ISAMBILILO 38
Mwataizya pa Umi
Kwaya ivintu ivingi visuma sana vino tungacita nu kuipakizya pa mulandu wakuti tuli nu umi. Nanti sile a lino tuli ni ntazi, kwaya ivintu vimwi vino tungaipakizya. Tungalanga uli Yeova ukuti tukataizya pa wila uno watupeela, kuli kuti umi? Nupya u mulandu ci uno cacindamila ukucita vivyo?
1. U mulandu ci uno tulinzile ukutaizizya pa umi uno twakwata?
Tulinzile ukutaizya pa umi pano u wila ukufuma kuli Tata witu uwaya nu kutemwa, Yeova. Wene ali “intendekelo ya umi,” kuli kuti u waumvile ivintu vyonsi. (Masamu 36:9) “Aliwe akapeela antu yonsi umi nu muza alino ni vintu vyonsi.” (Milimo 17:25, 28) Yeova akatupeela vino tukulondekwa pakuti tutwalilile ukuya nu umi. Nupya akatupeela vyonsi ivingalondekwa pakuti tuipakizye umi.—Belengini Milimo 14:17.
2. Tungalanga uli Yeova ukuti tukataizya pa wila uno watupeela, kuli kuti umi?
Lino mwatandike sile ukupangwa umunda yakwe ya mayo inu, Yeova watandike ukumisakamala. Muli Baibo, umuomvi wakwe Leza wenga, Devedi, wapefile ukuti: “Wemo wambweni calimwi lino ntacili mvyalwe.” (Masamu 139:16) Umi winu wacindama sana kuli Yeova. (Belengini Mateo 10:29-31.) Cingalenga Yeova ukuvwa sana ulanda ndi cakuti umwi uku mufulo sile wakoma umuntu muze nanti ukuikoma. a (Kufuma 20:13) Cingalenga Yeova ukuvwa uyi ndi cakuti tukwika umi witu umu uzanzo pa mulandu ni vintu ivitacindime nanti ndi cakuti tusikulondela masunde angalenga tucingilile yauze. Ndi cakuti tukuisakamala nu kucindika umi wa yantu yauze, tukalanga ukuti tukataizya pa wila usuma uno Yeova watupeela, kuli kuti umi.
LONDELEZYINI NA VYUZE
Sambililini inzila zimwi zino mungalangilamo ukuti mukataizya pa umi.
3. Mwasakamala umi winu
Pa mulandu wakuti twalavile Yeova ukuti tumacitanga ukulonda kwakwe, tukaezya na maka ukumuombela umi witu onsi. Fwandi pa mulandu wakuti aina Klistu yakapeela imili yao wi lambo lya muzilo kuli Leza yalinzile ukuisakamala ningo sana. Belengini Loma 12:1, 2, alino mulanzyanye mauzyo yaa:
-
I vyani ivilinzile ukulenga mwasakamala umi winu?
-
U mu nzila ci zimwi muno mungacitila vivyo?
4. Mwaika mano kuli vino mulinzile ukucita pakuti mucingilile antu yauze na mweineco
Baibo ikatukomelezya ukutaluka uku kucita ivintu ivingalenga umi witu uye umu uzanzo. Tambini VIDYO pakuti mumanye ivintu vimwi vino mulinzile ukucita pakuti muicingilile.
Belengini Mapinda 22:3, alino mulanzyanye vino mungacita pakuti muicingilile mweineco alino nu kucingilila yauze . . .
-
lino muli pa ng’anda.
-
lino muli uku ncito.
-
lino mukuteya ivyangalo.
-
lino mukupisya motoka nanti lino iyamisendako muli motoka, pali onda nanti vyuze ivikolineko.
5. Mwacindika umi wa mwana wino atatala wavyalwa
Devedi walondolwile vino Yeova akaika mano kuli vyonsi ivikacitika lino umwana akukula umunda yakwe nyina. Belengini Masamu 139:13-17, alino mulanzyanye iuzyo lii:
-
Uzye kuli Yeova, umi wa muntu ukatandika lino wavyalwa nanti lino nyina wakwata inda?
