune nkonko eyi:
-
Ntshinyi tshidi ne bua kukusaka bua kutabalela makanda ebe a mubidi?
-
Mmu malu kayi muudi mua kuatabalela?
4. Dimukila njiwu anyi lufu
Bible udi utukankamija bua kuepuka bienzedi bionso bidi ne njiwu. Tangilayi FILME bua kumona malu audi mua kuenza bua kuepuka njiwu.
Balayi Nsumuinu 22:3, pashishe nuyikile bua muudi wewe ne bakuabu mua kubabidila njiwu . . .
-
kumbelu,
-
ku mudimu,
-
panudi nunaya,
-
panudi mu mashinyi anyi kadiendelandela kakuabu.
5. Nemeka muoyo wa muana utshidi munda
Davidi wakela kasala uleja mudi Yehowa utabalela muoyo wa muana utshidi munda ne mudiye wenda utanta. Balayi Misambu 139:13-17, pashishe nuandamune lukonko elu:
-
Ku mêsu kua Yehowa, muoyo wa muntu udi utuadija padiye wimitshibua anyi mpadiye uledibua?
Mikenji ivua Yehowa muelele Isalele wa kale ivua ikuba bamamu ne bana babu batshivua munda. Balayi Ekesode 21:22, 23, pashishe nuandamune nkonko eyi:
-
Mmunyi muvua Yehowa umona muntu uvua ushipa muoyo wa muana utshivua munda ku mpukampuka?
-
Uvua mua kumvua mushindu kayi bu muntu muwushipe ku bukole? b
-
Wewe udi umona bishi bua mmuenenu wa malu wa Nzambi eu?
Dikuabu, nansha mukaji utu wangata muoyo ne mushinga udi mua kudiumvua muenzejibue anu bua kutula difu. Balayi Yeshaya 41:10, pashishe nuandamune nkonko eyi:
-
Bobu basuya mukaji bua kutula difu, udi mua kunyemena kudi nganyi bua kumuambuluishaye? Mbua tshinyi?
BAMUE BATU BAMBA NE: “Mukaji udi ne bukenji bua kutula difu anyi kubenga kuditula; muena mubidi wende nyeye.”
-
Ntshinyi tshidi tshikujadikila ne: Yehowa udi wangata muoyo wa mamu ne wa muanende utshidi munda ne mushinga?
TSHIA KUKUATA
Bible udi utulongesha ne: muoyo ndipa dia Yehowa. Tudi ne bua kunanga muoyo wetu ne wa bakuabu kabidi, kuwunemeka, ne kuwukuba.
Diambulula
-
Bua tshinyi Yehowa udi wangata muoyo wa muntu ne mushinga?
-
Ntshinyi tshidi Yehowa umvua padi muntu ujimija muoyo wende anyi wa bakuabu ku bukole?
-
Ndianyishaku kayi diudi wewe nadi kudi Nzambi bua dipa dia muoyo?
BIA KUTANGILA KABIDI
Mmushindu kayi utudi mua kusakidila Yehowa bua dipa dia muoyo?
Keba diandamuna dia lukonko elu: Nzambi udi mua kubuikidila mukaji uvua mutule difu anyi?
“Ntshinyi tshidi Bible wamba bua kutula kua difu?” (Tshiena-bualu tshia mu jw.org)
Longa mudi mushindu udi Nzambi umona muoyo ne bua kutulombola mu disungula dia mishindu yetu ya kujikija lutetuku.
“‘Manaya adi ne njiwu,’ mbimpe anu kuanji kuateta anyi?” (Tabulukayi!, 8/10/2000)
Tshia kuenza ntshinyi padi muntu ne meji a kudishipa? Mona mudi Bible mua kumuambuluisha.
a Muoyo utu usama Yehowa bikole bua badi basunsuke mu mioyo yabu. (Misambu 34:18) Udi umvua mudi tunyinganyinga tuabu tukole tudi pamuapa mua kubafikisha ku meji a kudishipa, ujinga kubambuluisha. Bua kumona bulenga bua diambuluisha diende, bala tshiena-bualu tshia “Ntu njinga mua kufua—Bible udi mua kungambuluisha pandi ne meji a kudishipa anyi?” tshidi mu tshitupa tshia Bia kutangila kabidi tshidi mu dilongesha edi.
b Bakadi batule mafu kabena ne bua kutungunuka ne kudibipisha bu bapile to, Yehowa udi mua kubafuila luse. Bua kumanya malu makuabu, bala tshiena-bualu tshia “Ntshinyi tshidi Bible wamba bua kutula kua difu?” tshia mu tshitupa tshia Bia kutangila kabidi tshidi mu dilongesha edi.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
