ESENUPANTOꞌ 38
Koꞌmantoꞌ saꞌnamakî
Enen uurînîkon wanî yeꞌnen, morîkon yapisî uurînîkonya. Eꞌtarumaꞌtîn tanne, tiaron pensa uurînîkon wanî eꞌpainon taatausinpai. Oꞌnon yeꞌka pe morî pe man taa uurînîkonya eꞌpainon, enen pe uurînîkon wanî yeꞌnen? Îꞌ waniꞌ awanî yeꞌnen mîrîrî kupî eꞌpai uurînîkon wanî?
1. Îꞌ waniꞌ awanî yeꞌnen morî pe man taa eꞌpai uurînîkon wanî uurînîkon koꞌmantoꞌ pî?
Enen uurînîkon wanî, Jeováya uurînîkon koꞌmantoꞌ ton tîrî yeꞌnen, mîrîrî wanî morî pe puꞌkuru uurînîkon pia. Koꞌmannîtoꞌ iipîꞌpî Paapa winîpai, ikonekasaꞌiya yeꞌnen. (Salmos 36:9) “Mîîkîrî Paapaya uurîꞌnîkon koꞌmantoꞌ ton tîrî. Mîîkîrî Paapaya uyettapusinkon ton tîrî. Tamîꞌnawîron tîrîiya uupiaꞌnîkon.” (Atos 17:25, 28) Seeni imenukasaꞌ eseurîma pî man, Jeováya uurînîkon koꞌmantoꞌ ton tîîsaꞌ. Tîîse inîꞌ panpîꞌ kupîiya. Jeováya uurînîkon koꞌmantoꞌ ton tîrî taatausinpai koꞌmannîtoꞌpeꞌnîkon. — Eraꞌmakî Atos 14:17.
2. Oꞌnon yeꞌka pe morî pe man taa uurînîkonya eꞌpainon uurînîkon koꞌmantoꞌ ton yapisîꞌpî uurînîkonya yeꞌnen?
Pena, taꞌpî Paapa poitîrîya iteseꞌ Davi: “Uurî wanî yai usan roꞌta ya, ayenuya uurî eraꞌmaꞌpî.” (Salmo 139:16) Mîrîrîya yenpo, Jeová esenumenka mararî pra amîrî pî, pena patapai sîrîrî tîpose. Amîrî koꞌmantoꞌ ton wanî morî pe puꞌkuru Jeová pia. (Eraꞌmakî Mateus 10:29-31.) Morî pe puꞌkuru koꞌmantoꞌ wanî Jeová pia, mîrîrî yeꞌnen eesewankonoꞌma ipîra îꞌ pensa anîꞌya tiaron wîîsaꞌ ya moropai tîîkoꞌmantoꞌ moꞌkasaꞌ pemonkonya ya. a (Êxodo 20:13) (Imenukasaꞌ itoꞌko eraꞌmakî.) Jeová esewankonoꞌma, îꞌ pensa nariꞌ piapai uurînîkon eppesaꞌ pra wanî ya. Jeová esewankonoꞌma nîrî, îꞌ pensa tiaronkon yarîsaꞌ uurînîkonya ya nariꞌ pia. Aka taa eꞌpai uurînîkon wanî uurînîkon koꞌmantoꞌ pî moropai tiaronkon koꞌmantoꞌ pî nîrî.
ESENUPAKÎ INÎꞌ PANPÎꞌ
Eraꞌmakî oꞌnon yeꞌka pe morî pe man taaya eꞌpainon aakoꞌmantoꞌ ton pî yapisîꞌpîya yeꞌnen.
3. Priꞌya eꞌnîtoꞌ eraꞌmakî
Jeová poitîrî pe anna man, mîrîrî yeꞌnen taꞌpî annaya ipî ipatîkarî imaimu yawîrî anna wanî. Paapa Maimuya taasaꞌ yeꞌnen “aakoꞌmamîkon pîkîrî mîîkîrî pîꞌ neken teesenumenkai akoꞌmantî morî pe”, morî pe uurînîkon esaꞌ (corpo/body) eraꞌma eꞌpai uurînîkon wanî. Eraꞌmatî Romanos 12:1, 2. Tarîpai seeni itoꞌkoꞌ manni pî eseurîmatî:
-
Mîrîrî imenukasaꞌ wenai, îꞌ waniꞌ awanî yeꞌnen priꞌya koꞌmantoꞌpe yuwa eꞌpai amîrî wanî?
-
Îꞌ yeꞌkakon wenai mîrîrî kupî uurînîkonya eꞌpainon?
4. Aka, imakuiꞌpî moropai saꞌmantantoꞌ eꞌkupî namai
Nariꞌ yapai epaꞌkakî taa Paapa Maimuya. PANTON eraꞌmatî, mîrîrî wenai epuꞌtîya eꞌpainon îꞌ kupî eꞌpai awanî nariꞌ yapai epaꞌkapa.
Eraꞌmatî Provérbios 22:3. Mîrîrî tîpo eseurîmatî oꞌnon yeꞌka pe nariꞌ yapai epaꞌka eꞌpainon îꞌ pensa . . .
-
ayewîꞌ ta wanî tanne.
-
esenyakaꞌmantoꞌ ta wanî tanne.
-
amîrî suꞌmina tanne.
-
tararan ya awanî tanne moropai tararan yarîya tanne (carro/car).