Masunde yano Yeova wapeezile aina Izlaeli yacingililanga nyina nu mwana atatala wavyalwa. Belengini Kufuma 21:22, 23, alino mulanzyanye mauzyo yaa:
-
Uzye Yeova akalola uli umuntu uwakoma umwana atatala wavyalwa ukwaula ukumanya?
-
Nomba anguvwa uli ndi cakuti umwi wakoma umwana atatala wavyalwa uku mufulo sile? b
-
Uzye mukauvwa uli pali vino Yeova akalola umulandu uu?
Nanti sile u mwanaci uwamanya ukuti umi wacindama angayuvwa ukuti ukuponya inda ali cintu sile cino alinzile ukucita. Belengini Ezaya 41:10, alino mulanzyanye mauzyo yaa:
-
Ndi cakuti umwanaci yakumupatikizya ukuponya inda, aekwi kuno angalenga uwazwilizyo? U mulandu ci?
YAMWI YAKALANDA UKUTI: “Insita zimwi ivikucitikila umuntu vingalenga umwi ukulonda ukuponya inda.”
-
I cani calenga musininkizye ukuti Yeova wacindika umi wakwe nyina nu wa mwana ali umunda yakwe?
VINO TWASAMBILILA
Baibo ikatusambilizya ukuti tulinzile ukutemwa, ukucindika nu kucingilila uwila uno Yeova watupeela, kuli kuti umi. Tutalinzile sile ukucindika nu kucingilila umi witu lelo nu wa yantu yauze.
I vyani vino mwasambilila?
-
U mulandu ci uno umi wacindamila kuli Yeova?
-
Uzye Yeova akauvwa uli ndi cakuti umwi wakoma umuntu nanti waikoma uku mufulo sile?
-
U mulandu ci uno mukataizizya pa umi uno Yeova wamupeela?
LONDELEZYINI
Tungacita uli pakuti twataizya Yeova pa umi uno watupeela?
Zanini icasuko ukwi uzyo lyakuti, uzye Leza angeleela umwanaci uwaponyizyepo inda?
“I Vyani Vino Baibo Ikalanda pa Kuponya Inda?” (Cipande ca pa intaneti)
Sambililini vino ukumanya vino Yeova akalola umi kungamwazwa ukusoolola ningo ivya kuizanzya.
“Uzye Mulinzile Ukwika Umi Winu Umu Uzanzo pa Mulandu ni Vya Kuizanzya?” (Zyukini!, Okotoba 8, 2000)
Cingaya uli ndi cakuti umuntu akulonda ukuikoma? Lolini vino Baibo ingamwazwa.
“Nkulonda Kufwa—Uzye Baibo Ingangazwa Ndi Cakuti Nkwelenganya pa Kuikoma?” (Cipande ca pa intaneti)
a Yeova akaya umupiipi na yayo atiyaputuka imisana. (Masamu 34:18) Akamanya iviipe ivikacitikila antu ivingalenga yalonda ukufwa nupya akalonda ukuyazwa. Pakuti mumanye vino akaazwa antu ukuta ukwelenganya pa kuikoma, belengini icipande cakuti, “Nkulonda Ukufwa—Uzye Baibo Ingangazwa Ndi Cakuti Nkwelenganya pa Kuikoma?” icili umu ciputulwa cakuti Londelezyini umwi sambililo kwene lii.
b Yayo aponyizyepo inda ku cisila yatalinzile ukutwalilila ukuyuvwa amulandu, Yeova angayelela. Pakuti mumanyilepo na vyuze, lolini icipande cakuti “I Vyani Vino Baibo Ikalanda pa Kuponya Inda?” icili umu ciputulwa cakuti Londelezyini umwi sambililo kwene lii.
Limwi Mungatemwa Ukulolako na Vii
MAUZYO YANO ANTU YAKAUZYA SANA
Uzye Isambililo Lya Baibo Ali Cani?
Zanini masuko ku mauzyo pali vino tukasambilizya antu Baibo ukwaula ukuyalipilisya.