5. Esenumenkakî more koꞌmantoꞌ pî maasa esenpo irawîrî
Daviya taꞌpî Jeová esenumenka mararî pra more pî, isan roꞌta ya tanne. Eraꞌmatî Salmo 139:13-17. Tarîpai seeni itoꞌkoꞌ manni pî eseurîmatî:
-
Ekaranmaposaꞌkon man uurînîkon esenumenkatoꞌpe Jeová yeseru pî, eraꞌmakî. Îꞌ wanî yairî Jeová pia? Îꞌ pensa enen koꞌmantoꞌ aweꞌtoꞌ erepamî? More yan pe wîriꞌ enaꞌsaꞌ ya karî, esenposaꞌ pe tîpo karî?
Jeováya tîmaimu imenukasaꞌ tîrîꞌpî Israel ponkon pia, mîrîrîya sankon moropai moreyamîꞌ pîikaꞌtîpîtîꞌpî isan roꞌta ya tanne. Eraꞌmatî Êxodo 21:22, 23. Tarîpai seeni itoꞌkoꞌ manni pî eseurîmatî:
-
More saꞌmantasaꞌ ya isan roꞌta ya tanne, ituꞌse pra awanî ya, îꞌ taa Jeováya mîrîrî pî?
-
Oꞌnon yeꞌka pe Jeová esepuꞌtî îꞌ pensa anîꞌya mîrîrî ikuꞌsaꞌ ya? b Imenukasaꞌ itoꞌko eraꞌmakî.
-
Îꞌ taaya Jeová esenumenkatoꞌ pî mîrîrî pî?
Wîriꞌya epuꞌtî koꞌmantoꞌ wanî morî pe puꞌkuru, tîîse tiaron pensa eesenumenka nîrî more maatoꞌ pî. Eraꞌmatî Isaías 41:10. Tarîpai seeni itoꞌkoꞌ manni pî eseurîmatî:
-
Tiaronkonya wîriꞌ panama more maatoꞌpeiya, anîꞌ piapai pîikaꞌtîntoꞌ esaꞌtîiya eꞌpainon? Îꞌ waniꞌ awanî yeꞌnen?
TIARONKONYA TAA: “Wirîꞌya more maa eꞌpainon. Maasa pra mîîkîrîya neken mîrîrî imenka eꞌpainon”, taa toꞌya.
-
Îꞌ waniꞌ awanî yeꞌnen inna taa amîrîya, Jeováya wîriꞌ moropai more pîinama iroꞌta ya awanî tanne?
Îꞌ PÎ ESENUPA PÎ NAN?
Paapa Maimuya uurînîkon yenupa saꞌnamatoꞌ pî, aka taatoꞌpe uurînîkon koꞌmantoꞌ pî, moropai tiaronkon koꞌmantoꞌ pî nîrî.
Enpanatapaiꞌnîkon
-
Îꞌ waniꞌ awanî yeꞌnen uurînîkon koꞌmantoꞌ wanî morî pe puꞌkuru Jeová pia?
-
Oꞌnon yeꞌka pe Jeová esepuꞌtî îꞌ pensa pemonkonya tiaron wîîsaꞌ ya moropai pemonkonya ewîîsaꞌ ya?
-
Îꞌ waniꞌ awanî yeꞌnen koꞌmantoꞌ wanî morî pe puꞌkuru aapia?
INÎꞌ PANPÎꞌ ESENUPAPAI NAN?
Oꞌnon yeꞌka pe morî pe man taa uurînîkonya eꞌpainon Jeová pî, uurînîkon koꞌmantoꞌ ton tîîsaiꞌya yeꞌnen?
Wîriꞌya menkasaꞌ yeꞌnen, more maatoꞌpeiya, mîrîrî kupî Jeováya eꞌpainon tîwanmîra?
“Îꞌ taa Paapa Maimuya more maatoꞌ pî?” (jw.org eseurîmantoꞌ pî)
Eraꞌmakî îꞌ waniꞌ awanî yeꞌnen eꞌmaiꞌpe esenupa eꞌpai uurînîkon wanî Jeová yeseru pî, suꞌminantoꞌ menka irawîrî.
Saꞌmantapai pemonkon wanî ya, Paapa Maimuya ipîikaꞌtî eꞌpainon.
“Saꞌmantapai wai — Paapa Maimuya naka uurî pîikaꞌtî eꞌpainon?” (jw.org eseurîmantoꞌ pî)
a Nota: Saꞌmantapai tîweꞌsanon yeseru epuꞌtî Jeováya, toꞌ anpîikaꞌtîpai wanî. Jeová esenumenka mararî pra tîweꞌtarumaꞌtîsanon pî. (Salmo 34:18) Oꞌnon yeꞌka pe Jeováya toꞌ pîikaꞌtî, seeni eraꞌmakî “Inîꞌ Panpîꞌ Esenupapai Nan?” imenukasaꞌ iteseꞌ wanî: “Saꞌmantapai wai — Paapa Maimuya naka uurî pîikaꞌtî eꞌpainon?”.
b Nota: Mîrîrî kupîꞌpî wîriꞌya ya, ipîra esewankonoꞌma eserîke pra wanî mîrîrî pî, maasa pra imakuiꞌpî nîkupîꞌpîiya yeꞌnen, iwanmîra kupî Paapaya eꞌpainon. Inîꞌ panpîꞌ epuꞌtîpa, seeni eraꞌmakî “Inîꞌ Panpîꞌ Esenupapai Nan?” moropai seeni imenukasaꞌ pî esenupakî, iteseꞌ wanî: “Îꞌ taa Paapa Maimuya more maatoꞌ pî?”.
